MATIUS 28

Yesus idup igai kunei matei-Ne

(Mrk. 16:1-10; Luk. 24:1-12; Yoh. 20:1-10)

1Waktau bilai Sabat tun Yahudi sudo liwet, pado bilai minggau pueng-pueng nien, Mariam Magdalena ngen Mariam de luyen'o lalau kemliak kubua'o. 2Tetibo tejijai gepo de lai. Su'ang malaikat Tuhan tu'un kunei surgo lajau gemuling butau penutup'o, ngen temot neak dasne. 3Papea malaikat'o awei kilet, ngen keracokne putiak nien. 4Tentra penjago de njago neak di kembiak saben sapei tobo'o gemtea ngen jijai awei tun matei.

5Malaikat'o madeak ngen selawei-selawei'o, “Jibeak saben! Uku namen udi mesoa Yesus de sudo senalib'o. 6Si coa gen neak yo. Si bi idup igai awei de sudo nadeak-Ne bel'o. Maro keliakba penan kenubua-Ne. 7Uyo, lalauba gacang, melei namen ngen penotoa-penotoa-Ne, ‘Si bi idup igai ngen uyo Si lalau lebiak dute kunei udi moi Galilea. Neak di udi bakea kemliak Si!’ Mingetba jano de sudo Uku madeak ngen ko.”

8Gegulut selawei-selawei'o teminggea kubua'o ngen saben capua riang delai ngen mlilai utuk melei namen ngen penotoa-penotoa Yesus.

9Tetibo Yesus teko magea selawei-selawei'o ngen madeak, “Salam!” Lajau tobo'o ma'ok Si, sudo'o megep kekea-Ne ngen sembeak Si. 10“Jibeakba saben,” nadeak Yesus ngen tobo'o, “lalau melei namen ngen pasuak-pasuak-Ku supayo tobo'o lalau moi Galilea, neak di tobo'o bakea kemliak Uku.”

Penjago-penjago melei namen jano de tejijai

11Sementaro selawei-selawei'o lalau kekedau kunei tentra penjago de jemago kubua'o belek moi kota, ngen melei namen ngen pemipin imem-imem kute de sudo tejijai. 12Pemipin Imem-imem'o basen ngen pemipin-pemipin Yahudi, lajau melei dau caci ngen tentra penjago'o, 13ngen madeak, “Udi mestai madeak bahwo penotoa-penotoa Yesus teko pado bilai klemen, ngen maling mayit-Ne waktau udi dong tidua. 14Ngen amen Gubernur temi'uk hal'o keme bakea mbujuk si supayo udi coa dapet masalah jano bae.”

15Mako tentra penjago'o mok caci'o, ngen menea awei de nesen ngen tobo'o. Kerno'o cerito'o masiak teniuk neak antaro tun Yahudi sapei pado bilai yo.

Yesus kemten diraine ngen penotoa-penotoan-Ne

(Mrk. 16:14-18; Luk. 24:36-49; Yoh. 20:19-23; Kis. 1:6-8)

16 # Mat. 26:32; Mrk. 14:28 Sebelas penotoa Yesus'o lalau moi tebo neak Galilea awei de neriteak Yesus ngen tobo'o. 17Pado waktau tobo'o kemliak Yesus neak di tobo'o sujud nyembeak Si. Tapi ade neak antaro tobo'o de ragau. 18Yesus maok tobo'o ngen madeak, “Kute kuaso neak surgo ngen neak bumai sudo senreak ngen Uku. 19#Kis. 1:8 Kerno'o lalauba ngen kute bangso neak kute dunio, jijaiba tobo'o penotoa-penotoa-Ku. Baptis tobo'o ngen sembut Gen Bak, Anok, ngen Roh Sucai kunei Allah. 20Najeaba tobo'o menea kute de sudo Uku periteak ngen ko. Ingetba Uku bakea selalu semerto udi sapei Bilai Kiamat.”

Currently Selected:

MATIUS 28: REJ

Highlight

Copy