MATIUS 27
27
Yesus nembin ngen Pilatus
(Mrk. 15:1; Luk. 23:1-2; Yoh. 18:28-32)
1Pueng-pueng nien, kute pemipin imem-imem ngen pemipin bangso Yahudi menea putusan utuk munuak Yesus. 2Tobo'o meket Si, lajau mbin-Ne ngen semreak-Ne ngen Gubernur Pilatus, walai negrai'o.
Yudas matei
(Kis. 1:18-19)
3 #
Kis. 1:18-19
Pado waktau Yudas, de mianat'o, kemliak Yesus bi neus hukuman matei, si nyesal. Lajau si melek caci de telau puluak pirok'o ngen pemipin imem-imem ngen pemipin-pemipin Yahudi. 4Si madeak, “Uku bi beduso mianat tun de coa besaleak, sapei Si nukum matei!”
Tapi tobo'o jemawab, “Jano dulai keme ngen udi? Do'o urusannu dewek!”
5Yudas meluk caci'o moi lem Umeak Semyang lajau lalau ngen gematung dirai.
6Pemipin imem-imem kemopoa caci'o ngen madeak, “Caci yo caci daleak (haram). Menurut Hukum Agamo, caci yo coa buliak nasuk moi lem penan ma'ik caci neak Umeak Semyang.” 7Sesudo basen, tobo'o makei caci'o utuk mukua taneak de senbut taneak tukang koon, taneak'o nakei utuk penan kubua tun asing. 8Do'oba sebabne taneak'o sapei bilai yo desenbut, “Taneak Daleak.”
9 #
Za. 11:12-13
Ngen'o, tejijaiba jano de nadeak oleh Nebai Yeremia, “Tobo'o temimo telau puluak caci pirok go de bi tentep ngen Israel utuk bayaran-Ne. 10Ngen cacio tobo'o pakei utuk temukua taneak tukang ko'on, awei de periteak Tuhan ngen uku.”
Pilatus mrikso pekaro Yesus
(Mrk. 15:2-5; Luk. 23:3-5; Yoh. 18:33-38)
11Waktau Yesus madep Pilatus, Gubernur negrai'o, Pilatus betanye, “Jano Ko Rajo tun Yahudi?”
“Awei'oba nadeaknu,” Yesus jemawab. 12Tapi waktau pemipin imem-imem ngen pemipin-pemipin Yahudi temuduak Yesus menea saleak, Si coa jemawab samo sekilai.
13Kerno'o Pilatus ngen-Si, “Jano Ko coa temi'uk kute de tobo'o temuduak ngen Ko'o?”
14Tapi Yesus coa jemawab jano-jano sehinggo Gubernur'o kembiak heran nien.
Yesus nukum matei
(Mrk. 15:6-15; Luk. 23:13-25; Yoh. 18:39–19:16)
15Pado setiep Bilai Rayo Paskah, gubernur biasone mlepas suang tun tahanan temurut piliak tun dau. 16Pado waktau'o ade suang tun tahanan de tekenal. Genne Yesus Barabas. 17Ijai, waktau dau tun sudo bekopoa, Pilatus betanye ngen tobo'o, “Api de udi lok uku mbebas utuk udi? Yesus Barabas atau Yesus desenbut Kristus?” 18Pilatus madeak awei'o sebab si namen bahwa pemipin-pemipin Yahudi semreak Yesus ngen si kerno tobo'o kidek atei.
19Ketiko Pilatus gidong madeak Yesus, ngenyanne kemirim pesen ngen si, “Jibeakba ko cemapua pekaro tun benea'o, sebab kerno Si uku kembiak tesikso lem mipai klemen nano.” 20Tapi pemipin imem-imem ngen pemipin-pemipin Yahudi masut tun dau'o utuk minoi ngen Pilatus supayo Barabas nebebas ngen Yesus de nukum matei. 21Lajau Gubernur'o betanye igai ngen tobo'o, “Kunei keduai tun'o, api de udi lok uku mbebas utuk udi?”
“Barabas,” tobo'o jemawab.
22“Amen awei'o uku harus menea jano ngen Yesus de senbut Kristus?” tanye Pilatus ngen tobo'o.
Tobo'o kute jemawab, “Senalib Si!”
23“Tapi jano de jahat de menea?” tanye Pilatus.
Lajau tobo'o mekik lebiak lek igai, “Senalib Si!”
24 #
Ul. 21:6-9
Akhirne Pilatus semadar amen si coa nam menea jano-jano igai, ngen tun-tun'o mukin bakea kemacau. Si mok bioa lajau mpuk tangenne. “Uku coa tanggung jawab das matei-Ne tun yo! Do'o urusan udi dewek!”
25Kute tun dau'o jemawab, “Au, kunyauba keme ngen anok-anok keme temanggung hukuman das matei-Ne tun'o!”
26Lajau Pilatus mlepas Barabas utuk tobo'o, ngen mluak tun cemambuk Yesus. Lajau Pilatus semreak Si utuk senalib.
Tentra-tentra mliyam Yesus
(Mrk. 15:16-20; Yoh. 19:2-3)
27Sudo'o prajurit-prajurit Pilatus mbin Yesus masuk moi umeak Gubernur ngen kute pasukan tentra bekopoa neak kliling Yesus. 28Tobo'o mukok keracok Yesus, ngen masang ngen-Si jubah ungu. 29Tobo'o nganem de buaek tudung rajo kunei tebok ngen meletokne neak das ulau Yesus, lajau tobo'o mlei Si de pun tokot neak tangen kanen-Ne, sesudo'o tobo'o sujud neak adep-Ne ngen cemimet Si, “Salam hoi Rajo tun Yahudi!” Nadeak tobo'o. 30Tobo'o temkek Si ngen mok tokot'o, lajau mokoa Si neak ulau-Ne. 31Sesudo mliyam Si, tobo'o muko jubah ungu'o lajau masang igai keracok-Ne dewek, sesudo'o Si nembin moi luea utuk senalib.
Yesus senalib
(Mrk. 15:21-32; Luk. 23:26-43; Yoh. 19:17-27)
32Neak tengeak dalen, tobo'o temau ngen suang tun kunei Kirene genne adeba Simon. Tobo'o makso tun'o musung salib Yesus. 33Sudo'o tobo'o sapeiba neak do penan de genne Golgota, taine “Penan Tengkorak”. 34#Mzm. 69:22 Lajau tobo'o melei Yesus menem anggur becapua pegau. Tapi sudo'o Yesus kemcep anggur'o, Si coa lok menemne.
35 #
Mzm. 22:19
Sudo'o tobo'o senalib Si ngen magiak-magiak keracok-Ne ngen ca'o suten. 36Lajau tobo'o temot jemagai Si neak di. 37Neak das ulau-Ne tobo'o masang tando getai Si nukum de isaine, “Dioba Yesus Rajo tun Yahudi”. 38Berpok ngen Si tobo'o senalib kulo duai tun prapok; suang neak depak kanen, suang igai neak de peak kideu-Ne.
39 #
Mzm. 22:8, 109:25 Tun-tun de liwet neak di gemeleng ulau ngen mino Yesus. 40#Mat. 26:61; Yoh. 2:19 Tobo'o madeak, “Ko de lok mubuak Umeak Semyang ngen mbangunne lem telau bilai! Amen Ko Anok Allah, tuunba kunei salib'o, ngen semlamat dirai-Nu!”
41Awei'o kulo pemipin imem-imem ngen gu'au-gu'au agamo ngen pemipin-pemipin cemimet Yesus. Tobo'o madeak, 42“Si semlamat tun luyen, padohal Si coa dapet semlamat dirai-Ne dewek! Amen Si rajo Israel, baikba Si uyo tuun kunei salib'o, mako kemelok pecayo ngen-Si. 43#Mzm. 22:9 Si pecayo ngen Allah, ngen madeak bahwa Si Anok Allah. Nah, maro ite kemliak janokah Allah lok semlamat Si uyo.”
44Prapok-prapok de senalib ngen Si'o, kulo mino Si kulo awei'o.
Yesus matei
(Mrk. 15:33-41; Luk. 23:44-49; Yoh. 19:28-30)
45Pado tengeak bilai, selamo telau jam, kute negerai'o jijai gelep. 46#Mzm. 22:2 Jam telau pelbeak, Yesus menggang ngen suaro lek, “Eli, Eli, lama sabakhtani?” de beartai, “Au Allah-Ku, au Allah-Ku, getai Ko teminggea Uku?”
47Temi'uk o kekedau tun madeak, “Si menok Elia!” 48#Mzm. 69:22 Ngen segero tekoba su'ang tun kunei tobo'o, si gegulut lalau mok bungai karang, cemlupne moi lem anggur pi'iak. Lajau cemcuk pado ujung de pun kieu ngen mulua moi bibia Yesus.
49Tapi tun-tun luyen madeak, “Mbot, maro ite kemliak janoka Elia teko semlamat Si!”
50Sudo'o Yesus menggang igai ngen suaro nya'ing, lajau Si matei.
51 #
Kel. 26:31-33
Tabir de tegatung lem Umeak Semyang pegit duai kunei das sapei moi beak ngen tejijaiba gepo, ngen tebo-tebo butau pegit. 52Kubua-kubua tukok, ngen dau umat de bi ninggea idup igai. 53Tobo'o keluea kunei kubua-kubua sesudo Yesus idup igai kunei mateine, ngen tobo'o masuk moi Yerusalem. Neak di dau tun kemliak tobo'o.
54Pemipin tentra serpok ngen tentra-tentrane de gidong jemagai Yesus jijai saben nien waktau kemliak gepo, ngen kute de tejijai'o. Tobo'o madeak, “Sungguak Si yo Anok Allah!”
55 #
Luk. 8:2-3
Neak di ade kulo dau selawei de gidong kemliak kunei uak. Tobo'oba de bi temotoa Yesus utuk temulung Si sejok kunei Galilea. 56Neak antarone adeba Mariam Magdalena, Mariam mak Yakobus ngen Yusuf, ngen mak anok-anok Zebedeus.
Yusuf Arimatea mubua Yesus
(Mrk. 15:42-47; Luk. 23:50-56; Yoh. 19:38-42)
57Malem'o tekoba su'ang tun kayo kunei Arimatea, genne Yusuf. Si kulo penotoa Yesus. 58Si lalau ngen Pilatus, ngen minoi mayit Yesus. Lajau Pilatus meriteak supayo mayit Yesus senreak ngen si. 59Mako Yusuf mok mayit'o, ngen mukusne ngen kain kafan de blau. 60Lajau si meletok mayit Yesus neak lem kubuane dewek, de menea neak lem tebo butau, ngen sesudo gemuling debueak butau lai moi utuk temutup bang kubua'o, lajau lalau. 61Mariam Magdalena ngen Mariam de luyen tinggea temot neak di madep kubua'o.
Penjago-penjago neak kubua
62Bilai menne, pado bilai Sabat tun Yahudi, pemipin imem-imem ngen tun-tun Farisi lalau serpok madep Pilatus. 63#Mat. 16:21, 17:23, 20:19; Mrk. 8:31, 9:31, 10:33-34; Luk. 9:22, 18:31-33 Ngen madeak, “Tuan, keme tinget waktau tukang nike'o masiak idup, Si pernea madeak, ‘Sesudo telau bilai Uku bakea idup igai.’ 64Kerno'o, melueakba tun njago kubua'o baik-baik sapei bilai de ke telau, supayo penotoa-penotoa-Ne coa dapet maling mayit-Ne lajau madeak ngen tun-tun bahwo Si bi nidup igai kunei matei-Ne. Ngen nike de kedong yo bakea lebiak kidek kunei de pertamo.”
65“Udi temuan tentra penjago,” nadeak Pilatus ngen tobo'o, “lalauba jago kubuak'o de baik-baikne.”
66Lajau tobo'o lalau moi kubua, semegel butau penutupne ngen teminggea penjago-penjago neak mukone, kunyau coa gen de ngurek kubua'o.
Currently Selected:
MATIUS 27: REJ
Highlight
Share
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
