KISAH RASUL-RASUL 5

Ananias ngen Safira

1Ade suang semanei de genne Ananias. Si ngen ngenyanne Safira jemuoa debidang taneak. 2Caci kunei jemuoa taneak o tengeakne si tema'en utuk diraine suang ngen de luyenne si semreak ngen rasul-rasul. Si menea o ngen ngenyanne namen. 3Mako Petrus madeak ngen si, “Ananias, getai ko munyau Iblis kemuaso atei nu, sapei ko mike ngen Roh Sucai, seca'o dediem tema'en utuk dirainu suang tengeak kunei caci jemuoa taneak o? 4Seke'an taneak o coa jenuoa, iso si do'o tep ko temuan, sesudo jenuoa, iso aseane o tep lem kuaso nu? Getai ko merencano plep o lem atei nu? Ko iso mike manusio, tapi mike Allah.” 5Waktau temi'uk kecek o, Ananias ubuak lajau matei. Kute tun de temi'uk tetang hal o jijai saben. 6Mako tun-tun uai teko mukus mayit Ananias, lajau mbinne moi luea utuk kenubuane.

7Kekiro telau jam sesudo'o ngenyanne masuk. Si coa namen jano de tejijai. 8Petrus madeak ngen si, “Cubo melei namen ngen uku: Jano taneak de ko ngen sematennu jenuoa o, kedau gone?” “Betoa, do'o gone,” jawab ngenyan Ananias.

9Lajau Petrus madeak ngen si, “Getai ko ngen sematennu sepakat utuk cemubo Roh Tuhan? Temi'ukba! Tun-tun de kemubua sematennu bi belek. Tobo'o bakea mbin ko moi luea kulo.” 10Waktau o kulo ngenyan Ananias o ubuak ngen matei neak adep Petrus. Waktau tun-tun uai o masuk, tobo'o temau si bi matei. Lajau tobo'o mbin mayitne moi luea ngen kemubuane neak depeak sematenne. 11Mako kute tun-tun pecayo o ngen tun-tun luyenne, de temi'uk tetang hal o, jijai saben.

Tando-tando ngen mujizat-mujizat

12Dau tando ngen mujizat de nea rasul-rasul neak antaro tun dau. Kute tun pecayo bogoa kopoa neak latet Salomo lem Bait Allah. 13Tun-tun luyen coa ade de binai bundok ngen tobo'o. Tapi tobo'o kembiak nego tun dau. 14Goyo an goyo betambeakba jumlah tun de pecayo ngen Tuhan, baik semanei jano selawei. 15Tobo'o mbin tun-tun bolon moi luea, moi dalen lai, gemulingne neak das penan tidua ngen neak tikea, supayo amen Petrus liwet, tobo'o paling didikne nam keno bayangan Petrus. 16Tun dau neak kota-kota neak rogok Yerusalem teko dedau serto mbin tun-tun de pasuk roh kidek. Ngen tun-tun o kena'en kutene.

Rasul-rasul nelepas kunei sel

17Akherne Imem Lai ngen kute tun penotoa-penotoane, adeba golongan tun-tun Saduki, muloi betindak kerno tobo'o iri atei. 18Rasul-rasul o tenakep, lajau nasuk moi lem sel umum. 19Tapi kelemenne, suang Malaikat Tuhan mukok bang-bang sel, lajau mbin rasul-rasul o moi luea. Malaikat o madeak ngen rasul-rasul o, 20“Lalauba je neak Bait Allah ngen melei namenba ngen tun-tun tetang idup de belau yo.” 21Mako rasul-rasul o temotoa pesen malaikat o. Kekabuk nien tobo'o lalau moi Bait Allah ngen muloi ngajea neak di.

Sementaro Imem Lai ngen tobo penotoane teko, lajau menea sidang mahkamah ngen tobo pemipin Yahudi. Sesudo'o tobo'o meluak tun lalau mok rasul-rasul o kunei sel utuk nembin madep tobo'o. 22Tapi waktau tun-tun de neluak o sapei neak sel, tobo'o coa temau rasul-rasul o neak di. Jijai tobo'o belek, lajau melei namen hal o ngen mahkamah. 23“Pado waktau keme sapei neak sel.” Nadeak tobo'o ngen mahkamah, “Keme kemliak bang sel o tekucai, ngen pengawal-pengawal gidong bejago neak bang. Tapi waktau keme mukok bang o, keme coa temau suang tun neak lem ne.” 24Waktau pemipin pengawal Bait Allah ngen imem-imem kepalo temi'uk laporan o, tobo'o reyeng ngen rasul-rasul o ngen saben ngen jano de bakea tejijai. 25Sesudo'o teko suang semanei mbin bito yo, “Ni'uk! Tun-tun de Tuan-tuan taen neak sel o uyo gidong ngajea tun dau neak Bait Allah!”

26Sesudo'o lalauba pengawal serto tun-tunne moi Bait Allah, lajau mok rasul-rasul o, tapi coa ngen kekerasan, kerno tobo'o saben, jibeak-jibeak tun dau meluk tobo'o ngen butau.

27Tobo'o mbin rasul-rasul o ngen madep tobo'o ngen mahkamah agamo. Lajau Imem Lai muloi temanye tobo'o. 28#Mat. 27:25 Nadeakne, “Keme sudo temgeak udi supayo jibeak ngajea tetang Tun o. Tapi uyo cubo kemliak jano de udi menea! Udi melei namen ajarannu o neak kota Yerusalem, udi malah lok temuduak bahwo kemeba de ijai sebab Tun o matei.”

29Petrus ngen rasul-rasul de luyenne jemawab, “Keme arus temotoa Allah, iso temotoa manusio. 30Yesus, de udi senalib, bi idup igai kunei mateine ngen Allah ninik puyang ite. 31Allah sudo melei ngen Si penan ngen kuaso de lekat awei Pemipin ngen Penyelamat; supayo bangso Israel nelei kesempatan utuk betobat kunei duso-dusone ngen dapet apun. 32Kemeba saksai-saksai tetang kutene o – keme ngen kulo Roh Sucai de nelei Allah ngen tun-tun de temotoa periteak-Ne.”

33Waktau anggota-anggota Mahkamah Agamo o temi'uk o, tobo'o mengiak nien, tobo'o sepakat utuk munuak rasul-rasul o. 34Tapi neak antaro anggota-anggota mahkamah o ade suang Farisi genne Gamaliel. Si gu'au agamo de kembiak kute tun hormat. Si je lajau meluak tun mbin moi luea rasul-rasul o tegoa. 35Sesudo'o si madeak ngen Mahkamah Agamo o, “Udi tun-tun Israel! Pekerba baik-baik tetang jano de bakea udi menea te'adep tun-tun yo. 36Sebab bel o perneak ade Teudas, de manggap diraine tun pacok, sehinggo kekiro pat otos tun temotoa si. Tapi si nunuak tun ngen kute penotoane ce'ei ngen nyep. 37Sesudo'o, pado waktau ade sensus, timboaba Yudas, tun kunei Galilea. Kerno pengaruhne, dau kulo tun de temotoane. Tapi si kulo matei ngen kute penotoa-penotoane ce'ei. 38Kerno o uku madeak ngen udi: Jibeakba betindak jejano te'adep tun-tun yo. Nunyau bae tobo'o. Sebab amen ajaran ngen gerakan tobo'o adeba kunei manusio, mako ajaran ngen gerakan o bakea nyep. 39Tapi amen do'o teko kunei Allah, mako udi-udi coa bakea dapet maleak tobo'o. Mukin bakea nyato bahwo udi-udi melawen Allah.”

Nasehat Gamaliel tenimo Mahkamah. 40Mako rasul-rasul o endeu, lajau nembas, sesudo'o, tobo'o mebebas. 41Rasul-rasul o teminggea Mahkamah Agamo ngen riang sebab Allah bi manggap tobo'o patut utuk dapet hino kerno Yesus. 42Ngen tiep bilai neak Umeak Tuhan ngen neak umeak-umeak tun, tobo'o bogoa ngajea ngen melei namen Bito Baik tetang Yesus bahwo Siba Rajo Penyelamat de jenanjai o.

Currently Selected:

KISAH RASUL-RASUL 5: REJ

Highlight

Copy