Lukas 16

'Ade-'ade mangale falalomu ma sae'e 'ai 'akala soro'unu masala

1Yesus 'o kanau Tai me-mete'e, “ 'Age rema ngowa'a matengo ngowa'a rema-enanga. Unanga rai falalomu ma sae'e ga'a pipisi ma gu-gu'u re 'uru-'urusu 'ai 'ori i'a rana. 'Age rema ngowa'a matengo 'o siajele toma ngowa'a rema-enanga gena-ge mangale falalomu ma sae'e 'a sihalibiru ngowa'a rema-enanga 'ai pipisi. 2Dadi unanga 'o 'aro'o 'ai falalomu ma sae'e gena-ge re 'o kanau, ‘ 'Oru ga'a ngoi to 'isene ḏua mangale ngana? Dadi nange-ne ḏua na masijumu banyatoro ma boku. Ngana 'ani munara, ngoi tini sitogumu!’

3Ḏua falalomu ma sae'e gena-ge 'o makanau tai 'akala re sinyingara ma dara, ‘Nange-ne ngoi balasu to 'a'a 'oru? Tuanga mau sitogumu ngoi 'ari munara: To mapatu, ta nga'unu ua; to golo-golo'o, ta mara'a. 4Mada'a ngoi rari fikirana so'o ne: Ngoi balasu to disa ḏagilomu repe-repe, la wakutu tuanga 'o sitogumu ngoi 'ari munara, ananga gena-ge 'aḏi 'aro'o re 'aḏi dawongo ngoi ra ananga manga wala!’ 5Dadi falalomu ma sae'e gena-ge unanga 'o 'aro'o ngowa-ngowa'a ga'a remanga banyatoro tai Tuanga. Unanga 'o sano ngowa'a ma mulaingi, ‘ 'Ani banyatoro ma lamo'o sa'olo tari tuanga?’ 6Ngowa'a gena-ge 'a sangoro, ‘Goroho zaitun tampayanga latu moi.’ Falalomu ma sae'e 'o kanau, ‘Ne 'ani banyatoro ma surata, tegoro re capati na lefo tampayanga nyagi romotoa.’ 7Gena ḏua, unanga 'o 'aro'o ngowa'a lelegu ḏi'i ga'a rai banyatoro re 'o sano, ‘ 'Ani banyatoro ma lamo'o sa'olo?’ Unanga 'o sangoro, ‘Gandum kadu cala moi.’ Falalomu ma sae'e gena-ge 'o kanau, ‘Ne 'ani banyatoro ma surata. Na lefo kadu latu tu'angere.’

8Kalaha falalomu ma sae'e gena-ge 'ai 'akala re sinyingara 'i boloto ua, ngowa'a rema-enanga gena-ge 'u sitoro 'ai falalomu gena-ge sababu 'ai 'akala soro'unu masala. Sababu ngowa-ngowa'a 'aḏi 'ahu di'a dungia nena-ne, ananga 'aḏi lebe pahe mangale manga 'urusana toma ngowa-ngowa'a 'aḏi 'ahu di'a dungia nena-ne reo ngowa-ngowa'a 'aḏi 'ahu toma tarangi ma dara!”

9Ḏua Yesus 'o kanau moju, “Ngoi to siajele ra ngini nena-ne: Ni pake ninga 'ori i'a rana toma dungia nena-ne di'a ni riono ngowa'a lelegu re ni sanga ḏagilomu, la wakutu ma 'orasa enanga 'i ngadolo 'ori i'a rana gena-ge ma ijana ri cua, ananga ḏuanga i'a 'aḏi dawongo ngini toma soroga.#16:9 Yesus 'ai maksudu so'o ne: unanga 'o 'ahu toma tarangi balasu 'o pake manga 'ori i'a rana di'a riono ngowa'a lelegu toma dungia nena-ne. Ḏua ḏuanga i'a ananga gena-ge 'aḏi dawongo unanga toma soroga ma tero sa'olo manga ḏagilomu.

10Ngowa'a ga'a 'aḏi jaga 'ori i'a ma je-jeka'a ngowa'a ya'u ngaku, ḏuanga i'a ngowa'a ya'u ngaku ḏi'i ya sijaga 'ori i'a ma la-lamo'o. Mada'a na'o ngowa'a ga'a 'aḏi jaga 'ori i'a ma je-jeka'a ngowa'a ya'u ngaku ua, ḏuanga i'a ngowa'a 'aḏi ngaku ua ḏi'i ya sijaga 'ori i'a ma la-lamo'o. 11Dadi na'o ngini ni jaga la-la ua 'ori i'a rana toma dungia nena-ne singadolo ngowa'a 'aḏi ngaku ngini riwara, 'a guna nga'unu ngaku ngini ni jaga 'ori i'a rana mode-mode'e toma soroga? 12Na'o ngini ni jaga la-la ua ngowa'a ma lelegu manga 'ori i'a rana singadolo ananga 'aḏi ngaku ngini riwara, 'a guna nga'unu 'o pula'a 'ori i'a rana toma soroga di'a ngini masiretene!

13Budaka matengo i'a mai ua nga'unu 'o de-de'oso ti-tiai tuanga nga muḏiḏi! Sababu unanga 'ai 'akala re sinyingara 'i kucela: Unanga 'o lebe dadalara tuanga matengo reo tuanga ma lelegu. Bolo unanga 'o mete'e lebe cufala tai tuanga matengo reo tuanga ma lelegu. So'o gena ḏi'i, sanga ua ngini ni lomu harata toma dungia nena-ne simete'e ni de-de'oso ti-tiai Ma Jou'ongu Madutu!”#Mat. 6:24

Yesus 'ai do-doto'o

(Mat. 11:12-13, 5:31-32; Mrk. 10:11-12)

14Ngowa-ngowa'a Farisi ya 'isene mo-moini ga'a Yesus 'o kanau mada'a ananga 'aḏi nye-nyelo'o Unanga sababu ananga 'aḏi nyafusu pipisi. 15Mada'a Yesus 'o kanau ra ananga, “Ngini nena-ne ni matuhu ngowa'a loasa re banari toma mandan. Mada'a Ma Jou'ongu Madutu 'a waro ninga 'akala re sinyingara. Sababu 'ori i'a ga'a manusia 'aḏi nyafusu, Ma Jou'ongu Madutu 'a emono.

16Musa 'ai hukumu 'i singadolo re nabi-nabi manga do-doto'o 'i siḏagi tau-taunu singadolo toma 'orasa Yohanes tukanga baptis. Mada'a mulaingi toma 'orasa gena-ge, Habari Roanga mangale Ma Jou'ongu Madutu 'ai Pareta 'i singadolo tau-taunu re ngowa-ngowa'a 'aḏi makutale mode-mode'e di'a 'aḏi osama nyo-nyoimi ra Ma Jou'ongu Madutu 'ai Pareta.#Mat. 11:12-13 17Mada'a lebe gapanga diwanga re dungia enanga 'i iranga reo Musa 'ai hukumu ma demo bale moi i'a mai ua 'i iranga.#Mat. 5:18

18'A guna 'a oḏu'u 'ai were'a kara 'o molo'ara we-were'a lelegu, unanga gena-ge 'o 'a'a tinikai. Re 'a guna 'o molo'ara we-were'a ngowa'a manga ḏiḏi'utu, unanga gena-ge ḏi'i 'o 'a'a tinikai.”#Mat. 5:32; Mrk. 5:32; 1Kor. 7:10-11

'Ade-'ade mangale ngowa'a rema-enanga re 'a Lazarus

19“ 'Age rema ngowa'a matengo, unanga gena-ge ngowa'a rema-enanga. 'Ai pakeanga ma ijana hali-hali re 'ai 'ahu wange moi-wange moi 'o maro-rousu ḇato. 20Tai wala ma ngalana ma biono, ngowa'a 'aḏi sigare ngowa'a ma dinga'unu ua matengo 'ai lomanga Lazarus, 'ai lese 'i romanga reo nyabo-nyaboto. 21Unanga 'o sawini dadi nyafusu lai siḏi 'apu'uru ngo-ngoromo ma so-sorono ga'a 'i eta'a tala toma ngowa'a rema-enanga 'ai meja ma 'aḏu. Sidogo ḏi'i nunu'u sapolo ya nyamele 'ai nyaboto.

22Pasala i'a, ngowa'a ma dinga'unu ua gena-ge 'o sengene, kara mala'ekata 'aḏi gasa toma sayanga ma ngi'i ra Abraham 'ai gagoro toma soroga. Ngowa'a rema-enanga gena-ge 'o sengene ḏi'i re 'u palihara. 23Toma naraka ngowa'a rema-enanga gena-ge 'o sangisara masala. Toma ngi'i gena-ge unanga 'o tatamo ie 'o oḏi'i 'a Abraham toma giḏanga re 'a Lazarus 'age ra 'a Abraham 'ai gagoro. 24Ngowa'a rema-enanga 'o maḏigaro'o, ‘Baba Abraham, no sijumu 'Ani 'akala re sinyingara ma la-la ra ngoi, soma'a 'a Lazarus 'a tono 'ai rarag̱a toma ḇanyo kara 'o sapolo 'a sioḇoso 'ari yai'i, sababu ngoi to sangisara masala toma u'u ma dara!’

25Mada'a Abraham 'o sangoro, ‘ 'Ari ngowa'a, wakutu ngana no 'ahu moju ngana 'ani 'ahu enanga 'i pai-pai'i re 'ahu sanangi masala. Mada'a Lazarus unanga 'ai 'ahu enanga kangela. Toma 'orasa nena-ne unanga 'ai 'ahu enanga 'i sanangi re ngana 'ani 'ahu enanga 'i sangisara. 26Sidogo ḏi'i, ngana re ngoi nanga sigolona 'age ngabanga lamo'o. Dadi ngowa'a da'a kaci moi, ino 'ane kaci moi yoḏu'u. So'o gena ḏi'i ngowa'a 'ane kaci moi, si'a da'a kaci moi yoḏu'u!’

27Ngowa'a rema-enanga 'o kanau, ‘Na'o so'o gena, ngoi to golo'o nga'unu gari'a Baba no soma'a Lazarus 'o tagi tari ḇaḇa 'ai wala. 28'Age ḏi'i 'ari ioro re nongoḏu nga mutoara da'a toma wala. No soma'a Lazarus 'o sipo-poma ananga, la awa singadolo ananga ḏi'i 'aḏi eta'a toma ngi'i sikisa so'o nena-ne.’

29Abraham 'o sangoro, ‘Ra ananga rema enanga ḏua 'a Musa re nabi-nabi ananga manga boku. Ananga balasu 'aḏi mete'e 'oru ga'a silefo ḏua toma boku-boku gena-ge!’ 30Mada'a ngowa'a rema-enanga gena-ge 'a sangoro, ‘Baba Abraham, enanga gena-ge 'i tiai nyangu. Mada'a na'o ngowa'a sengene ḏua dadunu 'o 'ahu moju, 'o sapolo ra ananga, ananga ḏuanga i'a 'aḏi maḏibo toma ngo'omo boloto.’ 31Mada'a Abraham 'o kanau, ‘Kalaha ngowa'a sengene dadunu 'o 'ahu moju, tantu ḏua ananga ḏuanga i'a 'aḏi ngaku ua ḏi'i sababu ananga ya mete'e ua 'a Musa 'ai hukumu re nabi-nabi manga do-doto'o.’ ”

Currently Selected:

Lukas 16: SNT

Highlight

Copy