Naanearü ügüchiga 36

Echaútaagüchiga

(1 Cr. 1.34-54)

1Rü ñaagü nixĩ ga nataagü ga Echaú ga Edóü̃gu ãégacü.

2-3Rü nüma ga Echaú rü Canaáü̃anecüã̱x ga ngexü̃gümaxã naxãxma̱x. Rü ngĩmaxã naxãxma̱x ga Adá ga Itítanüxü̃ ga Eróü̃acü ixĩ́cü. Rü yexgumarüxü̃ ta ngĩmaxã naxãxma̱x ga Aoribamá ga Anáxacü ga Chibóü̃ nataxa ixĩ́cü. Rü nüma ga Chibóü̃ rü Ebéutanüxü̃ nixĩ. Rü ñu̱xũchi ngĩmaxã naxãxma̱x ta ga Ismaéacü ga Bachemáx ga Nebaióxeya̱x ixĩcü.

4-5Rü gumá Echaú nane ga Adáwaü̃cü rü Eripá nixĩ. Rü guma Bachemáxwaü̃cü rü Reué nixĩ. Rü guma Aoribamáwaü̃gücü rü Yeú, rü Yaaráü̃, rü Coré nixĩgü. Rü yemagü nixĩ ga Echaú nanegü ga buexü̃ ga yexguma Canaáü̃anewa nayexmagu.

6-7Rü nüma ga Echaú rü tüxü̃ nanutaque̱xe ga guxema naxma̱xgü rü nanegü rü naxacügü, rü ñu̱xũchi guxãma ga duü̃xü̃gü ga naxü̃tawa yexmagüxü̃, rü to ga naanewa naxũ nax yemaacü naenexẽ ga Acóbuarü yáxü̃wa nayexmaxü̃ca̱x. Rü nayagagü ta ga guxü̃ma ga naxü̃nagü. Rü ñu̱xũchi nayana ga guxü̃ma ga norü yemaxü̃gü ga Canaáü̃anewa nüxü̃́ yexmaxü̃. Rü yema nax namuxũchixü̃ ga norü yemaxü̃gü rü naxü̃nagü ga Echaú rü Acóbu, rü yemaca̱x marü taxucürüwa nügüxü̃tawa nayexmagü. Rü ñu̱xũchi yema naane ga nawa nayexmagüxü̃wa rü marü tama ningu ga gumá maxẽ naxca̱x ga yema naxü̃nagü.

8Rü yemaca̱x ga Echaú ga Edóü̃gu ãégacü rü máxpüxanexü̃ ga Cheígu nayaxãchiü̃.

9Rü nüma ga Echaú ga Edóü̃gu ãégacü nixĩ ga norü o̱xi ga yema duü̃xü̃gü ga Edóü̃tanüxü̃ ga Cheíarü máxpü̱xanexü̃wa yexmagüxü̃. Rü ñaagü nixĩ ga naéga ga Echaútaagü.

10Rü Echaú nanegü rü ñaa nixĩ ga naégagü: Rü wüxi nixĩ ga Eripá ga Adáwaü̃cü. Rü to nixĩ ga Reué ga Bachemáxwaü̃cü.

11Rü Eripá nanegü nixĩ ga Temáü̃, rü Omá, rü Chefó, rü Gatáü̃, rü Quená.

12Rü nüma ga Eripá rü nüxü̃́ iyexma ga wüxi ga naxma̱x ga Tiná. Rü yemawa rü nüxü̃́ nayexma ga wüxi ga nane ga Amaréxgu ãégacü. Rü yemagü nixĩ ga ngĩtaagü ga Echaú naxma̱x ga Adá.

13Rü Reué nanegü nixĩ ga Náax, rü Chéra, rü Chamá, rü Michá. Rü yemagü nixĩ ga ngĩtaagü ga Echaú naxma̱x ga Bachemáx.

14Rü Aoribamá iyixĩ ga nai ga Echaú naxma̱x. Rü yemawaü̃güxü̃ ga nanegü nixĩ ga Yeú, rü Yaaráü̃, rü Coré. Rü ngĩma ga Aoribamá rü Anáxacü iyixĩ rü Chibóü̃taxa iyixĩ.

15-16Rü yema Echaútaagü ga ãẽ̱xgacüwa ngugüxü̃ rü ñaagü nixĩ: Rü gumá Echaú nane ga yacü ga Eripátaagü ga ãẽ̱xgacüwa ngugüxü̃ nixĩ ga Temáü̃, rü Omá, rü Chefó, rü Quená, rü Coré, rü Gatáü̃, rü Amaréx. Rü yemagü nixĩ ga Eripátaagü ga ãẽ̱xgacü ixĩgüxü̃ ga Edóü̃anewa. Rü guxü̃ma ga yemagü rü Echaú naxma̱x ga Adátaagü nixĩ.

17Rü gumá Echaú nane ga Reué nanegü ga ãẽ̱xgacüwa ngugüxü̃ nixĩ ga Náax, rü Chéra, rü Chamá, rü Michá. Rü yemagü nixĩ ga yema Reuétaagü ga ãẽ̱xgacü ixĩgüxü̃ ga Edóü̃anewa. Rü guxü̃ma ga yemagü rü Echaú naxma̱x ga Bachemáxtaagü nixĩgü.

18Rü yema Anáxacü ga Echaú naxma̱x ga Aoribamá ngĩnegü ga ãẽ̱xgacüwa ngugüxü̃ nixĩ ga Yeú, rü Yaaráü̃, rü Coré.

19Rü guxü̃ma ga yemagü nixĩ ga Echaú ga Edóü̃taagü. Rü nümagü nixĩ ga natanüxü̃arü ãẽ̱xgacügü.

20-21Rü nüma ga Oréutanüxü̃ ga Cheí nanegü ga yema naanegu ãchiü̃güxü̃ nixĩ ga Lotáü̃, rü Chobá, rü Chibóü̃, rü Aná, rü Dichóü̃, rü Éche, rü Dicháü̃. Rü yemagü nixĩ ga Cheítaagü ga Oréutanüxü̃arü ãẽ̱xgacügü ga Edóü̃anewa.

22Rü Lotáü̃ nanegü nixĩ ga Orí rü Emáü̃. Rü ngĩma ga Tiná rü Lotáü̃ naeya̱x tixĩ.

23Rü Chobá nanegü nixĩ ga Arbáü̃, rü Manáax, rü Ebá, rü Chefó, rü Onáü̃.

24Rü Chibóü̃ nanegü nixĩ ga Aiá, rü Aná. Rü nüma ga Aná nixĩ ga yema chianexü̃wa nüxü̃ yangauxü̃ ga bairawegü ga yexguma nanatü ga Chibóü̃arü búrugüna nadauyane.

25Rü nüma ga Aná rü nüxü̃́ nayexma ga wüxi ga nane ga Dichóü̃gu ãégacü, rü ñu̱xũchi wüxi ga naxacü ga Aoribamágu ãégacü.

26Rü Dichóü̃ nanegü nixĩ ga Emdáü̃, rü Echabáü̃, rü Itaráü̃, rü Queráü̃.

27Rü Éche nanegü nixĩ ga Biáü̃, rü Chaabáü̃, rü Acáü̃.

28Rü Dicháü̃ nanegü nixĩ ga Úx, rü Aráü̃.

29-30Rü yema Oréutanüxü̃arü ãẽ̱xgacügü ga namaxã icua̱xgüxü̃ nixĩ ga Lotáü̃, rü Chobá, rü Chibóü̃, rü Aná, rü Dichóü̃, rü Éche, rü Dicháü̃. Rü yemagü nixĩ ga yema Oréutanüxü̃arü ãẽ̱xgacügü ga nügütanüxü̃maxã icua̱xgüxü̃ ga Cheíanewa.

31-32Rü ñaagü nixĩ ga yema ãẽ̱xgacügü ga Edóü̃anemaxã icua̱xgüxü̃ naxü̃pa nax naxãẽ̱xgacüã̱xgüxü̃ ga Iraétanüxü̃. Rü Edóü̃arü ãẽ̱xgacü nixĩ ga Beóx nane ga Béra. Rü guma norü ĩane rü Dinábagu naxãéga.

33Rü yexguma Béra yu̱xgu rü nachicüxü ãẽ̱xgacüxü̃ ningucuchi ga Chéra nane ga Yobáx ga ĩane ga Bochrácüã̱x.

34Rü yexguma Yobáx yu̱xgu rü nachicüxü ãẽ̱xgacüxü̃ ningucuchi ga Ucháü̃ ga Temáü̃anecüã̱x.

35Rü yexguma Ucháü̃ yu̱xgu rü nachicüxü ãẽ̱xgacüxü̃ ningucuchi ga Bedáx nane ga Adáx. Rü nüma ga Adáx nixĩ ga Madiáü̃tanüxü̃xü̃ naporamaexü̃ ga Moáarü naanewa. Rü guma norü ĩane rü Abíx nixĩ ga naéga.

36Rü yexguma Adáx yu̱xgu rü nachicüxü ãẽ̱xgacüxü̃ ningucuchi ga Chamrá ga ĩane ga Marecácüã̱x.

37Rü yexguma Chamrá yu̱xgu rü nachicüxü ãẽ̱xgacüxü̃ ningucuchi ga Chaú ga Reobóxcüã̱x. Rü guma ĩane rü natücutüwa nayexma.

38Rü yexguma Chaú yu̱xgu rü nachicüxü ãẽ̱xgacüxü̃ ningucuchi ga Abóx nane ga Baá-anáü̃.

39Rü yexguma Baá-anáü̃ yu̱xgu rü nachicüxü ãẽ̱xgacüxü̃ ningucuchi ga Adáx. Rü norü ĩane rü Páu nixĩ ga naéga. Rü guxema Adáx naxma̱x rü Meetabé nixĩ ga tümaéga. Rü tüma ga Meetabé rü Matéxacü tixĩ rü Mechaáxtaxa tixĩ.

40-43Rü Echaútanüxü̃arü ãẽ̱xgacügü rü nagutama nixãéga ga natücumüchigü rü norü naanechigü. Rü yema Echaútaagüéga nax ñuxãcü mea inanuxü̃ natanüxü̃chigümaxã, rü naane ga nawa nayexmagüxü̃chigümaxã, rü ñu̱xũchi naégagüchigümaxã, rü ñaagü nixĩ ga naéga: Tiná, rü Abá, rü Yetéx, rü Aoribamá, rü Erá, rü Pinóü̃, rü Quená, rü Temáü̃, rü Mixchá, rü Maxdié, rü Iráü̃. Rü yemagü nixĩ ga yema ãẽ̱xgacügü ga Edóü̃anemaxã icua̱xgüxü̃ yema noxrütama naane ga nawa nayexmagüxü̃chigüwa. Rü nüma ga Echaú rü Edóü̃gu ta naxãéga.

Currently Selected:

Naanearü ügüchiga 36: tcaP

Highlight

Copy