Yhn 12

Maria atota minenge ya Yesu hi mafura ya kun'hwela

(Mt 26:6-13; Mrk 14:3-9)

1 # Lavisa Mrk 11:1. Loko kahasali masiku ya ntlhanu na drin'we na nkhuvu wa Paska wungasangana tlhasa, Yesu aya Betaniya, laha afaka kutrhama Lazaro lweyi Yesu angamupfuxa kufeni. 2Vamululamisela swakuda, kutani Marta afa avatirela. Lazaro afa ali mun'we wa lava vanga kudeni na Yesu. 3Kutani Maria ateka mpimu wa kukari wa mafura ya kunun'hwela ya kudula ngopfu lawa mahambiwiki hi nardo ntsena, atota minenge ya Yesu, kutani amisula hi misisi yake. A yindlu hinkwayu yitala hi kunun'hwela ka mafura lawo.

4Yudasi Iskariyota, mun'we wa vadondrisiwa va Yesu, lweyi afaka atamuwonga, swimu vilelisa aku: 5Hikola kayini amafura lawa mangaxavisiwanga hi mali ya madzana mararu (300) ya madenari, yitanyikiwa swisiwana, xana? 6Ahlayisa xileswo kunge hi leswi afaka ani mhaka ni swisiwana, kambe hi leswi afaka ali muyivi; kutani leswi afaka ali mutameli wa nkwama wa mali, afa ahamba ayiva leswi txheliwaka kone. 7Yesu ahangaku: Mutriki ungamukarati; abekisi#12:7 A man'wana matralwa mani leswaku: afa abekisi. mafura lawa, amabekisela siku dra kulahliwa kwanga. 8Hikusa a swisiwana, minaswu masiku hinkwawu; kambe mine n'wingavena mine masiku hinkwawu.

Makungu ya kudlaya Lazaro

9A xitrhungu lexi xikulu xa va-Yuda xiyingela leswaku Yesu akone Betaniya. Kutani xita kunge hikola ka Yesu ntsena, kambe ni kutatavona Lazaro, lweyi Yesu angamupfuxa kufeni. 10A varangeli va vaprista vatrimba makungu ya kudlaya naye Lazaro, 11hikusa, hikola kwake, va-Yuda lava vanyingi afa vapfumela ku Yesu, vafularela vaprista.

Kunhingena ka Yesu Yerusalema

(Mt 21:1-11; Mrk 11:1-11; Lk 19:28-40)

12Hi siku ledri drintlhantamaka, a xitrhungu lexi xikulu xa vhanu lava afaka vati nkhubyini wa Paska, xiyingela leswaku Yesu afa ata Yerusalema, 13a vhanu lavo hinkwavu vateka mahanga ya minkindru, vahuma vaya mutlhangaveta, nave kari vahuwelela, vaku:

Hozana!#12:13 Hozana: lavisa Mt 21:9, Mrk 10:9-9, 2 Sm 14:4; Mps 118:25.

Akukhensiwe lweyi ataka hi vito dra Hosi,

Mufumi wa Israyele!

14Yesu akumiki mbongolo, akhandriya ku yone, swanga hi leswi kutraliwiki leswaku:

15Ungatxhave n'hwanyana wa Siyoni!

Vona, A Hosi yaku hi leyi, yata;

yikhandriyi ximbongolwana.

16A vadondrisiwa vakwe avayingelisisanga mhaka leyi akusunguleni. Kambe loko Yesu atlakuxiwile, hi kone vangadrimuka leswaku a mhaka leyi afa yitraliwi ku Matralwa ya Kuhlawuleka hikola kwake, ni leswaku swiyentxekile ha kunene. 17A xitrhungu lexi afaka xili na yene loko avitana Lazaro ahuma xireni xiyi drungula leswi swiyentxekiki. 18Nakone a xitrhungu xiyile, xiya mutlhangaveta hikusa afa xiyingeli leswaku ayentxi mahlolana wolawu. 19Kutani vafarisi vabyelana vaku: N'waswivona leswaku amahapfuni ntxhumu. Lavisani, a tiko hinkwadru drilandra yene.

Van'we va-Girika vadjula kuvona Yesu

20Amakari ka lava afaka vantlhantukeli Yerusalema kuya gandrela nkhubyini wa Paska, afa kuni va-Girika#12:20 Va-Girika: kuhlayiwa va-Matiko lava afaka valandrelela a vukhongoti bya xi-Yuda. Lana, kuhlayiwa lava afaka vange va-Yuda kambe ntrhaku vandrulukiki, vapfumela ku Yesu. vange vangani. 21Vatrhindrekela ku Filipi, wa Betsayida wa le Galileya, vamukombela vaku: Hosi, ahirandra kuvona Yesu. 22Filipi ayabyela Andreyasi, kutani vone hi vubiri byavu vayabyela Yesu. 23Yesu avayangula, aku: Ankama wutlhasile lowu N'wana wa Mhunu ataka twalisiwa ha wone. 24Nihlayelamfuri nili ku n'wine: Loko nhleke ya vele leyi yiweliki misaveni yingafi, yitatrhama na yi vuswayone. Kambe loko yifa, yitapswala ngopfu. 25#Fananisa na Mt 10:39; 16:25; Mrk 8:35; Lk 9:24. Lweyi arandraka vutomi byake, byita mulahlekela; kambe lweyi avengaka vutomi byake misaveni leyi, atabyibekisa hi la kungahelikiki. 26Loko mhunu adjula kunitirela, a anilandre, kutani laha ninga kone, na yene nandra wanga atava kone. Loko mhunu anitirela, Tatana atamukomba xitxhavu.

Yesu akhanela hi kufa kwake

27Swoswi a moya wanga wakarateka. Xana ningaku yini? Xana nitaku Tatana, nihuluxe ku nkama lowu! Kambe, niteli swone, kuvona nkama lowu. 28Tatana, twalisa a vito draku! Kutani kutwala ritu, ledri dripfaka Tilweni driku: Nidritwalisile, nitatlhela nidritwalisa.

29A xitrhungu lexi afaka xiyimile, xiswiyingela, kutani xiku: Dre druma! A va'wana vaku: A ntrumi yivulavuli na Yene.

30Yesu avayangula aku: A ritu ledri adritwalanga hikola kwanga, kambe dritwali hikola kwenu. 31Swoswi a misava leyi mikari mayavanyisiwa, kutani mufumi wa misava leyi swoswi atahlongoliwa. 32Kambe mine, loko nitava nitlakuxiwi nisuka misaveni#12:32 Kutlakuxiwa misaveni: a maritu lawa mangatlhamuxeliwa hi tindlela tibiri: Kutlakuxiwa ka Yesu axihambanwini, ni kutlakuxiwa kwake ku lidrumu. Lavisa 3:14-15; 8:28., nitatikokela vhanu hinkwavu ku mine. 33Afa ahlaya timhaka leti na afanisa a mafela lawa atakafa ha wone.

34A xitrhungu ximuyangula, xiku: Hiyingeli Nawini leswaku Kriste atahanya hi la kungahelikiki. #12:34 Atahanya hi la kungahelikiki: kuhlayiwa vutomi bya Kriste a misaveni, amahlweni ka va-Yuda. Wene-ke uhlaya ha yini uku: Swifanekeli N'wana wa Mhunu atlakuxiwa? A N'wana lweyi wa Mhunu hi mani? 35Yesu aku ku vone: A kuvaninga kahatava kone nkamanyana amakari kwenu. Fambani loko meheni kuvaninga, leswaku munyama wungatitxhuka wu n'wikuma; kasi lweyi afambaka munyameni angativi lomu ayaka kone. 36Loko meheni kuvaninga, pfumelani ku kuvaninga loko, akuva mindruluka vana kuvaninga. Loko Yesu ahlayi leswo asuka aya tumbela kule na vone.

Va-yuda avapfumeli ku Yesu

37Kambe nambi loko ayentxi mahlolana lawa manyingi ngopfu amahlweni kwavu, avapfumelanga ku yene, 38akuva kuhetiseka a ritu dra muprofeta Ezaya, ledri driliki:

Hosi, xana hi mani lweyi apfumeliki kudondriseni kweru?

Ni ntamu wa Hosi wupfuleteliweli mani xana?#12:38 Lavisa Ezy 53:1. A hlayela ledri i dra tralwa dra khale dra Xigirika dra Septuaginta.

39Hi leswo, vahluleki kupfumela, hikolahu Ezaya atlheli aku: 40Adlayi mahlu yavu, anonohisi timbilu tavu, leswaku vangatitxhuka vavona hi mahlu, vayingelisisa hi timbilu, vandruluka, mine nivadaha.#12:40 Lavisa Ezy 6:9-10. A hlayela ledri i dra tralwa dra khale dra Xigirika.

41Ezaya ahlayi leswo, loko avoni kutwala ka Yesu, na kone, akhaneli ha yene. 42Nambi swilitanu, vanyingi amakari ka tindruna, vapfumeli ku yene; kambe, afa vangaswihlayi livaleni, hikola ka vafarisi akuva vanga hlongoliwi sinagogeni. 43Hikusa varandri kutwalisiwa hi vhanu kutlula kutwalisiwa hi Xikwembu Nkulukumba.

Yesu akhanela hi vufumi bya Tatana

44Kutani Yesu atlakuxa ritu, aku: Lweyi apfumelaka ku mine, angapfumeli ku mine kambe apfumela ku lweyi anirumiki. 45Ni lweyi anivonaka, avona lweyi anirumiki. 46Mine ni kuvaninga, kutani nitile misaveni akuva mun'wana-ni-mun'wana lweyi apfumelaka ku mine, angatrhami munyameni. 47Ni loko mhunu ayingela maritu yanga, kutani angamabekisi, animuyavanyisi, hikusa anitelanga kuyavanyisa misava, kambe niteli kumihuluxa. 48Lweyi anifularelaka, ava angayamukeli maritu yanga, ani lweyi amuyavanyisaka; a maritu lawa nimahlayaka hi wone matakamuyavanyisa hi siku dra vugamu. 49Hikusa anivulavulanga ha vuswanga, kambe lweyi anirumiki, anga Tatana ha vuswake, anileleti leswi nifanelaka ku n'witivisa ni ku swihlaya. 50Kutani nitiva leswaku akuleleta kwake i vutomi lebyi byingahelikiki. Swoswi, leswi niswihlayaka, niswihlaya hi laha Tatana anibyeliki ha kone.

Currently Selected:

Yhn 12: NTX2007

Highlight

Copy