Mnt 9

Kuhundruka ka Saulo

(Mnt 22:6-16; 26:12-18)

1Na Saulo aha hisekela kuxanisa ni kudlaya vadondrisiwa va Hosi, aya ku muprista lwe nkulu, 2#Lavisa II Ptr 2:2 ni ntlhamuxelo. amukombela mapapela ya kuya Damaseka, amasinagogeni ya kone akuva loko akuma van'wana lava valandraka ndlela ya Hosi a vavanuna ni vavasati, avayisa Yerusalema na vabohiwile.

3Aku na afamba, atrhindrekela Damaseka, kutxhuka kuvaninga loku kupfaka tilweni kumutrandrela makari; 4awa hansi kutani ayingela ritu ledri driliki: Saulo, Saulo, xana unixanisela yini? 5Kutani yene avutisa aku: U mani Hosi? A Hosi yimuyangula yiku: Hi mine Yesu, lweyi wene umuxanisaka! 6Pfuka, unhingena mutini; lomu utakabyeliwa leswi ufanelaka kuswiyentxa. 7Lava afaka vayendra na yene vayima hi tlhelo na vatremeki minhlana, hikusa afa vayingeli ritu na vangavoni mhunu. 8Kutani Saulo apfuka ahansi; loku apfula mahlu, angahavoni ntxhumu. Vahangamukhoma hi voko, vamunhingenisa Damaseka. 9Ava kone hi masiku mararu na angavoni, angadi, ni kunwa ntxhumu. 10Afa kulini mudondrisiwa le Damaseka, a vito drakwe ali Ananiya, a Hosi yimubyela hi noro yiku: Ananiya! Yene ayangula aku: Hi mine lweyi, Hosi. 11Kutani a Hosi yimuleleta yiku: Pfuka uya Ruweni dra Kululama, uyadjula, a kaya ka Yuda, a wanuna wa le Tarso lweyi valiki i Saulo, Iweyi akhongotaka; 12mfuri avoniki xivonisweni, a wanuna lweyi valiki i Ananiya, anhingeniki amuntlhanteka mavoko, akuva atlhela avona. 13Ananiya ayangula aku: Hosi, niyingeli hi vhanu vanyingi a mhaka ya wanuna lweyo, ni hinkwabyu wubihi lebyi abyiyentxiki ku vahlawuleki vaku a Yerusalema. 14Ni kola ani ntamu, lowu anyikiwiki hi vaprista lava vakulu, wa kutata boha hinkwavu lava vakhongotaka a vito draku. 15Kambe Hosi yiku ku Ananiya: Famba, hikusa yelweyo, ku mine i xibya xa kuhlawuliwa, xitakatwalisa a vito dranga amahlweni ka va-Matiko, ni ka vafumi, ni ka vana va Israyele. 16Hikusa nitamukomba mahlomulu hinkwawu atakafanela kumayingela hinkonta ya vito dranga.

17Ananiya afamba, aya kaya ka Yuda, ayantlhanteka mavoko ku Saulo, aku ku yene: Saulo makweru, Hosi Yesu, lweyi atikombisiki ku wene andleleni, anirumi ku wene akuva utlhela uvona, ni kuva utala hi Moya wa Kuxwenga. 18Hi nomu-lo kuwi mahlweni ya Saulo leswi swifanaka ni mayaya, atlhela avona. Kutani asekeleki aya babatisiwa. 19Ntrhaku ka kuda, akumi ntamu. Atrhamisa ni vadondrisiwa, masiku ya kuhlawa le Damaseka. 20Kolahu asunguli kudondrisa amasinagogeni, ahlaya leswaku Yesu i N'wana wa Xikwembu Nkulukumba. 21Hinkwavu lava vayingeliki Saulo afa vahlamala na vavutisana vaku: Xana yelweyi ahi yene lweyi afaka axanisa a Yerusalema lava afaka vakhongota a vito dra Yesu xana? Na swone afa atile halenu akuva avakhoma, ni kuvayisa ku vaprista lava vakulu 22Kambe Saulo afa akhinyela na ayengeteleka ntamu, akaneta va-Yuda lava afaka vatrhama Damaseka, na avakholwisa leswaku Yesu i Kriste.

23Ntrhaku ka masiku ya kuhlawa a va-Yuda vahlengeletana, vakhanela rengu dra kudlaya Saulo. 24Kambe a rengu dravu dritibyiwa hi Saulo. A va-Yuda vone afa valavisela tinyangwa ta muti, a vusiku ni nhlikanhi, akuva vamudlaya. 25Kambe a vadondrisiwa vakwe vamuteka vusikwini, vamunhingenisa a xihundrwini, vamuxikisa hi ntrhaku ka khumbi dra muti.

Saulo a Yerusalema

26Loko Saulo, atlhasi a Yerusalema, adjuli kutitlhanganisa ni vadondrisiwa, kambe hinkwavu afa vamutxhava hikusa afa vangakholwi leswaku na yene angava mudondrisiwa. 27Kambe Barnabasi amutekiki amuyisa ku vapostola, avatlhavukanyisa hi laha Saulo avoniki Hosi andleleni ni leswi a Hosi yimubyeliki swone, ni laha adondrisiki hi kutiya le Damaseka hi vito dra Yesu. 28Ntrhaku ka leswi, Saulo atrhamisa navu, anhingena ni kuhuma a Yerusalema, adondrisa hi kutiya hi vito dra Yesu. 29Na swone afa akhanela ni kukanetana ni va-Helenista#9:29 Va-Helenista: kuhlayiwa va-Yuda lava afaka vakhanela Xigirika.; kambe volava vadringisa kumudlaya. 30Loko a vadondrisiwa vaswiyingela, vafulameta Saulo a Khezareya, vamurumela a Tarso.

31A Kereke afa drini kurula atikweni hinkwadru dra Yudeya, Galileya ni Samariya, driyakisiwa ni kufamba kutxhaveni ka Hosi; na swone afa driyandra hi kupfuniwa hi Moya wa Kuxwenga.

Kuhanyisiwa ka Eneya

32Petrosi afa afamba-famba matlhelo hinkwawu, na kone afulamela ni le kuvahlawuliwa lava vayakiki a Lida. 33Akumi kone wanuna atxhuliwaka Eneya, lweyi afaka ayetleli vunanwini malembe ya ntlhanu na mararu, awonyani swiro. 34Petrosi aku ku yene: Eneya, Yesu Kriste awakuholisa. Sekeleka utikhondlela vunanu byaku. Kolahu, yene asekeleka. 35Hinkwavu vayaki va Lida ni va Saroni vamuvona kutani vandruluka, vapfumela ku Hosi.

Akupfuxiwa kufeni ka Dorkasi

36A mutini wa Yopa, afa kuni mudondrisiwa wa wansati, a vito drakwe hi Tavita, hi Xigirika swihlayaka Dorkasi, Mhunti. Yene afa atali hi mintiro leminene ni kupfuna swisiwana. 37Amasikwini lawo Dorkasi asungula hi mavabye ya xinyonga, afa. Ntrhaku ka kumunhlampswa, vamubeka andlwini ya le henhla. 38A muti wa Lida afa wuli kusuhi na Yopa; a vadondrisiwa vatwiki leswaku Petrosi akone kole Lida, vahangaruma vavanuna vabiri ku yene, vamukhongota vaku: Ungahlweli kuta ku hine. 39Petrosi afamba navu. Loko atlhasile, vamuntlhantukelisa andlwini ya le henhla. A vavasati va mafelwa hinkwavu vatrandrela Petrosi, na vadrila, vamukomba minkhantxu ni swiyambalu swin'wana leswi swihambiwiki ha Dorkasi. 40Kambe Petrosi, loko avahumexile hinkwavu, akhisama, akhongota. Kutani arendreleka alavisa ntrumbu aku: Tavita, pfuka! Yene apfula mahlu, avona Petrosi, atrhamisa. 41Petrosi amukhoma hi voko, amusekelekisa; ntrhaku avitana vahlawuliwa ni vavasati lava va mafelwa, kutani avakombisa yene na ahanya. 42Leswi switibyiwa hi muti hinkwawu wa Yopa, kutani vanyingi vapfumela ku Hosi. 43Petrosi, atrhami masiku ya kutalanyana a Yopa a kaya ka Simoni, mufuki wa swikhumba.

Currently Selected:

Mnt 9: NTX2007

Highlight

Copy