LUKAS 4
4
Iblis cemubo Yesus
(Mat. 4:1-11; Mrk. 1:12-13)
1Yesus, de penuak ngen Roh Allah, belek kunei Bioa Yordan. Roh Allah mbin Si moi benei libea. 2Neak di Yesus tinggea pat puluak bilai ke'anne ngen cenubo Iblis. Seke'an neak di Yesus coa mbuk jejano ngen sesudo'o Yesus nyemen.
3Lajau madeakba Iblis ngen Yesus, “Amen Ko Anok Allah, neluakba butau yo jijai ruti.”
4 #
Ul. 8:3
Jawab Yesus ngen si, “Ade tetulis: Manusio idup iso kunei ruti bae.”
5Sesudo'o Iblis mbin Yesus moi penan de lekat ngen dekejeb matai Iblis kemten ngen Yesus kute kerajaan dunio. 6Nadeak Iblis ngen Yesus, “Kute kekuasaan serto kemuliaan bakea nelei ngen-Ko, sebab kutene o bi senreak ngenku ngen uku meleine ngen api bae de kelokku. 7Jijai amen Ko nyembeak uku, kutene o bakea jijai hok-Nu.”
8 #
Ul. 6:13
Tapi Yesus madeak ngen si, “Ade tetulis: Ko harus nyembeak Tuhan, Allahnu, ngen layanba Si bae!”
9Sesudo'o Iblis mbin Yesus moi Yerusalem ngen mpek Yesus neak bubung Umeak Tuhan, lajau madeak ngen Yesus, “Amen Ko Anok Allah, ne'usba dirai-Nu kunei yo moi mimbeak. 10#Mzm. 91:11-12 Sebab ade tetulis: ‘Tetang Ko, Si bakea meriteak malaikat-malaikat-Ne utuk jemago Ko.’ 11Ngen tobo'o bakea semambut Ko neak das tangenne, supayo kekea-Ko jibeak tatuk butau.”
12 #
Ul. 6:16
Yesus jemawabne, nadeak Si, “Ade firman: ‘Jibeak ko cemubo Tuhan, Allahnu!’ ”
13Sesudo Iblis selsei cemubo Yesus ngen kute mecem ca'o, Iblis teminggea Yesus ngen mbot waktau de baik.
Yesus belek moi Galilea
(Mat. 4:12-17; Mrk. 1:14-15)
14Lem kuaso Roh belekba Yesus moi Galilea. Ngen tesebeaba bito tetang Yesus neak kute daerah o. 15Yesus majea neak umeak-umeak semyang neak di ngen kute tun mujai Yesus.
Yesus coa tenimo neak Nazaret
(Mat. 13:53-58; Mrk. 6:1-6)
16Yesus teko moi Nazaret penan Si lai, ngen temurut biaso-Ne pado bilai Sabat Yesus masuk moi umeak semyang. Lajau Si je utuk baco kiteb. 17Ngen Yesus nelei kiteb Nebai Yesaya. Sesudo nukok-Ne, Yesus temau ayat, neak ipe ade tetulis:
18 #
Yes. 61:1-2
“Roh Tuhan ade pado-Ku,
ngen sebab Si bi melatik Uku,
utuk semapei Bito Baik ngen tun-tun peset.
Ngen Si bi mutus Uku utuk melei
bito tetang bebas tun-tun tahanan,
ngen pengeliak bagiak tun-tun sutai,
utuk mbebas tun-tun de jijai budok,
19utuk melei bito taun rahmat Tuhan bi teko.”
20Sesudo'o Yesus temutup kiteb o, meleine ngen petugas, lajau temot; ngen kute matai lem umeak semyang o kemliak Yesus. 21Lajau Yesus muloi majea tobo'o, nadeak Yesus, “Pado bilai yo genepba ayat yo sewaktau udi temi'ukne.”
22Ngen kute tun o demukung Yesus, tobo'o sele ngen kecek-kecek de ba'es de nucep Yesus, lajau nadeak tobo'o, “Iso Yesus yo anok Yusuf?”
23Mako madeakba Si ngen tobo'o, “Paset ko bakea madeak pateak yo ngen-Ku: Hoi dokter, kena'enba dirai-Nu suang. Meneaba neak yo kulo, neak penan asal Ko yo, kute de keme temi'uk de bi tejijai neak Kapernaum!” 24#Mat. 13:57; Mrk. 6:4; Yoh. 4:44 Ngen Si madeak igai, “Uku madeak ngen udi, sesungguakne coa ade nebai de nego neak penan asalne. 25#1Raj. 17:1, 8-16 Ngen Uku madeak ngen udi, ngen kecek-Ku yo benea: Pado zaman Elia ade dau selawei jando neak Israel ketiko lenget katup seke'an telau taun ngen num bulen ngen ketiko bahayo nyemen de luea biaso tejijai neak kute negrai. 26Tapi Elia nembo iso ngen saleak suang kunei tobo'o, tapi ngen suang selawei jando neak Sarfat, neak taneak Sidon. 27#2Raj. 5:1-14 Ngen pado zaman Nebai Elisa dau tun olon kidek neak Israel ngen coa ade suang kulo kunei tobo'o de kena'en, seluyen Naaman, tun Siria o.”
28Kute tun neak umeak semyang temi'uk do'o kembiak mengiak. 29Tobo'o klongon, lajau musir Yesus moi luea kota ngen mbin Yesus moi tebing tebo, neak penan kota o ade, utuk meluk Yesus kunei tebing o. 30Tapi Yesus paneu liwet kunei tengek-tengeak tobo'o, lajau lalau.
Tun de pasuk roh kidek
(Mrk. 1:21-28)
31Sesudo'o Yesus lalau moi Kapernaum, do kota neak Galilea. Neak di Si majea pado bilai-bilai Sabat. 32#Mat. 7:28-29; Mrk. 1:22 Tobo'o kembiak kagum kemliak ca'o Yesus majea, sebab Yesus miling ngen penuak kuaso. 33Neak lem umeak semyang o ade suang de pasuk semat ngen si menggang kembiak lek, 34“Hoi Ko, Yesus tun Nazaret, jano urusan Ko ngen keme? Ko teko lok majua keme? Uku namen api Ko: De Sucai kunei Allah.”
35Tapi Yesus semgokne, Si madeak, “Diem, kelueaba kunei si!” Ngen semat o kulo meting tun o moi tengeak-tengeak tun dau, lajau keluea kunei si ngen samo sekilai coa megis ne.
36Ngen kute tun sele, lajau madeak suang ngen de luyen, “Luea biaso kecek-kecek Yesus. Ngen wibawa ngen kuaso, Yesus meriteak roh-roh kidek keluea, ngen tobo'o keluea kulo!” 37Mako bito tetang Yesus tesebea neak kute daerah o.
Yesus kema'en dau tun
(Mat. 8:14-17; Mrk. 1:29-34)
38Yesus teminggea umeak semyang o, lajau lalau moi umeak Simon. Setuang selawei Simon gidong demem, ngen tun-tun melei namen hal o ngen Yesus. 39Yesus lalau moi penan tidua o, lajau musir olon o. Olon o nyep, ngen indok setuang Simon lajau klongon ngen melayan tobo'o.
40Waktau matai bilai tebenem, kute tun mbin ngen si tun-tun bolon, de bolon memecem olon. Si kulo meletok tangen-Ne das tetiep tobo'o ngen kema'en tobo'o. 41Kunei dau tun keluea kulo semat-semat samo menggang, “Ko adeba Anok Allah.”
Tapi Yesus semgok tobo'o ngen coa mizin tobo'o miling, sebab tobo'o namen Siba Rajo Penyelamat.
Yesus majea neak kota-kota luyen
(Mrk. 1:35-39)
42Waktau kebilai, Yesus berakat ngen lalau moi do penan de sunyai. Tapi tun dau mesoa Si, lajau temau Si ngen berusaho tema'en Si supayo jibeak teminggea tobo'o. 43Tapi Si madeak ngen tobo'o, “Neak kota-kota luyen Uku harus melei namen Bito Baik tetang Allah meriteak sebagai Rajo sebab utuk do'oba Uku nutus.”
44Yesus bekhotbah Bito Baik lem umeak-umeak semyang neak Yudea.
Currently Selected:
LUKAS 4: REJ
Highlight
Share
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
