Mnt 8

Kuxanisiwa ka kusungula ka Kereke

1Saulo yene afa apfumela kudlawa ka Stefano. Asikwini ledro kahumeleli kuxaniseka kukulu ka Kereke a Yerusalema; hinkwavu, handle ka vapostola, vahangalasiwa hi matiko ya Yudeya na Samariya. 2A vavanuna lava vatxhavaka Xikwembu Nkulukumba, valahla Stefano, vamudrilela nkosi wukulu. 3Kambe Saulo afa ahlasela Kereke, hi kunhingena ndlwini yin'wana ni yin'wana, aya kokovisa vavanuna ni vavasati, ava nyiketa ku bohiweni.

Filipi ahaxa a Ivangeli le Samariya

4Hileswo-ke, lava vahangalasiwiki afa vafamba hi matiko, vahlaya a Ivangeli. 5Filipi, yene, afulamela mutini wa Samariya, arera kone hita Kriste. 6Ni switrhungu swikhinyela hi mbilu yin'we kuyingela leswi swihlayiwaka ha Filipi, ni kuvona a mahlolana lawa yene afaka amayentxa. 7Hikusa a mimoya ya xambya leyi afaka mikhomi vanyingi, afa mihuma hi kuhuwelela hi ritu ledri drikulu; ni lava vanyingi va kuwonyana swiro ni va kukhuta afa vahanyisiwa. 8Kavi ni kutrhava kukulu amutini wolowo.

9Kambe afa kuni wanuna lweyi valiki i Simoni, lweyi afaka ali mungoma, ni kuhlamalisa a tiko dra Samariya, ali kari atihlaya mhunu nkulu. 10Hinkwavu afa vanamarela ku yene, kusungula hi lweyi ntrongo kutlhasa ku lwenkulu, vaku: Yelweyi, i ntamu wa Xikwembu Nkulukumba, wuhlayiwaka Ntamu lowu wukulu! 11Afa vanamarela ku yene hi leswi afaka avahlamalisile hi nkama wa kuleha hi mahlolana yake. 12Kambe ku ti loko vapfumeli ku Filipi, lweyi afaka ativisa Ivangeli ya Mfumu wa Xikwembu Nkulukumba ni vito dra Yesu Kriste, vababatisiwa, vavanuna ni vavasati. 13Mfuri na yene Simoni apfumela; ni loko ababatisiwile, anamarela Filipi; na ahlamala ngopfu hi kuvona swikombiso ni mintamu leyi mikulu, leswi afaka swiyentxiwa.

14Loko a vapostola lava afaka vali Yerusalema vayingela leswaku a tiko dra Samariya driyamukeli ritu dra Xikwembu Nkulukumba, varumela kone Petrosi na Yohana, 15lava loko vatlhasile, vavakhongoteliki akuva vanyikiwa a Moya wa Kuxwenga, 16hikuva afaka wungasinaxikela ni mun'we ku vone; afa vababatisiwa ntsena, avitweni dra Hosi Yesu. 17Kolanu-ke vavantlhanteka mavoko, kutani vayamukela Moya wa Kuxwenga. 18Kambe Simoni atiki avona leswaku a Moya wa Kuxwenga wu nyikiwa hi kuntlhantekiwa ka mavoko ya vapostola, avanyika mali, 19aku: Ninyikani na mine a ntamu wolowu, akuva lweyi nitakamuntlhanteka mavoko, anyikiwa Moya wa Kuxwenga. 20Petrosi aku ku yene: A mali yaku ayisuve kun'we na wene, leswi upimisiki kuxava a nyiko ya Xikwembu Nkulukumba hi mali. 21Wene awuna mfanelo ya kuwuyamukela, hikusa amahlweni ka Xikwembu Nkulukumba a mbilu yaku ayilulamanga. 22Ndruluka, avubihini byaku, ukhongota ku Hosi, kumbe xana utadrivaleliwa, akuyanakanyeni loku ka mbilu yaku. 23Hikusa ni kuvona uli nyongweni ya kubava ni le mapindreni ya vudohi. 24Simoni ayangula aku: Nikhongotelani n'wine ku Hosi, kungatita henhla kwanga ni xin'we xa leswi n'wihlayiki swone.

25Vone-ke vatiki vahamba vumboni ni kuhlaya ritu dra Hosi, vatlhelela Yerusalema, na varera Ivangeli a mitanini minyingi ya Samariya.

Filipi ni ndruna ya Etiopiya

26Siku drin'wana a ntrumi ya Hosi yibyeli Filipi yiku: Pfuka ufamba uya nyingitimu, hi ndlela leyi yifulamelaka, yipfaka Yerusalema yiya Gaza. 27Ahangapfuka afamba. Kutani avona wanuna wa Etiopiya, angamutrheniwa ni ndruna ya Kandake#8:27 Kandake: xihluwa afaka xinyikiwa a vafumi va xisati mayelanu ni swihena swa Xigirika., a nkosikazi ya va-Etiopiya, lweyi afaka abekiwi a henhla ka nhlengwe yake hinkwayu: afa ateli kutatagandrela a Yerusalema. 28Afa amuka, atrhamisi kalitxhini drakwe, ahlaya buku dra muprofeta Ezaya. 29Kolahu a Moya wubyela Filipi: Trhindrekela kusuhi ni kalitxhi ledriya. 30Filipi atrutruma, amuyingela na ahlaya a buku dra muprofeta Ezaya, kutani amuvutisa aku: Xana waswiyingelisisa leswi uswihlayaka xana? 31Amuyangula aku: Xana nitaswiyingelisisa ku yini na kungena lweyi anitlhamuxelaka? Kutani akombela Filipi leswaku akhandriya, atatrhamisa na yene. 32A xiyenge xa Matralwa lexi afaka ahlaya xone hi lexi: Ayisiwi kutlhabyiweni swanga hi hamba;

mfuri swanga hi xihambana lexi miyelaka amahlweni ka

mutremeti wa xone;

na yene angapfulanga nomu.

33 # Lavisa Ezy 53:7-8. Akutitrongahateni kwake ayaleliwi kuyavanyisiwa.

Himani lweyi atakahlaya a lixaka drakwe?

Hikuva a vutomi byake byisusiwile amisaveni.

34A ndruna ya Etiopiya yiyangula Filipi yiku: Nakukombela, nibyeli: xana a muprofeta ahlaya leswo ha mani? Atihlaya yene, kumbe ahlaya mun'wana xana? 35Kolahu-ke Filipi amutlhamuxela; mfuri kusukela ku xiyenge lexo xa Matralwa, amudondrisa hi ta Yesu. 36Vaku na vafamba hi ndlela, vatlhasa lomu kungani mati, a ndruna yiku: Hi lawa mati! Xana kuni xa ntxhumu xingasivelaka leswaku nibabatisiwa? [ 37Filipi aku: Loko upfumela hi mbilu yaku hinkwayu, akuna lexi xingasivelaka. Yene aku: Napfumela leswaku Yesu Kriste i N'wana wa Xikwembu Nkulukumba.]#8:37 A ndrimana ya 37 ayikumeki ku matralwa manyingi ya khale. 38Kutani aleleta akuva a kalitxhi driyima, vaxikela matini hi vubiri byavu, kutani Filipi amubabatisa. 39Kuti loko vantlhantuka vahuma matini, a Moya wa Hosi wuwutla Filipi; kutani ndruna ayahamuvonanga, kambe yiya mahlweni andleleni ya yone, na yitali hi kutrhava. 40Kambe Filipi atikuma na ali mutini wa Azoto; kutani atremakanya tiko, adondrisa Ivangeli miti hinkwayu, akondra atlhasa le Khezareya.

Currently Selected:

Mnt 8: NTX2007

Highlight

Copy