Mnt Nhingeno
Nhingeno
A buku dra Mintiro ya Vapostola driyisa amahlweni a ntiro wa mutrali wa Ivangeli ya buku dra Luka. Ku Ivangeli, a mutrali atrhandra a vutomi bya Yesu lomu misaveni kuyatlhasa kuntlhantukeleni kwake aMatilweni; asungula hi kuntlhantuka ka Yesu (1:1-11), atrhandra ta vukone bya Yesu hikola ka Moya wa Kuxwenga, lowu wupfuneteliki mintiro ya vapostola ni le ku lava vayamukeliki vupfumeli bya vukriste. Hibyeliwa na kone leswi a valandreli vakusungula va Kriste, na vafambisiwa hi Moya wa Kuxwenga, vahaxisiki xiswone a vupfumeli bya vukriste kusukela Yerusalema, kuyatlhasa matikweni ya Yudeya, Galileya na Samariya; vafambiki na kone a matikweni mangeke ya xi-Yuda, kusungula hi Antiyokiya wa Siriya. A Madrungula ya Kriste, hi ntamu wa ntiro wa Pawulosi, mahangalaki hi dra Aziya Ntrongo, manhingena na kone amatikweni lawa afaka marangeliwa hi tiko dra va-Girika ni le Roma, ntsindra wa vufumi bya xi-Roma.
A buku ledri drihidrungulela leswi a vukriste byisungulisiki xiswone ni leswi byitlhasisiki xiswone ku matiko ya Ásiya ntrongo, man'we ya Europa ni man'we ya Áfrika.
Handle ka tindlela tin'wana leti akumiki ha tone a Madrungula, Luka atirisi na swone leswi aswivoniki ava aswihanya a kutireni kwake na Pawulosi. A mutrali akun'we na Pawulosi a kuyendreni kwake kusukela Trowasi kuya Filipi (16:10-40), ntrhaku kuya Yerusalema, lomu Pawulosi angabohiwa (20:5—21:18) hi vugamu, kusukela Khezareya kuya Roma, lomu mupostola atrhamiki malembe mabiri na arindrela kuyavanyisiwa (tindrima 27—28).
A makungu ya buku ledri, makombisiwa hi maritu ya Yesu ha vuswake, lweyi atiki: N'witayamukela ntamu wa Moya wa Kuxwenga lowu wutakaxikela henhla kwenu, kutani n'witava timboni tanga a Yerusalema ni le tikweni hinkwadru dra Yudeya ni le Samariya, ni kuyatlhasa mimbangwini ya le kule ya misava.
Xileswo, a buku ledri dringayaviwa hi swiyenge swiraru:
1. Masungulu ya Kereke dra Yerusalema ntrhaku ka kutlhantukisiwa ka Yesu (1:18—3)
2. Kuhaxiwa ka Ivangeli a Palestina hinkwaku (8:4—12:25)
3. Kuhangalasiwa ka vupfumeli bya Vukriste hi matiko hinkwawu mavundramaniki ni lwandle dra Mediterraneo kuyatlhasa a Roma: (13:1—28:31)
Vutrhandri hinkwabyu bya Mintiro byihlawutela a lisima dra ntiro wa vapostola Petrosi na Pawulosi, kambe mutlhavukanyisi wa ntiro lowu, i Moya wa Kuxwenga, lowu hikola ka ntamu ni kufambisa ka wone, kutumbulukiki, a Kereke dra Kriste.
Hinkwaswu leswi swihumeleliki, swihlayiwaka abukwini ledri, swipfula ndlela ya xaxameto lowu a Kereke dra minkama hinkwayu drifanelaka kuwuyentxa: Kutivisa a Ivangeli ya Yesu Kriste avhanwini hinkwavu kuyatlhasa mimbangwini hinkwayu ya misava.
Currently Selected:
Mnt Nhingeno: NTX2007
Highlight
Share
Copy
Want to have your highlights saved across all your devices? Sign up or sign in
Xironga New Testament with Psalms © Bible Society in Mozambique, 2007.