LUKAS 3

Yohanes Pembaptis

(Mat. 3:1-12; Mrk. 1:1-8; Yoh. 1:19-28)

1Lem taun kelemo belas kunei pemeriteak Kaisar Tiberius, ketiko Pontius Pilatus jijai Gubernur neak Yudea, ngen Herodes rajo neak Galilea, Filipus, pasuakne, rajo neak Iturea ngen Trakhonitis, ngen Lisanias rajo neak Abilene. 2Pado waktau Hanas ngen Kayafas jijai Imem Lai, tekoba firman Allah ngen Yohanes, anok Zakharia, neak benei libea. 3Yohanes teko moi kute daerah Bioa Yordan ngen semapei bito kunei Allah. Yohanes madeak, “Betobatba kunei duso-dusonu ngen ko harus dibaptis, supayo Allah mapun dusonu.” 4#Yes. 40:3-5 Awei ade tetulis lem kiteb Nebai Yesaya:

“Ade sa'ei de madeak neak benei libea,

‘Seniapba dalen utuk Tuhan,

lu'usba dalen bagiak-Ne.

5Tiep lekok bakea tenimbun,

tiep tebo ngen bakea jijai rato,

de belikau bakea jijai lu'us,

de be lekok-lekok bakea jijai rato.

6Ngen kute tun bakea kemliak

Allah semlamat manusio!’ ”

7 # Mat. 12:34, 23:33 Dau tun teko ngen Yohanes utuk dibaptis. Yohanes madeak ngen tobo'o, “Ko tun jahat! Api de madeak ko dapet lolos kunei ukuman Allah de bakea teko? 8#Yoh. 8:33 Tunjukba ngen plep ko bahwo ko sudo betobat kunei duso-dusonu! Jibeak muloi madeak Abraham adeba ninik puyang ko. Inget: Kunei butau-butau yo kulo Allah nam menea royot utuk Abraham! 9#Mat. 7:19 Kapok sudo tesedio pado balet pun ngen tiep pun de coa masea buak de baik, bakea tenbang ngen nuang moi lem opoi.”

10“Tun-tun o temnai ngen Yohanes keme harus menea jano?”

11Yohanes jemawab, “Tun de temuan duai lambea bajau, harus melei ngen tun de coa temuan; ngen tun de temuan kembuk, harus magiakne.”

12 # Luk. 7:29 Penagiak-penagiak pajak kulo teko ngen Yohanes utuk dibaptis. Tobo'o temnai, “Gu'au, keme harus menea jano?” 13Yohanes jemawab, “Jibeakba temagiak lebiak dau kunei jano de sudo tentep.”

14Ade kulo prajurit de temnai, “Awei ipe ngen keme? Jano de harus keme menea?”

Jawab Yohanes ngen tobo'o, “Jibeak mbut ngen jibeak mok ngen pakso ngen temuduak palsu. Puesba ngen gajainu!”

15Pado waktau o tun-tun muloi temnai, jano Yohanes Rajo tun Yahudi de tobo'o mbot. 16Do'o sebabne Yohanes madeak ngen tobo'o kute, “Uku baptis ko ngen bioa, tapi konyo bakea teko Tun de lebiak lai kunei uku. Mukok tilai sepatu-Ne kulo uku coa patut. Si bakea baptis ko ngen Roh Allah ngen opoi. 17Neak tangen-Ne ade teleng utuk nepai kute gendum-Ne sapei bersih. Gendum bakea Si kemopoa neak lem toa, tapi kute dok bakea embem-Ne neak lem opoi de coa nam padem!”

18Awei yo ba Yohanes melei nasehat tun-tun ngen memecem ca'o, pado waktau si melei namen Bito Baik. 19#Mat. 14:3-4; Mrk. 6:17-18 Tapi Herodes, penguaso Galilea, tengur ngen Yohanes tetang nikeakne ngen Herodias, ngenyan pasuakne, ngen tetang kute kejahatan luyen de bi si menea. 20Herodes temambeak kejahatan ngen nasuk Yohanes masuk moi lem penjara.

Yesus dibaptis

(Mat. 3:13-17; Mrk. 1:9-11; Yoh. 1:32-34)

21Sesudo dibaptis kute tun o, Yesus dibaptis kulo. Ngen waktau Yesus gidong bedu'o, tukokba lenget. 22#Kej. 22:2; Mzm. 2:7; Yes. 42:1; Mat. 3:17; Mrk. 1:11; Luk. 9:35 Roh Allah tu'un moi das Yesus awei burung daro. Lajau teti'uk sa'ei Allah madeak, “Koba Anok-Ku de Uku kemasiak. Ko semnang atei-Ku.”

Tembo Yesus

(Mat. 1:1-17)

23Waktau Yesus muloi bekerjo, Si be'omor kekiro telau puluak taun ngen temurut pedapet tun, Si adeba anok Yusuf, anok Eli, 24anok Matat, anok Lewi, anok Malkhi, anok Yanai, anok Yusuf, 25anok Matica, anok Amos, anok Nahum, anok Hesli, anok Nagai, 26anok Maat, anok Matica, anok Simei, anok Yosekh, anok Yoda, 27anok Yohanan, anok Resa, anok Zerubabel, anok Sealtiel, anok Neri, 28anok Malkhi, anok Adi, anok Kosam, anok Elmadam, anok Er, 29anok Yesua, anok Eliezer, anok Yorim, anok Matat, anok Lewi, 30anok Simeon, anok Yehuda, anok Yusuf, anok Yonam, anok Elyakim, 31anok Melea, anok Mina, anok Matata, anok Natan, anok Daud, 32anok Isai, anok Obed, anok Boas, anok Salmon, anok Nahazon, 33anok Aminadab, anok Admin, anok Arni, anok Hezron, anok Peres, anok Yehuda, 34anok Yakub, anok Ishak, anok Abraham, anok Terah, anok Nahor, 35anok Serug, anok Rehu, anok Peleg, anok Eber, anok Salmon, 36anok Kenan, anok Arpakhsad, anok Sem, anok Nuh, anok Lamekh, 37anok Metusalah, anok Henokh, anok Yared, anok Mahalaleel, anok Kenan, 38anok Enos, anok Set, anok Adam, anok Allah.

Currently Selected:

LUKAS 3: REJ

Highlight

Copy