Mrk 10

Mhaka ya kudlaya vukati

(Mt 19:1-12; Lk 16:18)

1Loko Yesu asuki kolahu aya mintremanweni ya Yudeya halahaya ka nambu wa Yordana. A switrhungu switlhela swihlengelatana ku Yene, aswidondrisa tani hi laha atoloveliki ha kone. 2A vafarisi vatiki vatlhasa, vamuvutisa hi kumudringa vaku: Xana a nawu wapfumela akuva a wanuna ahlongola a nsati wakwe? 3Yene avayangula hi xivutiso aku: Moxe aleleti yini xana? 4#Lavisa Mlw 24:21. Vone vaku: Moxe ahipfumeleli leswaku hitrala a papela dra kudlaya a vukati himuhlongola.

5Kambe Yesu aku ku vone: Amitraleli a leleto ledro hinkonta ya kunonon'hwa ka timbilu tenu. 6#Lavisa Gn 1:27; 5:1. Kambe a nkama angasungula a kutumbuluxa misava, Xikwembu Nkulukumba avayentxi nuna ni nsati. 7Hileswo-ke, a wanuna atasiya a tatana wakwe ni mamana wakwe, atanamarela a nsati wakwe, 8vatava miri min'we hi vubiri byavu, hi leswo-ke avehe vabiri kambe hi vubiri byavu i nyama yin'we#10:8 Lavisa Ms 2:24 Man'we Matralwa amanaswu leswaku: atanamarela a nsati wakwe. 9Ke leswi Xikwembu Nkulukumba angaswitlhanganisa a mhunu angatxhuki aswitravukanisa.

10Loko vatlhasi a kaya, a vadondrisiwa vatlhela vamuvutisa a mhaka leyo. 11Yesu aku ku vone: A wanuna lweyi ahlongolaka a nsati wakwe, ateka mun'wana, ayentxa vumbuye mayelano ni nsati wakwe. 12Nakone, loko a wansati atrika a nuna wakwe, atlhela atekana ni mun'wana wanuna na yene ayentxa vumbuye.

A vatrongwana ni Mfumu wa Xikwembu Nkulukumba

(Mt 19:13-15; Lk 18:15-17)

13Kutani vatisa ku Yene a vatrongwana akuva avantlhanteka a mavoko, kambe a vadondrisiwa vakhwavela a vhanu lavo. 14Yesu atiki aswivona, asola, aku ku vone: Trikani a vatrongwana vata ku mine, n'wingavatsimbeni hikusa a Mfumu wa Xikwembu Nkulukumba i wa volava vafanaka na vone. 15Drimukani leswi: lweyi wakuka angayamukeli a Mfumu wa Xikwembu Nkulukumba swanga hi ntrongwana angaka anganhingeni ku wone.

16Kutani ateka a vatrongwana avaxingara, avakatekisa, na avantlhanteka a mavoko.

A swipfundri ni Mfumu wa Xikwembu Nkulukumba

(Mt 19:16-30; Lk 18:18-30)

17Kuti loko Yesu ahumi kone, akhoma a ndlela, mun'we mhunu atrutruma ata ku yene, akhisama, amuvutisa aku: Mudondrisi lweyi munene, xana nitayentxa yini akuva nitada a pfindla dra vutomi lebyi byingahelikiki? 18Yesu aku ku yene: Xana unihlayela yini lweyi munene? Akuna lweyi munene loko ange Xikwembu Nkulukumba ntsena. 19Wayitiva a milawu: Ungayentxi vumbuye, ungadlayi, ungayivi, ungalumbeti mhunu kuloni hi kuhemba, ungakanganyisi van'wana, txhava a tatana waku ni mamana waku. #10:19 Lavisa Khm 20:12-16; Mlw 5:16-20. A maritu ya ku Ungakanganyisi van'wana amakumeki ku milawu ya khale, hambi ku matralwa ya Mt na Lk

20Kambe lweyo aku ku Yene: Mudondrisi, nabekisi hinkwaswu leswo kusukela a vutrongwanini byanga. 21Kambe Yesu amulavisa, amurandra, aku ku yene: I xin'we ntsena lexi upfumalaka xone; famba uyaxavisa hinkwaswu leswi unganaswu unyika a mali ku swisiwana, kutani utavani nhlengwe atilweni. Ntrhaku tana unilandra. 22Kambe yene avaviseka hi ritu ledro, asuka hi kuvaviseka, hikusa afa ali ni vukosi byinyingi.

23Kolahu Yesu aralarala matlhelo hinkwawu, abyela a vadondrisiwa vakwe aku: Swinonon'hwa swakunhati ku swipfundri a kunhingena a Mfun'wini wa Xikwembu Nkulukumba! 24Kambe a vadondrisiwa vahlamala hi maritu yake. Yesu atlhela avabyela aku: Vananga, swinonon'hwa ngopfu (ku lava vadumbaka vupfundri) a kunhingena a Mfun'wini wa Xikwembu Nkulukumba!#10:24 A man'wana matralwa mayengesela leswaku: lava vadumbaka wupfundri! 25Swanabyala loko a kamela drinhingena hi nomo wa ximari kutlula loko a xipfundri xinhingena a Mfun'wini wa Xikwembu Nkulukumba.

26A vadondrisiwa vahundrisa kuhlamala (hi leswi vaswiyingeliki), vavutisana vaku: I mani-ke lweyi angatihuluxaka? 27Loko avalavisile, Yesu aku ku vone: Ku vhanu aswikoteki, kambe ku Xikwembu Nkulukumba, hinkwaswu swakoteka, hikusa Xikwembu Nkulukumba angahluliwi hi ntxhumu. 28Petrosi ahangamubyela aku: Vona, hine hitriki hinkwaswu akuva hikulandra. 29Yesu aku: Nihlayelamfuri nili: Mani na mani lweyi atrikiki yindlu, kumbe vamakwavu vaxinuna ni vaxisati, kumbe mamana wakwe, kumbe tatana wakwe, kumbe vana, kumbe masimu, ha mine, ni hikola ka Ivangeli, 30yelweyo atayamukela leswi switlulaka ka dzana (100) swoswi amisaveni leyi, a tiyindlu ni vamakwavu va vaxinuna ni vaxisati, ni vamamana ni masimu, kun'we ni tinxanisa. Nakone atakuma a vutomi lebyi byingahelikiki ankameni lowu wutaka. 31Kambe lava vanyingi swoswi vanga va kuranga vatava va le ntrhaku, ni lava swoswi vanga va le ntrhaku vatava va kuranga.

Yesu atlhela avulavula hi lifu drakwe ni kupfuka kufeni

(Mt 20:17-19; Lk 18:31-34)

32Afa vali ndleleni na vantlhantukela Yerusalema, Yesu afa afamba amahlweni ka vadondrisiwa. Vone afa vatxhukisiwa, ni lava vamulandraka vatxhava. Yesu atlhela ateka a vadondrisiwa lava va khume na vabiri hi tlhelo asungula kuvabyela leswi switakamuhumelela, aku: 33Lavisani! Hi ntlhantukela a Yerusalema, kutani a N'wana wa Mhunu atanyiketiwa amavokweni ya vaprista lava vakulu ni vatrali. Vatamuyavanyisela kufa, vamunyiketa ku va-Matiko, 34vatamuhleka, vava vamuthukela mari, vamuba hi ntshilana vamudlaya. Kambe atapfuka-kufeni hi siku dra vuraru.

Xikombelo xa vana va Zebedeya

(Mt 20:20-28)

35Kutani Yakobe na Yohana, a vana va Zebedeya, vata ku Yene vaku: Mudondrisi, hirandra leswaku uhiyentxela leswi hitakakukombela swone. 36Kutani Yesu aku ku vone: Xana n'widjula leswaku nin'wiyentxela yini? 37Vone vaku ku yene: Hinyike leswaku mun'we atrhama axineneni, mun'wana aximantrhini xaku, a Mfun'wini waku wa lidrumo. 38Kambe Yesu aku ku vone: An'wiswitivi leswi n'wikombelaka swone. Xana n'wingaswikota a kunwa ntrheko lowu ninwaka wone, ni kubabatisiwa hi babatiso ledri nibabatisiwaka ha drone? 39#Fanisa na Mt 12:2. Vone vaku: Hingaswikota! Kambe Yesu aku ku vone: A ntrheko lowu ninwaka, n'witawunwa, na drone a babatiso ledri nibabatisiwaka ha drone, n'witababatisiwa ha drone na n'wine, 40kambe loko kuli kutrhama axineneni kumbe aximantrhini xanga ahi mine ninganyikaka. Kambe a mimbangu leyo kutanyikiwa lava swibekiseliwiki vone.

41Vatiki vaswiyingela lava va khume, vasungula a kuhlundrukela Yakobe na Yohana. 42Kutani Yesu avavitana aku ku vone: N'waswitiva leswaku lava ingiki vafuma a matiko, vamafuma hi kunonon'hwa, ni leswaku a vakulu va wone vamafuma hi ntamu. 43Kambe, ku n'wine aswitanu; na swone lweyi adjulaka kuva nkulu amakari kwenu atava mutireli wenu; 44ntlhantakubiri lweyi adjulaka kuva lweyi wa kuranga amakari kwenu, atava nandra wa hinkwavu. 45#Fanisa na Mrk 14:24; I Tmt 2:6. Hikusa na Yene N'wana wa Mhunu angatelanga kutatireliwa, kambe kutirela, ni kunyiketa a vutomi byake xiva xitirulo ku lava vanyingi.

Kuhanyisiwa ka Bartimeya

(Mt 20:29-34; Lk 18:35-43)

46Kutani vatlhasa Yeriko. Loko Yene ahuma mutini ni vadondrisiwa vakwe, ni xitrhungu xikulunyana, Bartimeya a n'wana Timeya, afaka ali mukombeli wa kufa-mahlu, afa atrhama andleleni. 47Kuti loko ayingeli leswaku hi Yesu wa Nazarete, asungula kubandlukana aku: Yesu, N'wana Davida, niyentxele vurombe! 48A vhanu vanyingi afa vamukhwavela akuva amiyela, kambe yene afa ahundrisa a kubandlukana aku: N'wana Davida, niyentxele vurombe!

49Yesu ayima aku: Muvitanani. Vahangayavitana lweyi wa kufa-mahlu vaku ku yene: Tiya ntamu sekeleka, awakuvitana. 50Yene atxukumetiki a xiyambalu xakwe, atlula ata ku Yesu. 51Yesu amuvutisa aku: Xana urandra leswaku nikuyentxela yini? Lweyi wakufa-mahlu aku: Mudondrisi! Akuva nitlhela nivona. 52Yesu aku ku yene: Muka, akupfumela kwaku kukuhuluxile. Hi nomu-lo atlhela avona, kutani alandra Yesu andleleni.

Currently Selected:

Mrk 10: NTX2007

Highlight

Copy