LUKAS 6

Penotoa-penotoa mopoa gendum pado bilai Sabat

(Mat. 12:1-8; Mrk. 2:23-28)

1 # Ul. 23:25 Pado bilai Sabat, waktau Yesus liwet neak kebun gendum, penotoa-penotoa Si mopoa gendum. Tobo'o gemosok gendum o ngen tangen, lajau mbukne. 2Kekedau tun Farisi madeak, “Getai udi melanggea ukum-ukum agamo ite ngen menea de coa buliak pado bilai Sabat?”

3 # 1Sam. 21:1-6 Lajau Yesus jemawab tobo'o, “Coa ko baco jano de nea Daud, ketiko si ngen tobo'o de temotoane nyemen? 4#Im. 24:9 Awei ipe si masuk moi lem Umeak Allah ngen mok ruti de sudo senreak ngen Allah, lajau mbukne. Sesudo'o neleine kulo ruti o ngen tun-tunne. Padohal temurut ukum agamo ite, imem-imem bae de buliak mbuk ruti o.”

5Nadeak Yesus igai ngen tobo'o, “Anok Manusio adeba Tuhan das bilai Sabat.”

Yesus kema'en tun pado bilai Sabat

(Mat. 12:9-14; Mrk. 3:1-6)

6Pado do bilai Sabat luyen, Yesus masuk moi umeak semyang, lajau majea. Neak di ade suang de matei tangen kanenne. 7Gu'au-gu'au agamo ngen tun-tun Farisi lok mesoa saleak Yesus supayo nam madau Si. Jijai tobo'o bogoa kemliak jano Si bakea kema'en tun pado bilai Sabat. 8Tapi Yesus namen pekeran tobo'o. Mako Si madeak ngen tun de tangenne pakuak o, “Maro je neak muko yo!” Tun o klongon, lajau je neak di. 9Sesudo'o Yesus temnai ngen tun-tun de ade neak di, “Temurut agamo, ite buliak menea jano pado bilai Sabat? Semlamat tun atau cemlako?” 10Sesudo'o Si kemliak keliling ngen tobo'o kute, lajau madeak ngen tun bolon, “Nuluaba tangennu!” Tun o menea awei yo ngen ka'enba tangenne.

11Gu'au-gu'au agamo ngen tun-tun Farisi kembiak mengiak, lajau tobo'o berunding, jano de bakea tobo'o menea te'adep Yesus.

Yesus miliak duai belas murid

(Mat. 10:1-4; Mrk. 3:13-19)

12Pado waktau o lalauba Yesus moi tebo utuk bedu'o. Si bedu'o demalem lutup. 13Ketiko kebilai, Si menok penotoa-penotoa-Ne ngen Si, lajau miliak kunei antaro tobo'o duai belas tun, Si temgen duai belas tun o rasul. Tobo'o adeba: 14Simon de kulo nelei-Ne gen Petrus, ngen Andreas pasuak Simon, Yakobus ngen Yohanes, Filipus ngen Bartolomeus, 15Matius ngen Tomas, Yakobus anok Alfeus, ngen Simon de senbut tun Zelot, 16Yudas anok Yakobus, ngen Yudas Iskariot de sesudo'o jijai penghianat.

Yesus majea ngen kema'en dau tun

(Mat. 4:23-25)

17Lajau Yesus tu'un kunei tebo sesamo ngen rasul-rasul o. Tobo'o bedan pado do penan de datea. Neak di bekopoa dau tun penotoa-penotoa-Ne ngen dau tun luyen de teko kunei kute Yudea ngen kunei Yerusalem ngen kunei daerah patoi Tirus ngen Sidon. 18Tobo'o teko utuk temi'uk Si ngen utuk kena'en kunei olon tobo'o; kulo tobo'o de nasuk roh-roh kidek dapet ka'en. 19Kute tun dau o berusaho megong Si, kerno ade kuaso de keluea kunei Si. Kuaso o kema'en kute tobo'o.

Kecek-kecek bahagia ngen peringatan

(Mat. 5:1-12)

20Lajau Yesus kemliak murid-murid-Ne ngen madeak:

“Bahagiaba, hoi ko de peset,

kerno udi adeba anggota umat Allah.

21Bahagiaba, hoi ko de uyo yo nyemen,

kerno ko bakea nues.

Bahagiaba, hoi ko de uyo yo ngindoi,

kerno ko bakea tawai.

22 # 1Ptr. 4:14 Bahagiaba udi amen jenngik, tenulok, nino ngen fitneah kerno Anok Manusio. 23#2Taw. 36:16; Kis. 7:52 Besukocitoba pado waktau o ngen beriangba, sebab sesungguakne, upeaknu lai neak surgo. Kerno seca'o awei yo kulo ninik puyang bi menea tobo nebai.

24Tapi celakoba ko, hoi ko de kayo.

Kerno ketiko ko kayo ko sudo meding.

25Celakoba ko, de uyo yo kenyang,

kerno ko bakea nyemen.

Celakoba ko, de uyo yo tawai,

kerno ko bakea ngindoi ngen sedingen.

26Celako ba ko, amen kute tun mujai ko; kerno seca'o awei yo kulo ninik puyang tobo'o bi mujai nebai-nebai palsu.”

Kasiak te'adep

(Mat. 5:38-48)

27“Tapi ngen ko, de temi'uk Uku, Uku madeak: Kasiakba musuaknu, meneaba baik ngen tun de jemngik ko; 28minoiba berkat bagiak tun de kemutuk ko; bedu'oba bagiak tun de kemidek ko. 29Amen tun tempok papeanu de do, kunyauba si tempok papeanu de depeak kulo. Amen jubahnu nebut, neleiba kulo bajaunu. 30Amen tun minoi sesuaktau ngen ko, neleiba do'o ngen si; ngen amen hoknu nebut, jibeakba meminoine igai. 31#Mat. 7:12 Amen ko lok tun luyen bebaik ngen ko, bebaik kulo ba ngensi.

32Amen udi mengasiak tun-tun de mengasiak udi bae, jano jasonu? Tun beduso kulo mengasiak tun-tun de mengasiak tobo'o! 33Ngen amen udi menea baik ngen tun-tun de menea baik ngen ko bae, jano jasonu? Tun beduso kulo menea awei o! 34Amen udi melei minjem caci ngen tun-tun de dapet melekne, jano jasonu? Tun beduso kulo melei minjem caci ngen tun beduso, lajau minoine igai! 35Seharusne iso awei'o! Udi sebelekne harus mengasiak musuaknu ngen menea baik ngen tobo'o. Udi harus melei minjem, ngen jibeak ma'ep dapet melek. Amen awei yo, upeaknu bakea lai ngen udi bakea jijai anok-anok Allah De Kembiak lekat. Sebab Allah baik atei te'adep tun de coa namen mokasiak, ngen te'adep de kidek kulo. 36Lokba udi mu'eak atei, serai awei Bapanu adeba mu'eak atei.”

Makim tun

(Mat. 7:1-5)

37“Jibeakba makim tun luyen, supayo udi suang kulo jibeak Allah makim. Jibeakba mukum tun luyen, supayo udi suang kulo jibeak Allah mukum. Napunba tun luyen, supayo Allah kulo mapun udi. 38Neleiba ngen tun luyen, supayo Allah kulo melei ngen ko. Udi bakea temimo pelei de kembiak dau de sudo tenakea padet-padet utuknu. Sebab takea de udi makei utuk tun luyen bakea nakei Allah utuknu.”

39 # Mat. 15:14 Sesudo'o Yesus cemrito ngen tobo'o umpamo awei yo, “Amen tun sutai mipin tun sutai de luyen, paset keduaine bakea us moi lem lubang. 40#Mat. 10:24-25; Yoh. 13:16, 15:20 Coa ade murid de lebiak lai kunei pado gu'aune. Tapi penotoa de sudo selsei belajea, bakea jijai serai awei gu'aune.

41Getai udi kemliak tatea kiyeu lem matai pasuaknu, tapi balok de neak matainu suang udi coa gemle? 42Awei ipe udi dapet madeak ngen pasuaknu, ‘Maro, pasuak, uku kemluea kiyeu tatea o kunei matainu o,’ tapi lem matainu suang ade balok de coa udi keten? Hoi munafik! Kelueaba kilea balok de ade pado matainu suang. Baruba udi dapet kemliak ngen jelas ngen dapet kemluea tatea kiyeu kunei matai pasuaknu.”

Pun ngen buakne

(Mat. 12:33-35)

43“Pun de subur coa masea buak de kidek. Awei'o pun de coa subur coa masea buak de baik. 44#Mat. 12:33-34 Tiep pun kenal kunei buakne. Sakea betebok coa masea buak ara, ngen sakea betebok coa masea buak anggur. 45Tun de baik kemluea hal-hal baik kerno ateine baik. Tun de jahat kemluea hal-hal de jahat kerno ateine penuak ngen jahat. Sebab jano de nucep ngen bibia do'oba de keluea kunei atei.”

Duai mecem dasar

(Mat. 7:24-27)

46“Getai udi menok Uku, ‘Tuhan, Tuhan,’ tapi coa menea jano de Uku nadeak ngen ko? 47Ngen api dapet ite semrai tun de teko ngen-Ku, ngen temi'uk kecek-Ku, serto meneane? – Baikba Uku temunjukne ngen ko –. 48Si awei tun de ketiko mbangun umeak mikoa lehlem, lajau menea pondasine pado butau. Pado waktau ade banjir ngen bioa masuk moi umeak o, umeak o coa dapet genuyang, sebab sudo mbangun neak das pondasi de baik. 49Tapi tun de temi'uk kecek-Ku ngen coa meneane, ade awei suang de mbangun umeak ngen coa ade pondasi. Amen banjir teko, umeak o segro ubuak; ngen usakne luea biaso sekilai.”

Currently Selected:

LUKAS 6: REJ

Highlight

Copy