MARKUS 7

Periteak Allah ngen adat istiadat Yahudi

(Mat. 15:1-20)

1Pado suatau kilai tun-tun Farisi ngen kekedau gu'au-gu'au agamo kunei Yerusalem teko magea Yesus. 2Tobo'o kemliak bahwo kekedau tun murid-Ne mukmei ngen tangen de najis, adeba tangen de coa nepuk.

3Sebab tun-tun Farisi awei tun-tun Yahudi luyenne coa mukmei amen coa mpuk tangen ngen cao tertentu, kerno tobo'o bepegang pado adat istiadat ninik puyang tobo'o. 4Ngen amen belek kunei pasar tobo'o kulo coa mukmei amen coa lebiak dute mpuk diraine. Dau adat istiadat luyen igai de tobo'o pegong, umpamone hal mpuk caker, ngen pekakas-pekakas tembago.

5Kerno o tun-tun Farisi ngen gu'au-gu'au agamo'o betanye ngen Yesus, “Getai murid-murid-Nu coa idup temotoa adat istiadat ninik puyang te, tapi mukmei ngen tangen najis?”

6 # Yes. 29:13 Jawab-Ne ngen tobo'o, “Tepat nien de nea Yesaya tetang udi, hoi tun-tun munafik! Awei ade tetulis:

Bangso yo mujai Uku ngen bibiane,

padohal ateine uak kunei-Ku.

7Percuma tobo'o semyang ngen-Ku.

Kerno ajaran de tobo'o najea adeba periteak manusio.

8Periteak Allah udi coa demulai, ngen adat istiadat manusio udi pegong.”

9“Yesus madeak kulo ngen tobo'o kembiak pacok udi teminggea periteak Allah, kunyau udi dapet miaro adat istiadat suang. 10#Kel. 20:12, 21:17; Im. 20:9; Ul. 5:16 Kerno Musa bi madeak: ‘Hormatba ngen tiak nu ngen indok nu,’ ngen: ‘Api de kemutuk tieakne atau indokne harus matei.’ 11Tapi udi madeak: Amen suang tun medeak ngen tieakne atau indokne: ‘Jano de ade padoku, de dapet genuno utuk murusnu, sudo genuno utuk kurban adeba persembahan ngen Allah,’ 12mako udi coa munyaune igai nea sesuaktau utuk tieak ngen indokne. 13Ngen awei yo firman Allah udi madeak coa belakau utuk adat istiadat de udi temotoa o. Masiak dau igai hal luyen de udi nea.”

14Lajau Yesus manggea igai tun dau ngen madeak ngen tobo'o, “Udi kute, teni'uk ba kunyau ngertai. 15Jano bae kunei luea de masuk moi lem awok suang tun, coa dapet menea tun'o najis, tapi jano de keluea kunei awokne, do'oba de jijai najis. [16Api temuan ti'uk utuk temi'uk kenlok ba si temi'uk.]”

17Sesudo Si masuk moi debuak umeak utuk nyikir kunei tun dau, murid-murid-Ne temnai ngen-Si tetang tai perumpamo'o. 18Mako jawab-Ne, “Jano udi kulo coa dapet paham? Coa namenba udi bahwo kute sesuatau kunei luea de masuk moi lem awok suang tun coa dapet nea najis? 19Kerno iso masuk moi lem atei tapi moi lem teneine, lajau nuang neak kakus.” Ngen aweiyo Si madeak kute kembuk halal.

20Nadeak-Ne igai, “Jano de keluea kunei awok suang tun do'oba de jijai najis. 21Sebab kunei lem, kunei atei tun, timboa kute pekeran kidek, perzinahan, maling, pembunuhan, 22Perzinahan, tamak, kajahatan, licik, ngike, coa sopan, iri atei, ombong, saro najea. 23Kute hal-hal kidek yo tiboa kunei lem de jijai tun najis.”

Selawei Siro-Fenisia de masai

(Mat. 15:21-28)

24Lajau Yesus berakat kunei di ngen lalau moi daerah Tirus. Si masuak moi debuak umeak ngen coa lok bahwo ade tun de namen, tapi Tekone Si coa dapet nunyin. 25Su'ang mbei, de anokne selawei pasuk roh kidek, segro temi'uk tetang Si, lajau teko ngen sujud neak adep kekea-Ne. 26Selawei'o su'ang tun Yunani bangso Siro-Fenisia. Si minoi ngen Yesus utuk musir semat'o kunei anokne. 27Lajau Yesus madeak ngen si, “Kunyau ba anok-anok keyang kileak, sebab coa patut mok ruti de semiyap utuk anok-anok ngen melukne ngen kuyuk.” 28Tapi selawei'o jemawab, “Benea, Tuhan. Tapi kuyuk de neak beak mija kulo mbuk tieak-tieak kembuk de cenucia anok-anok.” 29Mako Yesus madeak ngen selawei'o, “Kerno kecek-kecek nu'o, lalauba uyo sebab semat'o bi keluea kunei anok nu.” 30Selawei, o belek moi umeak ne, lajau temaune anok'o teguling neak penan tidua, ngen semat'o bi keluea.

Yesus kema'en suang tun sti'uk

31Sesudo'o Yesus teminggea igai daerah Tirus ngen melitas Sidon lalau moi Daneu Galilea, melitas daerah puluak kota. 32Neak di tun mbin ngen-Si suang tun de sti'uk ngen de setagea minoi ngen Si, supayo mpek tangen-Ne neak das tun'o. 33Sesudo Yesus cem'ei Si kunei tun dau, sehinggo tobo'o suang, Si mpek jiai-Ne moi ti'uk tun'o, lajau Si temkek ngen mabo dileak tun'o. 34Sesudo'o samo nanggea moi lenget Yesus mok nyabai madeak ngen Si, “Efata,” taine, “Tukokba!” 35Mako tukokba ti'uk tun'o ngen seketiko o dileakne jijai ka'en, lajau Si miling ngen baik. 36Yesus pesen ngen tun-tun de ade neak di supayo jibeak cemrito ngen api bae. Tapi tambeak temgeak, tambeak tobo'o cemritone. 37Tobo'o kebiak takjub ngen madeak, “Si jemijai kekutene baik, de seti'uk neane temi'uk, de bisau neane miling.”

Currently Selected:

MARKUS 7: REJ

Highlight

Copy