Markus 2

Yesus 'o si-la ngowa'a ḇolo matengo

(Mat. 9:1-8; Luk. 5:17-26)

1Palisi'i wangere muḏuo i'a, Yesus maḏibo ino toma limau Kapernaum. Ḏua ma habari aje Unanga 'age toma wala. 2Dadi ngowa'a repe 'aḏi matai sapolo 'U gowolo singadolo ngowa'a lelegu 'aḏi sanga ngi'i riwara. Toma ngalana mai ngowa'a 'aḏi masituḏu-tuḏu i'a. Ḏua Yesus 'o singadolo habari ra Ma Jou'ongu Madutu ino ra ananga. 3Wakutu Yesus 'o ka-kanau moju, 'age rema ngowa'a nga ḏuata 'aḏi tede ino ngowa'a ḇolo matengo ra Yesus. 4Mada'a ngowa'a 'aḏi repe woḏi dadi 'aḏi sebanga i'a yoḏu'u. Ḏua ananga 'aḏi pere ya tiwa'a wala ma 'atu pasi-pasi tala ra Yesus 'ai re'u ie. Gena ḏua, ananga 'aḏi siguci ngowa'a ḇolo gena-ge simete'e 'ai usungana soi moi. 5Wakutu Yesus 'a oḏi'i ngowa'a nga ḏuata gena-ge manga ga'a sababu manga ngo-ngaku lai te'e, Unanga 'o kanau i'a toma ngowa'a ḇolo gena-ge, “ 'Ari ngowa'a, 'ani ḏosa-ḏosa 'i singi-ngiranga ḏua.”

6Guru-guru 'agama nga muḏuo i'a 'aḏi tego-tegoro toma ngi'i gena-ge 'aḏi masano tamanga 'akala re sinyingara ma dara, 7“Ma ngi'i ua, unanga gena-ge singadolo 'o kanau so'o gena! Unanga 'o je-jengere Ma Jou'ongu Madutu. Unanga ma tero ua Ma Jou'ongu Madutu! 'A guna ua 'a nga'unu singi-ngiranga ngowa'a manga ḏosa, pa'i Ma Jou'ongu Madutu masiretene ḇato!”

8Toma 'orasa gena-ge, Yesus 'a waro ananga manga 'akala re sinyingara ma dara. Ḏua Yesus 'o kanau, “I'a sa'olo ni mafikiri so'o gena taninga 'akala re sinyingara ma dara? 9Le'a lebe gapanga si'a'a: Ngoi nyengara to kanau toma ngowa'a ḇolo nena-ne ‘ 'Ani ḏosa ta singi-ngiranga ḏua’ bolo nyengara to kanau, ‘Momi'i no tede 'ani usungana re no tagi’? 10Mada'a nange-ne ngoi ta sibukiti ra ngini mangale Ngoi, Manusia ma Ngowa'a Nau'u masiretene rari kuasa nga'unu ta singi-ngiranga ngowa-ngowa'a manga ḏosa toma dungia nena-ne.” Gena ḏua, Yesus 'o kanau i'a toma ngowa'a ḇolo gena-ge, 11“Momi'i ie, na tede 'ani 'usungana re no maḏibo!”

12Unanga 'o momi'i, jau-jau 'o 'oro 'ai usungana kara 'o supu toma ngowa'a repe manga biono. Ananga 'aḏi heranga masala re 'aḏi puji re silamo'o Ma Jou'ongu Madutu 'ai lomanga re 'aḏi kanau, “Ma di'ara ne, wa oḏi'i nyangu 'i dadi so'o nena-ne!”

Yesus 'o 'aro'o 'a Lewi

(Mat. 9:9-13; Luk. 5:27-32)

13Yesus 'o maḏibo ino moju toma talaga Galilea ma 'uḏu, ngowa'a repe 'aḏi sapolo ra Unanga. Ḏua Unanga 'o doto'o ananga. 14Wakutu Yesus 'o tagi-tagi palisi'i ngi'i gena-ge, Unanga 'o oḏi'i ngowa'a golo-golo'o balastengi matengo, 'ai lomanga 'a Lewi, 'a Alfeus 'ai ngowa'a, 'o maḏegoro toma balastengi ma kantor. Yesus 'o kanau i'a ra unanga, “Mete'e Ngoi.” Ḏua unanga 'o te'oso, kara 'o mete'e Yesus.

15Yesus re 'Ai me-mete'e re 'a Lewi, ananga 'aḏi oromo ra Lewi 'ai wala. Toma 'orasa gena-ge, golo-golo'o balastengi ma lelegu re ngowa-ngowa'a baraḏosa manga repe ḏi'i 'aḏi sapolo re 'aḏi oromo ma'u mete'e Yesus; sababu toma ngowa'a repe manga sigolona gena-ge 'age rema ngowa'a manga repe ḏi'i raḏi mete'e Yesus. 16Ngowa'a Farisi manga guru 'agama nga muḏuo i'a 'aḏi oḏi'i ngowa-ngowa'a gena-ge 'aḏi oromo ma'u mete'e Yesus. Dadi ananga 'aḏi kanau Tai me-mete'e, “Rousu ua, ninga guru 'o oromo ma'u mete'e reo ngowa'a baraḏosa re ngowa'a golo-golo'o balastengi!”

17Yesus 'a 'isene so'o gena re 'O kanau, “Ngowa'a kamanga si-siḏi ua 'aḏi paralu dotere ua. Pa'i ngowa'a remanga si-siḏi ḇato ananga 'aḏi paralu dotere. So'o gena ḏi'i, Ngoi to sapolo ua di'a 'aro'o ngowa'a loasa re banari, mada'a di'a 'aro'o ngowa'a baraḏosa.”

Yesus 'ai do-doto'o re ete re dotumu manga 'adata re 'atoranga, sicapuru awa

(Mat. 9:14-17; Luk. 5:33-39)

18Toma 'orasa rimoi, 'a Yohanes tukanga baptis, unanga 'ai me-mete'e re ngowa'a Farisi, ananga gena-ge 'aḏi puasa. Ḏua 'age rema ngowa'a 'aḏi sapolo ra Yesus re 'aḏi sano, “I'a sa'olo 'a Yohanes 'ai me-mete'e re ngowa'a Farisi manga me-mete'e 'aḏi puasa, mada'a baba 'ani me-mete'e puasa ua?” 19Yesus 'o sangoro, “Sanga ua, ioro nongoḏu 'aḏi oromo ua na'o geri molo'ara na-nau'u 'age tamanga sigolona moju!

20Mada'a ḏuanga i'a ma 'orasa 'i ngadolo na'o geri molo'ara gena-ge ananga 'u 'oro tamanga sigolona. Toma 'orasa gena-ge, ananga ḏuanga i'a 'aḏi puasa.

21Matengo ua 'o pata 'ai baju ma siḏa reo ba-bata su-sungi. Sababu na'o so'o gena-ge ba-bata ma su-sungi 'i taunu singadolo baju ma siḏa gena-ge 'i 'acingi lebe lamo'o i'a. 22So'o gena ḏi'i, matengo ua 'o sidai'i 'anggur ma su-sungi toma 'anggur ma ngi'i ma siḏa,#2:22 'Anggur ma ngi'i si'a'a reo haiwani ma 'eno'o. sababu 'anggur ma su-sungi 'i kekolo singadolo ngi'i ma siḏa gena-ge 'i 'acingi. Ma ḏo-ḏogumu tala, 'anggur ma su-sungi re ma ngi'i gena-ge ḏi'i ri cira. 'Anggur ma su-sungi balasu sidai'i toma ngi'i ma su-sungi ḏi'i!”

So-sano mangale Sabata ma wangere

(Mat. 12:1-8; Luk. 6:1-5)

23Wakutu Sabata ma wangere, Yesus re 'Ai me-mete'e 'aḏi mete'e toma ngo'omo toma guḏa gandum ma golona. Ḏua 'ai me-mete'e ananga 'aḏi 'utu'u gandum sababu 'aḏi sawini.#Dad. 23:25 24Ngowa'a Farisi nga muḏuo i'a 'aḏi oḏi'i so'o gena dadi 'aḏi sano ra Yesus, “I'a sa'olo 'Ani me-mete'e ananga ya mete'e ua nanga 'agama ma 'atoranga toma Sabata ma wangere!”#2:24 Ngowa'a Farisi 'aḏi kanau so'o gena-ge sababu Yesus 'ai me-mete'e 'aḏi 'a'a 'ori i'a 'i wosono toma Sabata ma wangere.

25-26Yesus 'o sangoro, “Ngini na sahe ua 'oru na baca mangale Daud re 'ai me-mete'e wakutu Abyatar 'o dadi 'imam 'agung. 'A Daud re 'ai me-mete'e 'aḏi sawini mada'a kamanga ngo-ngoromo ua. Dadi unanga 'o osama ra Ma Jou'ongu Madutu 'ai Wala re 'o oromo roti re 'o pula'a i'a tai me-mete'e ḏi'i. Roti gena-ge jou-jou di'a Ma Jou'ongu Madutu, mada'a na'o mete'e nanga 'agama ma 'atoranga, pa'i 'imam-'imam ḇato ya oromo nyengara roti gena-ge.”#1Sam. 21:1-6#Im. 24:9

27Ḏua Yesus 'o kanau, “Ma Jou'ongu Madutu 'o 'a'a manusia di'a Sabata ma wangere ua mada'a Ma Jou'ongu Madutu 'o 'a'a Sabata ma wangere di'a manusia. 28Dadi Ngoi, Manusia ma Ngowa'a Nau'u to kuasa toma Sabata ma wangere!”#2:28 Yesus 'ai maksudu so'o ne: Unanga nyengara 'o sitantukanga 'oru ga'a si'a'a yoḏu'u, re 'oru ga'a nyengara si'a'a.

Currently Selected:

Markus 2: SNT

Highlight

Copy