LUKAS 10

Yesus mbo tujuak puluak penotoa

1Sesudo'o Tuhan temunjuk tujuak puluak penotoa de luyen, lajau mbo tobo'o deduai demute Si moi tiep kota ngen penan de lok Si magea. 2#Mat. 9:37-38 “Asea de bakea kentem dau,” nadeak-Ne magea tobo'o, “tapi pekerjo utuk ngetemne cuma didik. Sebab o, minoiba magea Temuan kebun supayo Si mbo pekerjo utuk ngetem asea tanem-Ne. 3Lalauba, sesungguakne Uku mbo udi awei anok domba moi tengeak-tengeak serigala. 4#Mat. 10:7-14; Mrk. 6:8-11; Luk. 9:3-5 Jibeak mbin dupet atau katung sedekeak, atau kulo sepatu. Jibeak bedan neak tengeak dalen utuk melei salam ngen suang kulo. 5Amen udi masuk moi do umeak, nadeakba lebiak dute, ‘Semoga sejahteraba lem umeak yo.’ 6Amen neak di ade tun de galok damoi, salam damoinu o bakea tep padone; amen coa, tarikba igai salam damoinu o. 7#1Kor. 9:14; 1Tim. 5:18 Tinggeaba neak do umeak bae. Tenimoba jano de nidang ngen udi neak di, sebab tun de bekerjo dapet temimo upeakne. Jibeak bebaliak kunei do umeak moi umeak de luyen. 8Amen udi teko moi do kota ngen neak di udi senambut ngen baik, mbukba jano de nidang neak di ngen udi. 9Kena'enba tun-tun de bolon neak kota o, ngen nelei bito ngen tun-tun neak di, ‘Allah segro bakea muloi meriteak awei Rajo neak tengeak-tengeak udi.’ 10#Kis. 13:51 Tapi amen udi teko moi do kota ngen neak di udi coa tenimo, kelueaba moi dalen ngen nadeakba, 11‘Kulo debu kota udi de melket pado kekea keme, keme kemibas neak adepnu. Tapi namenba dio: Allah meriteak sebagai Rajo sudo pa'ok.’ 12#Kej. 19:24-28; Mat. 10:15, 11:24 Uku madeak ngen udi: pado Bilai Kiamat Sodom bakea lebiak mudeak napun Allah kunei pado tun kota o.”

Kota-kota de coa masai

(Mat. 11:20-24)

13 # Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4 “Celakoba udi Khorazim! Celakoba udi Betsaida! Kerno amen neak Tirus ngen neak Sidon tejijai mujizat-mujizat de bi tejijai neak tengeak-tengeak udi, sudo an tobo'o betobat kunei duso-duso tobo'o, ngen makei bajau bekabung serto mpek abau neak das ulau tobo'o. 14Pado Bilai Kiamat, tun-tun Tirus ngen Sidon bakea lebiak mudeak napun Allah kunei pado udi. 15#Yes. 14:13-15 Ngen udi, Kapernaum! Ko meker, udi bakea nelekat sapei moi surgo? Coa, udi bakea tenu'un sapei moi dunio tun matei!”

16 # Mat. 10:40; Mrk. 9:37; Luk. 9:48; Yoh. 13:20 Lajau Yesus madeak ngen penotoa-penotoa-Ne, “Tun de temi'uk udi, temi'uk Uku. Tun de temulok udi, temulok Uku. Ngen tun de temulok Uku, kulo temulok Si de mbo Uku.”

Belekne tujuak puluak penotoa

17Tujuak puluak penotoa o belek ngen riang nien. “Tuhan,” nadeak tobo'o, “roh-roh kejahatan kulo taat ngen keme amen keme meriteak tobo'o das gen Tuhan!”

18Yesus jemawab, “Uku kemliak Iblis us kunei lenget awei gelep. 19#Mzm. 91:13 Sesungguakne Uku bi melei kuaso ngen udi utuk melat dung ngen kalo ngen kuaso utuk tema'en kuet tenago musuak, sehinggo coa ade de bakea cemelako udi. 20Sekilai kulo awei o jibeakba beriang kerno roh-roh kejahatan taat ngen udi. Lebiak baik udi beriang kerno gennu ade neak lem surgo.”

Yesus beriang

(Mat. 11:25-27, 13:16-17)

21Pado waktau o kulo beriangba Yesus lem Roh Allah ngen madeak, “Uku besyukur ngen-Kumu, Bapa, Tuhan lenget ngen bumai, kerno kutene o Ko munyin bagiak tun bijak ngen pacok, tapi Ko melei nyato ngen tun titik. Au Bapa, do'oba de semnang atei Bapa.

22 # Yoh. 3:35, 10:15 Kutene bi senreak Bapa ngen Coa suang kulo kemnal Anok, luyen kunei Bapa. Coa ade kulo de kemnal Bapa luyen kunei Anok; ngen tun-tun ngen Anok o lok kemnal Bapa.”

23Lajau Yesus jemling ngen penotoa-penotoa-Ne, sesudo'o madeak ngen tobo'o bae, “Butungba udi kerno bi kemliak de udi kemliak uyo yo. 24Kerno Uku madeak ngen udi dau nebai ngen rajo lok kemliak de udi kemliak uyo yo, tapi tobo'o coa kemliakne. Tobo'o lok temi'uk de udi temi'ik uyo yo, tapi tobo'o coa temi'ukne.”

Tun Samaria de mu'eak atei

25 # Mat. 22:35-40; Mrk. 12:28-34 Sesudo'o je suang gu'au agamo utuk cemubo Yesus, nadeakne, “Gu'au, jano de harus kumenea utuk dapet idup de kekal?”

26Jawab Yesus ngen si, “Jano de tetulis neak lem Kiteb Ade? Awei ipe pedapetnu tetang hal o?”

27 # Im. 19:18; Ul. 6:5 Jawab tun o, “ ‘Kasiakba Tuhan, Allahnu, ngen segenep ateinu, ngen sepenuak jiwonu, ngen segenep tenagonu, ngen kute akeanu,’ ngen ‘Kasiakba sesamonu manusio awei dirainu suang.’ ”

28 # Im. 18:5 Nadeak Yesus ngen si, “Jawab udi o benea; meneaba awei yo, mako udi bakea idup.”

29Tapi utuk benea diraine tun o madeak ngen Yesus, “Api sesamoku manusio?”

30Yesus jemawab, “Ade suang semanei tu'un kunei Yerusalem moi Yerikho. Neak tengeak dalen si senrang perapok, nebut kute de si temuan, lajau teninggea setengeak matei, lajau teninggea tegulek neak dalen ngen sileak bea. 31Mujua ade suang imem tu'un liwet dalen o. Si kemliak tun o, tapi si liwet kunei dipoa dalen. 32Awei o kulo suang Lewi teko moi penan o. Ketiko si kemliak tun o, si liwet kunei dipoa dalen. 33#2Taw. 28:15 Lajau teko suang Samaria, de gidong lem pemaneune, moi penan o. Ngen ketiko si kemliak tun o, tegerokba ateine utuk temulung. 34Si lalau ngen si lajau mukus sileakne, sesudo si semiram ngen minyok ngen anggur. Sesudo'o si kemnek tun o moi das keledaine, lajau mbin si moi penan temalem ngen merawatne. 35Menne si mok duai caci pirok ngen melei ngen tun de temuan losmen o serto madeak, ‘Rawatba si, ngen amen caci yo ku'ang, bakea uku masen sudoyo, amen uku belek moi miyo.’ ”

36Sesudo'o Yesus semudo ceritone o ngen temnai, “Kunei ketelau tun o de ipe, temurut pedapetnu, de menea awei sesamo kunei tun de nerapok o?”

37Jawab tun o, “Tun de bi temulung tun'o.”

Nadeak Yesus ngen si, “Lalauba, ngen meneaba awei yo!”

Maria ngen Marta

38 # Yoh. 11:1 Ketiko Yesus ngen penotoa-penotoa-Ne lem pemaneune, sapeiba Si neak do sadei. Suang selawei de genne Marta temimo Si neak umeakne. 39Selawei o temuan suang pasuak de genne Maria. Maria yo temot pa'ok kekea Tuhan Yesus ngen bogoa temi'uk kecek-kecek-Ne. 40Gidong Marta sibuk sekilai mlayan. Si ma'ok Yesus ngen madeak, “Tuhan, coa Ko dulai, bahwo pasuakku munyau uku mlayan suang dirai? Luakba si temulung uku.”

41Tapi Tuhan jemawabne, “Marta, Marta, pasuak ragau ngen semaro dirai ngen dau pekaro; 42tapi cuma do bae de perlu. Maria bi miliak pagiak de lebiak baik, de coa bakea nemok kunei padone.”

Currently Selected:

LUKAS 10: REJ

Highlight

Copy