Yesus 'ai so-soma'a 11

Petrus 'o siajele habari mangale Kornelius toma Jama'ata Yerusalem

1Ḏua Yesus 'ai so-soma'a toma limau Yerusalem re ngowa'a ngaku Yesus toma daeraha Yudea mo-moini 'aḏi 'isene ngowa'a Yahudi ua raḏi mete'e ḏi'i Ma Jou'ongu Madutu 'ai demo tamanga 'ahu ma dara. 2Sababu gena-ge, wakutu 'a Petrus 'o tagi toma limau Yerusalem, ngowa-ngowa'a Yahudi ngaku Yesus 'aḏi tuduba 'a Petrus. 3Ananga 'aḏi kanau, “I'a sa'olo no osama toma ngowa'a Yahudi ua manga wala re ngana no sioromo i'a ra ananga?” 4Dadi, Petrus 'a sitarangi ra ananga toma ma mulaingi 'oru ga'a 'i dadi ḏua. Unanga 'o kanau,

5“Wakutu ngoi to manyiata toma limau Yope, ngoi to sanga tingoḏi'i. Tari tingoḏi'i gena-ge 'age 'ori i'a rimoi sa'olo ḇa'a ro-roata ga'i moi 'i siala da'u diwanga tala ma dere rata ge 'i piri'u, 'i togumu tari gagoro. 6Wakutu ngoi ta tailako toma ḇa'a ma dara, to oḏi'i haiwani-haiwani ma rou rata, haiwani-haiwani nga-ngabala, haiwani tare-tare re namo-namo diwanga. 7Ḏua ngoi to 'isene iḏingi rimoi ma betongo so'o ne: ‘Ayo momi'i Petrus! Ngana na tola'a haiwani-haiwani gena-ge, kara na oromo!’

8Mada'a ta sangoro, ‘Ma Jou, sanga ua! Sababu soi moi nyangu ngoi to oromo 'ori i'a ga'a 'i wosono taminga 'agama ma 'atoranga ma tero haiwani-haiwani gena-ge.’ 9Mada'a iḏingi gena-ge 'i kanau ma soi ḏiḏi da'u diwanga tala, ‘Na'o Ma Jou'ongu Madutu 'o nyengara na oromo haiwani-haiwani gena-ge, awa na itomo.’ 10'Ari tingoḏi'i gena-ge, ta oḏi'i da-dadunu soi ro'ange. Togumu i'a, 'i pere sie toma diwanga moju.

11Toma 'orasa gena-ge, nga ḏuange da'a limau Kaisarea ino, ga'a soma'a sidola'a ngoi, raḏi sapolo toma wala ga'a ngoi to tuḏu toma limau Yope. 12Ḏua Ma Ngagara 'Ofi-'Ofi 'i soma'a ngoi to tagi ma'u mete'e ra ananga re to mojongo riwara. Ngowa'a ngaku Yesus nga ḏurama toma limau Yope 'aḏi ma'u mete'e ra ngoi toma limau Kaisarea ḏi'i. Ḏua ngomi mo-moini mi osama ra Kornelius 'ai wala. 13Ḏua 'a Kornelius 'a sijarita mangale mala'ekata matengo 'o sapolo made'oso tai wala ma dara re 'o kanau, ‘Soma'a ngowa'a tagi toma limau Yope re 'aḏi sidola'a na-nau'u matengo 'ai lomanga Simon Petrus. 14Unanga ḏuanga i'a 'o siajele habari mangale sa'olo Ma Jou'ongu Madutu nyengara 'o singi-ngiranga 'ani ḏosa-ḏosa re 'ani ngitu re ngale ma dara manga ḏosa-ḏosa.’

15Wakutu ngoi ta siajele re mau dowanga 'ari carita, Ma Ngagara 'Ofi-'Ofi 'i 'uci tala re 'i ḏegoro ra ananga gena-ge ma tero sa'olo 'i dadi pasala ḏua ra ngene nga'ene, wakutu ma mulaingi toma Pentakosta ma Wangere. 16Ḏua ngoi ta si'elingi ie, Ma Jou 'o siajele ḏua, ‘ 'A Yohanes 'o baptis ngowa'a reo ḇanyo, mada'a Ma Jou'ongu Madutu 'o baptis ngini rema Ngagara 'Ofi-'Ofi.’#11:16 Yesus 'ai maksudu: Ma Ngagara 'Ofi-'Ofi 'i 'uci re nu ḏegoro.#Som. 1:5 17Dadi, mode-mode'e Ma Jou'ongu Madutu 'o pula'a Ma Ngagara 'Ofi-'Ofi toma ngowa-ngowa'a Yahudi ua ḏi'i, cocatu gena-ge 'i ma tero Ma Jou'ongu Madutu 'o pula'a ra ngene wakutu ngene wo ngaku Ma Jou Yesus Kristus. Sababu gena-ge, sanga ua Ma Jou'ongu Madutu 'ai Munara ngoi ta itomo!”

18Ananga ya 'isene pasala i'a, ya lawana riwara re 'aḏi puji re silamo'o Ma Jou'ongu Madutu 'aḏi kanau, “Sababu gena-ge, Ma Jou'ongu Madutu 'o pula'a loasa ḏi'i toma ngowa'a Yahudi ua di'a 'aḏi maḏibo toma ngo'omo boloto re 'aḏi sanga 'ahu kasingado-ngadolo i'a!”

Jama'ata toma limau Antiokhia

19'A Stefanus 'o sengene togumu i'a, ngowa'a Yahudi 'aḏi sisikisa ngowa-ngowa'a ngaku Yesus singadolo 'aḏi wiḏi matai are le'a bolo le'a. 'Age 'aḏi wiḏi ngadolo toma daeraha Fenisia, re 'age ḏi'i 'aḏi ngadolo toma pulo Siprus re limau Antiokhia toma daeraha Siria. Ananga gena-ge singadolo Habari Roanga pa'i toma ngowa-ngowa'a Yahudi ḇato.#Som. 8:1-4 20Mada'a toma ngowa-ngowa'a ngaku Yesus gena-ge, 'age mamuni'a manga 'asala toma pulo Siprus re limau Kirene#11:20 limau Kirene toma daeraha Kirene toma Afrika 'Utara. ino 'aḏi tagi ngadolo toma limau Antiokhia ḏi'i. Toma limau gena-ge ananga 'aḏi singadolo Habari Roanga mangale Yesus toma ngowa-ngowa'a Yahudi ua ḏi'i. 21Ma Jou'ongu Madutu 'ai kuasa 'i tegoro toma ngowa-ngowa'a ngaku Yesus gena-ge singadolo ngowa'a manga repe raḏi ngaku Yesus re 'aḏi mete'e Unanga 'ai do-doto'o tamanga 'ahu ma dara.

22Jarita mangale 'ori i'a 'i dadi toma limau Antiokhia 'i ngadolo toma jama'ata Yerusalem. Dadi, ananga 'aḏi cumutu 'a Barnabas 'o tagi toma limau Antiokhia. 23Wakutu Barnabas 'o ngadolo toma limau Antiokhia, unanga oḏi'i nana'o mangale Ma Jou'ongu Madutu 'ai mura re dadalara 'i tegoro ra ananga. Dadi unanga 'ai 'akala re sinyingara 'i maroanga. Barnabas 'o golo'o ananga gena-ge 'aḏi mete'e re 'aḏi ngaku Ma Jou Yesus tau-taunu remanga 'akala re sinyingara mode-mode'e. 24Barnabas 'ai 'akala re sinyingara lai la-la re Ma Ngagara 'Ofi-'Ofi 'u ḏegoro re 'ai ngo-ngaku 'i te'e masala singadolo ngowa'a manga repe raḏi ngaku Ma Jou Yesus.

25Gena ḏua, Barnabas 'o tagi toma limau Tarsus re 'o disa 'a Saulus. 26Wakutu Barnabas 'o ma'u sanga Saulus, unanga 'u singata'a Saulus toma limau Antiokhia. Saulus re Barnabas 'aḏi tegoro toma limau gena-ge ma di'ara musungu rimoi, 'aḏi malomu toma ngowa-ngowa'a ngaku Yesus tau-taunu re 'aḏi doto'o ngowa'a repe. Ngowa-ngowa'a ngaku Yesus toma limau Antiokhia, ananga gena-ge ya si'aro'o ngowa-ngowa'a Kristen ma mulaingi.

27-28Toma 'orasa gena-ge, 'age rema nabi-nabi nga muḏuo i'a toma limau Yerusalem ino 'aḏi sapolo toma limau Antiokhia. Toma nabi-nabi gena-ge manga sigolona 'age rema ngowa'a matengo 'ai lomanga 'a Agabus. Ma Ngagara 'Ofi-'Ofi 'u sinyanyasele unanga 'o siajele toma ngowa-ngowa'a ngaku Yesus mangale 'orasa sawini lai ti'ara ḏuanga i'a 'i dadi toma dungia Roma sitabi donga. (Gena-ge 'i dadi wakutu 'a Kaisar Klaudius 'o gu'u pareta).#Som. 21:10 29Dadi ngowa'a ngaku Yesus toma limau Antiokhia mo-moini 'aḏi mafakati siḏingoto manga bu-bula'a tamanga ioronongoḏu ngo-ngaku rimoi ga'a 'aḏi tegoro toma daeraha Yudea. Ananga 'aḏi pula'a mete'e matengo-matengo manga dinga'unu. 30Fakati nena-ne, ananga ya siḏagi re ya lomu, kara 'aḏi cumutu Barnabas re 'a Saulus ya ngata'a re ya sipula'a toma jama'ata ma bi-biri'i toma limau Yerusalem.

Currently Selected:

Yesus 'ai so-soma'a 11: SNT

Highlight

Copy