Lukas 15

'Ade-'ade mangale doba rimoi 'i iranga

(Mat. 18:12-14)

1Toma wangere rimoi, ngowa-ngowa'a golo-golo'o balastengi re ngowa-ngowa'a ga'a ngowa'a repe ya'u si'aro'o “ngowa'a baraḏosa” sapolo di'a 'aḏi 'isene Yesus 'ai do-doto'o. 2Ngowa-ngowa'a Farisi re guru-guru 'agama mulaingi 'aḏi kuḏubungu re 'aḏi kanau, “Unanga ne 'o dawongo ngowa-ngowa'a baraḏosa re 'aḏi oromo mamete'e ra Unanga!”#Luk. 5:29-30 3Sababu gena-ge, Yesus 'o jarita ra ananga 'ade-'ade rimoi so'o ne:

4“Si'ade-'ade i'a taninga sigolona 'age rema ngowa'a matengo i'a rai doba latu moi, mada'a 'i iranga rimoi. Doba ma dutu 'o 'a'a 'oru? Tantu ḏua unanga 'a sisoi'i tala moju ma nyagi siworo re siworo toma daeraha rurubu, re 'o tagi 'a disa ma rimoi ga'a 'i iranga nange-ge singadolo 'a sanga. 5Re unanga 'o maroanga madutu wakutu unanga ra sanga doba gena-ge, 'a kuluḇe re 'a gasa 6kara 'a siḏibo re 'o 'aro'o 'ai ḏagilomu-ḏagilomu re wala-wala sebanga re 'o kanau, ‘Ino ngene wo monere. 'Ari doba ga'a 'i iranga ta sanga ḏua!’ 7Ngoi to siajele ra ngini nena-ne: So'o gena ḏi'i, toma soroga lebe roanga na'o manusia baraḏosa ga'a ro ḏibo toma ngo'omo boloto reo ngowa'a nga nyagi siworo re nga siworo ga'a ḏibo toma ngo'omo boloto ua, sababu raḏi loasa re banari.”

'Ade-'ade mangale pipisi ngai moi 'i iranga

8“So'o gena ḏi'i, si'ade-'ade i'a we-were'a matengo rami pipisi salaka guḏi moi; 'i iranga ngai moi. We-were'a gena-ge mo 'a'a 'oru? Tantu ḏua, munanga ḏuanga i'a silejanga poci re mo parisi wala ma dara, ma disa ngi'i le'a ḇato singadolo ma sanga pipisi gena-ge. 9Wakutu munanga ma sanga 'ami pipisi gena-ge, munanga mo 'aro'o 'ami ḏagilomu, re wala-wala sebanga, re mo kanau ra ananga, ‘Ino ngene wo monere. 'Ari pipisi salaka ga'a 'i iranga ta sanga ḏua!’ 10Ngoi to siajele ra ngini nena-ne: So'o gena ḏi'i, Ma Jou'ongu Madutu re 'Ai mala'ekata 'aḏi monere na'o ngowa'a baraḏosa matengo ro maḏibo toma ngo'omo boloto.”

'Ade-'ade mangale ngowa'a nau'u matengo 'o iranga

11Yesus dadunu 'o kanau, “Ḇaḇa matengo rai ngowa'a nau'u nga muḏiḏi. 12Ma nongoḏu 'o kanau tai ḇaḇa, ‘Baba, Baba 'ani 'ori i'a rana na pula'a ino ngoi 'ari balangu.’ Dadi ma ḇaḇa gena-ge 'a sibalangu 'ai 'ori i'a rana tai ngowa'a nga muḏiḏi. 13Ti'ara nyangu, ngowa'a ma nongoḏu 'a wu'unu 'ai balangu, ḏua ro tagi toma daeraha toma giḏanga. Toma daeraha gena-ge unanga 'a simoini 'ai pipisi reo 'ori i'a ma faeda 'i cua. 14Wakutu 'ai pipisi 'i moini ḏua, toma daeraha gena-ge 'i dadi bahala sawini singadolo ngowa'a ma nongoḏu gena-ge unanga 'ai 'ahu ri kangela madutu. 15Gena ḏua, unanga ro tagi munara toma ngowa'a matengo toma daeraha gena-ge. Ḏua ngowa'a gena-ge 'o soma'a unanga 'o pula-pula'a soto ma ngo-ngoromo toma guḏa. 16Unanga 'o basono sawini madutu singadolo 'a nyafusu mau 'o oromo soto ma ngo-ngoromo; taragolo'o 'ai po'olo rema dara ḇato. Mada'a kalaha so'o gena, matengo i'a mai ua pula'a unanga ngo-ngoromo.

17Ma ḏo-ḏogumu tala unanga 'o ma'insafu, re 'o kanau tai 'akala re sinyingara ma dara, ‘ 'Ari ḇaḇa 'ai ngowa-ngowa'a munara manga ngo-ngoromo pai-pai'i, mada'a ngoi 'ane sa'i to sengene sawini! 18Sababu gena-ge, ngoi balasu to maḏibo tari ḇaḇa, re to kanau: Baba, ngoi to baraḏosa ra Ma Jou'ongu Madutu re ra Baba ḏi'i. 19Ngoi ri ma'u gasa riwara si'aro'o Baba 'ani ngowa'a nau'u. No si'a'a ngoi ma tero sa'olo 'ani ngowa'a munara ḇato.’ 20Gena ḏua, unanga ro tagi maḏibo tai ḇaḇa. Toma giḏanga moju ma ḇaḇa ro oḏi'i unanga. Dadi tai 'akala re sinyingara 'i baolo dadalara re 'o la-lalara jau i'a unanga 'u sibo'olo re 'u dume.

21Ngowa'a ma nongoḏu 'o kanau, ‘Baba! Ngoi reto baraḏosa ra Ma Jou'ongu Madutu re ra Baba, ngoi ri ma'u gasa riwara si'aro'o Baba 'ani ngowa'a nau'u.’ 22Mada'a ma ḇaḇa 'o 'aro'o 'ai budaka-budaka re 'o kanau, ‘Capati! 'Oro ino pakeanga ma rousu i'a, re ni sipake ra unanga. Sipake ḏi'i 'ali-'ali tai giama ma rarag̱a re tarupa tai rou. 23Gena ḏua, 'oro sapi ma ngowa rimoi ma lese 'i rousu i'a, re na tola'a, la ngene wo 'a'a laya re wa oromo. 24Sababu 'ari ngowa'a nau'u nena-ne ma tero sa'olo ro sengene ḏua, mada'a nange-ne unanga ma tero sa'olo dadunu 'o 'ahu moju. Unanga ro iranga, mada'a dadunu wo sanga moju.’ Ḏua ananga 'aḏi mulaingi 'a'a ma laya.

25Toma 'orasa gena-ge, ma ngowa'a nau'u ma ioro i'a unanga toma guḏa. Wakutu unanga 'o maḏibo toma guḏa ino re sa'i ro co-cori toma wala, unanga 'o 'isene musik ma iḏingi re 'o oḏi'i ngowa'a 'aḏi roje. 26Ḏua unanga 'o 'aro'o ma ḇaḇa 'ai falalomu matengo, re 'o sano, ‘Toma wala, 'age rema 'oru?’ 27Falalomu gena-ge 'a sangoro, ‘Tuanga 'ani nongoḏu ro sapolo re Tuanga 'ani ḇaḇa 'o soma'a tola'a sapi ma ngowa rimoi ma lese lai rousu, sababu Unanga dadunu 'o sanga moju 'ai ngowa'a nau'u toma salamata ma dara!’

28Ngowa'a nau'u ma ioro, unanga 'o porata lai siḏi singadolo 'o oḏu'u osama toma wala ma dara. Ḏua ma ḇaḇa 'o supu re 'o baja, la 'o osama. 29Mada'a ngowa'a nau'u ma ioro gena-ge 'o kanau, ‘Ngoi to munara ma tero sa'olo budaka di'a ngana ma di'ara rema musu-musungu ḏua. Soi moi i'a mai nyangu to sangoro 'ani demo. Mada'a ngana no pula'a 'abingi ma ngowa rimoi i'a mai ua ra ngoi, la ngoi to 'a'a laya rari ḏagilomu. 30Mada'a Baba 'ani ngowa'a nau'u gena-ge ra simoini 'ai pipisi toma we-were'a ma jira. Kalaha so'o gena, Baba no tola'a sapi ma ngowa rimoi ma lese lebe rousu di'a unanga wakutu 'o maḏibo.’ 31Ma ḇaḇa 'o sangoro, ‘ 'Ari ngowa'a nau'u, ngana no tegoro tau-taunu 'ane ra ngoi re 'oru ga'a ta ngoi gena-ge ta ngana ḏi'i. 32Mada'a ngene balasu wo monere re wo 'a'a laya sababu 'ani nongoḏu gena-ge ro sengene, nange-ne dadunu 'o 'ahu moju, unanga ro iranga mada'a nange-ne dadunu 'o maḏibo moju!’ ”

Currently Selected:

Lukas 15: SNT

Highlight

Copy