MATIUS 22
22
Perumpamo tetang pesta nikeak
(Luk. 14:15-24)
1Yesus miling igai ngen tun dau makei perumpamo, 2“Amen Allah meriteak keadaanne awei perumpamo yo: Rajo de semiyap pesta nikeak utuk anokne. 3Rajo'o mluak pelayan-pelayanne lalau mapet tun-tun de nundang moi pesta'o. Tapi tobo'o coa lok teko. 4Sesudo'o rajo mutus igai pelayan-pelayan de luyen. Nadeakne ngen tobo'o: ‘Mlei namen ngen tun de nundang'o: Hidangan pesta bi seniap, kunei sapai, ngen anok-anok sapaiku de kembiak ba'es sudo sembeliak. Kutene teko bi siap maro moi pesta nikeak yo!’ 5Tapi tamu-tamu de nundang'o, coa miraune. Tobo'o lalau moi penan kerjone dewek-dewek; di kup moi kebunne de luyen murus usahone; 6ngen de luyen igai temakep pelayan-pelayan rajo'o, lajau mokoa ngen munuak tobo'o. 7Waktau rajo temi'uk hal'o mengiak nien rajo, si kemirim tentrane utuk munuak tun-tun de munuak'o ngen mbem kota tobo'o. 8Sesudo'o menok pelayan-pelayanne lajau madeak, ‘Pesta nikeak sudo siap, tapi tun de nundang coa patas. 9Lalauba uyo moi dalen-dalen lai, ngen nundangba sekedau-kedaune tun moi pesta nikeak yo.’ 10Mako pelayan-pelayan'o lalau. Tobo'o lalau moi dalen-dalen lai, lajau melungguk kute tun de tobo'o temau neak di, de baik ngen de jahat. Sehinggo penuakba ruangan pesta nikeak'o ngen tamu.
11Waktau rajo'o masuk utuk temau ngen tamu-tamu, si kemliak, ‘Ade suang tun neak pesta'o coa makei keracok pesta.’ 12Lajau si betanye ngen tun'o, ‘Kuat awei ipe ko dapet masuk moi lem yo ngen coa makei keracok pesta?’ Tapi tun'o coa nam madeak jano-jano. 13#Mat. 8:12, 25:30; Luk. 13:28 Lajau rajo'o madeak ngen pelayan-pelayanne, ‘Neket kekea ngen tangen tun yo, ngen nuang si moi luea moi penan de kelem. Neak di bakea ade indoi ngen saro.’ ”
14Lajau Yesus semudo perumpamo'o awei yo, “Dau tun de nanggea, tapi didik bae de niliak.”
Soal masen pajak
(Mrk. 12:13-17; Luk. 20:20-26)
15Sesudo'o tun-tun Farisi lalau basen besamo-samo, tetang awei ipe tobo'o dapet jembak Yesus liwet pertanyaan-pertanyaan. 16Mako tobo'o mutus penotoa-penotoa tobo'o ngen Yesus serpok kekedau anggota golongan Herodes. Tun-tun'o madeak ngen Yesus, “Gu'au, keme namen bak jujur, bak ngajea ngen tetang utang kelok Allah utuk manusio, coa mirau pendapet api bae. Sebab bak coa pandang tun. 17Kerno'o cubo Bak madeak ngen keme temurut aturan agamo ite: Jano buliak keme masen pajak ngen rajo atau coa?”
18Yesus namen kelok tobo'o de jahat'o, jijai Si madeak, “Hoi, tun-tun munafik! Getai udi lok jembak Uku? 19Cubo tunjuk ngen Uku caci de makei utuk masen pajak'o!”
Lajau tobo'o melei ngen-Si keping caci pirok. 20Yesus betanye ngen tobo'o, “Gambar ngen gen api dio?”
21“Rajo,” tobo'o jemawab.
Mako Yesus madeak ngen tobo'o, “Amen awei'o nleiba ngen rajo jano de jijai hok Rajo, ngen jano de hok Allah.”
22Waktau tobo'o temi'uk hal'o tobo'o heran. Mako tobo'o lalau teminggea Yesus.
Soal idup igai kunei matei
(Mrk. 12:18-27; Luk. 20:27-40)
23 #
Kis. 23:8
Pado bilai'o kulo kekedau tun Saduki teko ngen Yesus. Tobo'o adeba golongan de temuan pendapet bahwa tun matei coa bakea idup igai. 24#Ul. 25:5 “Pak gu'au,” nadeak tobo'o, “Musa majea awei yo: Amen suang semanei matei ngen si coa temuan mok, ngen pasuakne mestai nikeak ngen jandone supayo melei anok ngen tun de sudo matei'o. 25Perneak ade tujuak tun sepasuak de tinggea neak yo. De tuai nikeak lajau matei, coa temuan anok. Jando'o teminggea utuk pasuakne. 26Pasuakne o sudo'o ninggea kulo ngen coa temuan anok. Awei yo kulo tejijai ngen ketelau sapei ngen de ketujuak. 27Akhirne selawei'o kulo meninggea. 28Nah, pado waktau tun matei nidup igai, ngenyan api selawei'o? Sebab ke tujuak-tujuakne bi nikeak ngen si.”
29Yesus jemawab, “Udi kembiak keliru, sebab ko coa ngertai kiteb awei'o kulo kuaso Allah. 30Sebab amen tun matei idup igai, tobo'o coa bakea nikeak igai luyen, tobo'o bakea idup awei malaikat neak surgo. 31Jano udi ati perneak mbaco jano de Allah nadeak tetang tun matei de nidup igai? Allah madeak, 32#Kel. 3:6 ‘Ukuba Allah Abraham, Allah Ishak ngen Allah Yakub.’ Allah'o coa Allah tun matei. Si Allah tun idup!”
33Ketiko tun dau temi'uk ajaran Yesus, tobo'o kembiak heran ngen ajaran-Ne.
Periteak de utamo
(Mrk. 12:28-34; Luk. 10:25-28)
34Pado waktau tun-tun Farisi temi'uk bahwo Yesus sudo menea tun-tun Saduki coa dapet miling igai, tobo'o bekopoa. 35#Luk. 10:25-28 Suang kunei tobo'o, adeba suang gu'au agamo, betanye utuk jembak Yesus. 36“Pak gu'au,” nadeakne, “Periteak ipe de kembiak utamo neak lem ukum agamo?”
37 #
Ul. 6:5
Yesus jemawab, “Cintoba Tuhan Allahnu ngen sepenuak ateinu, ngen segenep jiwonu, ngen kute akeanu. 38Do'oba periteak de kembiak utamo ngen de kembiak peting! 39#Im. 19:18 Periteak de keduai samo ngen de pertamo'o: Cintoba sesamonu aweiko cemito di rainu dewek. 40Kute hukum agamo de nelei Musa ngen ajaran nebai-nebai tegatung pado keduai periteak'o.”
Hubungan antaro Yesus ngen Daud
(Mrk. 12:35-37; Luk. 20:41-44)
41Waktau tun-tun Farisi gidong bekopoa neak di, Yesus betanye ngen tobo'o, 42“Jano pedapet udi tetang Rajo Penyelamat? Anok api Si?”
“Anok Daud,” tobo'o madeak.
43“Amen awei yo,” tanye Yesus, “Getai ngen pipinan Roh Daud senbut Rajo Penyelamat ‘Tuhan’? Kerno Daud madeak,
44 #
Mzm. 110:1
‘Tuhan madeak ngen Tuhanku:
temotba neak de peak kanen-Ku,
sapei Uku menea musuak-musuak-Nu aleak ngen-Ko.’
45Jijai amen Daud senbut Rajo Penyelamat'o ‘Tuhan’, awei ipe mukin Rajo Penyelamat'o Anok Daud?”
46Coa suang tun kulo dapet jemawab Yesus. Ngen muloi bilai'o coa ade de binai temnai jano-jano igai ngen-Si.
Currently Selected:
MATIUS 22: REJ
Highlight
Share
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
