Mrk 1

Ntxhumayelo ya Yohana Mubabatisi

(Mt 3:1-12; Lk 3:1-18; Yhn 1:19-28)

1A kusungula ka Ivangeli ya Yesu Kriste, N'wana wa Xikwembu Nkulukumba#1:1 Man'wana matralwa amanawu a maritu yaku: N'wana wa Xikwembu Nkulukumba. Mayelanu ni tindrimana ta 2-4 lavisa Mlk. 3:1; Ezy 40:3 swanga hi tolokiwo dra khale dra Septuajinta., 2swanga hi leswi swingatraliwa hi muprofeta Ezaya, angaku: Nitaruma a ntrumi yanga amahlweni kwaku, leyi yitakabekisa a ndlela yaku. 3Yene i ritu ledri dribandlukanaka ahuleni driku: Bekisani gudju dra Hosi, na n'wihamba tindlela ta Yone tilulama.

4Xileswo kuhumeleli mhunu lweyi atxhuliwaka Yohana, na ababatisa atikwanini dra hula, na atekisa ahlaya ku vhanu aku: Ndrulukani ku swakubiha n'wiyamukela Babatiso, akuva Xikwembu Nkulukumba atan'widrivalela a swidoho swenu. 5A vhanu hinkwavu va-le-Yudeya ni vayaki va Yerusalema afa vaya yingela Yohana Mubabatisi. Afa vatihlaya a swidoho swavu kutani yene afa avababatisa a nambyeni wa Yordana. 6Yohana afa ayambala xiyambalu xa voya bya kamela, ni bandi dra nhlonge alikhalwini, afa ada humbi ni vulombe bya nhova. 7Afa aku ku xitrhungu: Kuta mun'wana antrhaku kwanga, lweyi anitlulaka hi ntamu, ningafanelikiki akuva nikarama nintrhunxa a ngoti ya tintangu takwe. 8Mine, nin'wibabatisa hi mati, kambe yene atan'wibabatisa hi Moya wa Kuxwenga.

Kubabatisiwa ni kudringiwa ka Yesu

(Mt 3:13—4:11; Lk 3:21-22; 4:1-13)

9Amasikwini lawo, Yesu apfi Nazarete wa Galileya, ababatisiwa hi Yohana Mubabatisi a nambyeni wa Yordana. 10Yesu aku ahahuma matini, avona matilo makendlukile hi le makari, ni Moya wa Kuxwenga wuxikelaka henhla kwake, swanga hi tuva. 11Ava ayingela a ritu ledri dripfaka Tilweni, driku: Wene, u N'wananga lweyi wa kurandreka, lweyi nimutrhavelaka.

12Kutani hi nomu-lo, a Moya wa Kuxwenga wumuyisa ahuleni; 13ayatrhama kone mune wa makume ya masiku, amakari ka swihari na ali kari adringiwa hi Sathana. Na swirun'wa swimutirela.

Vadondrisiwa va kusungula va Yesu

(Mt 4:12-22; Lk 4:14-15; 5:1-11)

14Kuti antrhaku kakubohiwa ka Yohana Mubabatisi, Yesu atlhelela Galileya, arera a Ivangeli ya Xikwembu Nkulukumba, aku: 15A nkama wuhetisekile, a Mfumu wa Xikwembu Nkulukumba wutlhasile. Xileswo ndrulukani n'wipfumela ku Ivangeli. 16Loko Yesu akhaluta kusuhi ni tiva dra Galileya, avona Simoni ni makwavu Andreyasi, na vakukuta ativeni; hikusa afa vali vaphasi va tinhlampfi. 17Yesu aku ku vone: Nilandrani, nitan'wiyentxa vaphasi va vhanu. 18Vone, vahatla vatrika minkukutu, vamulandra. 19Afambiki kutrongonyana, avona Yakobe ni makwavu Yohana, vana va Zebedeya, na vabusetela a minkukutu yavu abyatrhwini. 20Avavitana, vone vahatla vatrika tatana wavu, Zebedeya, abyatrhwini kun'we ni vatiri vakwe, vamulandra.

Wanuna wa moya lowu mfani

(Lk 4:31-37)

21Yesu ni vadondrisiwa vayi Kapernawume. Kuku hi siku dra Savata Yesu anhingena asinagogeni, asungula a kudondrisa. 22A vhanu afa vahlamala hi dondro yake, hikusa afa avadondrisa hi ntamu, kungali swanga hi vadondrisi va Nawu. 23Asinagogeni dravu afa kuni wanuna lweyi angani moya lowu mfani, ahatla abandlukana aku: 24Xana a mhaka yeru na wene hi yini, wene, Yesu wa le Nazarete? U teli kuhisuvisa! Mine nakutiva lweyi unga yene; wene u Muxwengi wa Xikwembu Nkulukumba! 25Kambe Yesu awukhwavela, aku: Miyela, huma ku nuna lweyi. 26A moya lowu mfani wutrekatrekisa nuna lweyo wubandlukana hi ritu ledri drikulu, wuhuma ku yene. 27A vhanu vahangahlolelwa hinkwavu, vava vavutisana, vaku: Xana impswini leswi? Van'wana vaku i dondro yimpswha ni ya ntamu! Mfuri yene aleleta ni mimoya leyi mimfani mimuyingiseta. 28A xidrumo xa Yesu xihatla xihangalaka atikweni hinkwadru dra Galileya.

Yesu ahanyisa mamana wa nkata Petrosi

(Mt 8:14-17; Lk 4:38-41)

29Loko vahumi asinagogeni, Yesu afambi kun'we na Yakobe na Yohana a kaya ka Simoni na Andreyasi. 30A mukon'wana wa xisati wa Simoni afa ayetlelile, ani kuhisa ka miri, kutani vativisa Yesu. 31Atrhindrekeliki, amukhoma hi voko amupfuxa; kutani a kuhisa ka miri kumutrika, ava avatirela.

32Amadambyeni, loko a dambu dripela, vatisa hinkwavu lava vavabyaka, ni lava vaxanisiwaka hi mimoya leyi mimfani. 33A vhanu va muti hinkwawu afa vahlengeletani anyangweni. 34Yesu ahanyisa lava vanyingi, lava vaxanisiwaka hi vuvabyi bya tinxaka-xaka, ahlongola ni mademoni manyingi. Nakone, afa angapfumeleli a mademoni a kuvulavula, hikusa afa mamutiva.

Yesu ativisa a Ivangeli

(Lk 4:42-44)

35Ampundrwini, na kahatimphu, Yesu apfuka, ahuma, atiyela mbangwini wa hula, ayakhongota. 36Simoni ni lava afaka vali na yene, vamulandra. 37Loko vamukumile, vaku ku yene: Hinkwavu vakudjula. 38Kutani Yesu aku ku vone: Ahifambeni kun'wana, amitanini leyi minga kusuhi akuva niyarera na kone, hikusa nihumeli swone. 39Kutani afamba, arera a masinagogeni yavu, ni hi dra Galileya hinkwadru, na ahlongola mademoni.

Kubasisiwa ka nuna wa nhlokonho

(Mt 8:1-4; Lk 5:12-16)

40Mun'we wa nhlokonho ati ku Yesu, awa hi matrolo amahlweni kwake, amukhongota aku ku yene: Loko uswidjula, ungaswikota a kunibasisa. 41Yesu aviki ni vurombe, analavuta a voko amukhumba, aku ku yene; Naswidjula! Basisiwa. 42Hi nomu-lo a nhlokonho yimutrika, abasisiwa. 43Yesu ahatla amulaya ngopfu, amutlhelisa aku: 44Tivoneli, ungayibyela mhunu xa ntxhumu. Kambe famba ku muprista, akuva uyisa ku yene leswi Moxe angaleleta swone, hinkonta ya kubasisiwa kwaku, leswaku byiva vumboni ku vone. 45Kambe a nuna lweyo, aku awasuka, asungula a kuhuwelela leswi swinyingi ni kudrungula leswi swimuhumeleliki, lakakuva Yesu angahaswikoti ni kunhingena amutini mun'we alivaleni. Kambe afa atitrhamela handle, amimbangwini ya mananga; kutani vaya ku yene, vapfa matlhelweni hinkwawu.

Currently Selected:

Mrk 1: NTX2007

Highlight

Copy