Nüxíraxü̃xü̃ ga popera ga Coríntiuwa yexmagüxü̃ ga yaxõgüxü̃tanüwa namuxü̃ ga Pauru 13
13
1Rü woo togü i nagawa chidexagu, rü woo Tupanaarü orearü ngeruü̃gü i daxũcüã̱xgawa chidexagu, natürü ñoma wüxi i paxetaruxü̃ i ãgamarexü̃rüxü̃ chixĩ ega tama choxü̃́ nangẽxmagu i ngechaü̃.
2Rü woo nüxü̃ chacua̱xgu nax mea duü̃xü̃gümaxã nüxü̃ chixuxü̃ i Tupanaarü ore, rü woo nüxü̃ chacua̱xgu i guxü̃ma i ta̱xacü i ẽxü̃guxü̃ i Tupanachiga, rü woo choxü̃́ natauxchagu nax chorü õmaxã chayaxĩgachixẽẽxü̃ ya ma̱xpǘnegü, natürü taxuwama chame ega tama choxü̃́ nangẽxmagu i ngechaü̃.
3Rü woo ngẽma duü̃xü̃gü i ngearü diẽruã̱xgüxü̃xü̃ chayanuxgu i guxü̃ma i ta̱xacü i choxü̃́ ngẽxmaxü̃, rü woo Tupanaarü oreca̱x chaugü ichaxãxgu nax üxüwa choxü̃ yagugüxü̃ca̱x, rü taxuwama choxü̃́ name i ngẽma ega tama choxü̃́ nangẽxmagu i ngechaü̃.
4Rü yíxema tüxü̃́ nangẽxmaxẽ i ngechaü̃ rü guxchaxü̃maxã yáxna taxĩnü, rü tamecüma. Rü tama taxãũxãchiwa̱xe, rü tama togüxü̃ tügü tarüyexera, rü tama tügü ticua̱xüxü̃.
5Rü yíxema tüxü̃́ nangẽxmaxẽ i ngechaü̃ rü tama taguxchigawa̱xe, rü tama tügüguxicatama tarüxĩnü, rü tama tanuxwa̱xe, rü tama nagu tarüxĩnüecha ega texé guxchaxü̃ tümamaxã uxgu.
6Rü tama namaxã tataãxẽ i chixexü̃gü, natürü namaxã tataãxẽ i ngẽma ore i aixcüma ixĩxü̃.
7Rü yíxema aixcüma tüxü̃́ nangẽxmaxẽ i ngechaü̃ rü nüxü̃ tarüngüma i guxü̃ma i guxchaxü̃gü, rü guxü̃guma tayaxõ, rü guxü̃guma mexü̃gu tarüxĩnü, rü guxü̃ma i guxchaxü̃gümaxã yáxna taxĩnü.
8Rü ngẽma ngechaü̃ rü tagutáma inayacua̱x. Natürü ngẽma nax nüxü̃ ixuxü̃ i Tupanaarü ore rü wüxi i ngunexü̃gu tá inayacua̱x. Rü ngẽma tama nüxü̃ icuáxü̃ i nagawa nax idexaxü̃, rü tá ta inayacua̱x. Rü ngẽma cua̱x i ñu̱xma tüxü̃́ ngẽxmaxü̃ rü wüxi i ngunexü̃gu rü marü taxuwatáma tüxü̃́ name.
9Erü ngẽma tórü cua̱x i ñu̱xma tüxü̃́ ngẽxmaxü̃, rü tama ningu nax nüxü̃ icuáxü̃ca̱x i guxü̃ma i Tupanachiga. Rü ngẽxgumarüxü̃ ta i ngẽma norü orexü̃ nax ixuxü̃, rü tama ningu i tórü cua̱x nax nüxü̃ ixuxü̃ca̱x i guxü̃ma i Tupanachiga.
10Rü guxü̃ma i ngẽma cua̱x i ñu̱xma tüxü̃́ ngẽxmaxü̃ rü tá inayarüxo i ngẽxguma Tupanape̱xewa ingugügu. Rü ngẽxguma i nüma rü tá guxü̃xü̃ma tüxü̃ nacua̱xẽxẽ.
11Yexguma chabuxgu ga chomax, rü wüxi ga buxü̃rüxü̃ chidexa, rü buxü̃ nagu rüxĩnüxü̃gu charüxĩnü, rü tama mea chauãẽxü̃ chacua̱x. Natürü yexguma marü chaya̱xgu, rü nüxü̃ charüxo ga guxü̃ma ga yema chorü bucüma.
12Rü ngẽma ñu̱xma nüxü̃ idauxü̃ i Tupanachiga, rü ñoma wüxi i worua ya üxachametüxewa yigü idauxü̃rüxü̃ nixĩ nax taxca̱x naxẽxü̃. Natürü yixcüra rü tá aixcüma mea nüxü̃xüchi tadau ya Tupana. Rü ñu̱xma rü írarüwatama nüxü̃ chacua̱x i Tupanachiga. Natürü wüxi i ngunexü̃gu rü tá mea nüxü̃ chacua̱x i guxü̃ma i nachiga, ngẽma nüma ya Tupana choxü̃ nacuáxü̃rüxü̃.
13Rü ñu̱xma rü nangẽxma i tomaepü̱x i nacümagü i guxü̃gutáma ngẽxmaxü̃. Rü wüxi nixĩ nax yaxõxü̃, rü ngẽma to nixĩ nax ínangu̱xẽẽxü̃ nax nataeguxü̃ ya Cristu, rü ngẽma to nixĩ nax tüxü̃́ ngẽxmaxü̃ i ngechaü̃. Natürü ngẽma tomaepü̱xtanüwa rü ngẽma guxü̃arü yexera rümemaexü̃ nixĩ i ngẽma ngechaü̃.
© 2022, Wycliffe Bible Translators, Inc. All rights reserved.
