Nüxíraxü̃xü̃ ga popera ga Coríntiuwa yexmagüxü̃ ga yaxõgüxü̃tanüwa namuxü̃ ga Pauru 14
14
Ngẽma tama nüxü̃ icuáxü̃ i nagawa nax idexaxü̃chiga
1¡Rü naxca̱x peda̱u̱x nax duü̃xü̃güxü̃ pengechaü̃güxü̃! Rü ngẽxgumarüxü̃ ta name nixĩ i naxca̱x pedau i ngẽma cua̱xgü i Naãxẽ ya Üünexü̃wa ne ĩxü̃. Rü ngẽma cua̱x i yexeraãcü penaxwa̱xexü̃ nixĩ nax pexü̃́ natauxchaxü̃ nax nüxü̃ pixuxü̃ i Tupanaarü ore.
2Yíxema tama nüxü̃ tacuáxü̃ i nagawa idexaxe, rü Tupanamaxã nixĩ i tidexaxü̃ rü tama i duü̃xü̃gümaxã, erü taxúema nüxü̃ tacua̱x nax ñuxũ ñaxü̃chiga yixĩxü̃. Rü Tupanaãxẽ ya Üünecü nixĩ i tüxü̃ idexaxẽẽxü̃, natürü ngẽma ore i nüxü̃ tixuxü̃ rü ẽxü̃guxü̃ nixĩ.
3Natürü yíxema nüxü̃ ixuxe i Tupanaarü ore rü ngẽma yaxõgüxü̃arü ngü̃xẽẽruxü̃ tixĩ, erü ngẽma oremaxã nüxü̃́ tanangúchaü̃xẽxẽ nax yexeraãcü yaxõgüãxü̃ca̱x rü ngẽma oremaxã tanataãẽxẽxẽ i ngẽxguma guxchaxü̃ nüxü̃ üpetügu.
4Rü yíxema tama nüxü̃ tacuáxü̃ i nagawa idexaxe, rü tümaca̱xtama nixĩ i ngẽma nax yexeraãcü mea Tupanaaxü̃́ tayaxõxü̃ca̱x. Natürü yíxema nüxü̃ ixuxe i Tupanaarü ore rü nüxü̃ tixu nax yexeraãcü Tupanaaxü̃́ yaxõgüãxü̃ca̱x i guxü̃ma i ngẽma yaxõgüxü̃.
5Choma chierüx chanaxwa̱xe nax guxãma i pema rü ngẽma tama nüxü̃ pecuáxü̃ i nagawa nax pidexagüxü̃. Natürü ngẽma yexeraãcü chanaxwa̱xexü̃ nixĩ nax duü̃xü̃gümaxã nüxü̃ pixuxü̃ i Tupanaarü ore. Erü ngẽma nixĩ i to i nagawa idexaxü̃arü yexera rümemaexü̃ ega tataxu̱xgu nax texé nüxü̃ ixuxü̃ nax ta̱xacüchiga yixĩxü̃ i ngẽma dexa i to i nagawa nüxü̃ tixuxü̃ nax ngẽmaãcü nüxü̃ nangü̃xẽẽxü̃ca̱x i ngẽma yaxõgüxü̃.
6Rü dücax, Pa Chauenexẽgüx, rü ngẽxguma chi pexü̃tawa chaxũxgu, rü chi to i nagawa chidexagu, ¿rü ta̱xacüwa chi pexü̃́ namexü̃ i ngẽma? Natürü ngẽxguma chi pemaxã nüxü̃ chixuxgu i ngẽma Tupana tüxü̃ nüxü̃ cua̱xẽẽxü̃, rü ẽ̱xna ngẽma chomatama nüxü̃ chacuáxü̃ nax aixcüma yixĩxü̃, rüe̱xna ngẽma ẽxü̃guxü̃ i ñu̱xma Tupana tüxü̃ nüxü̃ cua̱xẽẽxü̃, rüe̱xna ta̱xacürü to i ngu̱xẽẽtae i Tupanachiga, rü ngẽmawaxi nixĩ i pexü̃́ mexü̃.
7¡Rü dücax ngẽma paxetaruxü̃ i quena rü ẽ̱xna árpa! Rü ngẽxguma ngéma naxãgamaregu rü tama ínaxueguãchigagu rü taxũchima nüxü̃ tacua̱x nax ta̱xacügu napaxüxü̃.
8Rü ngẽma churaragü, rü ngẽxguma tama mea nangógagu ya yimá cornéta ya daixca̱x naxca̱x caxü̃ne ¿rü ñuxãcü tá nügü namexẽxẽ nax nügü nada̱i̱xü̃ca̱x?
9Rü ngẽma nixĩ i pexü̃ üpetüxü̃ i pema i ñu̱xma. Rü ngẽxguma chi tama perü conümaxã nüxü̃ pixuxgu i dexa i mea nüxü̃ icuáxü̃, ¿rü ñuxãcü tá nüxü̃ tacua̱x nax ñuxũ ñaxü̃chiga yixĩxü̃ i ngẽma nüxü̃ pixuxü̃? Rü ñoma ngürüanewa pidexagüxü̃rüxü̃ tá pixĩgü.
10Rü aixcüma nixĩ i namuxü̃ i nagagü i ñoma i naanewa. Rü guxü̃ma i ngẽma nagagü rü name naxca̱x i ngẽma duü̃xü̃gü i nawa idexagüxü̃.
11Natürü ngẽxguma chi tama nüxü̃ chacua̱xgu i ngẽma naga i to i duü̃xü̃ chomaxã nawa idexaxü̃, rü ngẽma duü̃xü̃ca̱x rü to i nachixü̃anecüã̱x chixĩ, rü cha̱u̱xca̱x rü to i nachixü̃anecüã̱x i duü̃xü̃ nixĩ i nümax.
12Choma nüxü̃ chacua̱x rü pema rü pexü̃́ nangúchaü̃ nax pexü̃́ nangẽxmaxü̃ i ngẽma cua̱x i Tupanaãxẽ ya Üünecü tüxna ãxü̃. Natürü name nixĩ i naxca̱x pedau nax guxü̃arü yexera pexna naxããxü̃ i ngẽma cua̱x i namaxã nüxü̃ perüngü̃xẽẽxü̃ i guxü̃ma i yaxõgüxü̃ nax yexeraãcü mea Tupanaaxü̃́ yaxõgüãxü̃ca̱x.
13Rü ngẽmaca̱x yíxema duü̃xẽ ya taxúema nüxü̃ cuáxü̃ i nagawa idexaxe, rü name nixĩ i Tupanana naxca̱x taca nax tüxna naxããxü̃ca̱x i cua̱x nax nüxü̃ tixuxü̃ca̱x nax ta̱xacüchiga yixĩxü̃ i ngẽma to i nagawa nüxü̃ tixuxü̃.
14Rü ngẽxguma chi taxúema nüxü̃ cuáxü̃ i nagawa chayumüxẽgu, rü chauãẽ nixĩ i ngẽma yumüxẽxü̃. Natürü chomatama rü taxuxü̃ma chacua̱x nax ta̱xacüchiga yixĩxü̃ i ngẽma chauãxẽarü yumüxẽ.
15¿Rü ñuxãcü tá chayumüxẽxü̃ i ñu̱xmax? Rü marü name nixĩ ega taxúema nüxü̃ cuáxü̃ i nagawa chayumüxẽgu, natürü chanaxwa̱xe i guxãma nüxü̃ cuáxü̃ i nagawa rü ta chayumüxẽ. Rü marü name nixĩ ega taxúema nüxü̃ cuáxü̃ i nagawa chawiyaegu, natürü chanaxwa̱xe i guxãma nüxü̃ cuáxü̃ i nagawa rü ta chawiyae.
16Erü ngẽxguma chi taxúema nüxü̃ cuáxü̃ i nagawa Tupanaxü̃ quicua̱xüü̃gu, rü yíxema duü̃xẽgü ya ngéma irüxĩnüexe, rü taxucürüwa cumaxã wüxigu Tupanaxü̃ ticua̱xüü̃gü, erü tama nüxü̃ tacua̱x nax ta̱xacüchiga yixĩxü̃ nax Tupanaxü̃ quicua̱xüxü̃xü̃
17Rü woo ngẽma curü yumüxẽ rü namexẽchigu, natürü yíxema duü̃xẽgü ya ngéma irüxĩnüexe rü taxuxü̃ma i mexü̃ nawa tayaxu ega to i nagawa cuyumüxẽgu.
18Tupanana moxẽ chaxã, erü perü yexera taxúema nüxü̃ cuáxü̃ i nagawa chidexa.
19Natürü woo 10,000 i ore i taxúema nüxü̃ cuáxü̃ i nagawa nax chidexaxü̃, natürü ngẽma yaxõgüxü̃arü ngutaque̱xegüwa rü cha̱u̱xca̱x rü narümemae chi nixĩ ega woo wüxime̱xpü̱x i ore i meama nüxü̃ icuáxü̃wa namaxã nüxü̃ chixuxgu i Tupanaarü ore nax ngẽmaãcü ngẽmamaxã mea chanangúexẽẽxü̃ca̱x.
20Pa Chauenexẽgüx, tama name i ñoma buxü̃gürüxü̃ nagu perüxĩnüe i ngẽma ore i pemaxã nüxü̃ chixuxü̃. Rü narümemae nixĩ i ñoma buxü̃gürüxü̃ pegü pixĩgüxẽxẽ na̱xcha̱xwa i ngẽma chixexü̃. Natürü ngẽma perü ĩnüwa rü penaxwa̱xe i duü̃xü̃gü i marü yáxü̃rüxü̃ mea nagu perüxĩnüe rü nagu pexĩ i ngẽma ore i pemaxã nüxü̃ chixuxü̃.
21Tupanaarü ore ga ümatüxü̃ rü ñanagürü:
“Tá chanamugü i to i nachixü̃anecüã̱x i duü̃xü̃gü nax to i nagawa yadexagüxü̃ca̱x namaxã i chorü duü̃xü̃gü i Yudíugü.
Natürü woo ngẽmaãcü chanaxüxgu, rü taxũtáma chauga naxĩnüe i ngẽma Yudíugü”,
ñanagürü ga Tupana.
22Rü ngẽmaca̱x ngẽma nax to i nagawa idexaxü̃, rü wüxi i cua̱xruxü̃ nixĩ naxca̱x i ngẽma duü̃xü̃gü i tama yaxõgüxü̃. Rü tama duü̃xü̃gü i marü yaxõgüxü̃ca̱x nixĩ i ngẽma. Natürü ngẽma Tupanaarü orexü̃ nax ixuxü̃, rü duü̃xü̃gü i marü yaxõgüxü̃ca̱x nixĩ nax yexeraãcü mea Tupanaaxü̃́ yaxõgüãxü̃ca̱x. Rü tama duü̃xü̃gü i tama yaxõgüxü̃ca̱x nixĩ i ngẽma.
23Rü ngẽxguma chi pema i yaxõgüxe pengutaque̱xegügu, rü guxã chima to i nagawa pidexagügu, ¿rü ñuxũ ñaxü̃ tá ega petanügu naxücu̱xgu i wüxi i duü̃xü̃ i ngéma iyarüxĩnüxü̃ rü ẽ̱xna wüxi i duü̃xü̃ i tauta yaxõxü̃? ¿Taux ẽ̱xna i nagu tá naxĩnüxü̃ nax pexãũãẽgüxü̃ i pemax?
24Natürü ngẽxguma chi guxãma i pema nüxü̃ pixuxgu i Tupanaarü ore, rü chi petanügu naxücu̱xgu i wüxi i duü̃xü̃ i tama yaxõxü̃ rü ẽ̱xna wüxi i duü̃xü̃ i ngéma iyarüxĩnüxü̃, rü tá nüxü̃ naxĩnü i ngẽma Tupanaarü ore i nüxü̃ pixuxü̃. Rü ngẽmaãcü tá nügü nicua̱xãchi nax chixexü̃wa nangẽxmaxü̃ i norü maxü̃. Rü tá nügügu tátama inarüxĩnü i ngẽxguma nüxü̃ naxĩnügu i ngẽma nüxü̃ pixugüexü̃.
25Rü ngẽmaãcü tá nango̱x i ngẽma chixexü̃ i nüxicatama nüxü̃ nacuáxü̃ rü ngẽxma tá nacaxã́pü̱xü, rü tá Tupanaxü̃ nicua̱xüxü̃. Rü tá nüxü̃ nixu nax aixcüma Tupana petanüwa nangẽxmaxü̃.
Name nax meamare penaxüxü̃ i ngẽxguma pengutaque̱xegügu
26Dücax, Pa Chauenexẽgüx, ñu̱xma tá pemaxã nüxü̃ chixu nax ñuxãcü tá penaxüxü̃ ega ngẽxguma pengutaque̱xegügu. Rü ñuxre i pema rü marü name nax Tupanaarü wiyaegu pewiyaegüxü̃, rü toguxe rü tangu̱xẽẽtaegüxü̃, rü toguxe rü nüxü̃ tixuxü̃ i ngẽma ore ya Tupana tüxü̃ nüxü̃ cua̱xẽẽxü̃, rü toguxe rü nawa tidexagüxü̃ i naga i tama nüxü̃ tacua̱xgüxü̃, rü toguxe rü tanango̱xẽẽgüxü̃ i ngẽma dexa i to i nagawa nüxü̃ yaxugüxü̃. Natürü guxü̃ma i ngẽma rü tanaxwa̱xe i ngẽma yaxõgüxü̃arü ngü̃xẽẽca̱x nax yixĩxü̃, nax yexeraãcü yaxõgüãxü̃ca̱x rü mea Tupanaca̱x namaxẽxü̃ca̱x.
27Rü ngẽxguma to i naga i pema tama nüxü̃ pecuáxü̃wa pidexagügu, rü name nixĩ i taxre rü ẽ̱xna tomaepü̱xicatama tidexagü. Rü tanaxwa̱xe i wüxíexíra tidexa i noxri rü yixcama ya toguxe. Rü ngẽxguma chi texé to i nagawa idexaxgu, rü name nixĩ nax tangexmaxü̃ ya wüxíe ya nüxü̃ ixuchigüxe nax ta̱xacüchiga yixĩxü̃ i ngẽma ore i to i nagawa nüxü̃ tixuxü̃.
28Natürü ngẽxguma chi tataxu̱xgu nax texé nüxü̃ ixuxü̃ nax ta̱xacüchiga yixĩxü̃ i ngẽma ore i to i nagawa nüxü̃ tixuxü̃, rü narümemae nixĩ nax noxtacüma tama to i nagawa tidexagü i perü ngutaque̱xewa. Rü narümemae i wüxichigü tüxica Tupanamaxãxicatama bexma tidexa.
29Rü ngẽxgumarüxü̃ ta ngẽxguma pengutaque̱xegügu, rü name nixĩ i taxre rü ẽ̱xna tomaepü̱xicatama nüxü̃ tixu i Tupanaarü ore. Rü ngẽma togü i ngutaque̱xetanüxü̃ rü name nixĩ nax mea nangugügüãxü̃ i ngẽma ore.
30Natürü ngẽxguma chi íyadexayane i wüxi i duü̃xü̃, rü Tupana tümamaxã idexagu ya toguxe ya ngéma rütoxe, rü name nixĩ nax iyanachianexü̃ i ngẽma nüxíra idexaxü̃ nax tidexaxü̃ca̱x ya yíxema duü̃xẽ ya Tupana tümamaxã idexaxe.
31Rü ngẽxguma texé Tupana tümamaxã idexagu, rü name nixĩ i wüxichigü ítanangu̱xẽxẽ nax tümawa nanguxü̃ nax nüxü̃ tixuxü̃ca̱x i ngẽma Tupana tümamaxã nuxü̃ ixuxü̃ i ore nax ngẽmaãcü i ngẽma yaxõgüxü̃ rü nüxü̃ nacua̱xgüxü̃ca̱x nax ta̱xacüchiga yixĩxü̃ i ngẽma nüxü̃ tixuxü̃ rü nataãẽgüxü̃ca̱x.
32Rü ngẽmaãcü tanaxwa̱xe i meama tügümaxã itacua̱x ya wüxichigü ya yíxema Tupana tümamaxã idexaxe.
33-34Erü perü ngutaque̱xegüwa rü Tupana nanaxwa̱xe nax mea penaxüxü̃ i guxü̃ma, rü tama nanaxwa̱xe nax ngéma pexãũgatanüxü̃ rü pegü ípetüexẽẽxü̃. Rü guxü̃ma i ngẽma togü i yaxõgüxü̃arü ngutaque̱xegüwa rü marü nüxü̃ nayapue nax tama yadexagüxü̃ i ngexü̃gü. Rü name nixĩ i pema rü ta ngẽmaãcü penaxü, erü nachu̱xu nax yadexagüxü̃ i ngexü̃gü i ngutaque̱xegüwa. Rü name nixĩ nax yatügüga naxĩnüexü̃ i ngexü̃gü, ngẽma Tupanaarü ore tüxü̃ muxü̃rüxü̃.
35Rü ngẽxguma chi wüxi i ngexü̃ ta̱xacüxü̃ nacuáxchaü̃gu, rü name nixĩ i natena naca i nachiga i ngẽma. Erü wüxi i ãne nixĩ ega ngutaque̱xewa yadexaxgu i wüxi i ngexü̃.
36Pa Coríntiucüã̱xgüx, name nixĩ nax nüxna pecua̱xãchiexü̃ nax tama pewaxira ne naxũxü̃ i Tupanaarü ore. Rü tama pexicatama nixĩ i penayauxgüxü̃ i ngẽma.
37Rü ngẽxguma chi texé tügügu rüxĩnügu nax Tupanaarü orearü uruxü̃ tixĩxü̃ rü ẽ̱xna tügügu tarüxĩnügu nax Tupanaãxẽ ya Üünecü tüxna naxãxü̃ i ta̱xacürü cua̱x, rü name nixĩ i nüxna tacua̱xãchi nax tórü Coriarü mu yixĩxü̃ i ñaa ore i pexca̱x chaxümatüxü̃.
38Natürü ngẽxguma chi texé tama nüxü̃ cuáxchaü̃gu i ngẽma pexca̱x chaxümatüxü̃, rü nüma ya Cori ya Tupana rü tama tüxü̃ nacua̱x.
39¡Rü ngẽmaca̱x, Pa Chauenexẽgüx, rü Tupanana naxca̱x peca i cua̱x nax meama nüxü̃ pixuxü̃ca̱x i norü ore! ¡Rü tama penachu̱xu nax to i nagawa yadexagüxü̃ i duü̃xü̃gü!
40Rü perü ngutaque̱xegüwa, rü name nixĩ nax mea penaxüxü̃ i guxü̃ma. Rü tama name i ngéma pexãũgatanü rü pegü ípetüexẽxẽ.
© 2022, Wycliffe Bible Translators, Inc. All rights reserved.
