KISAH RASUL-RASUL 9

Saulus betobat

(Kis. 22:6-16, 26:12-18)

1Sementaro o atei Saulus masiak bae lok macam, munuak murid-murid Tuhan Yesus. Si madep Imem Lai, 2minoi su'et kuaso utuk nembin moi pemipin-pemipin umeak-umeak semyang tun Yahudi neak Damsyik, supayo amen si temmau neak di tun-tun de pecayo ngen Yesus, si dapet temakep tobo'o lajau mbin tobo'o moi Yerusalem.

3Lem pemaneune moi Damsyik, ketiko si sudo pa'ok kota o, tetibo cahayo besinea kunei lenget kemliling Saulus. 4Si us moi taneak lajau temi'uk do sa'ei madeak ngensi, “Saulus, Saulus! Jano sebabne ko semikso Uku?”

5Jawab Saulus, “Api Ko, Tuan?”

Nadeak-Ne, “Ukuba Yesus de ko semikso o. 6Tapi klongonba, lalauba moi lem kota. Neak di bakea nadeak ngenko, jano de harus ko menea.”

7Tun-tun de milem besamo-samo Saulus tekanjet sehinggo coa dapet besa'ei; kerno tobo'o temi'uk sa'ei o tapi coa kemliak suang kulo. 8Saulus klongon, lajau mukok mataine, tapi si coa dapet kemliak jejano; tobo'o harus mapeak si masuk moi Damsyik. 9Selamo telau bilai si coa dapet kemliak, selamo o kulo si cao mukmei, menem.

10Neak Damsyik ade suang murid Tuhan Yesus de genne Ananias. Neak lem do pengeliak, Tuhan miling ngensi. Tuhan madeak, “Ananias!”

Ananias jemawab, “Uku Tuhan.”

11Tuhan madeak, “Maro berakat uyo. Lalauba moi umeak Yudas neak Dalen Lu'us. Tanye neak di tun de genne Saulus de asalne kunei kota Tarsus. Tun o gidong bedu'o, 12neak lem do penglihatan si kemliak suang semanei, de genne Ananias, teko ngensi lajau meltok tangen moi dasne supayo si dapet kemliak igai.”

13Ananias jemawab, “Tuhan, uku sudo temi'uk dau tun miling tetang tun yo, te'utamo tetang penganiayaan-penganiayaan de si menea te'adep umat-Nu neak Yerusalem. 14Igai kulo neak yo si temuan kuaso kunei imem-imem kepalo utuk temakep kute tun de menok gen-Nu.”

15Tuhan madeak ngensi, “Lalauba, sebab tun yo adeba alat piliak bagiak-Ku utuk melei namen gen-Ku neak adep bangso-bangso luyen serto rajo-rajo ngen tun-tun Israel. 16Uku suang bakea temunjuk ngensi kute penderitaan de harus si tanggung kerno Uku.”

17Mako Ananias kulo lalau moi umeak o lajau meltok tangenne moi das Saulus. “Pasuak Saulus,” nadeak Ananias, “Tuhan Yesus de udi keliak neak tengeak dalen ketiko Pasuak gidong miyo, Siba de meluak uku teko supayo Pasuak nam kemliak igai, ngen penuak Roh Sucai.” 18Saat o kulo sesuaktau de awei sisik kan telpas kunei matai Saulus, si dapet kemliak igai. Mako si kulo klongon lajau dibaptis. 19aSesudo si mukmei, si jijai kuet igai.

Saulus majea neak Damsyik

19bSaulus tinggea kekedau bilai besamo-samo murid-murid Yesus neak Damsyik. 20Si lasung lalau moi umeak-umeak semyang muloi melei namen bahwo Yesus do'oba Anok Allah.

21Kute tun selle temi'uk Saulus. Tobo'o madeak, “Tun yo neak Yerusalem sudo munuak kute tun de pecayo ngen Yesus. Si teko moi miyo kerno utuk temakep lajau mbin tobo'o moi adep imem-imem kepalo!”

22Tapi Saulus lebiak kuet pengaruhne. Bukti-bukti de si nadeak tetang Yesus kembiak benea bahwo Yesus do'oba Rajo Penyelamat, sapei tun-tun Yahudi de tinggea neak Damsyik coa dapet igai mbantah.

23 # 2Kor. 11:32-33 Sesudo liwet kekedau anne tun-tun Yahudi sepakat utuk munuak Saulus. 24Tapi maksud kidek o Saulus namen. Lueng kelmen tun-tun Yahudi mbot neak bang gerbang kota utuk munuak si. 25Tapi pado do kelmen, penotoa-penotoa Saulus mok si, lajau temu'unne neak lem do rago liwet tembok kota.

Saulus neak Yerusalem

26Saulus lalau moi Yerusalem, neak di si berusaho begabung ngen murid-murid Yesus. Tapi tobo'o saben ngensi, sebab tobo'o coa pecayo bahwo si benea-benea bi jijai murid Yesus. 27Sesudo'o Barnabas teko ngensi, lajau mbinne ngen rasul-rasul. Barnabas cemrito ngen tobo'o tetang aweiipe Saulus kemliak Tuhan neak tengeak dalen, aweiipe Tuhan miling ngensi. Barnabas melei namen kulo tetang aweiipe binaine Saulus majea neak Damsyik lem gen Yesus. 28Mako o Saulus tinggea besamo tobo'o, binai bekhotbah neak kute Yerusalem lem gen Tuhan. 29Saulus miling ngen bedebat kulo ngen tun-tun Yahudi de makei bahaso Yunani, tapi tobo'o berusaho munuak si. 30Ketiko tun-tun pecayo luyenne namen tetang hal o, tobo'o mbin Saulus moi Kaisarea, sesudo'o mbo si moi Tarsus.

31Mako jemaat neak kute Yudea, Galilea, Samaria jijai aman. Roh Sucai temulung, tobo'o idup lem saben bakea Tuhan, jemaat-jemaat o betambeak kuet, betambeak dau.

Petrus neak Lida ngen Yope

32Petrus lalau moi ipe-ipe magea jemaat-jemaat. Pado do bilai si magea umat Tuhan de tinggea neak Lida. 33Neak di si temau suang semanei de genne Eneas, de pakuak sudo lapen taun, coa nam klongon kunei penan tiduane. 34Petrus madeak ngen Eneas, “Eneas, Yesus Kristus kema'en ko. Klongonba lajau mberes penen tiduanu.” Saat o kulo Eneas klongon. 35Kute penduduk neak Lida, Saron kemliak Eneas, lajau tobo'o kutene pecayo ngen Tuhan.

36Neak Yope ade suang selawei de genne Tabita – lem bahaso Yunani Dorkas. Selawei o dau sekilai menea baik ngen melei sedekeak. 37Tapi pado waktau o si bolon lajau meninggea. Sesudo'o jenazahne endai, si neltok neak kamar de neak das. 38Yope coa seberapo uak kunei Lida. Jijai pado waktau murid-murid Yesus neak Yope temi'uk Petrus ade neak Lida, tobo'o mbo duai tun lalau ngen Petrus melei pesen yo, “Gacang-gacangba teko miyo.” 39Petrus lasung klongon lajau temotoa tobo'o. Sapeine neak di, si nembin moi bilik de neak das. Kute jando neak di gemlung Petrus samo ngindoi lajau temunjuk ngensi bajau-bajau, jubah de endet Dorkas utuk tobo'o waktau si masiak idup. 40Petrus meluak tobo'o kutene keluea, lajau si sujud ngen bedu'o. Sesudo'o si madep jenazah Dorkas lajau madeak, “Tabita, klongon!” Mako Dorkas mukok matai ketiko si kemliak Petrus, si temot. 41Lajau Petrus megong tangenne lajau temulung si je. Sesudo'o Petrus menok tun-tun pecayo neak di sesamo jando-jando o, lajau semreak Dorkas de sudo idup o ngen tobo'o. 42Bito tetang kejijai o tesebea moi kute Yope, sehinggo dau tun pecayo ngen Yesus sebagai Rajo Penyelamat tobo'o. 43Petrus tinggea neak di kekedau bilia igai neak umeak suang pengrajin babok de genne Simon.

Currently Selected:

KISAH RASUL-RASUL 9: REJ

Highlight

Copy