Naanearü ügüchiga 35
35
Tupana rü Betéwa mexü̃ Acóbumaxã naxuegu
1Rü nüma ga Tupana rü Acóbuxü̃ ñanagürü: —¡Cugü namexẽxẽ rü inaxũãchi nax Betégu cuyaxãchiü̃xü̃ca̱x! ¡Rü ngẽxma cha̱u̱xca̱x naxü i wüxi i ãmarearü guruxü̃ nagu ga yema nachica ga nawa cuxca̱x changóxü̃ ga yexguma cuenexẽ ga Echaúcha̱xwa quixũxgu! —ñanagürü.
2Rü yexguma ga Acóbu rü naxma̱xgüxü̃ rü guxü̃ma ga norü duü̃xü̃güxü̃ ñanagürü: —¡Ípenanuxü̱̃x i guxü̃ma i perü tupanachicüna̱xãgü i pexü̃́ ngẽxmagüxü̃! ¡Rü ñu̱xũchi pegü pexaiyagü rü to i pexchiru i ngẽmataxü̃gu picu̱xgü!
3¡Rü ngĩxã rü paxa itaxĩãchi nax Betéwa ixĩxü̃! Erü ngẽxma tá chanaxü i wüxi i ãmarearü guruxü̃ naxca̱x ya Tupana ga guxü̃wama ga ngextá íchaxũxü̃wa choxü̃ íxümücücü rü choxü̃ rüngü̃xẽẽcü ga yexguma guxchaxü̃wa chayexmagu —ñanagürü.
4Rü yexguma ga yema duü̃xü̃gü, rü Acóbuxü̃tawa nanana ga guxü̃ma ga norü tupanachicüna̱xãgü rü yema naxmachinügü ga namaxã yaxãxmachinüxü̃ ga togü ga tupanagüarü cua̱xruü̃gü ixĩgüxü̃. Rü ĩane ga Chiquéü̃arü ngaicamana rüxüxü̃ne ga castañatüü̃gu Acóbu inanata̱xgü ga yema tupanachicüna̱xãgü rü yema naxmachinügü.
5Rü yexguma inaxĩãchigu ga Betéwa nax naxĩxü̃ca̱x, rü Tupana rü nanamuü̃xẽxẽ ga guxü̃ma ga yema ĩanegücüã̱x ga Chiquéü̃arü ngaicamana yexmagüxü̃ nax tama Acóbu nanegüwe nangegüxü̃ca̱x.
6Rü Acóbu rü guxü̃ma ga yema duü̃xü̃gü ga nawe rüxĩxü̃maxã rü meama Canaáü̃anewa yexmane ga ĩane ga Lúxgu ãéganewa nangugü. Rü to ga naéga rü Beté nixĩ.
7Rü yexma nanaxü ga wüxi ga ãmarearü guruxü̃ rü El-betégu nanaxüéga, yerü yexguma naenexẽcha̱xwa yaxũxgu, rü yéma nixĩ ga Tupana naxca̱x ngóxü̃.
8Rü yema nachicagu ta nixĩ ga nayuxü̃ ga Débora ga Rebécaarü dauruxü̃, rü nai ga taxü̃ ga Betéarü ngaicamawa yexmaxü̃tüü̃gu ngĩxü̃ nata̱xgü. Rü yemaca̱x ga Acóbu rü yema nachica rü Nai i Taxü̃gu nanaxüéga.
9Rü yexguma Padáü̃-aráü̃anewa ne naxũxgu ga Acóbu, rü Tupana rü Betéwa wenaxarü naxca̱x nango̱x, rü mexü̃ namaxã naxuegu.
10-11Rü ñanagürü: —Cuma rü Acóbu nixĩ i cuéga. Natürü i ñu̱xma rü marü taxũtáma ngẽma nixĩ i cuéga erü ñu̱xmacürüwa rü Iraé tá nixĩ i cuéga —ñanagürü. Rü yemawena ga Tupana rü ñanagürü: —Choma nixĩ ya Tupana ya Guxü̃étüwa Changexmaxü̃. Rü tá namu ya cunegü rü cutaagü. Rü cuwa tá nango̱x i wüxi i nachixü̃ane rü muxü̃netáma ya ĩanegü. Rü cutaagütanüwa tá nangẽxma i ãẽ̱xgacügü ixĩxü̃.
12Rü ñaa naane ga Abraáü̃na rü Ichaána chaxãxü̃, rü cuxna rü ta chanaxã. Rü cuwena rü tá cutaagüna chanaxã —ñanagürü ga Tupana.
13-14Rü yexguma yema nachica ga Acóbumaxã íyadexaxü̃wa yaxũgachigu ga Cori ya Tupana, rü nüma ga Acóbu rü nanayaxu ga wüxi ga nuta. Rü yema nachica ga Cori ya Tupana namaxã idexaxü̃wa nanatopǘtaxẽxẽ ñoma wüxi i caxtarüxü̃. Rü ñu̱xũchi chíxü̃maxã rü bínumaxã nanabaétü nax naxüünexü̃ca̱x.
15Rü yema nachica rü Betégu nanaxüéga.
Iyu ga Raqué
16Rü yemawena rü Betéwa inaxĩãchi nax ĩane ga Efrátawa naxĩxü̃ca̱x. Natürü yexguma Efrátaxü̃ yangaicagügu rü ga Raqué rü ixíraxacüama. Rü poraãcü guxchaãcü ixíraxacü.
17Rü yexguma tama paxa yéma naxíraxacügu rü düxwa ngĩma ga yema ngĩrü dauruxü̃ rü ngĩxü̃ ngĩgürügü: —¡Yáxna naxĩnü erü to i yatüxü̃ i cuxacü cuxü̃ naxíra! —ngĩgürügü.
18Natürü ngĩma ga Raqué rü marü ituraxüchi rü yáxna irüngü̃ rü: —Ben-óni nixĩ ya yimá õxchana —ngĩgürügü. Natürü ga nanatü ga Acóbu rü Bẽyamíü̃gu tanaxüéga.
19Rü yemaacü nixĩ ga nayuxü̃ ga Raqué. Rü yema nama ga Efrátawa nadaxü̃gu ngĩxü̃ nata̱xgü. Rü guma ĩane ga Efráta rü ñu̱xma rü Beréü̃gu naxãéga.
20Rü nüma ga Acóbu rü wüxi ga tacü ga nuta ngĩxchique̱xewa narütoxẽxẽ. Rü ñu̱xma rü ta rü yimá nuta nixĩ i norü cua̱xruxü̃ nax ngextá natáxü̃ i Raqué.
21Rü nüma ga Iraé ga Acóbugu ãégacü rü ínixũãma rü yema daxũtaechica ga Édexarü yéama nangu.
22Rü yexguma marü yéma nayexmagu ga Iraé, rü nane ga Rubéü̃ rü nanatüma̱x ga Birámaxã ínape. Rü yexguma yemaxü̃ nacua̱xgu ga Iraé rü nanu.
Acóbu nanegü
(1 Cr. 2.1-2)
23Rü Acóbu nanegü rü 12 nixĩ. Rü gumá Léawaü̃gücü rü Rubéü̃ nixĩ ga Acóbu nane ga yacü. Rü naenexẽgü nixĩ ga Chimeóü̃, rü Lebí, rü Yudá, rü Ichacá, rü Chaburóü̃.
24Rü gumá taxre ga Raquéwaü̃gücü rü Yúche rü Bẽyamíü̃ nixĩ.
25Rü gumá Raquéxü̃taxü̃ ga Biráwaü̃gücü rü Dáü̃ rü Netarí nixĩ.
26Rü gumá Léaxü̃taxü̃ ga Chipáwáü̃gücü rü Gáx rü Aché nixĩ. Rü gumágü nixĩ ga Acóbu nanegü ga Padáü̃-aráü̃anegu buexü̃.
Ichaáarü yuxchiga
27Rü nüma ga Acóbu rü nanatü ga Ichaáxü̃ ínayadau ga Mamréwa. Rü guma ĩane rü namuéga. Rü Abá nixĩ ga wüxi rü Ebróü̃ nixĩ ga to. Rü yexma nixĩ ga naxãchiü̃güxü̃ ga Abraáü̃ rü Ichaá.
28Rü nüma ga Ichaá rü nüxü̃́ nayexma ga 180 ga taunecü ga yexguma nayu̱xgu.
29Rü yexguma marü nayaxüchigu nixĩ ga nayuxü̃ rü natanüxü̃wa naxũxü̃. Rü nanegü ga Echaú rü Acóbu rü inanata̱xgü.
Currently Selected:
Naanearü ügüchiga 35: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
