LUKAS 5

Yesus miliak murid-murid-Ne de dute

(Mat. 4:18-22; Mrk. 1:16-20)

1 # Mat. 13:1-2; Mrk. 3:9-10, 4:1 Pado waktau Yesus je neak patoi Daneu Genesaret, lajau tun dau gemlumbung Si. Tobo'o lok temi'uk firman Allah. 2Si kemliak duai biduk neak pengger patoi. Nelayan-nelayanne bi tu'un ngen gidong mpuk jalaine. 3Si kenek moi saleak do biduk o, adeba biduk Simon, ngen meluak si supayo temuluk bidukne uak didik kunei patoi. Lajau Si temot ngen majea tun dau kunei das biduk.

4Sesudo selsei miling, Si madeak ngen Simon, “Lalauba moi penan de lem ngen nambuaba jalainu utuk temakep kan.”

5 # Yoh. 21:3 Simon jemawab, “Gu'au, bi de malem lutup keme bekerjo benek ngen keme coa temakep jejano, tapi kerno Ko meluakne, uku bakea nambua jalai kulo.” 6#Yoh. 21:6 Sesudo tobo'o meneane, tobo'o temakep dau kan sapei jalai tobo'o muloi ca'ik. 7Sebab o tobo'o minoi tulung ngen kekuat tobo'o neak biduk de luyen. Kekuat tobo'o o teko lajau tobo'o sesamo misai keduai biduk o penuak ngen kan sapei biduk-biduk o gesea tendem. 8Waktau Simon kemliak hal o si kulo sujud neak adep Yesus ngen madeak, “Tuhan, lalauba kuneiku, kerno uku yo tun beduso.”

9Simon ngen kute tun de sesamo si sele kemliak daune kan de tobo'o temakep. 10Awei o kulo Yakobus ngen Yohanes, anok-anok Zebedeus, de jijai kuat Simon. Yesus madeak ngen Simon, “Jibeak saben, muloi kunei uyo ko bakea jemalai manusio.”

11Ngen sesudo tobo'o seme'et biduk-bidukne moi da'et, tobo'o kulo teminggea kutene, lajau temotoa Yesus.

Yesus kema'en suang de olon kidek

(Mat. 8:1-4; Mrk. 1:40-45)

12Pado waktau Yesus ade neak lem do kota. Neak di ade suang de penuak olon kidek. Waktau si kemliak Yesus, sujudba si ngen bekinoi, “Yesus, amen Yesus lok, Yesus dapet kema'en uku.”

13Yesus megong tun o samo madeak, “Uku lok, ka'enba!” Saat o kulo olonne nyep. 14#Im. 14:1-32; Mat. 8:4; Mrk. 1:44 Lajau Yesus temgeak tun o cemrito hal o ngen api bae, nadeak-Ne, “Lalauba ngen imen, ngen minio si utuk maset ko sudo ka'en. Lajau lalauba semreak kurban awei de neriteak Musa, sebagai bukti ngen tun-tun ko benea-benea sudo ka'en.”

15Tapi bito tetang Yesus tambeak tesebea moi ipe-ipe, ngen dau tun teko utuk temi'uk Si ngen utuk kena'en kunei olon tobo'o. 16Sesudo'o Yesus lalau bedu'o moi penan de sunyai.

Yesus kema'en suang pakuak

(Mat. 9:1-8; Mrk. 2:1-12)

17Pado waktau Yesus gidong majea, ade kekedau tun Farisi ngen gu'au-gu'au agamo temot neak di. Tobo'o teko kunei Yerusalem, ngen kunei kota-kota neak Galilea ngen Yudea. Kuaso Tuhan ade pado Yesus utuk kema'en tun-tun bolon. 18Lajau tekoba kekedau tun musung suang pakuak neak das penan tidua; tobo'o berusaho mbin si masuk ngen meletokne neak adep Yesus. 19Kerno tun kembiak dau neak di, tobo'o coa dapet mbin si masuk. Kenekba tobo'o moi atep umeak, lajau mukea atep o, ngen temu'un si ngen penan tiduane neak tengeak-tengeak tun dau pas neak adep Yesus. 20Waktau Yesus kemliak kembiak lai imen tobo'o, madeakba Si, “Hoi udi, dusonu sudo napun!”

21Tapi gu'au-gu'au agamo Yahudi ngen tun-tun Farisi bepeker lem ateine, “Api tun de mino Allah yo? Api de dapet mapun duso seluyen kunei Allah?” 22Tapi Yesus namen pekeran tobo'o, lajau madeak ngen tobo'o, “Jano de ko peker lem ateinu? 23Ipe lebiak mudeak, madeak: Dusonu sudo napun, jano madeak: klongonba, ngen paneuba? 24Tapi supayo ko namen, neak dunio yo Anok Manusio bekuaso mapun duso.” Madeakba Si ngen tun pakuak o, “Ngen ko Uku nadeak, klongonba, naketba penan tidua ko ngen belekba moi umeaknu!”

25Ketiko o kulo klongonba si, neak adep tobo'o, lajau maket penan tiduane ngen belek moi umeakne samo mulio Allah.

26Kute tun o kagum, lajau mujai Allah, ngen tobo'o kembiak saben, si madeak, “Bilai yo keme bi kemliak hal-hal de kembiak sele!”

Lewi penagiak pajak temotoa Yesus

(Mat. 9:9-13; Mrk. 2:13-17)

27Sesudo'o, ketiko Yesus moi luea, Si kemliak suang penagiak pajak, de genne Lewi, gidong temot neak umeak pajak. Yesus madeak ngen si, “Milauba Uku!” 28Mako je ba Lewi ngen teminggea kutene, lajau temotoa Yesus.

29Lewi menea pesta lai utuk Yesus neak umeakne ngen dau penagiak pajak ngen tun-tun luyen milem mbuk sesamo ngen Yesus. 30#Luk. 15:1-2 Tun-tun Farisi ngen gu'au-gu'au agamo meding coa senang, lajau madeak ngen murid-murid Yesus, “Getai ko mbuk ngen menem sesamo ngen penagiak pajak ngen tun beduso?”

31Lajau jawab Yesus ngen tobo'o, Si madeak, “Iso tun sehat de perlu dokter, tapi tun de bolon. 32Uku teko iso utuk menok tun benea, tapi tun beduso, supayo tobo'o betobat.”

Hal puaso

(Mat. 9:14-17; Mrk. 2:18-22)

33Tun-tun o madeak kulo ngen Yesus, “Penotoa-penotoa Yohanes cet puaso ngen semyang, awei yo kulo penotoa-penotoa tun Farisi, tapi penotoa-penotoa-Nu mbuk ngen menem.”

34Jawab Yesus ngen tobo'o, “Pado pesta nikeak ko coa dapet meluak tamu bepuaso amen sematen semanei masiak ade. 35Tapi bakea teko waktaune, amen sematen o nemok kunei tobo'o, pado waktau do'oba tobo'o bakea puaso.”

36Si madeak kulo do umpamo ngen tobo'o, “Coa suang kulo semgit delambea kain kunei bajau blau utuk temepekne pado bajau de an. Amen awei yo, de blau o kulo bakea segit. Pado kain blau coa cocok tenepek kain de an. 37Awei yo kulo coa suang de temuang anggur de blau moi lem katung babok de tuai, kerno amen awei yo, anggur de blau o bakea semgit katung o ngen anggur o bakea tekuang ngen katung o kulo ajua. 38Tapi anggur de blau harus naik lem katung de blau kulo. 39Ngen coa suang kulo de bi menem anggur tuai lok menem anggur de blau, sebab si bakea madeak: ‘Anggur de tuai o baik.’ ”

Currently Selected:

LUKAS 5: REJ

Highlight

Copy