Mt 27

Yesu anyiketiwa ku Pilatu

(Mrk 15:1; Lk 23:1-2; Yhn 18:28-32)

1Loko byixile, hinkwavu vaprista lava vakulu ni vakulu va tiko vakhanela makungu ya kudlaya Yesu. 2Kutani vamuboha, vayamunyiketa ku Pilatu, mufuminyana.

Mafela ya Yudasi

(Mnt 1:18-19)

3Yudasi, lweyi amuwongiki, loko avoni leswaku Yesu ayavanyisiwile, andruluka, atlhelisela mali ya silivhela ya makume mararu ku vaprista lava vakulu ni vakulu va tiko; 4aku ku vone: Nihonile, niwongiki angati leyi yingekena nandru. Vone vayangula vaku: Swina yini ku hine, i mhaka yaku. 5Yene-ke, atiki atxukumeta a mali aNdlwini ya HOSI, asuka ayatisunga.

6A vaprista lava vakulu vateka a mali, vaku: Swayila a kunhingenisa a mali leyi anhlengweni hi leswi dringa hakelo dra ngati. 7Loko vakhanelile, vaxava ha yone a nsimu ya muvumbi, akuva wuva ntimu wa va-Matiko. 8Hi leswo a nsimu leyo yitxhuliwi Nsimu ya Ngati, kutlhasa namuhla. 9Hi nkama lowo, kuhetiseka leswi swingahlayiwa hi muprofeta Yeremiya#27:7-9 Yeremiya: kukombisiwa a maritu lawa mafambelanaka na Zk 11:12-13, na kuvoniwa kambe ni mhaka ya kuxaviwa ka nsimu leyi yihlayiwaka ha Yr 32:6-15. lweyi angaku: Vateki a mali ya silivhela ya makume mararu, dringa hakelo dra lweyi apimanisiwiki, lweyi a vana va Israyele vamupimanisiki, 10vahumexi yone akuxava nsimu ya muvumbi, swanga hi leswi a HOSI yinileletiki swone.

Yesu amahlweni ka Pilatu

(Mrk 15:2-5; Lk 23:3-5; Yhn 18:33-38)

11Yesu afa ayimi amahlweni ka mufuminyana, lweyi amuvutisiki aku: Xana wene u HOSI ya va-Yuda, xana? Yesu ayangula aku: Uhlaya swone. 12Kambe loko a vaprista lava vakulu ni vakulu va tiko vamurambela, angayangulanga ntxhumu. 13Kutani Pilatu aku ku yene: Xana awuswiyingeli leswi lava vakurambelaka ha swone? 14Kambe amiyela angayanguli ritu ni drin'we, lakakuva a mufuminyana ahlamala ngopfu.

Yesu ayavanyiseliwa lifu

(Mrk 15:6-15; Lk 23:13-25; Yhn 18:39—19:16)

15Hi masiku ya nkhuvu a mufuminyana afa atolovela a kuntrhunxa mun'we wa vabohiwa lweyi ahlawuliwaka hi xitrhungu. 16Kolahu-ke afa kuni mubohiwa mun'we lweyi wa kutibyiwa ngopfu lweyi a vito drakwe afaka vaku i Barabasi. 17Kutani Pilatu avutisa lava vahlengeletaniki aku: Xana n'widjula leswaku nin'wintrhunxela mani? Barabasi kumbe Yesu lweyi ahlayiwaka Kriste? 18Hikusa afa aswitiva leswaku vamunyiketi yene hi matrhoho.

19Kuti loko atrhamisi ahubyeni, a nsati wakwe arumela a ritu aku ku yene: Kungatxhuke kuvani ntxhumu amakari kwaku ni mululami lweyo, hikusa nixaniseki ngopfu namuhla, anorweni, hinkonta yake.

20Kambe vaprista lava vakulu ni vakulu va tiko vakholwisa a switrhungu akuva swikombela Barabasi, Yesu yene adlayiwa. 21A mufuminyana atlhela avavutisa aku: Hi mani ku lava vabiri n'widjulaka akuva nin'wuntrhunxela yene xana? Vone vaku Barabasi. 22Pilatu avavutisa aku: Nitayentxa yini ha Yesu lweyi valiki i Kriste? Hinkwavu vaku: Avambiwe. 23A mufuminyana aku ku vone: Xana ayentxi xihono xini? Kambe vatshima kubandlukana vaku: Avambiwe. 24Pilatu loko avona leswaku angakoti ntxhumu, ni leswi a pongwe, driyaka mahlweni, ateka mati ahlamba mandla amahlweni ka xitrhungu aku: Ningavena nandru angatini ya mululami lweyi; swivonani n'wine. 25A vhanu hinkwavu vaku: A ngati yake ayiwele ahenhla kweru ni vana veru.

26Kolahu Pilatu avantrhunxela Barabasi, antrhaku ka loko Yesu apswhitiwile, avanyiketa yene akuva avambiwa.

A masotxha matreketrela Yesu

(Mrk 15:16-20; Yhn 19:2-3)

27A masotxha ya mufuminyana mateki Yesu mamuyisa andlwini ya vufumi, vamuhlengeletela a butrhu hinkwadru; 28#Lavisa Zk 9:9. kutani vamususa a swiyambalu swake, vamuyambexa a kapulana dra libungu; 29maluka a hari ya mitwa mayitlhanteka anhlokweni yake, mamutamelisa ni lihlanga avokweni dra xinene; mamukhisamela, mamutreketrela maku: Xawani HOSI ya va-Yuda; 30mamuthukela mari, mateka a lihlanga mamuba a nhloko yake.

31Antrhaku ka loko mamutreketrelile, masusa a kapulana ledri dra libungu matlhela mamuyambexa a swiyambalu swake, mamufambisa akuva maya muvamba.

Kuvambiwa ka Yesu

(Mrk 15:21-32; Lk 23:26-43; Yhn 19:17-27)

32Loko vahuma, vakuma a wanuna lweyi valiki i Simoni wa le Kirene, lweyi vamusindrisiki a kubyatrha a xihambanu xa Yesu. 33Loko vatlhasi ambangwini lowu valiki i Gologota#27:33 A vito drimbeni dra Gologota i Kalvhari; Nhava leyi yinga kun'we na Yerusalema, lomu Yesu angavambiwa kone., hileswaku mbangu wa Pala, 34vamunyika a vhinyo ledri dripatriwiki ni nyongwa#27:34 A ritu dra Xigirika ledri hi ntoloveto dritolokiwaka hileswaku nyongwa drikombisa a ximurana xa kubava ngopfu, kumbe angava nhome leyi yisusiwiki ku swinsinyana swa nhome ya kubava. akuva anwa, kambe loko adringile angarandranga kunwa.

35Loko vatava vamuvambile, vayavelana a swiyambalu swake hi kuhamba mpswhampswha. 36Kutani vatrhamisa kone vamulavelela. 37Hile henhla ka nhloko ya Yesu vagongondrela a tralwa ledri drihlayaka a mhaka leyi afaka vamurambela ha yone: LWEYI HI YESU HOSI YA VA-YUDA. 38Kun'we na yene kuvambiwi vayivi vabiri, mun'we axineneni mun'wana aximantrhini.

39Lava afaka vahundra kolano afa vamuruketela vamuhlakahlela tinhloko, 40vaku: Mubutrhuti wa Tempele ni muyaki wa drone ha masiku mararu! Tihuluxe! Loko uli N'wana wa Xikwembu Nkulukumba, xika Xihambanwini. 41Na vone a vaprista lava vakulu kun'we ni vadondrisi va Nawu ni vakulu va tiko afa vamutreketrelisa xiswoswo vaku: 42Ahanyisi van'wana, yene ahluleka a kutihanyisa. Loko ali HOSI ya Israyele, axike swoswi xihambanwini hita pfumela ku yene. 43Adumbi Xikwembu Nkulukumba, amuhuluxi swoswi, loko amurandra; hikusa ati: Ni N'wana wa Xikwembu Nkulukumba! 44Na vone vayivi lava vavambiwiki kun'we naye, afa vamusandra hi maritu wolawo.

Ta kufa ka Yesu

(Mrk 15:33-41; Lk 23:44-49; Yhn 19:28-30)

45Akusukela ku nkama wa ntlhanu na mun'we, kuyatlhasa ku wa ntlhanu na mune, kavi ni munyama amisaveni hinkwayu. 46#Lavisa Mps 22:2. Hi nkama wolowo Yesu abandlukana hi ntamu aku: Eli, Eli, lama sabaktani, hileswaku: Xikwembu Nkulukumba wanga, Xikwembu Nkulukumba wanga, xana unitrikeli yini? 47Van'we amakari ka lava afaka vali kone, loko vamuyingela ahlaya leswo, vaku: Avitana Eliya. 48Kutani mun'we ku vone atrutruma ayateka xiponji axitata hi nhlowa, axitlhoma lihlangeni atrhindrekela amunyika. 49Kambe a van'wana afa vaku: Trikani, hita vona loko kumbe Eliya ata muhuluxa. 50Kutani Yesu kambe atlhela ayengesa abandlukana hi ntamu, anyiketa a moya wakwe, afa. 51Hi nkama wolowo, a kapulana dra Tempele drihandruka hi le makari, kusukela henhla kuyatlhasa a hansi. A misava mitrekatreka, a maribye mapandreka. 52A maxira mapfuleka, ni miri ya vunyingi bya vahlawuleki lava afaka vayetlelile, mipfuxiwa. 53Kolahu antrhaku kakupfuka ka Yesu akufeni vanhingena a mutini lowu wa kuhlawuleka, Yerusalema lomu vavoniwiki hi lava vanyingi.

54A ndruna ya dzana (100) dra mabutrhu ni mabutrhu lawa afaka malavelela Yesu, loko vavona kutrekatreka ka misava, ni leswi swihumeleliki, vatxhava ngopfu vaku: Ha kunene, lweyi afa ali N'wana wa Xikwembu Nkulukumba.

55Nakone afa kuni vavasati lava vanyingi, valavisa hi le kule, lava afaka valandri Yesu ni kumupfuna kusukela a Galileya. 56Amakari kwavu afa kuna Maria Magdala, na Maria mamana wa Yakobe na Yosefa ni mamana wa vana va Zebedeya.

Kulahliwa ka Yesu

(Mrk 15:42-47; Lk 23:50-56; Yhn 19:38-42)

57Dritiki drapela, kuta a mhunu wa xipfundri, wa le Arimateya, a vito drakwe i Yosefa, na yene aviki mudondrisiwa wa Yesu. 58Yelweyiyo aya ku Pilatu, akombela a miri wa Yesu. Pilatu aleleta leswaku anyikiwa. 59Kutani Yosefa ahangateka a miri amintrondriyela hi kapulana dra ntlhohe, 60ayamibeka axireni drakwe ledri drimpswha, ledri afaka akeli ribyeni; apfingula a ribye ledri drikulu apfala a nyangwa ya xira, kutani atifambela. 61Kambe Maria wa le Magdala na Maria mun'wana afa vatrhamisi kone, amahlweni ka xira.

Kulaveleliwa ka xira

62A siku ledri drintlhantamaka, dringa ledri drilandraka dra kutibekisela, a vaprista lava vakulu ni vafarisi vahlengeletana ku Pilatu, 63vaku: N'winyi weru, hahadrimuka leswaku a mukanganyisi lwiya, loko ahahanya ati: Nitapfuka akufeni loko kuhundri masiku mararu. 64Hileswo-ke, leleta leswaku a xira drilaveleleliwa swinene kutlhasa ku siku dra vuraru. Hikusa a vadondrisiwa vakwe vangatxhuka vamuyiva, kutani vaku ku tiko: Apfuki kufeni. Kutani a madrimi lawa ya vugamu matatlula a ya kusungula. 65Pilatu aku ku vone: N'wini vulaveleli, fambani n'wiyalavelela hi laha n'witivaka ha kone.

66Kutani vafamba vayalavelela xira, vabeka ni mfungo ahenhla ka ribye kun'we ni valaveleli.

Currently Selected:

Mt 27: NTX2007

Highlight

Copy