Mt 28
28
Kupfuka ka Yesu akufeni
(Mrk 16:1-10; Lk 24:1-12; Yhn 20:1-10)
1Antrhaku ka Savata, ampundrwini wa siku dra kusungula dra vhiki, Maria wa le Magdala na Maria mun'wana vafambi vaya vona a xira. 2Kutani vonani, kuvi ni kutrekatreka loku kukulu ka misava, hikusa a ntrumi ya HOSI afa yixiki hi le Tilweni, yitrhindrekela axireni yipfingula a ribye, yitrhamisa ku drone; 3a mavonekela ya yone afa mahamba swanga i lihati, ni swiyambalu swa yone afa swili swa ntlhohe swanga xitrhwatrhwa; 4kutani a valaveleli vatrekatreka hi kutxhava yone vava vandruluka swanga hi vafi.
5A ntrumi yiku ku vavasati lavaya: N'wine n'wingatxhaveni; naswitiva leswaku n'widjula Yesu, lweyi avambiwiki. 6Anga kone la, hikusa apfukile kufeni, swanga hi leswi afaka ahlayile. Tanani n'witata vona mbangu lowu afaka ayetleli ku wone. 7Na swone kahlulani n'wiyabyela a vadondrisiwa vakwe leswaku apfukile kufeni, vonani yene an'wirangela aya Galileya, hi lomu n'witakayamuvona kone. Hi swoleswo, nin'wibyelile.
8Kutani vahatla vasuka axireni hi kutxhava, ni kunyoxa loku kukulu, vatrutruma vayabikela a vadondrisiwa vakwe.
9Kutani vonani, Yesu avatlhangaveta aku ku vone: Xawani! Kutani vone vatrhindrekela ku Yene, vamukhoma a minenge, vamugandrela. 10Yesu aku ku vone: N'wingatxhaveni. Fambani n'wiyabikela a vamakweru leswaku vaya Galileya; hi lomu vatakanivona kone.
Madrimi ya vakulu va tiko
11Loko a vavasati vahafamba, vonani, van'we va valaveleli, vaya a mutini, vayadrungulela a vaprista lava vakulu hinkwaswu leswi swihumeleliki. 12Kutani vone vahlengeletana ni vakulu va tiko, vakhanela makungu, vanyika a masotxha a mali leyi yakutala, 13vavaleleta vaku: Hlayani leswaku a vadondrisiwa vakwe vatile ni vusiku, vatatamuyiva, na hine hiyetlelile. 14Loko a mufuminyana aswiyingela, hine hitamukholwisa, hin'wixirelela. 15Vone-ke, vayamukela a mali, vayentxisa xiswoswi vabyelisiwiki xiswone. Kutani a ritu ledro dritwali amakari ka va-Yuda, kutlhasa ni namuhla.
Yesu ahumelela ku vadondrisiwa vakwe a Galileya
(Mrk 16:14-18; Lk 24:36-49; Yhn 20:19-23; Mnt 1:6-8)
16Kutani a vadondrisiwa lava va khume na mun'we vasuka vaya Galileya anhaveni leyi Yesu afaka avaleleti yone. 17Loko vamuvona, vamukhisamela, kambe van'wana afa vaganaganeka.
18Kolahu Yesu atrhindrekela akhanela navu aku: Ninyikiwi ntamu hinkwawu ni vuhosi atilweni ni le misaveni. 19Hileswo-ke, fambani n'wiyadondrisa a matiko hinkwawu, n'wivababatisa hi vito dra Tatana ni dra N'wana ni dra Moya wa Kuxwenga, 20n'wivadondrisa a kubekisa hinkwaswu leswi nin'wileletiki swone. Na swone lavisani, mine nina n'wine masiku hinkwawu kukondra kuhela a minkama.
Currently Selected:
Mt 28: NTX2007
Highlight
Share
Copy
Want to have your highlights saved across all your devices? Sign up or sign in
Xironga New Testament with Psalms © Bible Society in Mozambique, 2007.
Free Reading Plans and Devotionals related to Mt 28
The Last Week
BibleProject | Holy Week & Easter
Faith & Love: A One Year Bible Reading Plan - Part 5
