Lk 2

Kubelekiwa ka Yesu

(Mt 1:18-25)

1Aminkameni leyo kuhumexiwi nawu hi mufumi-nkulu Khezari Augusto wa leswaku, a vhanu hinkwavu va tiko vayatralisa mavito.#2:1 Mufumi-nkulu wa mu-Roma ku lembe dra makume mararu (30 a. C.) kurangela kuta ka Kriste, kutlhasa ku lembe dra khume ni mune (14 d. C.) ntraku ka kuta ka Kriste. 2A traliso ledro dra kuranga, drayentxiwi ankameni lowu afaka Kirino ali mufumi wa Siriya. 3Hinkwavu afa vafanekela kufamba vayatraliwa mavito, a mun'wana-ni-mun'wana mutini wa le kwavu. 4Hikola ka leswo Yosefa asuka tikweni dra le Galileya, amutini wa le Nazarete, aya Betlehema tikweni dra Yudeya, lomu angapswaliwa kone mufumi Davida hikusa Yosefa afa ali wa lixaka dra Davida, 5ayi kone akuyatraliwa na Maria, mubutiwa wakwe, lweyi afaka ani nyimba.

6Vaku na vahali Betlehema, a masiku ya Maria ya kuphuluka matlhasa. 7Ahangaphuluka a n'wanakwe wa wandrisanyana wa mativula, amutrondriyela hi makapulana, amulata nkumbyini hikusa afa wungekone mbangu wa kuyanela vone andlwini ya vayeni.

A ntrumi ni vabyisi

8Afa kuni vabyisi atikweni dra Betlehema lava afaka vatrhamisa anhoveni valavelela mintlhambi yavu avusikwini. 9Kutani ntrumi ya Hosi yihumelela ku vone, akuphatima ka Hosi kuvatrandrela makari. Kutani vatxhava hi kutxhava loku kukulu. 10A ntrumi yiku ku vone: N'wingatxhaveni! Nin'witisela Mahungo lawa manene, matakatrhavisa ngopfu ku n'wine ni ku tiko hinkwadru. 11Hi leswaku namunhla n'wipswaleliwi Muhuluxi anga Kriste Hosi amutini wa Davida! 12Mfuri a xikombiso xenu atava lexi: n'witakuma xin'wanana lexi xitrondriyeliwiki hi makapulana xilatiwi nkumbyini.

13Kutani hi nomu-lo, kun'we ni ntrumi, kuhumelela a vunyingi bya tintrumi tin'wana ta tilo, tidrumisa Xikwembu Nkulukumba tiku:

14A kutwala akuve ku Xikwembu Nkulukumba a Matilweni ya le

henhla-henhla,

ni kurula amisaveni ku vhanu

lava atitrhavelaka ha vone.

15Loko atintrumi titlheleli tilweni, a vabyisi vabyelana vaku: Ahi fambeni ke hiya Betlehema, hiya vona a mhaka leyi yihumeleliki, leyi Hosi yihitivisiki yone. 16Vayatlhasa hi kukahlula vayakuma Maria na Yosefa ni xin'wanana lexi xilatiwiki nkumbyini. 17Loko vaswivonile, vahangadrungula ku vhanu hinkwavu leswi vabyeliwiki swone hi swa xin'wanana. 18Kutani hinkwavu lava vaswiyingeliki vahlamala hi leswi a vabyisi vavabyeliki swone. 19Kambe Maria afa abekisa a timhaka leto hinkwatu atiyanakanya ambilwini yake. 20A vabyisi vatlhela na vatwalisa Xikwembu Nkulukumba vamukhensa hinkonta ya hinkwaswu leswi vaswiyingeliki ni leswi vaswivoniki, swanga hi leswi vabyelisiwiki xiswone.

Kusokiwa ni kukombisiwa ka Yesu

21Loko kuhundri masiku ya ntlhanu na mararu a ntrongwana asokisiwa, atxhuliwa vito dra Yesu, ledri afaka a ntrumi yihlayi drone ku Maria na angasivana nyimba.

22Loko masiku ya kuhlawulekisiwa kwake mahelile, hi kulandra a Nawu wa Moxe, Yosefa na Maria, vayisa a ntrongwana a Yerusalema akuya mukombisa amahlweni ka Hosi. 23Vayentxi leswi hikusa anawini wa Hosi kutraliwi leswaku: An'wana mun'wana-ni-mun'wana wawanuna wa mativula atahlayiwa lweyi ahlawuleliwiki Hosi. 24Vayahumexa a mhamba swanga heswi kuyisiwiki xiswone anawini wa Hosi: manga matuva mabiri kumbe mavondlo mabiri ya matuva. #2:24 Ku ndrima ya 23, lavisa Khm 13:2,12. Ku ndrimana ya 24, lavisa Lv 12:6-8. Afa i xinyiko xa swisiwana.

25Ankameni lowo afa kuni mhunu a Yerusalema, a vito drakwe ali Simiyoni. A mhunu lweyo afa ali mululami ni mukhongoti, afaka alavisela kumiyetiwa ka Israyele. A Moya wa Kuxwenga afa wu ku yene. 26Mfuri afa ativisiwi leswaku angaka angafi na angasanganavona Kriste lweyi atakarumiwa hi Hosi. 27Simiyoni ayisiwa aNdlwini ya Hosi hi Moya wa Kuxwenga, loko a vapswali va ndrisanyana Yesu, vamutisa ku yene, akuva ayentxa leswi xihila xa nawu xileletaka swone. 28Simiyoni amuyamukela mavokweni yake, akhensa Xikwembu Nkulukumba aku:

29Swoswi, we Hosi, ungatrika nandra waku atifambela

hi kurula,

swanga hileswi udumbisiki xiswone!#2:29 Toloko drin'wana ledri drikotekaka hi ledri draku: Afa n'wingaswitive leswaku mine afa nifanela kubekisa timhaka ta Tatana wanga xana?

30Hikusa a mahlu yanga mavoni kuhuluxa kwaku,

31loku ubekisiki kone amahlweni ka matiko hinkwawu,

32Yene i livaningo drodritaka vaninga matiko,

ni kutwala ka tiko drakwe dra Israyele.

33A tatana ni mamana wa Yesu afa vahlamala hi leswi Simiyoni ahlayaka swone hi ndrisanyana. 34Kutani Simiyoni avatovokisa, ahangabyela Maria mamana wa Yesu aku: Lavisa, Maria, a ntrongwana lweyi atawisa ni kupfuxa lava va kutala a Israyeleni. Nikuva xikombiso lexi xitaka landruliwa hi lava vanyingi, 35na wene mfuri a lipanga dritakutlhava hika draku, akuva kupfuleteliwa a miyanakanyu leyi mifihlekiki ya lava vanyingi.

36Afa kuna Ana, a muprofeta wa wansati, a n'wana Fanuwele, wa lixaka dra Aseri. Yene afa aduhwali ngopfu. Angava ni nuna hi malembe ya ntlhanu na mabiri a vumpsweni byake. 37Kutani afaka ali mufelwa, wa malembe lawa madjulaka kuva ya ntlhanu wa makume na makume mararu na mune (84), afa angasuki aNdlwini ya Hosi, na atirela Hosi hi kutitrona ni kukhongota vusiku ni nhlikanhi. 38Ana atlhasa hi wolowo nkama, akhensa Xikwembu Nkulukumba. Ahlaya swa n'wana ku hinkwavu lava afaka valavisela kuhuluxiwa ka Yerusalema hi Xikwembu Nkulukumba.

39Kuti loko vaheti hinkwaswu swa Nawu lowu Xikwembu Nkulukumba aleletiki akuva swiyentxiwa, Yosefa na Maria vatlhelela Galileya, amutini wa kwavu wa Nazarete. 40A ndrisanyana afa akula, atiya, na atali hi vutlhari. A timpswalu ta Xikwembu Nkulukumba afa tili henhla kwake.

Ndrisanyana Yesu loko a sala aNdlwini ya Hosi

41A vapswali va Yesu afa vaya a Yerusalema hi malembe hinkwawu ankhubyini wa Paska. 42Kuti loko Yesu ani khume dra malembe na mabiri, vaya kone hi xihena xa nkhuvu. 43Vatiki vaheta masiku ya nkhuvu, Yosefa na Maria va vatlhelela kaya, a ndrisanyana Yesu asala Yerusalema na vapswali vanga switivanga. 44Afa vapimisa leswaku Yesu afambi ni ntlawa wakukari andleleni. A vugamu bya siku drin'we dra liyendro vasungula kumudjula amakari ka maxaka ni vanakulobye, 45Kambe avamukumanga. Hinkonta ya leswo vatlheleli Yerusalema, vaya mudjula kone. 46Kati antrhaku ka masiku mararu, vaya mukuma na ali Tempeleni, atrhamisi makari ka vadondrisi va nawu. Afa ayingiseta leswi afaka vaswihlaya na ali kari avavutisa. 47Hinkwavu lava vamuyingelaka afa vahlamala hi vutlhari byake ni hi kuyangula kwake. 48Loko vamuvona a vapswali vakwe, vahlamala ngopfu, kutani a mamana wakwe aku ku yene: N'wananga, xana uhiyentxeli yini leswo? A tatana waku na mine afa hi famba hikudjula na hivaviseka ngopfu.

49Yesu avayangula aku: Afa n'winidjulela yini? Xana afa n'wingaswitivi leswaku nifanekeli akuva nitrhama a ntirweni wa Tatana wanga? 50Kambe vone avayingelisisanga a ritu ledri avabyeliki drone.

51Yesu kolahu atlheli navu aya Nazarete, ahamba avayingiseta. A mamana wakwe afa abekisa a timhaka leto ambilwini yake. 52Yesu yene, afa akula avutlharini ni le kuleheni; ni le timpswalwini, amahlweni ka Xikwembu Nkulukumba ni ka vhanu.

Currently Selected:

Lk 2: NTX2007

Highlight

Copy