KISAH RASUL-RASUL 4

Petrus ngen Yohanes neak adep Mahkamah Agamo

1Waktau Petrus ngen Yohanes gidong miling ngen tun dau, imem-imem ngen kepalo pengawal Bait Allah serto tun-tun Saduki teko magea tobo'o. 2Tun-tun o kembiak mengiak sebab Petrus ngen Yohanes ngajea tun dau bahwo lem Yesus ade idup igai kunei antaro tun matei. 3Tobo'o tenakep ngen masuk moi lem sel sapei menne, kerno bilai bi kelemen. 4Tapi neak antaro tun de temi'uk ajaran o dau de jijai pecayo, sehinggo jumlah tobo'o kekiro lemo ribau tun semanei. 5Menne pemipin-pemipin Yahudi serto tetuai ngen gu'au-gu'au agamo sedang neak Yerusalem, 6ngen Imem Lai Hanas ngen Kayafas, Yohanes ngen Aleksander ngen kute tun luyen de temasuk royot Imem Lai. 7Lajau Petrus ngen Yohanes nadep moi sidang o ngen muloi nerikso ngen pertanyaan yo, “Ngen kuaso ipe jano lem gen api ko menea hal o?” 8Lajau Petrus, de penuak ngen Roh Sucai, jemawab tobo'o, “Hoi pemipin-pemipin umat ngen tuai-tuai. 9Amen keme uyo arus nerikso kerno plep baik ngen tun-tun bolon ngen arus melei namen ngen kuaso ipe tun o kena'en, 10udi kutene arus namen ngen kute bangso Israel kulo arus namen bahwo lem Yesus Kristus, tun Nazaret, de sudo udi semalib, tapi de sudo midup igai ngen Allah kunei antaro tun matei bahwo kerno Yesus o ba tun yo je lem keadaan ka'en uyo neak adep udi. 11#Mzm. 118:22 Yesus adeba,

‘Butau de nuang tukang-tukang bangunan – adeba udi suang –,

tapi Si bi jijai butau de utamo.’

12Coa ade keselamatan neak lem api bae kulo seluyen neak lem Si, sebab neak beak lenget yo coa ade gen luyen di nelei ngen manusio de kunei Yesus ite dapet selamat.”

13Anggota-anggota sidang pengadilan o selle kemliak kebinai Petrus ngen Yohanes, jano igai tobo'o namen bahwo keduai rasul o adeba tun-tun biaso de coa perneak sekula. Lajau tobo'o sadar bahwo keduai rasul o adeba tun-tun de milau ngen Yesus. 14Tapi tobo'o coa nam madeak jejano, sebab tun de sudo kena'en o ade je neak di neak adep tobo'o sesamo ngen Petrus ngen Yohanes. 15Mako tobo'o meluak keduai rasul o keluea kunei ruang sidang, sesudo'o tobo'o berunding. 16Tobo'o madeak, “Ite arus menea jano te'adep tun-tun yo? Sebab kute tun de tinggea neak Yerusalem bi namen bahwo mujizat de luea biaso yo, de nea ngen tobo'o beduai. Ite coa dapet muker o. 17Tapi supayo hal o jibeak tesebea lebiak luas igai neak antaro tun-tun, maro ite nacam tobo'o beduai bahwo tobo'o samo sekilai coa buliak igai miling ngen api bae ngen makei gen Yesus.”

18Mako tobo'o menok keduai rasul o masuk igai, ngen melei namen bahwo tobo'o debat bae coa buliak igai miling, ngajea igai lem gen Yesus.

19Tapi Petrus ngen Yohanes jemawab, “Pekerba suang jano de benea neak adep Allah: taat ngen periteak Tuan-tuan jano periteak Allah. 20Sebab keme coa nam bedan miling tetang jano de sudo keme kemliak ngen temi'uk suang.” 21Anggota-anggota sidang o coa dapet do alasan kulo utuk mukum Petrus ngen Yohanes. Tobo'o macam keduai rasul o, lajau melpas keduai ne, sebab kute tun mujai Allah kerno hal o. 22Sebab tun de kena'en ngen mujizat o sudo lebiak kunei pat puluak taun omorne.

Du'o jemaat

23Sesudo Petrus ngen Yohanes bi bebas, tobo'o lalau ngen kekuat tobo'o ngen cemrito kute de nadeak imem-imem kepalo ngen pemipin-pemipin Yahudi o ngen tobo'o. 24#Kel. 20:11; Neh. 9:6; Mzm. 146:6 Sesudo kekuat tobo'o temi'uk hal o, tobo'o sesamo bedu'o ngen Allah. Tobo'o madeak, “Tuhan, Ko ba de jemijai lenget ngen bumai, laut ngen kute isaine. 25#Mzm. 2:1-2 Ngen Roh-Nu Ko perneak miling liwet ninik puyang keme, Daud, adeba hambo-Nu; Ko madeak,

‘Getai tun-tun, de coa kemnal Tuhan, mengiak;

getai bangso-bangso menea rencano de coa ade guno?

26Rajo-rajo dunio siap utuk perang,

ngen tobo pemipin bekopoa

utuk melawen Tuhan ngen Rajo Penyelamat.’

27 # Mat. 27:1-2; Mrk. 15:1; Luk. 23:1, 7-11; Yoh. 18:28-29 Sebab Herodes ngen Pontius Pilatus bi menea pertemuan ngen tun-tun de coa kemnal Tuhan ngen tun-tun Israel neak kota yo. Tobo'o temau utuk melawen Yesus Hambo-Nu de sucai o, de sudo Ko maket jijai Rajo Penyelamat. 28Tobo'o jijai do utuk menea kute sesuaktau, de sudo Ko temtau lebiak dute bahwo do'o bakea tejijai. Ngen Ko temtau do'o das kuaso ngen kelok-Nu suang. 29Uyo, Tuhan kemliakba awei ipe tobo'o macam keme. Ngen nizinba keme, hambo-hambo-Nu yo, semiar bito-Nu ngen coa saben. 30Nuluakba tangen-Nu utuk kema'en tun, ngen nadeba tando-tando ngen mujizat-mujizat lem gen Yesus, Hambo-Nu de sucai.”

31Sesudo tobo'o selsei bedu'o, penan tobo'o bekopoa o unyak. Tobo'o kutene kenuaso Roh Sucai, ngen muloi miling ngen binai nien tetang bito kunei Allah.

Ca'o idup jemaat

32 # Kis. 2:44-45 Kute tun de pecayo o idup do atei ngen do jiwo. Coa suang kulo kunei tobo'o manggap bahwo de temuanne adeba temuanne suang. Kute de ade ngen tobo'o, tobo'o makei sesamo. 33Ngen kuaso de lai, rasul-rasul o melei saksai bahwo Yesus sudo idup igai. Mako Allah kembiak memberkati tobo'o. 34Ngen coa ade suang kulo kunei antaro tobo'o de coa temuan jejano sebab tun de temuan taneak jano umeak, jemuane tobo'o mbin cacine 35ngen semreak ngen rasul-rasul. Sesudo'o caci o nagiak ngen tiep tun de perlune.

36Awei o kulo ngen Yusuf, rasul-rasul madeak si Barnabas, taine anok penghibur, suang Lewi kunei Siprus. 37Si jemua kebun, lajau mbin caci o ngen mpekne neak adep kekea rasul-rasul.

Currently Selected:

KISAH RASUL-RASUL 4: REJ

Highlight

Copy