MATIUS 24

Yesus miling tetang ubuakne Bait Allah

(Mrk. 13:1-2; Luk. 21:5-6)

1Tiko Yesus teminggea Bait Allah, penotoa-penotoa-Ne teko ngen-Si ngen temunjuk ngen bangunan-bangunan Bait Allah. 2Yesus madeak ngen tobo'o, “Jano udi kemliak kutene'o? Udi mestai namen, bahwa coa gen do kulo kunei bangunan-bangunan'o bakea tinggea tesusun neak penanne. Kutene bakea nubuak.”

Saro ngen sikso

(Mrk. 13:3-13; Luk. 21:7-19)

3Sudo'o Yesus temot lalau moi Tebo Zaitun, gidong Si temot, penotoa-penotoa-Ne teko utuk miling ngen Si seca'o pribadi. “Nadeakba ngen keme, tengen kutene'o bakea tejijai,” madeak tobo'o ngen-Si. “Jano tando-tando de temunjuk teko Bak ngen akhir zaman?”

4Yesus jemawab, “Teateiba, jibeak sapei udi te pike. 5Sebab dau tun bakea teko ngen makei gen-Ku ngen madeak, ‘Ukuba Rajo Penyelamat!’ Tobo'o bakea mike dau tun. 6Udi bakea temi'uk sa'ei-sa'ei ngen kabar prang, tapi jibeak saben. Sebab hal'o mestai tejijai, tapi'o coa beartei sudo waktaune kiamat. 7Bangso de do bakea prang mlawen bangso de luyen, negara de do bakea semrang negara de luyen. Neak ipe-ipe bakea tejijai bahayo nyemen ngen gepo. 8Kutene'o tembei mulone bae, awei bolon de nidep su'ang selawei waktau lok mlaher.

9 # Mat. 10:22 Sudo'o udi bakea tenakep ngen semreak utuk senikso ngen nunuak. Ngen kute dunio bakea jemngik udi kerno udi penotoa-Ku. 10Pado waktau'o dau tun bakea murtad, ngen mianat serto jemngik do ngen de luyen. 11Dau nebai-nebai palsu bakea timboa ngen mike dau tun. 12Plep kidek bakea makok kembiak luea biaso sapei tun dau coa nam igai mengasiak. 13#Mat. 10:22 Tapi tun de beta'en sapei akhirne bakea senlamat. 14Ngen Bito Baik tetang kero Allah meriteak bakea ke nabar moi kute dunio supayo kute tun temi'ukne. Sesudo'o kiamat teko.”

Plep jahat de ngajua

(Mrk. 13:14-23; Luk. 21:20-24)

15 # Dan. 9:27, 11:31, 12:11 “Udi bakea kemliak ‘Plep jahat de ngajua’, awei de nadeak Nebai Daniel, tegok neak penan de sucai. 16Pado waktau'o, tun de ade neak Kota Yudea mestai melilai moi tebo-tebo. 17#Luk. 17:31 Tun de berade neak das atep umeak, jibeak tuun utuk mok barang de tenuanne kunei lem umeak. 18Tun de berade neak kebun jibeak belek utuk mok keracokne. 19Padeak menyaben bilai-bilai'o bagiak selawei de ngandung, ngen mak de masiak se musu cupikne! 20Bedu'oba supayo jibeak sapei udi harus melilai pado musim ujen atau pado bilai Sabat tun Yahudi. 21#Dan. 12:1; Why. 7:14 Bilai-bilai de menyaben'o bakea ade sikso ngen luea biasoawei de ati perneak tejijai sejok awal dunio sapei uyo ngen de coa bakea tejijai igai. 22Sekirone Allah coa semiket waktaune; mako coa ade suang kulo de selamat. Tapi kerno umat-Ne, Allah semiket maso'o.

23Pado waktau'o amen ade su'ang tun ngen tun madeak ngen udi, ‘Keliak, Rajo Penyelamat ade neak yo’ atau ‘Si ade neak di!’ Jibeakba pecayo ngen tun'o. 24Sebab bakea timboa tun-tun de senlamat de palsu ngen nebai-nebai palsu. Tobo'o bakea made plep-plep de luea biaso ngen mujizat-mujizat utuk mike amen mukin umat Allah kulo. 25Jijai, ingetba! Uku sudo melei namen ngen udi telebiak kileak ayok hal'o tejijai.

26 # Luk. 17:23-24 Amen tun madeak ngen ko, ‘Keliak, Si ade neak di neak padang gurun!’ – jibeak ko lalau moi mindi. Atau amen tobo'o madeak, ‘Keliak Si bunyin neak lem bilik neak yo!’ – jibeak udi pecayo. 27Sebab teko-Ne Anok Manusio awei cahayo kilet besinea kunei timur, ngen sapei barat.

28 # Luk. 17:37 Neak ipe ade bukei, neak di ade burung de mbuk bukei.”

Anok Manusio teko

(Mrk. 13:24-27; Luk. 21:25-28)

29 # Yes. 13:10, 34:4; Yeh. 32:7; Yl. 2:10, 31, 3:15; Why. 6:12-13 “Coa an sesudo maso de saro'o, matai bilai bakea jijai gelep ngen bulan coa becayo igai. Bitang-bitang bakea us kunei lenget ngen paro penguaso lenget bakea kacau balau. 30#Dan. 7:13; Za. 12:10-14; Why. 1:7 Sesudo'o tando anok manusio bakea keten neak lenget. Pado waktau'o kute bangso neak bumai bakea ngindoi. Tobo'o bakea kemliak Anok Manusio teko neak das embun ngen kuaso ngen kemulioanne delai. 31Trupet lai bakea sena'ei, ngen Anok Manusio bakea mluak malaikat-malaikat-Ne kemopoa umatne kunei kepat sudut bumai, kunei ujung lenget dedo sapei ujung lenget de luyen.”

Pelajaran kunei pun de senbut ara

(Mrk. 13:28-31; Luk. 21:29-33)

32“Mokba pelajaran kunei pun de senbut ara. Amen dandanne ijo ngen luyek ngen muloi tunes, udi namen kerno musim panes. Bipa'ok. 33Awei'o kulo amen udi kemliak hal-hal'o tejijai, udi namen kerno waktaune bi pa'ok nien. 34Kelokba ko ngertai! Hal-hal'o bakea tejijai ayok tun-tun de idup uyo matei kutene. 35Lenget ngen bumai bakea nyep, tapi Firman-Ku tep selamo-lamone.”

Coa gen de namen bilai ngen jamne

(Mrk. 13:32-37; Luk. 17:26-30, 34-36)

36“Coa gen de namen tengen bilaine yo ngen jamne, malaikat-malaikat neak surgo coa, ngen Anok Allah kulo coa, cuma Bak dewek de namen, 37#Kej. 6:5-8 Amen Anok Manusio tekobe, keadaanne awei neak zaman Nuh bel'o. 38Pado bilai-bilai ayok banjir lai'o, tun-tun mbuk menem, ngen nikeak. Awei'oba seterusne sapei pado bilai Nuh masuk moi lem kepea. 39#Kej. 7:6-24 Pado waktau banjir'o temipo tobo'o kute sadar bakea jano de gidong tejijai, awei'oba kulo keadaanne konyo amen Anok Manusio teko. 40Pado waktau'o, duai tun gidong kerjo neak kebun: Suang tun bakea nembin, ngen suang tun igai teninggea. 41Duai selawei gidong gemiling gendum: Suang tun bakea nembin, ngen suang tun igai teninggea. 42Jijai, teateiba, sebab udi coa namen tengen Tuhannu bakea teko. 43#Luk. 12:39-40 Ingetba dio! Seandaine temuan umeak namen jam kedau neak bilai klemen maling bakea teko, si coa bakea tidua, supayo maling coa masuk moi lem umeakne. 44Sebab'o udi kulo mestai siap. Kerno Anok Manusio bakea teko pado saat de coa udi demugo.”

Pelayan de setia ngen pelayan de coa setia

(Luk. 12:41-48)

45Nadeak Yesus igai, “Amen awei'o de ipe de setia ngen pacok? Siba de naket tuanne ijai pemipin pelayan-pelayan de luyen supayo si melei tobo'o kembuk pado waktaune. 46Padeak bahagiane pelayan'o amen tuanne belek, ngen temau si gidong menea tugasne. 47Tuanne bakea cemayo kute hartone ngen pelayan'o. 48Tapi amen pelayan'o jahat, si bakea madeak lem ateine, 49‘Tuanku masiak an belek,’ lajau si muloi mokoa pelayan-pelayan de luyen, ngen kembuk menem ngen tun-tun pemabuk. 50Sesudo'o tuanne bakea belek pado bilai ngen jam de coa te sako-sako. 51Mako pelayan-pelayan'o bakea mipai ngen tuanne, kunei tuanne, moi penan tun-tun munafik. Tobo'o bakea ngindoi ngen derito neak di.”

Currently Selected:

MATIUS 24: REJ

Highlight

Copy