Mrk 3

A wanuna wa kuwonyana a voko

(Mt 12:9-14; Lk 6:6-11)

1Ku drin'wana Savata Yesu atlheli anhingena a sinagogeni, kone afa kuni wanuna lweyi afaka a wonyani voko. 2Kambe afa kuni vhanu lava afaka valavisisa Yesu loko kumbe angamuhanyisa hi siku dra Savata, vatakota ku murambela ha swone. 3Yesu aku ku mhunu lweyi wa kuwonyana a voko: Sekeleka uta la makari. 4Kutani aku ku vone: Xana a nawu wenu wapfumela hi Savata, a kuyentxa swinene kumbe swakubiha, kuhuluxa mhunu, kumbe kudlaya xana? Kambe vone vamiyela. 5Yesu atiki avarala-rala hi mahlu na ahlundrukile, avaviseka hinkonta yakunonon'hwa ka timbilu tavu, aku ku nuna lweyo: Nalavuta a voko. Ahanga drinalavuta, dritlhela driwololoka.

6Vatiki vahuma a vafarisi, vahatla vahlengeletana ni va-Heroda vakhanela makungu ya leswaku xana vatamudlayisa ku yini Yesu.

A xitrhungu ankingeni wa tiva

7Kutani Yesu afamba hi tlhelo dra tiva, kun'we ni vadondrisiwa vakwe. A xitrhungu xikulu xi mulandra xipfa Galileya ni le Yudeya, 8ni le Yerusalema, ni le Idumeya#3:8 A tiko dra Idumeya afa drikumeka a nyingitimu wa Yudeya, na dripatrani ni muti wa Hebroni., ni halahaya ka Yordana, ni le tikweni ledri dringa kusuhi ni le Tiri, ni le Sidoni. Vatiki vayingela leswikulu leswi aswiyentxaka, vata ku Yene. 9Yesu abyela a vadondrisiwa vakwe leswaku axibyatrhwana xiva kone kusuhi na Yene, hinkonta ya xitrhungu, xingati mukamanyeta. 10Hikusa afa ahanyisa vanyingi, lakakuva hinkwavu lava vangani vuvabyi vakunyuluta vayatiwisa kusuhi na Yene akuva vamukhumba. 11Na vone lava afaka vani mimoya leyi mimfani, loko vamuvona, vamukhisamela, kutani a mimoya leyi mimfana leyi afaka mili ku vone mibandlukana miku: Wene, u N'wana wa Xikwembu Nkulukumba. 12Kambe Yesu afa amikhwavela ngopfu, akuva mingamupaluxi alivaleni.

Kuhlawuliwa ka lava va Khume na vabiri

(Mt 10:1-4; Lk 6:12-16)

13Yesu antlhantukeli anhaveni, ativitanela lava avadjuliki. Vatrhindrekela ku Yene, 14ahlawula khume na vabiri, akuva vava na Yene, atavaruma a kurera a Ivangeli, 15ni kuvanyika a ntamu wa kuhlongola a mademoni. 16Lava va khume na vabiri angavahlawula hi lava: Simoni lweyi amutxhuliki a vito dra Petrosi, 17Yakobe na Yohana makwavu, vanga vana va Zebedeya, lava avatxhuliki a vito dra Bowanergesi (hileswaku, Vana vakudruma ka Tilo), 18na Andreyasi, na Filipi, na Bartolomewu, na Matewu, na Tomasi, na Yakobe n'wana Alifewu, na Tadeya, na Simoni, wa ntlawa wa va Tiko, 19na Yudasi Iskariyota, lweyi anganyikela Yesu.

Yesu na Beelzebule

(Mt 12:22-32; Lk 11:14-23; 12:10)

20A nkameni wun'wana, Yesu ayi ndangwini wa kukari. A xitrhungu xitlhela xihlengeletana, lakakuva Yesu ni vadondrisiwa vakwe vahluleka ni kuda. 21Vatiki vaswiyingela a valekwavu, vatata mukhoma, hikusa afa vaku#3:21 Tolokiwo drin'wana drili: vone afa vahlaya vaku. ahambani nhloko. 22A vatrali lava vafulameliki, vapfa Yerusalema, vaku: Ani Beelzebule; ahlongola mademoni hi ntamu wa mufumi wa mademoni. 23Kutani Yesu avavitana, avabyela xifaniso aku: Xana Sathana angaswikotisa ku yini kuhlongola Sathana? 24Ni loko a mfumu wutravukanile, a mfumu lowo awuswikoti kutiya. 25Ni loko a ndangu wutravukanile, a ndangu lowo awuswikoti kutiya. 26Ni loko Sathana atilwisa ali yene, atravukana ha vuswake, angaswikoti kutiya, kutava kuhela kwake. 27Kambe akuna mhunu lwyi anganhingenaka andlwini ya lweyi wa ntamu, ni kuphanga a vukosi byake, loko angaranganga atrimba lweyi wa ntamu, hi kone atakaphanga a yindlu yake.

28Nihlayelamfuri nili ku n'wine: A vana va vhanu vatadrivaleliwa a swidoho swavu hinkwaswu, ni swisandru hinkwaswu leswi vasandriki ha swone. 29Kambe lweyi ataka sandra a Moya wa Kuxwenga angaka angadrivaleliwi hi la kungahelikiki. Kambe atava ni nandru wa xihono lexi xakuka xingaheli. 30Yesu ahlaya leswo hi leswi afaka vati: Yene ali ni moya lowu mfani.

Mamana ni vamakwavu va Yesu

(Mt 12:46-50; Lk 8:19-21)

31Kutani kutlhasi a mamana wa Yesu ni vamakwavu vayima handle. Varumela kuya muvitana. 32A xitrhungu afa xitrhamile ximutrhandrela makari, vaku ku yene: Lavisa, a mamana waku ni vamakwenu vakola handle, vakudjulaka. 33Avayangula aku: Xana a mamana wanga i mani, ni vamakweru i vamani? 34Kutani aralarala lava vatrhamisiki, vamutrandrela makari, aku; Hi lava, a mamana wanga ni vamakweru. 35Hikusa lweyi ayentxaka a kurandra ka Xikwembu Nkulukumba, hi yene a makweru wa xinuna ni makweru wa xisati, ni mamana wanga.

Currently Selected:

Mrk 3: NTX2007

Highlight

Copy