Yesus 'ai so-soma'a 10

Petrus re 'a Kornelius

1Toma limau Kaisarea, 'age rema na-nau'u matengo, ngowa'a Yahudi ua 'ai lomanga Kornelius, unanga gena-ge 'o kapiteng toma sordado Italia ma balangu.#10:1 Sordado Roma Legiun rimoi ma ngowa'a manga repe nga cala rarama. Legiun rimoi gena-ge toma ma dara 'i dadi pasukana balangu nyagi moi. Pasukana rimoi 'i dadi kompi balangu rarama re kompi rimoi ma ngowa'a nga latu moi, kompi ma sae'e gena-ge kapiteng. 2Unanga re ngowa'a mo-moini ga'a tegoro tai wala ma dara,#10:2 Ananga mo-moini ga'a 'aḏi tegoro ra Kornelius 'ai wala, bae 'ai were'a, 'ai ngowa-ngowa'a manga falalomu, 'ai ḏagilomu-ḏagilomu re 'ai ngowa'a munara re manga were'a re manga ngowa'a. ananga 'aḏi 'ahu di'a sisanangi Ma Jou'ongu Madutu re 'aḏi silamo'o re mojongo Ma Jou'ongu Madutu. Unanga 'o pula'a pipisi lai repe toma ngowa'a Yahudi ma dinga'unu ua manga repe. Unanga 'o manyiata ra Ma Jou'ongu Madutu tau-taunu ḏi'i. 3Toma wangere rimoi, ḏa ca'olo ro'ange wangere so'o ne'o,#10:3 Ne sa'olo 'orasa manyiata di'a ngowa'a Yahudi (Som. 3:1 sa'olo nana'o). Re Kornelius 'o manyiata ḏi'i gari'a. unanga 'o sanga tingoḏi'i re 'o oḏi'i mode-mode'e Ma Jou'ongu Madutu 'ai mala'ekata matengo ga'a 'o kanau, “Kornelius!”

4Kornelius 'o talaḏi i'a rai mojongo re 'o kanau, “Ma Jou, rema 'oru?” Mala'ekata gena-ge 'o sangoro, “Ma Jou'ongu Madutu 'a 'isene 'ani go-golo'o ḏua re 'a sidaioranga ua 'ani 'akala re sinyingara ma la-la toma ngowa-ngowa'a ma dinga'unu ua. 5Nange-ne ḏua, no soma'a ngowa-ngowa'a 'aḏi tagi toma limau Yope si'a re 'aḏi sidola'a Simon, unanga gena-ge 'ai lomanga madutu 'a Simon Petrus. 6Unanga gena-ge 'o tegoro ra Simon, ga'a wa-wati'i haiwani ma 'eno'o, 'ai wala cori toma ngoloto ma 'uḏu.”

7Ḏua mala'ekata gena-ge 'o sisoi'i tala, kara Kornelius 'o 'aro'o 'ai falalomu nga muḏiḏi re 'ai sordado matengo. Sordado gena-ge 'ai pengawala, ga'a 'o 'ahu di'a sisanangi Ma Jou'ongu Madutu 'ai 'akala re sinyingara. 8Kornelius 'a siajele mo-moini ra ananga 'oru 'i dadi toma wangere gena-ge re 'o soma'a ananga 'aḏi tagi si'a toma limau Yope re 'aḏi sidola'a 'a Simon Petrus.

9Ma ḇiḇini ino, cori wangere 'olona, ananga toma ngo'omo ma golona sa'i ngadolo toma limau Yope, 'a Petrus 'o pere toma wala ma re'u#10:9 Ngowa'a Yahudi 'aḏi side'oso wala kama wanata ua, 'i rata-rata i'a. Toma wala ma gagoro rema ngute-ngute. Na'o 'ai ioronongoḏu 'aḏi sapolo bolo 'aḏi roka 'aḏi mangomasa toma ngi'i gena-ge. di'a 'o manyiata. 10'A Petrus 'o basono sawini masala re mau 'o oromo. Wakutu ananga 'aḏi sidodahe 'ai ngo-ngoromo, unanga 'o sanga tingoḏi'i. 11Tai tingoḏi'i ma dara gena-ge, unanga 'o oḏi'i diwanga 'i talanga re 'ori i'a rimoi sa'olo ḇa'a ro-roata ga'i moi 'i siala da'u tala ma dere rata ge 'i piri'u. 12Toma dara, 'age rema haiwani fara muḏuo i'a: ma rou rata, tare-tare, re namo diwanga. 13Ḏua iḏingi rimoi ma betongo so'o ne: “Petrus, no te'oso re na tola'a haiwani gena-ge, kara na oromo!”

14Petrus 'o sangoro, “Ma Jou, sanga ua! Sababu soi moi nyangu ngoi to oromo 'ori i'a ga'a 'i wosono taminga 'agama ma 'atoranga, ma tero haiwani-haiwani gena-ge.”#10:14 Na'o ngowa'a matengo i'a 'a cigi bolo 'a oromo haiwani najis, ngini ni dadi najis mete'e manga 'atoranga (Im. 11). 15Re iḏingi gena-ge 'i kanau moju ma soi ḏiḏi ra unanga, “Na'o Ma Jou'ongu Madutu 'o nyengara na oromo haiwani-haiwani gena-ge, awa na itomo.” 16Iḏingi gena-ge 'i dadunu singadolo soi ro'ange. Gena ḏua, kage-kage ma ḇa'a ge 'i pere sie toma diwanga.

17Wakutu Petrus 'o masano moju tai 'akala re sinyingara ma dara mangale ma maksudu 'oru tingoḏi'i gena-ge, Kornelius 'ai ju-jumutu ga'a 'aḏi saele 'aḏi ngadolo ra Simon 'ai wala ma hisa ma ngalana.#10:17, 32 Simon: Unanga gena-ge ga'a wa-wati'i haiwani ma 'eno'o. 18Ḏua ananga 'aḏi 'aro'o 'aḏi sano, “ 'Ane rema ngowa'a matengo, ananga 'u si'aro'o Simon Petrus, 'o tuḏu 'ane bolo ua?”

19Wakutu Petrus 'o mafikiri moju mangale tingoḏi'i ma maksudu, Ma Ngagara 'Ofi-'Ofi 'i kanau ra unanga, “Hei Petrus, 'age rema ngowa'a nga ḏu'ange 'aḏi disa ngana. 20Dadi caiti no 'uci re no mataka-taka awa mete'e ananga, sababu ngoi to soma'a ananga 'aḏi sapolo ra ngana.”

21Ḏua Petrus 'o 'uci re 'o kanau i'a ra ananga gena-ge, “Ngoi ne ngowa'a ga'a ngini ni disa, di'a 'oru ni sapolo 'ane?”

22Ananga ya sangoro, “Kapiteng Kornelius 'o soma'a ngomi sapolo 'ane. Unanga ngowa'a loasa re banari re 'o silamo'o re mojongo Ma Jou'ongu Madutu. Ngowa'a Yahudi mo-moini 'aḏi silamo'o masala unanga ḏi'i. Ma Jou'ongu Madutu 'ai mala'ekata matengo 'o soma'a unanga 'o golo'o 'a Tuanga no sapolo tai wala, la 'o 'isene 'oru Tuanga no siajele ra unanga.” 23Ḏua, Petrus 'o 'aro'o ananga mo-moini gena-ge 'aḏi osama toma wala re 'aḏi tuḏu otu utu moi.

Ma ḇiḇini i'a, unanga 'o momi'i re 'o tagi ma'u mete'e ra ananga gena-ge 'aḏi tagi toma limau Kaisarea. Ngowa'a ngaku Yesus nga muḏuo i'a toma limau Yope 'aḏi mete'e ḏi'i. 24Ma da-daini i'a, ananga 'aḏi ngadolo da'a toma limau Kaisarea. 'Age ḏi'i, Kornelius re 'ai ioro re nongoḏu re 'ai ḏagilomu-ḏagilomu cori ya'u 'aro'o pasala ḏua. Ananga mo-moini 'aḏi totoma 'a Petrus 'o sapolo. 25Wakutu Petrus 'o osama ra Kornelius 'ai wala, Kornelius 'o mapagara 'ai biono tala re 'o silamo'o re siḏubuso Petrus. 26Mada'a Petrus 'a gu'u 'ai giama re 'u taba'a side'oso re 'o kanau ra unanga, “Te'oso! Ngoi masiretene manusia 'i ma tero sa'olo ngana ḏi'i.” 27Wakutu 'a Petrus 'o osama ra Kornelius 'ai wala ma dara ananga 'aḏi ma'u ka-kanau moju re 'age unanga 'o sanga i'a ngowa'a manga repe 'aḏi malomu. 28Ḏua unanga 'o kanau i'a ra ananga, “Ngini masiretene na waro mangale mete'e ngowa'a Yahudi manga 'agama ma 'atoranga, ngowa-ngowa'a Yahudi simaha ua 'aḏi tuḏu bolo 'aḏi malomu toma ngowa-ngowa'a Yahudi ua. Mada'a Ma Jou'ongu Madutu 'o sijumu pasala ḏua tari tingoḏi'i nange-ge mangale ngoi nyengara to tuḏu bolo to malomu ra guna ḇato: bae ngowa'a Yahudi bae ngowa'a Yahudi ua. 29Sababu gena-ge, wakutu Tuanga no golo'o ngoi to sapolo ino, ngoi ta itomo ua. Dadi nange-ne, ngoi mau ta waro i'a sa'olo Tuanga, 'ani ioro re nongoḏu re 'ani ḏagilomu-ḏagilomu cori ni golo'o ngoi to sapolo ino?”

30Kornelius 'a sangoro, “ 'Au gangele, enanga ma 'orasa ḏa ca'olo ro'ange so'o nena-ne ḏi'i, ngoi masiretene to manyiata tari wala. Kage-kage na-nau'u matengo 'o made-de'oso ino re 'ai pakeanga lai jamanga. 31Unanga gena-ge 'o kanau, ‘Kornelius! Ma Jou'ongu Madutu 'a 'isene ḏua 'ani go-golo'o re 'a sidaioranga ua 'ani 'akala re sinyingara ma la-la toma ngowa-ngowa'a ma dinga'unu ua. 32Sababu gena-ge, ngana no soma'a ngowa'a 'aḏi tagi toma limau Yope re 'aḏi sidola'a 'a Simon Petrus, unanga 'o tuḏu ra Simon 'ai wala toma ngoloto ma 'uḏu.’ 33Sababu gena-ge, ngoi jau-jau to soma'a ngowa'a 'aḏi sidola'a Tuanga. Tuanga, 'ani 'akala re sinyingara 'i la masala, sababu no sapolo ino toma 'orasa nena-ne. Ngomi mi to-tororumu ra Ma Jou'ongu Madutu 'ai momina di'a masigi-gisene mo-moini 'oru ga'a Unanga 'o soma'a Tuanga na siajele ra ngomi.”

Petrus 'ai bobita

34Ḏua 'a Petrus 'o mulaingi kanau, “Nange-ne ngoi to waro mode-mode'e mangale Ma Jou'ongu Madutu 'o dadalara ngowa'a mo-moini ma tero.#Dad. 10:17 35Ma Jou'ongu Madutu 'o dawongo ngowa'a toma bangsa mo-moini ga'a 'aḏi silamo'o re mojongo Unanga re 'aḏi 'a'a ba-banari tau-taunu. 36Ioronongoḏu ngowa'a Yahudi, ngini ni waro ḏua mangale Ma Jou'ongu Madutu 'ai habari 'i singadolo toma bangsa Israel. Habari Roanga gena-ge mangale ma duhu sa'olo ngowa-ngowa'a nyengara sanga dame ra Ma Jou'ongu Madutu tala sababu Yesus Kristus ga'a 'Ai kuasa toma ngowa'a mo-moini: bae ngowa'a Yahudi bae ngowa'a Yahudi ua. 37Ngini rena waro, Yohanes 'o siajele ngowa'a balasu 'aḏi maḏibo toma ngo'omo boloto, kara sanga baptis. Togumu i'a, Yesus 'o doto'o re 'o 'a'a ga'a hera-heranga mulaingi toma daeraha Galilea, kara toma daeraha Yudea mo-moini. 38Ngini ni waro ḏua Ma Jou'ongu Madutu 'o 'utusu 'a Yesus, ngowa'a Nazaret, re 'U sipa'ala Ma Ngagara 'Ofi-'Ofi re 'Ai Kuasa ra Unanga. Unanga gena-ge 'o tagi le'a ḇato re 'o 'a'a 'ori i'a la-la tau-taunu. Unanga nyengara 'o si-la ngowa'a 'o roh ma jira ya'u dungosama, sababu Ma Jou'ongu Madutu 'o mamete'e ra Unanga tau-taunu.

39Mo-moini nena-ne ngomi maoḏi'i masiretene Unanga 'a si'a'a toma daeraha ngowa-ngowa'a Yahudi: Toma limau Yerusalem re toma gamu-gamu ma lelegu ḏi'i. Ma ḏo-ḏogumu, ananga 'U sisengene Unanga toma salib. 40Mada'a toma wangere ma soi ro'ange, Ma Jou'ongu Madutu dadunu 'u si'ahu moju toma ngowa'a senge-sengene manga sigolona re Unanga 'O sioḏi'i Yesus toma ngowa-ngowa'a. 41Mada'a Ma Jou'ongu Madutu 'o sioḏi'i Unanga toma ngowa'a mo-moini ua, ḏuga-ḏuga ra ngomi ga'a Ma Jou'ongu Madutu 'o cumutu pasala ḏua, la mi dadi Yesus 'ai sakisi-sakisi. Ngomi mi dadi sakisi gena-ge sababu mi ka'e re mi oromo ma'u mete'e Unanga, wakutu Unanga dadunu 'o 'ahu moju toma ngowa'a senge-sengene manga sigolona. 42Unanga 'o soma'a ngomi mi singadolo Habari Roanga toma ngowa'a mo-moini re mi pula'a sakisi mangale Ma Jou'ongu Madutu 'o 'utusu Yesus. Unanga gena-ge ḏuanga i'a 'o dadi Juruhakimi di'a ngowa'a 'ahu-'ahu re ngowa'a senge-sengene. 43Nabi mo-moini 'aḏi siajele pasala ḏua mangale Yesus. Ananga gena-ge 'aḏi siajele mangale 'a guna ḇato ngaku Yesus, Ma Jou'ongu Madutu 'a singi-ngiranga manga ḏosa ḏua, sababu Yesus 'ai kuasa.”

Ma Ngagara 'Ofi-'Ofi 'i 'uci re 'i ḏegoro toma ngowa'a Yahudi ua

44Wakutu ngowa-ngowa'a ya 'isene 'a Petrus 'o bobita moju, Ma Ngagara 'Ofi-'Ofi 'i 'uci re ya'u ḏegoro. 45Ngowa'a Yahudi ga'a ngowa'a ngaku Yesus mo-moini ga'a 'aḏi mete'e Petrus toma limau Yope ino, 'aḏi heranga masala sababu 'aḏi oḏi'i masiretene Ma Jou'ongu Madutu 'o pula'a Ma Ngagara 'Ofi-'Ofi ḏi'i toma ngowa'a Yahudi ua; 46sababu ya 'isene ngowa'a Yahudi ua 'aḏi makanau matai demo re 'aḏi puji re silamo'o Ma Jou'ongu Madutu. Ḏua Petrus 'o kanau, 47“Tai'i ni oḏi'i, Ma Ngagara 'Ofi-'Ofi 'i 'uci re ya'u ḏegoro toma ngowa'a Yahudi ua, ma tero ngene ḏi'i. Dadi 'a guna ua ya'u dola'aku ananga 'aḏi sanga baptis?!” 48Ḏua Petrus 'o soma'a ya'u baptis ra Yesus Kristus 'ai lomanga. Togumu i'a, ngowa'a Yahudi ua gena-ge 'aḏi golo'o 'a Petrus 'o tuḏu ra ananga wangere muḏuo i'a moju.

Currently Selected:

Yesus 'ai so-soma'a 10: SNT

Highlight

Copy