MARKUS 6

Yesus coa tenimo neak Nazaret

(Mat. 13:53-58; Luk. 4:16-30)

1Sesudo'o Yesus berakat kunei di ngen sapei neak penan asal-Ne, gidong murid-murid-Ne temotoa Si. 2Waktau bilai sabat si muloi majea neak umeak semyang ngen dau tun takjub temi'uk-Ne ngen madeak, “Kunei ipe Si dapet hal-hal'o? Hikmat jano de nelei ngen-Si? Awei ipe Si dapet menea mujizat-mujizat? 3Si dio anok tukang kieu, anok Maria, ngen pasuak Yakobus, Yoses, Yudas ngen Simon? Iso pasuak-pasuak-Ne de selawei ade neak yo besamo ite?” Lajau tobo'o coa temimo Si. 4#Yoh. 4:44 Sudo'o Yesus madeak ngen tobo'o, “Suang nebai nego neak ipe bae, kecuali neak penanne suang, neak antaro keluargone ngen neak umeakne.” 5Si coa dapet menea mujizat neak di, kecuali kema'en kekedaw tun bolon ngen meletok tangen-Ne neak das tobo'o. 6aSi meraso sele kerno tobo'o coa masai.

Yesus mbo keduai belas murid

(Mat. 10:5-15; Luk. 9:1-16)

6bLajau Yesus paneu keliling kunei sadei moi sadei samo ngajea. 7Si menok keduai belas murid o ngen muloi mbo tobo'o de duai. Si melei tobo'o kuaso das roh-roh kidek. 8#Luk. 10:4-11 Ngen pesen ngen tobo'o jibeak mbin jano-jano neak lem pemanew tobo'o, kecuali tobo'o bae, ruti jibeak, katung ibet kulo jibeak, caci lem katung jibeak kulo nembin, 9buliak makei alas kekea, tapi jibeak mbin duai bajau. 10Nadeak-Ne igai ngen tobo'o, “Amen neak do penan udi masuk moi lem do umeak, tinggea ba neak di sapei udi berakat kunei penan'o. 11Amen ade do penan de coa lok temimo udi ngen coa lok temi'uk udi, kelueaba kunei di ngen kenibasba debu de neak kekeanu sebagai peringatan utuk tobo'o.” 12Lajau lalauba tobo'o melei namen bahwo tun harus tobat, 13#Yak. 5:14 Ngen tobo, o musir dau roh kidek, ngen melomok dau tun bolon ngen minyok ngen kema'en tobo'o.

Yohanes Pembaptis nunuak

(Mat. 14:1-12; Luk. 9:7-9)

14 # Mat. 6:14; Mrk. 8:28; Luk. 9:19 Rajo Herodes kulo temi'uk tetang Yesus, sebab genne bi tenamo ngen tun madeak, “Yohanes Pembaptis bi idup igai kunei antaro tun matei ngen do'oba sebabne kuaso-kuaso'o bekerjo neak lem Si.”

15Tun luyen igai madeak, “Si'o Elia!”

De luyen igai madeak, “Si'o suang nebai samo awei nebai-nebai bel'o.”

16Waktau Herodes temi'uk hal'o, Si madeak, “Iso, Si'o Yohanes gi sudo Uku motongulau ne, ngen de idup igai.”

17 # Mat. 14:3-4; Luk. 3:19-20 Sebab Herodes ba gi meluak tun temakep Yohanes ngen mbelenggaune neak penjaro berhubung ngen peristiwo Herodias, ngenyan Filifus pasuakne, kerno Herodes de ngemok si sebagoi ngenyan. 18Kerno Yohanes berkilai-kilai temgua Herodes, “Coa buliak ko mok ngenyan pasuaknu!” 19Kerno, o Herodias dendem ngen Yohanes ngen beniat utuk munuak si, tapi coa dapet, 20Kerno Herodes segan ngen Yohanes kerno si namen, bahwo Yohanes tun de benea ngen sucai, jijai si ngelindungne. Tiep kilai si temi'uk Yohanes, ateine jijai ragau, tapi si masai riang kulo temi'uk'o.

21Akherne ade kulo kesepatan de baik utuk Herodias, waktau Herodes ulang tahunne made pesta utuk pejabet-pejabetne, perwira-perwirane ngen tun-tun terkenal neak Galilea. 22Waktau'o anok selawei Herodias lalau moi muko lajau na'ai, ngen si semnang atei Herodes ngen tamu-tamune. Herodes madeak ngen semulen'o, “Minoiba jano bae de kenloknu, mako bakea nelei ngen ko!” 23Lajau Herodes bejanjai ngen si, “Jano bae de ko minoi bakea uku melei ngen ko, kunyau tengeak kunei kerajaanku!” 24Anok'o lalau ngen temnai indokne, “Jano de harus uku minoi?” Jawab indokne, “Ulau Yohanes Pembabtis!” 25Lajau si gegulut masuk madep rajo ngen minoi, “Uku lok, supayo uyo kulo ko melei ngen uku ulau Yohanes Pembatis neak das talam!” 26Lajau kembiak ibo ba atei rajo, tapi kerno janjaine ngen kerno tamu-tamune si coa lok temulok. 27Rajo segro meluak suang tun algojo ngen periteak supayo mok ulau Yohanes Pembaptis. Tun'o lalau ngen motong ulau Yohanes Pembaptis neak penjaro. 28Si mbin ulau'o neak debueak talam lai ngen neleine ngen semulen'o ngen semulen o melei kulo ngen indokne.

29Ketiko murid-murid Yohanes temi'uk hal'o tobo'o teko mok mayitne, lajau gemuling neak lem kubua.

Yesus melei kembuk lemo ribau tun

(Mat. 14:13-21; Luk. 9:10-17; Yoh. 6:1-13)

30Sesudo'o rasul-rasul'o belek igai belungguk ngen Yesus ngen melai namen ngen-Si kute de tobo'o kemerjo ngen tobo'o najea. 31Lajau Yesus madeak ngen tobo'o, “Maroba ite moi penan de sunyai, supayo ite suang, ngen bedan tegoa!” Sebab awei'o daune tun teko ngen lalau, sehinggo mukmei bae tobo'o coa telalau. 32Mako tobo'o berakat ngen biduk moi penan de sunyai.

33Tapi waktau tobo'o berakat dau tun kemliak tobo'o ngen namen maksud tobo'o. Ngen mok dalen da'et segroba teko tun kunei kute kota moi penan'o sehinggo de mute tobo'o. 34Ketiko Yesus tu'un kunei biduk, Si kemliak tun dau belugguk, mako tegerokba ateine ngen asai ibo ngen tobo'o. Kerno tobo'o awei bebirai de coa temuan gembala. Lajau muloiba Si majea dau hal ngen tobo'o. #Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mat. 9:36

35Pado waktau mulei kelmen, tekoba murid-murid-Ne ngen-Si madeak, “Penan yo sunyai ngen bilai muloi kelemen. 36Meluakba tobo'o lalau moi kapung-kapung ngen sadei rogok yo kunyau tobo'o dapet temukua kembuk utuk tobo'o.” 37Tapi Yesus jemawab-Ne, “Udi harus melei tobo'o mukmei!” Nadeak tobo'o ngen-Si, “Jijai harusba keme lalau temukua ruti gone duai otos dinar utuk melei tobo'o mukmei?”

38Tapi Si madeak ngen tobo'o, “Kedau ruti de ade ngen udi? Cuboba perikso!”

Sesudo Si namen tobo'o madeak, “Lemo ruti ngen duai kan.”

39Lajau Yesus meluak tun-tun'o, supayo kute temot bekelopok-kelopok neak das dukut ijo. 40Tobo'o lajau temot bekelopok-kelopok, ade de sotos, ade de lemo puluak tun. 41Sesudo mok lemo ruti ngen duai kan'o, Yesus nanggeak moi lenget ngen mucep syukur, lajau mecuak ruti'o ngen magiakne ngen murid-murid-Ne, supayo nagiak ngen kute tun o; sesudo'o Si magiak ke duai kan'o ngen tobo'o kute. 42Lajau tobo'o kutene mbuk sapei kenyang. 43Sudo'o tun melungguk tieak-tieak ruti sekedau duai belas bokoa penuak ngen tieak-tieak kan. 44De milau mbuk ruti'o ade lemo ribau tun semanei.

Yesus paneu neak das bioa

(Mat. 14:22-33; Yoh. 6:16-21)

45Sesudo'o Yesus segro demsok murid-murid-Ne kemnek moi biduk ngen berakat lebiak dute moi dipoa, moi Betsaida, sementaro'o Si meluak tun dau'o belek. 46Sesudo Si ce'ei kunei tobo'o, Si lalau moi tebo utuk bedu'o. 47Waktau bilai bi kelemen biduk'o sudo neak tengeak daneu, gidong Yesus tinggea suang neak daet. 48Waktau Si kemliak kebiak sarone tobo'o ngayuak kerno ibut lai mako kekiro jam telau kelmen Si teko ngen tobo'o paneu neak das bioa ngen Si lok melitas tobo'o. 49Waktau tobo'o kemliak Si paneu neak das bioa, tobo'o sako bahwo Si adeba atau, lajau tobo'o menggang. 50Sebab tobo'o kute kemliak Si ngen tobo'o kulo kembiak kanjet. Tapi segro Si madeak ngen tobo'o, “Tenangba! Uku yo, jibeak saben!” 51Lajau Si kenek moi biduk magea tobo'o, ngen ibut kulo bedan. Tobo'o kembiak cengang ngen bingung, 52tobo'o ati kulo ngertai kunyau ayokne bi kemliak mujizat tetang ruti, atei tobo'o coa masai.

Yesus kema'en tun-tun bolon neak Genesaret

(Mat. 14:34-36)

53Sapeine neak dipoa Yesus ngen murid-murid-Ne bedan neak Genesaret. 54Waktau tobo'o keluea kunei biduk, tun segro kemnal Yesus. 55Lajau ngacapba tobo'o moi kute daerah'o ngen muloi musung tun-tun bolon neak das tikeane moi ipe bae tobo'o temi'uk Yesus berade. 56Moi ipe bae Si lalau, moi sadei-sadei, moi kota-kota ngen moi kapung-kapung, tun meletok tun-tun bolon neak pasar minoi ngen Si, supayo tobo'o buliak gemindoa kunyau ujung jubahne bae. Kute tun de gemindoane jijai ka'en.

Currently Selected:

MARKUS 6: REJ

Highlight

Copy