Mt 23

Yesu asandra vatrali ni vafarisi

(Mrk 12:38-40; Lk 11:43-52; 20:45-47)

1Kutani Yesu akhanela ni switrhungu ni vadondrisiwa vakwe aku: 2A xitrhan'wini xa Moxe kutrhami a vatrali ni vafarisi. 3Hinkwaswu leswi van'wibyelaka swone swiyentxani, n'wiva n'wiswibekisa; kambe n'wingalandri a mintiro yavu, hikusa vahlaya kambe avayentxi. 4Vatrimbelela mintrhwalu ya kubindra leyi mingakotiwikiki kumirwala, vantlhanteka a makatleni ya vhanu, kasi vone avadjuli kumihlekahlekisa, nambi hi litiho. 5Hinkwaswu leswi vaswiyentxaka, vaswiyentxela akuva vatavoniwa hi vhanu. Hikusa vayanamisa tifilatera#23:5 Tifilatera: swikombiso swakuhambiwa hi swikhumba, leswi afaka kutraliwa ku swone a tindrimana ta swileleto swa Nawu wa Xikwembu Nkulukumba, leswi a va-Yuda afaka vaswitrimba aswiyambalwini swavu swa vukhongoti. Lavisa Tnhl 15:38-41; Mlw 22:12. tavu, valehisa ni makhaxa ya swiyambalu swavu. 6Varandra a vutrhamu bya xihluwa aminkhubyini, ni switrhamu swa le mahlweni amasinagogeni, 7ni kulosiwa atihubyini, ni kuhlayiwa hi vhanu: Rabbi (mudondrisi). 8Kambe n'wine n'wingadjuleni kutitxhula Rabbi, hikusa i mun'we ntsena a Mudondrisi wenu, n'wine hinkwenu n'wi vamakwavu-na-makwavu. 9Mfuri n'wingatxhuleni mhunu Tatana wenu laha misaveni, hikusa Tatana wenu i mun'we ntsena, lweyi wa le Matilweni. 10Nakone n'wingatxhulananeni varangeleni, hikusa a Murangeli wenu i mun'we ntsena, anga Kriste. 11Kambe lwe nkulu ku n'wine atava mutireli wenu. 12Hikusa mani na mani lweyi atakatikulisa, atatrongahatiwa, kambe lweyi atakatitrongohata atakulisiwa.

13Kambe yowee, n'wine vatrali ni vafarisi va mandrendre! Hikusa n'wipfalela vhanu a Mfumu wa Matilo; na kone n'wine an'winhingeni, mfuri an'wivapfumeleli lava varandraka a kunhingena.

[ 14#23:14 Andrimana leyi ayikumeki ku matolokela manyingi ku buku dra Matewu; kambe makumeka ku mabuku man'wana swanga hi Mrk 12:40; Lk 20:47. Yowee, n'wine vatrali ni vafarisi va mandrendre! Hikuva n'wiphangaka a tiyindlu ta mafelwa, n'wititxhavelela hi kuhamba a swikhongoto swakuleha; hinkonta ya leswo n'witayamukela yavanyiso ledri drihundrisaka.]

15Yowee, n'wine vatrali ni vafarisi, vamandrendre! Hikusa n'witekisa n'wifamba hi misava ni lwandle akuva n'wikuma mupfumeli mun'we, kutani loko n'wimukumile, n'wimuhamba ava n'wana gehena ha kubiri kutlula n'wine.

16Yowee, n'wine varangeli vakufa-mahlu! N'wiliki: Loko a mhunu afunga hi Tempele, ahi ntxhumu; kambe loko afunga hi gole dra Tempele, atasindriseka a kulandra leswi aswifungiki. 17Masinge ni vakufa-mahlu! Xana hi xini lexi xinga xikulu? I gole kumbe i Tempele, leyi yiyentxaka leswaku a gole drihlawuleka? 18Nakone n'wili: Lweyi afungaka hi xiluvelo, leswo ahi swa ntxhumu; kambe lweyi afungaka hi mhamba leyi yinga xiluvelweni, atasindriseka a kulandra leswi aswifungiki! 19Swifamahlu! Xana lexi xinga xikulu hi xini ke? I mhamba, kumbe i xiluvelo, lexi xiyentxaka a mhamba yihlawuleka? 20Hileswo-ke, lweyi afungaka hi xiluvelo, afunga ha xone ni hinkwaswu leswi swinga henhla ka xone. 21Nakone mfuri, lweyi afungaka hi Tempele, afunga ha yone, ni hi lweyi atrhamaka ku yone. 22Na swone lweyi afungaka hi Tilo, afunga hi xitrhamu xa Xikwembu Nkulukumba ni lweyi atrhamaka ku xone.

23Yowee, n'wine vatrali ni vafarisi va mandrendre! Hikusa n'wihlenga hi kupumba swa vukhume bya swimbowana ni bya swimilwa swin'wana, kasi n'witriki leswi swinga nsinya wa Nawu, byinga vululami, ni vumbilu ni kupfumela. Afa swidjuleka leswaku n'wiyentxa leswi, n'wingatriki leswiya. 24Vafambisi vakufa-mahlu, n'wihluta a nsuna, kasi n'wimita a kamela!

25Yowee, n'wine vatrali ni vafarisi va mandrendre! N'winhlampswa a handle ka ntrheko ni mbenga, kasi andreni kutali hi vuyivi ni nxambya.

26Mufarisi wa kufa-mahlu! Nhlampswa kusungula andreni ka ntrheko ni mbenga, akuva na kone a handle kutabasa.

27Yowee, n'wine vatrali ni vafarisi va mandrendre! Hikusa n'wifana ni maxira lawa matotiwiki hi mhemba hi le handle, mavoneka maxongi ngopfu#23:27 A maxira afa mapendiwa hi ntlhohe akuva mavoneka swinene a vusikwini, leswaku kungayi mhunu aya makhumba hi xihoxo, hikusa leswo aswipfuxa a kunyama hi tlhelo dra Nawu. Lavisa Tnhl 19:16., kambe andreni matali hi marambu ya vafi ni tinxaka hinkwatu ta nxambya. 28Hi swoswo na n'wine, hi le handle ingi n'wi vhanu vanene, kasi andreni n'witali hi mandrendre ni vusomboloki.

29Yowee, n'wine vatrali ni vafarisi va mandrendre! Hikusa n'wiyakaka a maxira ya vaprofeta, n'wiva n'wixongisa a maxira ya valulami, 30kutani n'wiku: Loko afa havi kone a minkameni ya vatatana veru, ana hingatlhangananga navu a kuhalateni ka ngati ya vaprofeta. 31Hi swoswo n'witiyisa ha swenu leswaku n'wi vana va lava vadlayiki vaprofeta. 32Tatisane-ke a mpimu wa vatatana venu.

33Tinyoka! Lixaka dra swipswhahla! Xana n'witahulukisa kuyini akuyavanyiseliweni ka gehena? 34Hileswo-ke nitan'wirumela a vaprofeta, tintlhari ni vatrali; kambe van'we vavu n'witavadlaya n'wiva n'wivavamba, van'wana n'witavaba amasinagogeni yenu, n'witavahlongolisa kusukela ku muti mun'we kuyatlhasa ku mun'wana. 35Akuva ngati hinkwayu ya kululama hitawela henhla kwenu, leyi yingahalatiwa amisaveni, kusungula hi ngati ya Abele, mululami, kuyatlhasa ku Zakariya, n'wana Barakia#23:35 Kuyanakanyiwa leswaku atava ali Zakariya lwiya, lweyi ahlayiwaka n'wana Yehoyada ku 2 Mak 24:20-22., lweyi n'wingamudlaya amakari ka vuhlawuleko ni xiluvelo. 36Nihlayelamfuri nili ku n'wine: Hinkwaswu leswo switata henhla ka lixaka ledri!

A kukarateka ka Yesu a Yerusalema

(Lk 13:34-35)

37Yerusalema, Yerusalema, udlayaka a vaprofeta uva ukhandlatela hi maribye a varumiwa ku wene! Ha kangani nirandriki kuhlengeleta a vana vaku swanga hi huku leyi yihlengeletaka a switxuwana ahansi ka timpapa! Kambe wene awuswidjulanga! 38Vonani, a yindlu yenu yisala drili rumbi. 39Hikusa nan'wibyela nili: N'wingaka n'wingahanivoni kukondra n'wiku: Akukhensiwe lweyi ataka hi vito dra HOSI.

Currently Selected:

Mt 23: NTX2007

Highlight

Copy