Markus 7

Ngowa'a Yahudi manga 'adata re 'atoranga tamanga ete re dotumu moju

(Mat. 15:1-9)

1Ngowa'a Farisi re guru 'agama nga muḏuo i'a da'a toma limau Yerusalem ino 'aḏi sapolo ra Yesus. 2Ananga 'aḏi oḏi'i Yesus 'ai me-mete'e nga muḏuo i'a 'aḏi oromo manga giama ya soso'o ua, ananga gena-ge 'aḏi mete'e ua ete re dotumu manga 'adata!

[ 3Ngowa'a Farisi bolo ngowa'a Yahudi, ananga mo-moini ya mete'e ete re dotumu manga 'adata re 'atoranga moju: Ananga 'aḏi oromo 'i yoḏu'u moju na'o ya soso'o manga giama nyangu. 4'Oru ḇato 'aḏi tibo toma pasara, ya oromo 'i yoḏu'u moju na'o 'aḏi ma'ori'i nyangu. Re ma repe moju ananga manga 'atoranga ya cako'o namo-namoto, 'i ma tero sa'olo soso'o galasi, sawo'o, re 'o pakakasa tamḇaga.]

5Sababu gena-ge, ngowa-ngowa'a Farisi re guru-guru 'agama ananga 'aḏi sano ra Yesus, “I'a sa'olo 'Ani me-mete'e 'aḏi oromo manga giama ya soso'o ua? Ma sababu 'oru ananga ya mete'e ua ete re dotumu manga 'adata re 'atoranga?”

6Yesus 'a sangoro, “Ngini ngowa'a munafiki! Tero mode'e, 'a Yesaya 'a sinubuata pasala ḏua mangale ngini:

‘Ma Jou'ongu Madutu 'o kanau so'o ne:

Ngowa-ngowa'a gena-ge 'aḏi silamo'o Ngoi pa'i tamanga 'uḏu ma betu'u,

mada'a tamanga 'akala re sinyingara 'i kiḏanga ra Ngoi.#Yes. 29:13

7'I parasaja, ananga gena-ge 'aḏi silamo'o re siḏubuso Ngoi;

sababu ananga manga do-doto'o pa'i manusia manga 'atoranga ḇato, ga'a 'i mete'e Ngoi 'ari do-doto'o ua!’#Yes. 29:13

8Ngini ni cako'o namo-namoto manusia manga 'atoranga mada'a ngini ni mete'e ua Ma Jou'ongu Madutu 'ai parenta!”

9Ḏua Yesus dadunu 'o kanau, “Ngini ni pahe masala; ni sito-to'u Ma Jou'ongu Madutu 'ai parenta singadolo ni cako'o namo-namoto ninga do-doto'o masiretene. 10'A Musa 'o pula'a pasala ḏua parenta nena-ne: ‘Silamo'o ninga ḇaḇa re ninga ngina. 'A guna ḇato 'o sosowini 'ai ḇaḇa bolo 'ai ngina; balasu 'o sanga hukumu sengene.’#Sup. 20:12, 21:17; Im. 20:9; Dad. 5:16 11-12Mada'a ngini ni sidoto'o so'o ne: 'A guna ḇato nyengara 'o kanau tai ḇaḇa bolo ngina ‘Ngoi to riono ngini yoḏu'u sababu ngoi to pula'a mo-moini ma tero sa'olo jou-jou ra Ma Jou'ongu Madutu.’ Dadi ngini ni dola'aku unanga 'o riono 'ai ḇaḇa re ngina. 13Sababu ngini ni doto'o so'o nena-ne, ni singi-ngiranga Ma Jou'ongu Madutu 'ai parenta. 'Age Ma Jou'ongu Madutu 'ai parenta ma repe moju, ngini na singi-ngiranga ma tero sa'olo nena-ne ḏi'i.”

'Oru ga'a si'a'a ngowa-ngowa'a 'aḏi dadi najis ra Ma Jou'ongu Madutu 'ai momina

(Mat. 15:10-20)

14Ḏua Yesus 'o 'aro'o ngowa'a repe gena-ge soi moi moju re 'O kanau ra ananga, “Ni 'isene la-la, la ni sahe!” 15'Oru ḇato ga'a 'i osama toma lese, enanga gena-ge 'i si'a'a ua ngowa'a matengo 'o dadi najis ra Ma Jou'ongu Madutu 'ai momina. Siḏibo ḏi'i, 'oru ga'a 'i supu toma lese, enanga gena-ge 'i si'a'a ngowa'a matengo 'o dadi najis ra Ma Jou'ongu Madutu 'ai momina. [16Dadi, na'o reninga ngau'u, ni 'isene.]

17Wakutu Yesus 'o sisoi'i tala ngowa'a repe gena-ge Unanga 'o osama toma wala re 'Ai me-mete'e 'aḏi sano, “Ma maksudu 'oru 'ade-'ade gena-ge?” 18Ḏua Yesus 'o kanau i'a ra ananga, “Ngini ni sahe nyangu ḏi'i! 'Oru ḇato 'i osama ra matengo 'ai lese, enanga gena-ge 'i si'a'a yoḏu'u ngowa'a matengo 'o dadi najis ra Ma Jou'ongu Madutu 'ai momina. 19Sababu 'ori i'a osama gena-ge 'i mete'e ua toma 'akala re sinyingara mada'a 'i mete'e po'olo ḇato, kara 'i supu.” Rema demo-demo gena-ge, Yesus 'o kanau ngo-ngoromo mo-moini 'i wosono ua.

20Ḏua Yesus dadunu 'o kanau, “Ga'a 'i supu toma ngowa'a, enanga gena-ge 'i si'a'a ngowa'a matengo 'o dadi najis ra Ma Jou'ongu Madutu 'ai momina. 21Sababu da'a toma 'akala re sinyingara ma dara ino, 'i baolo 'ulungu ma jira singadolo 'aḏi sudala, tori'i, sisengene ngowa'a. 22tinikai, jajaha demo, madiga'a 'ori i'a ma jira, da-danata re do-dowoka, 'akala 'i romanga reo bo-bosono, 'akala si-siḏi, momole re 'isene do-doto'o ua. 23'Ori i'a ma jira gena-ge, 'i baolo toma 'akala re sinyingara ma dara, mo-moini gena-ge 'i si'a'a ngowa'a matengo 'o dadi jira ra Ma Jou'ongu Madutu 'ai momina.”

Were'a Yunani matengo 'ami ngo-ngaku lai te'e

(Mat. 15:21-28)

24Gena ḏua, Yesus 'a sisoi'i tala ngi'i gena-ge re 'o tagi so'o toma daeraha co-cori limau Tirus. Unanga osama toma wala ḏu moi re 'O oḏu'u ngowa'a ya waro Unanga 'age toma ngi'i gena-ge. Mada'a ngowa'a ya waro ḇato. 25-26Ngowa 'olo were'a matengo 'o roh ma jira mi dungosama. Munanga 'ami ngina ngowa'a Yunani mo sibuoro toma daeraha Fenisia toma Siria. Ngina gena-ge mo 'isene mangale Yesus, munanga jau-jau mo sapolo re mo mapagara 'ami biono tala ra Yesus 'ai rou. Munanga mo madigaro'o Unanga 'o dusu'u roh ma jira tami ngowa 'olo were'a gena-ge.

27Yesus 'o kanau ra munanga, “Ngowa 'olo-ngowa 'olo balasu oromo siḏa. Rousu ua, na'o wo 'oro ngowa 'olo manga roti, kara wa pula'a toma nunu'u.”#7:27 Yesus 'ai maksudu: Unanga 'o sapolo di'a ngowa'a Yahudi siḏa (ananga gena-ge ma tero sa'olo ngowa 'olo) kara togumu i'a ngowa'a Yahudi ua (ananga gena-ge ma tero sa'olo nunu'u).

28We-were'a gena-ge mo kanau, “Tero mode'e Jou, mada'a 'o nunu'u enanga toma meja ma 'aḏu mai oromo, na'o ngowa 'olo manga so-sorono 'i eta'a tala!”

29Ḏua Yesus 'o kanau ra munanga, “Sababu 'ani sa-sangoro so'o gena, roh ma jira 'i supu ḏua tani ngowa'a were'a. Dadi no maḏibo ḇato.”

30Ngina gena-ge mo maḏibo toma wala. Munanga mo sanga i'a 'ami ngowa 'olo were'a gena-ge re mo otu toma dederu re mode-mode'e roh ma jira 'i supu ḏua ra munanga.

Yesus 'o si-la matengo 'o popongolo re 'o mou

31Gena ḏua, Yesus 'o sisoi'i tala daeraha ma'u co-cori limau Tirus re 'o tagi sisa toma talaga Galilea. Unanga 'o mete'e limau Sidon re 'a sitola'a daeraha, ma lomanga Limau Nyagi Moi. 32Toma ngi'i gena-ge, ananga 'aḏi gasa ino ngowa'a matengo 'o popongolo re 'o mou ra Yesus. Ananga 'aḏi madigaro'o ra Unanga, “Yesus, na siteru 'Ani giama toma ngowa'a gena-ge, la unanga 'o la.” 33Yesus 'o gasa ngowa'a popongolo re 'o mou nange-ge re 'aḏi masai'i i'a toma ngowa'a repe. Yesus 'a singosama 'ai rarag̱a tai ngau'u kaci ḏiḏi ma dara, kara 'A obi'i 'ai rarag̱a re 'A sipiasa ngowa'a gena-ge 'ai yai'i. 34Gena ḏua, Yesus 'o talaḏi ie diwanga re 'a iḏala 'ai sangagara re 'o kanau i'a toma ngowa'a gena-ge, “Efata,” ma ngale: “Welanga ḏua!”

35Ngowa'a gena-ge 'ai popongolo 'i iranga re 'ai yai'i 'i wale singadolo 'o kanau mai ri nyengara. 36-37Togumu i'a, Yesus 'o sipo-poma ananga ya sihabari awa ra guna ḇato. Kalaha Yesus 'a sipo-poma so'o gena, ananga ganapu ya sihabari!

Ḏua ngowa'a mo-moini ya 'isene 'aḏi heranga masala. Ananga 'aḏi ma'u kanau, “Unanga 'o 'a'a mo-moini gena-ge lai rousu. Unanga 'o si-la ngowa'a popongolo mai nyengara 'aḏi 'isene re ngowa'a mou mai nyengara 'aḏi kanau!”

Currently Selected:

Markus 7: SNT

Highlight

Copy