Mrk 2

Kuhanyisiwa ka nuna wa kuwonyana swiro

(Mt 9:1-8; Lk 5:17-26)

1Antrhaku ka man'wana masiku, Yesu atlhelela Kapernawume. Kutwala leswaku ali ndangwini wa kukari, 2a vhanu lava vanyingi vahlengeletana, lakakuva kupfumaleka ni mbangu mahlweni ka nyangwa. Yesu afa arera a ritu, 3kutani kutlhasa a vhanu, vamutiselaka a wanuna wa kuwonyana swiro, na a byatrhiwi hi mune wa vavanuna. 4Vone-ke loko vahluleka a kumuyisa ku Yesu, hinkonta ya xitrhungu, vakhandriya a lwangwini dra yindlu leyi afaka atrhami ku yone, vapfula pholwa, vanembeleta vunanu lebyi lweyi wa kuwonyana swiro afaka yetleli ku byone. 5Yesu, atiki avona kupfumela kwavu, abyela lweyi wa kuwonyana a swiro, aku: N'wananga, udrivaleliwi swidoho swaku.

6Kambe afa kuni van'wana va vadondrisi va nawu lava vatrhamiki kone, lava afaka vatipimisela leswaku; 7Xana lweyi, ahlayisa xileswo ha yini? Asandra Xikwembu Nkulukumba. Xana hi mani lweyi akotaka kudrivalela a swidoho, loko angali Xikwembu Nkulukumba ntsena? 8Yesu ahatliki kuswitiva amoyeni wakwe, leswaku vatipimisela leswo, aku ku vone: Xana mitipimiselela yini timhaka leto andreni kwenu? 9Xana kunabyala yini, loko niku ku lweyi wa kuwonyana a swiro: Udrivaleliwi swidoho swaku, kumbe loko niku ku yene: Pfuka, utlakula vunanu byaku, ufamba? 10Switivani leswaku a N'wana wa Mhunu ani ntamu wa kudrivalela a swidoho amisaveni.

Kutani aku ku lweyi wa kuwonyana a swiro: 11Pfuka, utlakula vunanu byaku, utifambela a kaya kwaku. 12A mhunu lweyi wa mbabyi ahanga pfuka, ahatla atlakula vunanu, ahuma mahlweni ka hinkwavu, lakakuva vahlamala hinkwavu. Vatwalisa Xikwembu Nkulukumba, vaku: Ahingiswivona swanga hi leswi!

Yesu avitana Levi (Matewu)

(Mt 9:9-13; Lk 5:27-32)

13Yesu atlheli ahuma aya nkingeni wa tiva dra Galileya. A xitrhungu hinkwaxu xiya ku yene; kutani avadondrisa. 14Loko akhaluta, avona Levi, a n'wana Alifewu, lweyi afaka atrhamisi andlwini ya kuhakela ku yone a tinemba, aku ku yene: Nilandre! Levi asekeleka, amulandra. 15Kuti loko Yesu atrhami akudeni a kaya ka Levi, a vahakelisi vatinemba ni vadohi lava vanyingi vatrhama kun'we na Yesu ni vadondrisiwa vakwe. Hikusa afa vali vanyingi, lava afaka vamulandra. 16Kambe a vadondrisi va Nawu ni vafarisi vatiki vavona leswaku ada#2:16 A man'we matralwa mayengetela leswaku: ava an'wa. ni vadohi ni vahakelisi va tinemba, vaku ku vadondrisiwa vakwe: Xana, a mudondrisi wenu adela yini ni vahakelisi va tinemba ni vadohi? 17Yesu atiki awa swiyingela, aku ku vone: Lava vanga vatomi avadjuli n'anga, kambe ntsena lava va vabyaka. Anitelanga kuvitana valulami, kambe im'na, vakuva vadohi.

Mhaka ya kutitrona

(Mt 9:14-17; Lk 5:33-39)

18A vadondrisiwa va Yohana Mubabatisi ni va vafarisi afa vatitrona, kutani a van'wana vavu vata ku Yesu vaku: Ha yini a vadondrisiwa va Yohana ni va vafarisi vatitrona, kasi a vadondrisiwa vaku avatitroni? 19Yesu avayangula aku: Xana a vanakulobye va mulovoli vatitrona, loko yene ahalina vone? A nkama hinkwawu lowo vangani mulovoli avana kutitrona. 20Kambe a masiku matata, lawa a mulovoli atakasusiwa ku vone. Lahuke, vatatitrona, a kusukela a sikwini ledro.

21Akuna mhunu lweyi arungelaka xihlama xa kapulana drimpswha ku xiyambalu xakhale, suka a xihlama lexi ximpswha xihandrula a xiyambalu xakhale, ahandrukela dra kone dritabiha kutlulisa. 22Nakone akuna mhunu lweyi atxhelaka a vhinyo drimpswha aminkwameni ya khale, suka a vhinyu drimpswha drihandrula minkwama; kuhalaka a vhinyo na yone minkwama mihoneka. Kambe vatxhela a vhinyu drimpswha aminkwameni mimpswha.

Yesu ni Savata

(Mt 12:1-8; Lk 6:1-5)

23Kuti hi siku dra Savata, loko Yesu ahundra amakari ka masimu, a vadondrisiwa vakwe vasungula kutrhova a switrhetrho swa tirigo akuva vada. 24A vafarisi vavutisa Yesu vaku: Lavisa; xana vayentxela yini leswi a nawu wungapfumelikiki hi Savata? 25Kambe Yesu aku ku vone: Xana a n'wingihlaya leswi Davida angaswiyentxa, loko apfumali swakuda na ani ndlala, yene ni lava afaka vali na yene? 26Anhingeni andlwini ya Hosi, ankameni wa Muprista Abiyatari, ada a makati ya mhamba, lawa amangafanelikiki kudiwa hi vhanu van'wana, loko vangali Vaprista ntsena, ava anyika ni lava afaka ali na vone? 27Kutani Yesu aku ku vone: A Savata driyentxeliwi mhunu, swingali leswaku a mhunu ayentxeliwi Savata. 28Hileswo-ke a N'wana wa Mhunu i Hosi nambi ku dro Savata.

Currently Selected:

Mrk 2: NTX2007

Highlight

Copy