Markus 3

Yesus 'o si-la ngowa'a matengo toma Sabata ma wangere

(Mat. 12:9-14; Luk. 6:6-11)

1Wakutu Yesus 'o maḏibo ino moju toma wala puji, 'O sanga i'a matengo 'ai giama kaci moi 'i sengene. 2'Age ḏi'i rema ngowa-ngowa'a Farisi sababu 'aḏi mau 'aḏi disa waro Yesus 'ai sala, la 'u kalaki toma Mahkamah 'Agama. Dadi ananga 'aḏi tailako Unanga tau-taunu; awa ua mara Unanga 'o si-la ngowa'a siḏi gena-ge toma Sabata ma wangere. 3Yesus 'o 'aro'o ngowa'a 'ai giama kaci moi sengene gena-ge, “Ino, no made-de'oso 'ane toma biono.” 4Ḏua Unanga 'o sano ra ananga mo-moini toma ngi'i gena-ge, “Mete'e 'agama ma 'atoranga, ngene balasu wo 'a'a 'oru toma Sabata ma wangere? Wo 'a'a 'ori i'a ma la-la, bolo 'ori i'a ma jira! Wo sisalamata ngowa'a, bolo wo sisengene!”

Mada'a ananga 'aḏi masiogoro ḇato.#3:4 Ananga 'aḏi masiogoro ḇato sababu na'o ananga 'aḏi aje, “Nyengara 'a'a 'ori i'a la-la toma Sabata ma wangere,” ananga 'aḏi ma'u rapu 'agama ma 'atoranga. Na'o 'aḏi aje “Yoḏu'u,” ananga 'aḏi mete'e 'agama ma 'atoranga mada'a manga dadalara 'i cua toma ngowa'a gena-ge! 5Yesus 'o magelelo kuwiḏa re kuḇali, biono re ḏuḏunu re 'O porata re 'Ai 'akala re sinyingara 'i kangela masala sababu ananga manga 'akala re sinyingara lai te'e.#3:5 Ananga gu'u 'agama ma 'atoranga lebe te'e reo dadalara ngowa'a. Ḏua Unanga 'o kanau i'a toma ngowa'a gena-ge, “Na toa'a ino 'ani giama.” Ngowa'a gena-ge 'a toa'a i'a 'ai giama re ro la. 6Gena ḏua, ngowa-ngowa'a Farisi ya sisoi'i tala wala puji gena-ge, jau-jau 'aḏi masigaro'o re 'a Herodes 'ai me-mete'e di'a 'aḏi disa ngo'omo sa'olo sisengene 'a Yesus.

Yesus 'o si-la ngowa'a siḏi manga repe toma talaga ma 'uḏu

(Mrk. 3:7; Mat. 4:25; Luk. 6:17; Mrk. 3:7-12; Mat. 12:15-16; Luk. 6:17-19)

7-8Yesus re 'Ai me-mete'e ananga 'aḏi masai'i da'u toma talaga Galilea. Mada'a ngowa'a repe masala toma daeraha-daeraha 'aḏi matai sapolo ra Yesus, sababu ananga 'aḏi 'isene mangale Yesus 'o 'a'a 'oru ḇato, mo-moini gena-ge 'i la re rousu. Ananga 'aḏi sapolo toma daeraha co-cori (Galilea) ino re toma daeraha-daeraha toma giḏanga (Yudea, Idumea, Perea#3:7-8 daeraha da'a kaci moi Ḇanyo Yordan) ino. Re ananga 'aḏi sapolo da'a limau toma giḏanga (limau Yerusalem re limau-limau 'i ma'u sebanga toma Tirus re toma Sidon) ino ḏi'i. 9Wakutu Yesus 'o oḏi'i i'a ngowa'a repe gena-ge, ḏua Yesus 'o soma'a 'ai me-mete'e ananga 'aḏi sisebanga i'a oti ra Unanga, awa ua mara ngowa'a repe 'aḏi tu-tuḏu Unanga. 10Yesus 'o si-la ḏua ngowa'a siḏi manga repe. Dadi ngowa'a siḏi mo-moini 'aḏi marerebe 'aḏi masebanga i'a re 'aḏi mau cigi Unanga, la ananga 'aḏi la ḏi'i. 11Wakutu 'oru ḇato ngowa-ngowa'a 'o roh ma jira ya'u dungosama 'aḏi oḏi'i Unanga, ananga 'aḏi mapagara manga biono tala ra Yesus, kara 'aḏi poa'a re 'aḏi kanau, “Ngana nena-ne Ma Jou'ongu Madutu 'ai Ngowa'a Nau'u.”

12Mada'a Yesus 'o simaha ua roh-roh ma jira gena-ge siajele mangale Unanga ge 'a guna.

Yesus 'o cumutu 'ai me-mete'e nga nyagi moi re nga muḏiḏi

(Mat. 10:2-3; Luk. 6:12-16)

13Gena ḏua, Yesus 'o mabere ie toma polono rimoi re 'o 'aro'o ngowa-ngowa'a, la 'aḏi mete'e Unanga 'ai 'akala re sinyingara ma mau. Ḏua ananga 'aḏi tagi i'a, 14kara Unanga 'o cumutu nga nyagi moi re nga muḏiḏi tamanga sigolona, la 'aḏi dadi 'Ai so-soma'a. Unanga 'o kanau, “Ngoi to cumutu ngini, la mete'e Ngoi kara tini soma'a ni tagi re ni singadolo Habari Roanga, 15re ni sanga kuasa dusu'u roh-roh ma jira.”

16Ananga nga nyagi moi re nga muḏiḏi manga loma-lomanga:

'A Simon, Yesus 'o silomanga unanga Petrus, 17'a Yakobus re 'a Yohanes, ananga gia nongoḏu ga'a manga ḇaḇa 'a Zebedeus (ananga nga muḏiḏi gena-ge, Yesus 'o silomanga Boanerges ga'a ma ngale, “Murasa ma Ngowa'a”), 18-19'a Yakobus, unanga 'a Alfeus 'ai ngowa'a, Andreas, Filipus, Bartolomeus, Matius, Tomas, Tadeus, Simon ('o dadalara masala nagara Israel) re 'a Yudas Iskariot, unanga gena-ge 'o sipula'a 'a Yesus toma 'Ai lawana.

Ngowa'a Farisi 'aḏi kalaki Yesus 'o pake kuasa ra Beelzebul ino

(Mat. 12:22-32; Luk. 11:14-23, 12:10)

20Togumu i'a, Yesus 'o osama toma wala ḏu moi. Mada'a ngowa'a repe 'aḏi sapolo 'aḏi malomu singadolo Yesus re 'Ai me-mete'e 'aḏi oromo mai yoḏu'u, sababu sanga donga ua. 21Sababu gena-ge, ngowa-ngowa'a 'aḏi kanau, “Yesus ro pona,” singadolo Unanga 'o oromo ḇusuru. Dadi Yesus 'ai rera moi ya 'isene ḏua 'aḏi tagi mau 'oro Unanga.

22Guru-guru 'agama 'aḏi sapolo da'u toma limau Yerusalem tala 'aḏi kanau, “Yesus, Beelzebul 'u dungosama. Beelzebul, 'o Roh ma Jira ma 'Olana 'i pula'a kuasa ra Yesus, la 'O dusu'u roh ma jira.”#Mat. 9:34, 10:25

23Ḏua Yesus 'o 'aro'o ngowa'a repe re 'O kanau i'a ra ananga re 'O pula'a 'ade-'ade so'o ne: “Sanga ua, Beelzebul 'i dusu'u roh ma jira! 24Na'o nagara rimoi sibalangu daeraha muḏuo i'a re daeraha-daeraha gena-ge 'aḏi ma'u bo-bosono, nagara gena-ge 'i te'e ua! 25Re na'o ngitu re ngale rimoi toma golona, ma ngowa-ngowa'a 'aḏi ma'u 'isene ua, ngitu re ngale gena-ge ma ḏo-ḏogumu 'i pinya'olo!

26So'o gena ḏi'i reo 'Iblisi ma pareta. Na'o 'age 'i ma'u bo-bosono re 'i ma'u emono, 'Iblisi ma pareta gena-ge 'i te'oso ti'ara ua; ma ḏo-ḏogumu 'i pinya'olo!

27Ma nyonyata na'o matengo 'o osama toma wala ḏu moi di'a 'o ra-rabasa 'ori i'a rana toma wala ma dutu ga'a lao te'e; siḏa-siḏa unanga balasu 'o piri'u wala ma dutu gena-ge si, kara 'o ra-rabasa 'ai 'ori i'a rana.#3:27 'Iblisi ma tero sa'olo wala ma dutu ga'a lao te'e.

28Ni ngaku mode-mode'e 'Ari demo-demo nena-ne: 'A guna ḇato 'o 'a'a ḏosa bolo 'o je-jengere ngowa'a; nga'unu 'ai ḏosa gena-ge singi-ngiranga. 29Mada'a 'a guna ḇato 'o je-jengere Ma Ngagara 'Ofi-'Ofi, 'ai ḏosa gena-ge singi-ngiranga yoḏu'u, sababu ḏosa gena-ge 'i kasingado-ngadolo i'a.” 30Yesus 'o kanau so'o gena-ge sababu 'age rema ngowa'a 'aḏi kanau, Yesus 'o roh ma jira 'u dungosama.

Yesus 'ai ngina re 'Ai ioro re nongoḏu

(Mat. 12:46-50; Luk. 8:19-21)

31Pasala i'a, Yesus 'ai ngina re 'Ai no-nongoḏu 'aḏi sapolo. Ananga 'aḏi totoma toma soana re 'aḏi soma'a ngowa'a 'aro'o 'a Yesus. 32Toma 'orasa gena-ge, 'age rema ngowa'a manga repe 'aḏi tegoro sigoloḏi Yesus. Ananga 'aḏi kanau i'a ra Unanga, “ 'Ani ngina re 'Ani no-nongoḏu, ananga da'a toma soana. Ananga 'aḏi disa Jou.”

33-34Unanga 'a sangoro, “Ngoi 'ari ngina ngo guna? Ngoi 'ari ioro re 'Ari nongoḏu 'a guna?” Ḏua Unanga 'o tatamo i'a toma ngowa'a repe gena-ge ga'a sigoloḏi re 'o kanau, “Ngini nena-ne ngoi 'ari ngina re 'Ari ioro re 'Ari nongoḏu ḏi'i! 35'A guna ḇato 'o 'a'a re 'o mete'e Ma Jou'ongu Madutu 'ai 'akala ma mau, ananga gena-ge Ngoi 'ari ngina re 'Ari ioro re nongoḏu re 'Ari biḏanga.”

Currently Selected:

Markus 3: SNT

Highlight

Copy