KISAH RASUL-RASUL 10

Petrus ngen Kornelius

1Neak Kaisarea ade suang semanei de genne Kornelius. Si suang kapten “Pasukan Italia”. 2Si saleh, si beserto keluargone saben bakea Allah. Si dau temulung tun-tun Yahudi de peset, si bogoa bedu'o ngen Allah. 3Pado do bilai kekiro jam telau kebilai si kemliak ngen jelas suang malaikat Allah teko, menok si, “Kornelius!”

4Kornelius demnong malaikat o ngen saben lajau madeak, “Ade jano, Tuan?”

Jawab malaikat o ngensi, “Kute du'onu, sedekeaknu bi kenek moi hadirat Allah, Allah minget ko. 5Uyo, neluakba kekedau tun moi Yope utuk demapet suang de genne Simon de senbut kulo Petrus. 6Si numpang neak umeak suang pengrajin babok de genne Simon de tinggea neak biding patoi.” 7Sesudo'o malaikat de miling ngensi o teminggea si, nokne duai tun pelayanne beserto suang prajurit de saleh. Kunei tun-tun de bogoa besamo-samo ngensi. 8Sesudo'o si jemlas kute sesuaktau ngen tobo'o, si meluak tobo'o moi Yope.

9Men kekiro tengeak bilai ketelau tun o berade lem pemaneu, tobo'o sudo pa'ok kota Yope, kenekba Petrus moi das umeak utuk bedu'o. 10Si nyemen lajau lok mukmei. Sementaro kembuk seniap, si dapet do pengeliak. 11Si kemliak lenget tukok, sesuaktau awei kain de libea nulua moi bumai, tegatung pado kepat sudutne. 12Neak lemne tedapet memecem benatang de kekea pat, benatang melata, burung. 13Lajau ade sa'ei madeak ngensi, “Petrus, klongon! Sembeliakba lajau mbuk!”

14Petrus jemawab, “Coa, Tuhan! Ati perneak uku mbuk jejano de haram jano najis.” 15Tapi sa'ei o madeak igai ngensi, “Jano de sudo Allah nadeak halal jibeak ko anggap do'o haram.” 16Hal yo tejijai sapei telau kilai, sesudo'o taketba kain o moi lenget

17Sementaro Petrus betanye-tanye neak lem ateine, jano tai penglihatan de bi kenliakne o, tun-tun de neluak Kornelius utuk mesoa umeak Petrus, bi je neak muko bang. 18Tobo'o menok suang lajau betanye, jano Simon de senbut Petrus numpang neak umeak o.

19Waktau Petrus gidong bepeker tetang pengeliak o, madeakba Roh ngensi, “Ade telau tun gidong mesoa ko. 20Klongonba, tu'unba moi mimbeak ngen berakatba besamo-samo ngen tobo'o, jibeak ragau kerno uku de meluak tobo'o.” 21Lajau tu'unba Petrus moi mimbeak, madeak ngen tun-tun o, “Ukuba de udi mesoa; jano maksud ko teko?”

22Jawab tobo'o, “Kornelius, Si tun de baik, Si saben ngen Allah, de paling baik neak antaro kute bangso Yahudi, bi nelei petunjuk ngen suang malaikat sucai, kunyau si mundang ko moi umeakne ngen temi'uk jano de bakea ko madeak.” 23Lajau si meluak tobo'o utuk temalem neak di.

Menne si klongon ngen berakat besamo-samo tobo'o, kekedau pasuak kunei Yope semerto si. 24De bilai sesudo'o sapeiba tobo'o neak Kiasarea. Kornelius gidong mbot tobo'o ngen si bi menok pepasuakne ngen kekuatne bekopoa. 25Waktau Petrus masuk, tekoba Kornelius semabutne. Si sujud neak adep kekea Petrus ngen nyembeakne. 26Tapi Petrus temulung si je samo madeak, “Klongonba, uku kulo manusio.” 27Samo miling ngensi, si masuk temau tun dau bi bekopoa. 28Lajau si madeak ngen tobo'o, “Udi suang namen bahwo tun Yahudi coa buliak lem agamone utuk magea atau begaul ngen tun-tun kunei bangso luyen. Tapi Allah sudo melei namen ngen uku bahwo uku coa buliak manggep api bae najis atau haram. 29Do'oba sebabne uku coa keberatan utuk teko waktau uku nok. Uyo uku lok namen, jano sebab udi menok uku.”

30Jawab Kornelius, “Pat bilai de sudo kekiro pado waktau de serai awei uyo, adeba jam telau pelbeak, uku gidong bedu'o neak umeakku. Tetibo ade suang tun je neak adepku, keracokne bekilet. 31Si madeak: Kornelius, du'onu bi teni'uk Allah, sedekeaknu bi ninget neak adep-Ne. 32Kerno'o, neluakba tun moi Yope utuk demapet Simon de senbut Petrus; si gidong temalem neak umeak Simon, suang pengrajin babok, de tinggea neak pengger laut. 33Do'oba sebabne segro uku meluak tun ngenko, ngen senang atei ko bi teko. Uyo keme kute bi ade neak piyo neak adep Allah utuk temi'uk jano de neriteak Tuhan ngen ite.”

Pidato Petrus

34 # Ul. 10:17 Lajau muloiba Petrus miling, “Sesungguakne uku bi ngertai bahwo Allah coa mbeda tun. 35Tun de saben ngen Allah ngen menea de benea, tun o tenimo Allah, coa dulai si kunei bangso jano. 36Do'oba firman de Si semapei ngen tun-tun Israel waktau si melei namen damoi sejahtera liwet Yesus Kristus de adeba Tuhan kunei kute tun. 37Udi namen tetang kute sesuaktau de tejijai neak kute taneak Yudea, muloi kunei Galilea, sesudo baptisan de melei namen ngen Yohanes. 38Udi namen bahwo Allah bi miliak Yesus tun Nazaret o, melei namen ngen-Si Roh Sucai ngen kuaso. Udi namen kulo bahwo Yesus o lalau moi ipe bae utuk menea baik, Si kemaen kute tun de kenuaso Iblis, kerno Allah semerto Si. 39Kemeba saksai-saksai kunei kute sesuaktau de nea-Ne neak negrai tun Yahudi atau neak Yerusalem; tobo'o bi munuak Si ngen gematung Si moi kiyeu salib. 40Allah bi midup Si pado bilai ketelau ngen kemten Si ngen manusio, 41iso ngen kute bangso o, tapi ngen saksai-saksai, de ayokne bi tenunjuk ngen Allah. Keme de bi mukmei ngen menem besamo-samo ngen Si, sesudo Si idup igai kunei antaro tun matei. 42Si meluak keme melei namen Bito Baik o ngen tun-tun, melei saksai bahwo Si de naket Allah jijai hakim tun-tun de masiak idup ngen tun-tun de sudo matei. 43Tetang Siba kute nebai besaksai ngen-Si, bakea dapet apun liwet gen-Ne.”

Tun-tun de iso Yahudi dapet Roh Sucai

44Sementaro Petrus madeak awei yo, tu'unba Roh Sucai moi das kute tun de temi'uk bito o. 45Tun-tun Yahudi de pecayo ngen Yesus ngen temotoa Petrus kunei Yope, kute selle kemliak Allah melei kulo Roh-Ne ngen tun-tun bangso luyen de iso Yahudi. 46Sebab tobo'o temi'uk tun-tun o miling lem dau bahaso ngen memuliakan Allah. Lajau nadeak Petrus, 47“Cubo kemliak, tun-tun yo bi dapet Roh Sucai awei ite. Jijai jano dapet tun-tun temgeak tobo'o utuk dibaptis ngen bioa?” 48Mako Petrus meluak tobo'o dibaptis das gen Yesus Kristus. Sesudo'o tobo'o minoi supayo Petrus tinggea ngen tobo'o kekedau bilai anne.

Currently Selected:

KISAH RASUL-RASUL 10: REJ

Highlight

Copy