KISAH RASUL-RASUL 8

1Saulus kulo tujau ngen pembunuhan Stefanus.

Saulus semikso jemaat neak Yerusalem

Pado waktau o muloiba penganiayaan de kembiak kejam te'adep jemaat neak Yerusalem. Tobo'o kute, kecuali Rasul-rasul, tesebea moi kute daerah Yudea ngen Samaria. 2Tun-tun saleh kemubua mayit Stefanus serto mindoine ngen kembiak. 3#Kis. 22:4-5, 26:9-11 Tapi Saulus bogoa bae berusaho majua jemaat. Si lalau kunei umeak moi umeak ngen seme'et moi luea tun-tun masai, lajau mbin masuk tobo'o moi lem penjara.

Bito Baik nelei namen neak Samaria

4Tun-tun pecayo de sudo tesebea o melei namen Bito Baik kunei Allah o moi ipe-ipe. 5Filipus lalau moi do kota neak Samaria ngen melei namen ngen tun-tun neak di tetang Rajo Penyelamat de jenanjai Allah. 6Ketiko tun-tun temi'uk Filipus miling ngen tobo'o kemliak tando-tando de nea ne, dau kunei tobo'o de kemliak jano de nadeak Filipus. 7Sebab roh-roh kidek sudo keluea ngen mekik kunei dau tun de pasuk semat. Tun-tun pakuak ngen tipang kulo dau de kena'enne. 8Mako tun-tun neak kota o riang sekilai.

9Neak kota o ade suang semanei de genne Simon, de sudo kekedau waktau anne menea tun-tun Samaria takjub bakea lemau sihirne. Si madeak ngen tobo'o bahwo si tun de luea biaso. 10Kute tun, lai titik, temotoa si ngen madeak, “Tun yo adeba kuaso Allah de senbut Kuaso Lai.” 11Tobo'o temotoa ne, kerno sudo an si menakjubkan tobo'o ngen sihirne. 12Tapi uyo tobo'o pecayo ngen Filipus de melei namen Bito Baik tetang Allah meriteak sebagai Rajo, tetang gen Yesus Kristus, Tobo'o dibaptis, baik semanei kulo selawei. 13Simon suang kulo pecayo. Sesudo dibaptis si bogoa temotoa Filipus. Si takjub ketiko si kemliak tando-tando, mujizat-mujizat lai de tejijai.

14Ketiko rasul-rasul neak Yerusalem temi'uk bahwo taneak Samaria bi temimo firman Allah, tobo'o mutus Petrus, Yohanes moi mindi. 15Ketiko sapei neak di keduai rasul o bedu'o, supayo tun-tun Samaria o dapet Roh Sucai. 16Sebab Roh Sucai ati tu'un neak das suang kulo neak antaro tobo'o, kerno tobo'o tembei dibaptis lem gen Tuhan Yesus. 17Sesudo keduaine mpek tangen neak das tobo'o, lajau tobo'o temimo Roh Sucai.

18Simon kemliak bahwo kerno tangen rasul-rasul neltok moi das tun-tun o, Roh Sucai nelei ngen tobo'o. Kerno o Simon mbin caci ngen Petrus ngen Yohanes. 19Simon madeak, “Neleiba ngen uku kuaso o kulo supayo amen tangen uku neltok pado api bae, tun o bakea temimo Roh Sucai.”

20Tapi Petrus jemawab, “Celakoba ko ngen cacinu! Ko kiro pelei Allah dapet nukua ngen caci? 21Ko coa temuan hok utuk milem neak lem kerjo keme, sebab ateinu coa benea te'adep Allah. 22Sebab o teninggeaba maksudnu de kidek o, ngen minoiba ngen Tuhan supayo Si mapun pekerannu de kidek o! 23Sebab uku namen ko penuak ngen kidek atei ngen nudok ngen kejahatan.”

24Lajau Simon madeak ngen Petrus ngen Yohanes, “Tulungba minoi ngen Tuhan supayo coa do kulo kunei pepasuak nadeak o tejijai padoku.”

25Sesudo keduaine besaksai ngen melei namen firman Tuhan, belekba tobo'o moi Yerusalem. Lem pemaneune o tobo'o melei namen Bito Baik lem dau sadei neak Samaria.

Pejabat istana kunei Etiopia

26Suang malaikat Tuhan madeak ngen Filipus, “Maro berakat! Lalauba moi arah Selatan moi dalen de mubung Yerusalem ngen Gaza.” Dalen o sunyai. 27Lajau Filipus klongon ngen berakat. Adeba suang Etiopia, suang pejabat istana, suang pegawai lekat, kepalo perbendaharaan Sri Kandake, ratu negrai Etiopia. Lajau tun moi Yerusalem utuk semyang. 28Tun o gidong lem pemaneu belek ngen temot lem keritane samo mbaco Kiteb Nebai Yesaya. 29Lajau nadeak Roh ngen Filipus, “Lalauba moi mindi ngen na'okba kerita o!” 30Filipus lalau ma'ok kerita o, lajau si temi'uk tun o mbaco Kiteb Nebai Yesaya. Filipus betanye ngensi, “Jano Tuan ngertai de Tuan baco o?”

31Tun o jemawab, “Awei ipe uku ngertai, amen coa ade de jemlasne ngenku?” Lajau si majok Filipus kenek moi kerita ngen temot besamo-samo si. 32#Yes. 53:7-8 Dioba ayat-ayat de si baco o,

“Si awei bebirai de ni'ing utuk senbeliak,

awei anok bebirai de coa ngembek amen bulaune genuting,

awei'oba Si coa mucep depateak kecek kulo.

33Lem hino-Ne, keadilan coa nelei ngen-Si.

Api de bakea cemrito asal usul-Ne?

Sebab nyabai-Ne nemok kunei bumai.”

34Lajau nadeak pejabat istana o ngen Filipus, “Uku betanye ngenko, tetang api nebai madeak aweiyo? Tetang diraine suang jano tetang tun luyen?” 35Filipus kulo muloi miling ngen betulok kunei ayat o si melei namen Bito Baik tetang Yesus ngensi. 36Tobo'o melanjut pemane tobo'o, sapei neak do penan de ade bioa. Lajau nadeak pejabat istana o, “Keliak, neak di ade bioa; jano ade halangan bagiakku utuk dibaptis?”

[ 37Simbet Filipus, “Amen Tuan pecayo ngen segenep atei, buliak.”

Jawabne, “Uku pecayo bahwo Yesus Kristus adeba Anok Allah.”]

38Tun Etiopia o meluak medan kerita o, keduaine tu'un moi lem bioa, baik Filipus kulo pejabat istana o, lajau Filipus membaptis si. 39Sesudo tobo'o keluea kunei bioa, Roh Tuhan tetibo mbin Filipus lalau, pegawai istana o coa kemliakne igai. Si kembiak riang temrus pemaneune. 40Filipus sudo ade neak Asdod. Si paneu liwet daerah o samo melei namen Bito Baik neak kute kota sapei si teko neak Kaisarea.

Currently Selected:

KISAH RASUL-RASUL 8: REJ

Highlight

Copy