Mt 22
22
A xifaniso xa varambiwa ankhubyini.
(Lk 14:15-24)
1Kutani Yesu atlhela avayangula na akhanela hi swifaniso, aku: 2A Mfumu wa Matilo wufana ni mufumi lweyi angahamba a nkhuvu wa vukati bya n'wanake wa wandrisanyana. 3Aruma a malandra yake mayavitana lava avarambiki ankhubyini, kambe vayala kuta. 4Atlhela aruma man'wana malandra aku: Byelani a varambiwa leswaku nilulamisi swakuda swanga; A tihomu tanga ni swifuyo swakunona switlhabyiwile, hinkwaswu swilulamisiwile. Tanani ankhubyini. 5Vone kambe avahlayanga ntxhumu ha swone, vatisukela, mun'we aya nsin'wini yake, mun'wana aya amabindrwini yake, 6van'wana vakhoma a malandra vamaxanisa, vamadlaya. 7A mufumi ahlundruka ngopfu, aleleta mabutrhu yake kuyahelisa vadlayi lavo, ni kuhisa a muti wavu.
8Hikolahu abyela a malandra yake aku: A nkhuvu wubekisiwile, kambe a varambiwa afa wungavafanelanga. 9Ke, fambani amatlhanganweni ya tindlela, n'wivitanela ankhubyini hinkwavu lava n'witakavakuma. 10A malandra mafamba maya tindleleni, mayahlengeleta hinkwavu vhanu lava mavakumiki, lava vamfani ni lava vanene, a yindlu ya nkhuvu yitala hi varambiwa. 11A mufumi atiki anhingena andlwini ya nkhuvu akuva avona a varambiwa, avona wanuna mun'we lweyi angayambalangakiki a xiyambalu xa nkhuvu. 12Aku ku yene: Nakulori, xana unhingenisi kuyini kola, na ungena xiyambalu xa nkhuvu? Lweyo amiyela. 13Kutani a mufumi abyela malandra aku: Trimbani minenge ni mavoko yake n'wimutxukumeta ahandle amunyameni, lomu kutakava ni swidrilo ni kuketrela ka menyo.
14Hikuva lava vavitaniwiki i vanyingi, kambe lava vahlawuliwiki i vatrongo.
Mhaka ya tinemba
(Mrk 12:13-17; Lk 20:20-26)
15Kutani a vafarisi vafamba vayakhanela kun'we vatamuphasisa kuyini amaritwini. 16Vahangaruma ku yene a vadondrisiwa vavu, kun'we ni va-Heroda, vayaku: Mudondrisi, haswitiva leswaku uwa xihlayelamfuri, ni leswaku udondrisa a ndlela ya Xikwembu Nkulukumba hi xihlayelamfuri; ni leswaku awutxhavisiwi hi mhunu hikuva awulangusi vuso bya mhunu. 17Ke hibyele, uli yini hi leswi: Xana swapfumeleliwa a kuhumexela Khezari a tinemba, kumbe ahi swone, xana?
18Kambe Yesu ativiki miyanakanyu yavu ya kubiha, aku ku vone: Va mandrendre, hayini n'winidringa? 19Nikombani a mali ya tinemba. Vamunyiketa a Denari. 20Yesu aku ku vone: Xana a xifaniso lexi ni vito ledri dritraliwiki i swa mani? 21Vone vayangula vaku I swa Khezari. Kutani Yesu avabyela aku: Ke nyikelani ku Khezari leswi swinga swa Khezari, ni ku Xikwembu Nkulukumba leswi swinga swa Xikwembu Nkulukumba. 22Vatiki vayingela leswo, vahlamala ngopfu, kutani vamutrika vatifambela.
Mhaka ya kupfuka kufeni
(Mrk 12:18-27; Lk 20:27-40)
23Hi siku droledro, a vasaduki vahlayaka leswaku akuna kupfuxiwa ka vafi, vaya ku yene, vamuvutisa vaku: 24#Lavisa Mps (Salmo) 110:1. Mudondrisi, Moxe ahibyeli leswaku loko a mhunu afa na angakumanga n'wana, a makwavu afanela kutekana ni mufelwa ava nkatakwe atapfuxela vana a makwavu lweyi afiki. 25Ke, amakari kweru afa kuni ntlhanu na vabiri wa vamakwavu-na-makwavu. Lweyi wa nhondrwa ateka nsati ava afa. Hikuva angavangana vana, a mufeliwa asala atekiwa hi lweyi wa vubiri. 26Swiva tanu ku lweyi wa vubiri, ntrhaku ni lweyi wa vuraru, kuko swiyatlhasa ku lweyi wa vuntlhanu na vubiri. 27Ntrhaku, ni yelweyi wansati afa. 28Xana-ke, akupfuxiweni ka vafi, atava nsati wa wini ku lavo va ntlhanu na vabiri, hikusa hinkwavu vatekani na yene?
29Yesu avayangula aku: N'wilahlekile kunene, leswi n'wingativikiki Matralwa nambi wuli ntamu wa Xikwembu Nkulukumba. 30Hikusa loko a vafi vatapfuka, vangahateki, vangahatekiwi; kambe vatava swanga hi tintrumi a Matilweni. 31Loko kuli hi kupfuxiwa ka vafi, xana an'wingihlaya leswi Xikwembu Nkulukumba an'wibyeliki aku: 32#Lavisa Khm (Eks) 3:6. Mine ni Xikwembu Nkulukumba wa Abrahamu, ni Xikwembu Nkulukumba wa Yisaki, ni Xikwembu Nkulukumba wa Yakobe? Hileswo-ke ahi Xikwembu Nkulukumba wa vafi, kambe wa lava vahanyaka.
33Loko a switrhungu swiyingela leswo, swihlamala ngopfu hi dondro yake.
A leleto ledri drikulu
(Mrk 12:28-34; Lk 10:25-28)
34A vafarisi loko vativi leswaku amiyeti a vasaduki, vahlengeletani ku mbangu mun'we, 35kutani mun'we ku vone, lweyi afaka ali mudondrisi wa Nawu, amuvutisa hi kumudringa aku: 36Mudondrisi, xana hi drini a leleto ledri drikulu a Nawini? 37#Lavisa Mlw (Deut) 6:5. Aku ku yene: Utarandra HOSI Xikwembu Nkulukumba waku hi mbilu yaku hinkwayu, ni hi hika draku hinkwadru, ni hi kuyanakanya kwaku hinkwaku. 38Ledri hi drone a leleto ledri drikulu ni dra kuranga. 39#Lavisa Lv 19:18. Ni dra vubiri, drifanaka na drone hi ledri: Utarandra a wa-le-kwenu swanga hi loko utirandra. 40A swileleto leswi swibiri hi swone anga masungulu ya Nawu hinkwawu ni vaprofeta.
Kriste HOSI, n'wana Davida
(Mrk 12:35-37; Lk 20:41-44)
41Na vafarisi vahlengeletanile, Yesu avavutisi aku: 42Xana n'wili yini ha Kriste xana? Xana i n'wa mani? Vaku ku Yene: I wa Davida! 43Aku ku vone: Ke ha yini Davida hi kuhuhuteliwa hi Moya, amutxhula HOSI, aku: 44#Lavisa Mps (Salmo) 110:1. A HOSI yati ku HOSI yanga: Trhamisa axineneni xanga, nikondra nibeka a valala vaku a hansi ka minkondro yaku. 45Loko-ke, Davida amutxhula HOSI, xana i n'wanakwe ha yini?
46Akavanga kone ni mun'we lweyi angaswikota a kumuyangula ritu, na kone kusukela ku siku ledro akuvangani mun'we lweyi angatiya akuyentxa swivutiso.
Currently Selected:
Mt 22: NTX2007
Highlight
Share
Copy
Want to have your highlights saved across all your devices? Sign up or sign in
Xironga New Testament with Psalms © Bible Society in Mozambique, 2007.
