MARKUS 1

Yohanes Pembaptis

(Mat. 3:1-6, 11-12; Luk. 3:3-6, 15-17; Yoh. 1:19-28)

1Dioba Bito Baik tetang Yesus Kristus, Anok Allah. 2#Mal. 3:1 Awei ade tetulis lem Kiteb Nebai Yesaya:

“Keliakba, ‘Uku meluak utusan-Ku demute Ko,

si bakea semiap dalen bagiak-Nu.’

3 # Yes. 40:3 Ade sa'ei tun de menggang neak benei libea,

‘Semiapba dalen utuk Tuhan,

nelu'usba dalen utuk-Ne.’ ”

4Awei yo ba Yohanes Pembaptis teko neak benei libea ngen madeak, “Betobatba ngen neleiba dirainu dibaptis ngen Allah bakea mapun dusonu.” 5Lajau tekoba mageane tun-tun kunei kute daerah Yudea ngen kute penduduk Yerusalem, ngen samo makau dusone tobo'o baptis neak Bioa Yordan. 6#2Raj. 1:8 Yohanes makei jubah bulau unto ngen peket pinggang babok, ngen kembukne belalang ngen medau imbo. 7Si melei namen awei yo, “Sesudo uku bakea teko Si de lebiak bekuaso kunei padoku. Utuk nunduk mukok tilai sepatu-Ne kulo, uku coa patas. 8Uku baptis ko ngen bioa, tapi Si bakea baptis ko ngen Roh Sucai.”

Yohanes membaptis Yesus

(Mat. 3:13-17; Luk. 3:21-22; Yoh. 1:32-34)

9Pado waktau'o tekoba Yesus kunei Nazaret neak taneak Galilea, ngen Si dibaptis neak Bioa Yordan ngen Yohanes. 10Waktau Si keluea kunei bioa, Si kemliak lenget tukok ngen Roh Sucai awei burung daro tu'un moi das-Ne. 11#Kej. 22:2; Mzm. 2:7; Yes. 42:1; Mat. 3:17, 12:18; Mrk. 9:7; Luk. 3:22, 9:35 Lajau teni'ukba sa'ei kunei surgo, “Ko ba Anok-Ku de Uku kemasiak, ngen Ko ba semnang atei-Ku.”

Yesus cenubo neak benei libea

(Mat. 4:1-11; Luk. 4:1-13)

12Segro sesudo'o Roh Sucai mipin Si moi benei libea 13Neak benei libea'o selamo pat puluak bilai Si tinggea ngen cenubo Iblis. Si tinggea besamo ngen benatang-benatang liea ngen malaikat-malaikat melayan Si.

Yesus neak Galilea

(Mat. 4:12-17; Luk. 4:14-15)

14Sesudo Yohanes tenakep tekoba Yesus moi Galilea semiar Bito Baik kunei Allah. 15#Mat. 3:2, 4:17 Nadeak-Ne, “Waktaune bi genep; Allah segro meriteak sebagai Rajo. Betobatba ngen pecayoba ngen Bito Baik!”

Yesus Menok murid-murid de pertamo

(Mat. 4:18-22; Luk. 5:1-11)

16Ketiko Yesus dong paneu moi Daneu Galilea, Si kemliak Simon ngen Adreas, pasuak Simon. Tobo'o dong mambua jalai neak daneu, karno tobo'o tukang jalai kan. 17Yesus madeak ngen tobo'o, “Maro, totoaba Uku ngen udi bakea jijai tukang jalai tun.” 18Lajau tobo'o segro teminggea jalaine ngen temotoa Si. 19Sesudo Yesus temrus pemaneu-Ne didik igai, Si-kemliak Yakobus, anok Zabedeus, ngen Yohanes, pasuakne, dong penyep jalai neak lem biduk. 20Yesus segro menok tobo'o ngen tobo'o teminggea bakne, Zabedeus, neak lem biduk besamo anok bueakne lajau temotoa Si.

Yesus neak lem umeak semyang neak Kapernaum

(Luk. 4:31-37)

21Yesus ngen murid-murid-Ne sapei nak Kapernaum. Sesudo bilai Sabat muloi, Yesus segro masuk moi umeak semyang ngen mengajea. 22#Mat. 7:28-29; Luk. 4:32 Tun-tun de ade neak umeak semyang kembiak tujau temi'uk ca'o ajaran-Ne kerno Si majea tobo'o awei tun gi temuan kuaso, coa awei gu'au-gu'au agamo. 23Pado waktau'o neak lem umeak semyang tobo'o ade tun de pasuk roh kidek tun'o menggang, 24“Jano Kelok-Nu ngen keme, Yesus tun Nazaret? Jano Ko teko utuk munuak keme? Uku namen api Ko: De Sucai kunei Allah.” 25Tapi Yesus tema'ok-Ne, nadeak-Si, “Diem, kelueaba kunei awokne!” 26Roh kidek o gemuyang tun'o, samo menggang ngen saei kebiak lek roh kidek keluea kunei awokne. 27Tobo'o kutene kembiak tujau, sehinggo tobo'o bogoa, madeakne, “Jano dio? Do ajaran belau. Si miling ngen kuaso. Melei periteak ngen roh-roh kidek ngen tobo'o taat ngen-Si.” 28Lajau segro tesebeaba bito tetang Si neak kute Galilea.

Yesus kema'en stuang selawei Petrus ngen tun-tun luyen

(Mat. 8:14-17; Luk. 4:38-41)

29Sesudo keluea kunei umeak semyang'o Yesus besamo Yakobus ngen Yohanes lalau moi umeak Simon ngen Adreas. 30Stuang Selawei Simon tegulek kerno bolon. Tobo'o segro melei namen keadaanne ngen Yesus. 31Yesus lalau moi penan selawei'o samo megong tangenne Si gemingut ne. Lajau nyep olonne, sesudo'o selawei o melayan tobo'o.

32Ayok kelmen, sesudo matai bilei tebenem, nembinba ngen Yesus kute tun gi bolon ngen pasuk semat. 33Kute penduduk neak kota o dong bekopoa nak adep bang. 34Yesus kema'en dau tun de dau mecem olon ngen musir dau semat; Si coa melueak semat-semat'o miling, karno semat'o namen ngen Si.

Yesus mengajea neak kota-kota luyen

(Luk. 4:42-44)

35Kekabuk nien, waktau bilei masiak kelem, Yesus kelongon sesudo'o lalau moi luea. Si lalau moi penen sunyai ngen bedu'o neak di. 36Tapi Simon ngen kekuatne mesoa Yesus. 37Waktau tobo'o temau ngen Si, tobo'o madeak ngen Si, “Kute tun mesoa ko.”

38Jawab-Ne, “Maroba ite lalau moi penan luyen, moi kota rogok yo, supayo neak di kulo Uku melei namen Bito Baik, kerno utuk o Uku teko.”

39 # Mat. 4:23, 9:35 Lajau lalauba Si moi kute kota Galilea melei namen Bito Baik neak lem umeak semyang tobo'o ngen musir semat-semat.

Yesus kema'en tun olon kidek

(Mat. 8:1-4; Luk. 5:12-16)

40Suang tun de bolon kidek teko ngen Yesus, ngen sembeak sujud neak adep-Ne Si minoi tulung, nadeakne, “Amen ko lok, Ko nam kema'en uku.”

41Lajau tegerokba atei-Ne ngen raso ibo, Si mulua tangen-Ne, Si gemindoa tun'o madeak ngen Si, “Uku lok, ka'enba ko.” 42Seketiko o kulo nyepba olon kidekne ka'enba si. 43Segro Si muluak tun'o lalau samo Si madeak: 44#Im. 14:1-32 “Inget, jibeak ko madeak hal yo ngen api bae, tapi lalauba, kemten dirainu ngen imem ngen meleiba utuk upacara persembahan, de neriteak Musa, sebagai bukti bagiak tobo'o.”

45Tapi tun'o lalau melei namen hal'o serto semiar neak ipe bae, sehinggo Yesus coa dapet igai tete'ang masuk moi lem kuta. Si tinggea nak luea nak penan sunyai; tapi tun te'us kulo teko ngen-Si kunei kute penan.

Currently Selected:

MARKUS 1: REJ

Highlight

Copy