Mt 24

Yesu akhanela hi kumbundrumuxiwa ka Tempele

(Mrk 13:1-2; Lk 21:5-6)

1Kuti loko Yesu ahuma a Tempeleni, atifambela, a vadondrisiwa vakwe vamutrhindrekelela vamukomba mayakiwela ya Tempele. 2Kutani avayangula aku ku vone: An'wiswivoni hinkwaswu leswi? Nihlayelamfuri nili ku n'wine: kungaka kungasali ribye a henhla ka ribye ledri dringatiki mbundrumuxiwa.

A masungulu ya mahlomulo

(Mrk 13:3-13; Lk 21:7-19)

3Kuti loko atrhami nhaveni ya Minhlwari, a vadondrisiwa vakwe vatrhindrekela ku Yene na vali swavu vaku: Hibyele a nkama lowu switakahumelela ha swone, utivisa ni xikombiso xa kubuya kwaku, ni xa kuhela ka misava? 4Yesu avayangula aku: Tivonelani, n'wingatitxhuka n'wikanganyisiwa hi mhunu. 5Hikusa lava vanyingi vatata hi vito dranga vaku: Hi mine Kriste, vatakanganyisa a vakutala. 6N'witayingela tiyimpi ni pongwe dra tiyimpi; tivonani, n'wingatxhukeni; hikuva swifanekeli kuhumelela; kambe abyisiva vugamu. 7Hikusa a tiko drin'we dritapfukela drin'wana, ni mfumu mun'we wutapfukela mun'wana. Kutava ni tindlala amimbangwini minyingi. 8Hinkwaswu leswi atava kusungula ka mahlomulo.

9Kutani vatan'winyiketa akuxanisekeni, vatan'widlaya; n'witavengiwa hi matiko hinkwayu hinkonta ya vito dranga. 10Hi nkama lowo lava vanyingi vatakhunguvanyisiwa, vatawongana, ni kuvengana. 11Kutahumelela vaprofeta vanyingi va madrimi, vakanganyisa lava vanyingi. 12Hinkonta ya kuyandra ka vubihi, a lirandru dra lava vanyingi dritatitimeta. 13Kambe lweyi atiyiselaka kuyatlhasa vugan'wini, atahuluxiwa. 14Kutani a Ivangeli ya Mfumu yitareriwa akuva byiva vumboni amisaveni hinkwayu; ntrhaku hi kone kutakata vugamu.

A mahlomulo lawa makulu

(Mrk 13:14-23; Lk 21:20-24)

15 # Lavisa Dn 11:31; 12:11. Hileswo-ke kutaku loko n'wivona a manyala ya kuhlasela, lawa amahlayiki muprofeta Daniel, na me mbangwini wa kuhlawuleka (lweyi adondraka leswi, aswiyingelisise), 16lava vanga Yudeya avatrutrumele atinhaveni; 17lweyi anga henhla ka yindlu yake anga txhuke axika aya titekela swa yindlu yake; 18ni lweyi anga masin'wini, anga txhuke atlhelela ntrhaku kuya teka swiyambalu swake. 19Yowee lava vatakava ni tinyimba ankameni lowo, ni lava vatakava vayan'wisa! 20Khongotani leswaku a kutrutruma kwenu kungavi hi vuxika na kone kungavi hi Savata; 21hikusa kutavani nhlomulo wukulu, lowu swanga ha wone, wungasamikiki wuva kone kusukela loko misava mitumbuluxiwa, mfuri wungahatikiva kone. 22Loko a masiku lawo amangagomisiwanga, afa kungahulukanga mhunu ni mun'we; Kambe hinkonta ya vahlawuliwa, amasiku lawo matagomisiwa.

23Loko mhunu an'wibyela aku: Lavisani, Kriste hi lweyi la kumbe, lahaya, n'wingapfumeleni. 24Hikusa kutahumelela lava vatakatihlaya va Kriste hi madrimi, ni vaprofeta va madrimi, vatakahumexa swikombiso leswi swikulu ni mahlolana, akuva loko swikoteka, kukanganyisiwa na vone a vahlawuliwa. 25Vonani, nin'wibyeli swingasina humelela. 26Hileswo-ke, loko vaku ku n'wine: Lavisani, hi lwiya ahuleni, n'wingahumeni; kumbe vaku: Lavisani, hi lwiya atindlwini; n'wingapfumeleni. 27Hikusa swanga hi lihati drivoniwaka na drivaninga kusukela avuxeni kuyatlhasa vupeladambu, switava tanu ni kubuya ka N'wana wa Mhunu.

28Lomu a ntrumbu wutakava kone, hi lomu makhoti matakahlengeletana kone!

A kubuya ka N'wana wa Mhunu

(Mrk 13:24-27; Lk 21:25-28)

29Ntrhaku ka masiku lawo ya nhlomulo, a dambu dritandruluka driva dra ntima, ni hweti yingativaninga, a tinyeleti titawa hi le tilweni, a mintamu ya matilo mitatrekatrekisiwa. 30Hi laha kutakavoniwa atilweni a xikombiso xa N'wana wa Mhunu, a matiko hinkwawu ya misava matadrila, mfuri matavona a N'wana wa Mhunu loko abuya hi matlavi ya tilo na ani ntamu lowu wukulu ni kuphatima. 31Ataruma a tintrumi takwe hi mpfumawulu wa mhalamhala, akuva swihlengeleta vahlawuliwa vakwe vapfa ku mune wa matlhelo ya misava, kusukela ku tlhelo drin'we kuyatlhasa ku tlhelo drin'wana dra tilo.

A dondro ya nkuwa

(Mrk 13:28-37; Lk 21:29-33; 17:26-30,34-36)

32Dondrani hi xifaniso xa nkuwa. Loko tinkambu ta wone tisungula kunabyala, kuhluka ni makamba, n'waswitiva leswaku a minyuku mikusuhi. 33Hi swoswo, na n'wine, loko n'wivona hinkwaswu leswo, switivani leswaku Yene#24:33 A tolokiwo drin'wana drikotekaka hi ledri: Yene (A N'wana wa mhunu). ale kusuhi, anyangweni. 34Nihlayelamfuri nili ku n'wine: A vhanu va nkama lowu vangaka vangakhaluti, na leswo hinkwaswu swingasinahumelela. 35A tilo ni misava switahundra, kambe a maritu yanga mangaka mangahundri. 36Kambe a siku ni nkama, akuna mhunu lweyi aswitivaka, nambi tili tintrumi ta Tilo, nambi ali N'wana, loko angali Tatana ntsena.

37Kambe, swanga hi masiku ya Nowa, a kubuya ka N'wana wa Mhunu kutava tanu. 38Hikuva swanga hi leswi afaka vada, vanwa, vatekana, vatekisa, amasikwini lawa mangarangela a ntita, kuyatlhasa siku ledri Nowa anganhingena angalaweni, 39na swone afaka vangativi ntxhumu, kukondra kutlhasa a ndhambi yivaheta hinkwavu; hi swoswo, na kone kubuya ka N'wana wa Mhunu kutava tanu. 40Ankameni lowu a vavanuna vabiri vatava masin'wini, mun'we atatekiwa mun'wana atatrikiwa. 41A vavasati vabiri vatava na vasila aribyeni dra kusila: mun'we atatekiwa mun'wana atatrikiwa.

42Hitekani-ke, hikusa an'witivi a siku ledri a HOSI yenu yitakata ha drone. 43Kambe tivani leswi: Loko fanga n'winyi wa yindlu ativi nkama lowu a muyivi atakata ha wone, afa atalavelela angamupfumeleli a kutlhanya a yindlu yake. 44Hi swoswo na n'wine tilulamiselani hikusa a N'wana wa Mhunu atata hi nkama lowu n'wingawuyanakanyikiki.

Xifanisu xa vatiri vabiri

(Lk 12:41-48)

45Hi mani-ke a mutiri lweyi wa kudumbeka ni kutlhariha, lweyi a hosi yake yimubekiki a henhla ka ndangu wa yone, akuva awuyavela a swakuda hi nkama lowu wufanekelaka, xana? 46Kukateki a mutiri lweyi kutakaku loko a hosi yake yibuya, yimukuma na atirisa xiswoswo. 47Nihlayelamfuri nili ku n'wine: yitamubeka a henhla ka vukosi bya yone hinkwabyu. 48Kambe kungaku loko a mutiri lweyi mfani, ahlaya mbilwini yake aku, a hosi yanga yahlwela, 49asungulaka a kuba a vatirikulobye, ada, anwa kun'we ni timpopswi; 50a hosi ya mutiri lweyo yitata hi siku ledri angayilaviselikiki ha drone ni nkama lowu yene angawutivikiki, 51kitani atamutravukanyisa, amunyika vutrhamu byake kun'we ni vamandrendre. Lahu kutava ni xidrilo ni kuketrela ka menyo.

Currently Selected:

Mt 24: NTX2007

Highlight

Copy