MARKUS 9

1Nadeak-Ne igai ngen tobo'o Uku madeak ngen udi, “Sesungguakne neak antaro tun de ade neak yo ade de coa bakea matei ayok tobo'o kemliak bahwo Allah meriteak sebagai Rajo bi teko ngen kuaso.”

Yesus de mulio

(Mat. 17:1-13; Luk. 9:28-36)

2 # 2Ptr. 1:17-18 Num bilai sesudo'o Yesus mbin Petrus, Yakobus, Yohanes ngen besamo-samo tobo'o Si keneak moi debueak tebo de lekat. Neak di tobo'o suang bae. Lajau Yesus bubeak papea neak adep matei tobo'o, 3Ngen keracok-Ne kebiak putiak bekilet. Coa gen su'ang tun tukang nepat neak dunio yo de dapet mutiak keracok awei'o. 4Mako keten ba ngen tobo'o Elia besamo ngen Musa, keduaine dong miling ngen Yesus. 5Nadeak Petrus ngen Yesus, “Gu'au, alangkah baikne ite berade neak penan yo. Kunyauba keme temgok telau kema, do utuk ko, do utuk musa ngen do utuk Elia.” 6Si madeak aweiyo, kerno coa namen jano de harus de nadeakne, kerno tobo'o kebiak saben. 7#Mat. 3:17; Mrk. 1:11; Luk. 3:22 Mako tekoba mbun melitas tobo'o ngen kunei mbun'o teni'uk saei, “Dioba anok de Uku kasihi, teni'ukba Si.” 8Ngen seketiko o waktau tobo'o kemliak sekeliling tobo'o coa kemliak su'ang tun igai besamo tebo'o, kecuali Yesus su'ang dirai.

9Pado waktau tobo'o tu'un kunei tobo'o Yesus pesen ngen tobo'o, supayo tobo'o jibeak cemrito ngen su'ang tun jano de sudo tobo'o kemliak'o, ayok Anok Manusio idup igai kunei antaro tun matei. 10Tobo'o megong pesen nano samo temnai suang ngen de luyenne neak antaro tobo'o jano maksud “idup iagai kunei antaro tun matei.” 11#Mal. 4:5; Mat. 11:14 Lajau tobo'o betanye ngen-Si, “Getai gu'au-gu'au agamo madeak, bahwo Elia harus teko lebiak dute?” 12Yesus jemawab, “Benea Elia bakea teko lebiak dute ngen menyep kutene. Cuma, aweiipe ngen de ade tetulis tetang Anok Manusio, bahwo Si bakea dau derito ngen bakea nino?” 13Tapi Uku madeak ngen udi, “Benea Elia bi teko ngen tun menea si temurut kenlok tobo'o, sesuai ngen de ade tetulis tetang si.”

Yesus musir roh kunei su'ang anok de bisau

(Mat. 17:14-21; Luk. 9:37-43)

14Waktau Yesus, Petrus, Yakobus ngen Yohanes belek igai ngen murid-murid luyen, tobo'o kemliak tun dau gemlumbung murid-murid'o, ngen kekedau gu'au agamo dong tanye jawab ngen tobo'o. 15Pado waktau tun dau'o kemliak Yesus, cengang ba tobo'o kute ngen gegulut semambut Si. 16Lajau Yesus temnai ngen tobo'o, “Jano de udi semoal ngen tobo'o?”

17Nadeak su'ang tun kunei tun dau'o, “Gu'au, anokku yo uku mbin ngen-Ko, kerno si pasuk roh de menea si bisau. 18Ngen tiep kilai roh'o semrang si, si segro gemuyang anok'o, ngen anok'o tepelating moi pitok; ngen geguling lajau bibiane bukuak, epenne besa'ei ngen awokne jijai telo. Uku bi minoi ngen murid-murid-Nu, supayo tobo'o musir roh'o, tapi tobo'o coa nam.”

19Mako nadeak Yesus ngen tobo'o, “Hoi udi tun-tun de coa masai, kedau ke'an igai Uku harus tinggea neak antaro udi? Kedau ke'an igai Uku harus sabar teadep udi? Mbin ba anok'o minyo!” 20Lajau tobo, o mbinne ngen Yesus.

Waktau roh'o kemliak Yesus anok'o segro genuyangne, ngen anok'o tepelating moi pitok ngen taguling-guling, dong bibiane bukuak. 21Lajau Yesus temnai ngen tieak anok'o, “Bikedau ke'anne si medingyo?”

Jawabne, “Muloi kunei titik. 22Ngen bi awit roh'o seme'etne moi lem opoi atau moi lem bioa utuk mabisne. Kerno'o amen Kumu dapet menea sesuaktau, tulungba keme ngen selenba ngen keme.”

23Yesus jemawab, “Nadeaknu: Amen Ko nam? Coa ade de mustahil utuk tun de pecayo!”

24Segro tiak anok'o menggang, “Uku pecayo. Tulungba uku de coa pecayo yo!”

25Waktau Yesus kemliak tun dau tambeak dau teko gemlumbung, Si temgur roh kidek'o ngen lek, nadeak-Ne, “hoi ko roh de menea tun jijai bisau ngen seti'uk, Uku meluak ko, kelueaba kunei anok Yo ngen jibeak masukne igai”

26Lajau kelueaba roh'o samo menggang ngen gemuyang anok'o ngen padekne. Anok'o ketenne awei tun matei, sehinggo dau tun de madeak, “Si bi matei.” 27Tapi Yesus megong tangen anok'o ngen geminggut, lajau si kelongon su'ang.

28Waktau Yesus bi neak dasei, murid-murid-Ne tek ngen-Si, tennaiba tobo'o, “Getai keme coa nam musir roh tobo'o?”

29Jawab-Ne ngen tobo'o, “De aweiyo coa dapet nusir kecuali ngen du'o.”

Melei namen de keduai tetang derito Yesus

(Mat. 17:22-23; Luk. 9:43-45)

30Yesus ngen murid-murid-Ne berakat kunei di ngen melitas Galilea, Yesus coa lok hal'o namen ngen tun. 31Kerno Si dong majea murid-murid-Ne. Si madeak ngen tobo'o, “Anok Manusio bakea senreak moi lem tangen manusio, tobo'o bakea munuak Si, telau bilai sesudo Si nunuak Si bakea idup igai.”

32Tobo'o coa ngertai kecek'o, tapi tobo'o saben betanye ngen-Si.

Api de kebiak lai neak antaro murid

(Mat. 18:1-5; Luk. 9:46-48)

33Sesudo'o sapei ba Yesus ngen murid-murid-Ne neak Kapernaum. Waktau Yesus bi neak dasei, Si betanye ngen murid-murid-Ne, “Jano de udi madeak nano neak tengeak dalen?”

34 # Luk. 22:24 Tapi tobo'o diem, kerno neak tengeak dalen nano tobo'o betekea tetang api de kebiak lai neak antaro tobo'o. 35#Mat. 20:26-27, 23:11; Mrk. 10:43-44; Luk. 22:26 Lajau Yesus temot ngen menok kedua belas murid'o. Nadeakne ngen tobo'o, “Amen su'ang tun lok jijai de deno, lok ba si jijai de akhir kunei kutene ngen pelayan kunei kutene.” 36Mako Yesus mok su'ang anok titik ngen mpekne neak tengeak-tengeak tobo'o, sesudo'o Si megep anok'o ngen madeak ngen tobo'o: 37#Mat. 10:40; Luk. 10:16; Yoh. 13:20 “Api semambut su'ang anok awei yo lem gen-Ku, si semambut Uku. Ngen api semambut Uku, iso Uku de senambutne, tapi Si de mutus Uku.”

Su'ang tun de iso murid Yesus musir semat

(Luk. 9:49-50)

38Nadeak Yohanes ngen Yesus, “Gu'au, keme kemliak su'ang tun de iso murid ite musir semat utuk gen-Nu, lajau keme temgeak tun'o, kerno si iso murid ite.”

39Tapi Yesus madeak, “Jibeak udi temgeak si! Kerno coa su'ang tun de bi menea mujizat utuk gen-Ku, dapet seketiko o kulo mupet Uku. 40#Mat. 12:30; Luk. 11:23 Api de coa melawen ite, si ade neak pihak ite. 41#Mat. 10:42 Uku madeak nge-Ko, Sesungguakne api melei udi menem do caker bioa kerno udi adeba murid Kristus, si coa bakea nyep upeakne.”

Api de menea tun beduso

Tetang silai

(Mat. 18:6-9; Luk. 17:1-2)

42“Api de menea saleak do kunei anok-anok titik de masai yo, lebiak baik utukne amen de buak butau delapang neket moi kagenne lajau si nuang moi lem laut. 43#Mat. 5:30 Amen tangennu de menea ko beduso, notongba! Kerno lebiak baik ko masuk moi lem idup ngen tangen butung kunei pado utuh keduai tangen nu nuang moi lem nerako, moi lem opoi de coa nam padem. [44Neak penan'o olokne coa matei, ngen opoine coa bakea padem.] 45Amen kekeanu menea ko beduso, notongba, kerno lebiak baik ko masuk lem idup ngen ciket, kunei pado utuh keduai kekea nu nuang moi lem nerako. [46Neak penan'o olokne coa bakea matei, ngen opoine coa bakea padem.] 47#Mat. 5:29 Amen matei nu menea ko beduso, cukieaba! Kerno lebiak baik ko masuk moi lem dunio blau Allah ngen do matai kunei pado ngen duai matai tapi, nuang moi lem nerako. 48#Yes. 66:24 Neak ipe olok-olok coa matei ngen opoi coa padem.

49Kerno tiep tun bakea senucai ngen opoi.

50 # Mat. 5:13; Luk. 14:34-35 Silai memang baik tapi amen silai jijai ambea, ngen janokah udi mesinne? Lokba udi jijai awei silai ngen idupba besamo-samo ngen damoi.”

Currently Selected:

MARKUS 9: REJ

Highlight

Copy