KISAH RASUL-RASUL 13

Barnabas ngen Saulus nutus

1Pado waktau'o lem jemaat neak Antiokhia ade kekedau nebai ngen pengajea, adeba: Barnabas ngen Simeon de senbut Niger, ngen Lukius tun Kirene, ngen Menahem de nasuh besamo ngen rajo Wilayah Herodes, ngen Saulus. 2Pado suaktau bilai waktau tobo'o semyang ngen puaso, madeakba Roh Sucai, “Miliakba Barnabas ngen Saulus khusus utuk-Ku utuk tugas de sudo Uku tentau utuk tobo'o.”

3Lajau tobo'o puaso ngen bedu'o, sesudo mpek tangen moi das duai tun'o, tobo'o munyau keduaine lalau.

Saulus ngen Barnabas neak puleu Siprus

4Kerno nelueak Roh Sucai, Barnabas ngen Saulus berakat moi Seleukia, kunei di tobo'o belayea moi puleu Siprus. 5Sapeine neak Salamis tobo'o melei namen Firman Allah neak lem umeak-umeak semyang tun Yahudi. Yohanes ngen Markus semerto tobo'o sebagei pembantu tobo'o.

6Tobo'o kemliling kute puleu'o sapei moi Pafos. Neak di tobo'o temau ngen suang tun Yahudi genne Bar Yesus. Si suang tun tukang sihir ngen nebai palsu. 7Si adeba kuat gubernur pulau'o, Sergius Paulus, suang tun de cerdas. Gubernur'o menok Barnabas ngen Saulus, kerno si lok temi'uk firman Allah. 8Tapi Elimas, tukang sihir'o awei yo ba tai genne malang tobo'o ngen berusaho supayo gubernur'o jibeak sapei pecayo ngen Yesus. 9Tapi Saulus, de senbut kulo Paulus, de penuak ngen Roh Sucai, kemliak si, 10Paulus madeak, “Hoi anok Iblis, ko penuak ngen memecem tipu muslihat ngen kejahatan, ko musuak kute kebenea, ko coa bakea bedan musak ajaran Yesus de lu'us'o? 11Uyo, keliakba, tangen Tuhan teko mukum ko, ko jijai sutai, kekedau an'ne ko coa dapet kemliak matai bilai.”

Seketiko'o kulo si meding ade kabut de meleu temutup mataine, sehinggo si paneu mabo mesoa tun utuk mapeak ne. 12Waktau gubernur'o kemliak jano de sudo tejijai, si pecayo ngen Yesus; kerno si kebiak kagum ngen ajaran tetang Tuhan.

Neak Antiokhia, Pisidia

13Lajau Paulus ngen kekuatteminggea Pafos, belayea moi Perga neak Pamfilia; tapi Yohanes teminggea tobo'o lajau belek moi Yerusalem. 14Kunei Perga tobo'o temrus pemaneu ne, lajau sapei neak Antiokhia neak Pisidia. Pado bilai Sabat tobo'o lalau moi umeak semyang, lajau temot neak di. 15Sesudo Bukau Musa ngen Bukau Nebai-nebai m'baco pemipin-pemipin umeak semyang'o meluak tun betanye ngen Paulus ngen kekuatne, “Pasuak-pasuak, amen ade neak antaro udi temuan pesen utuk tun yo, senapei ba!” 16Lajau je ba Paulus. Si melei isyarat ngen tangenne, lajau madeak,

“Hoi tun-tun Israel ngen udi de saben ngen Allah, teni'uk ba! 17#Kel. 1:7, 12:51 Allah umat Israel yo bi miliak ninik puyang te ngen menea umat'o jijai lai, waktau tobo'o tinggea neak Mesir sebagei tun asing. Ngen kuaso de lai Allah mbin tobo'o keluea kunei Mesir. 18#Ul. 1:31 Pat puluak taun keaansi bersabar teadep plep tobo'o neak benei libea. 19#Ul. 7:1 Sesudo melenyep tujuak bangso neak taneak Kanaan, si magiak taneak'o ngen tobo'o utuk jijai warisan tobo'o. 20#Hak. 2:16; 1Sam. 3:20 Selamo kekiro pat otos lemo puluak taun. Sesudo'o si melei tobo'o hakim-hakim sapei pado zaman Nebai Samuel. 21#1Sam. 10:17-21 Sesudo'o tobo'o minoi suang rajo ngen Allah melei ngen tobo'o Saul anok Kish kunei sukau Benyamin, pat puluak taun an ne. 22#1Sam. 13:14; Mzm. 89:21 Sesudo Saul senikia, Allah maket Daud jijai rajo tobo'o. Tetang Daud Allah bi saksai, ‘Uku bi dapet Daud anok Isai, suang tun de semnang atei-Ku, de menea kute kelok-Ku.’ 23Sesuoi ngen de sudo jenanjai-Ne, kunei royotneba Allah bi semdio Juruslamat bagiak tun Israel, adeba Yesus. 24#Luk. 3:3 Ayok Yesus teko Yohanes bi melei peringatan baptisan tobat ngen kute bangso Israel. 25#Yoh. 1:20, 27 Waktau Yohanes ayok selesei kemerjo tugasne, si madeak, ‘Sakonu uku yo api? Uku iso Si. Sesungguakne Si bakea teko sesudo uku. Mukok tilai sepatu-Ne bae uku coa patas.’

26Hoi Pasuak-pasuak ku, udi de termasuk royot Abraham ngen udi kulo de saben ngen Allah, bito keselamatan'o sudo senapei ngen ite. 27Penduduk Yerusalem nge pemipin-pemipinne coa lok ngakau Yesus. Ngen melei hukuman matei das Si, tobo'o gemnep kecek nebai-nebai de mbaco tiep bilai Sabat. 28#Mat. 27:22-23; Mrk. 15:13-14; Luk. 23:21-23; Yoh. 19:15 Kunyau tobo'o coa temau sesuaktau de dapet jijai alasan utuk hukuman matei'o, tapi tobo'o bi minoi ngen Pilatus supayo Si nunuak. 29#Mat. 27:57-61; Mrk. 15:42-47; Luk. 23:50-56; Yoh. 19:38-42 Sesudo tobo'o gemnep kutene de tetulis tetang Si, tobo'o temuun Si kunei kieu salib, lajau gemulek-Ne neak lem kubua. 30Tapi Allah midup igai Si kunei antaro tun matei. 31#Kis. 1:3 Selamo kekedau waktau Si kemten dirai ngen tobo'o de motoa Si kunei Galilea moi Yerusalem. Tobo'oba de uyo jijai saksai-saksai-Ne utuk umat yo. 32Keme uyo melei Bito Baik ngen udi: Bahwo janjai de nelei ngen ninik puyang te, 33#Mzm. 2:7 bi nea Allah ngen ite, royot tobo'o, ngen midup igai Yesus. Awei de tetulis lem Mazmur keduai,

‘Ko ba Anok-Ku!

Uku bi jijai Bapa-Nu pado bilai yo.’

34 # Yes. 55:3 Allah bi midup Si kunei antaro tun matei. Si coa bakea senreak igai ngen kebinasaan. Awei de sudo nadeak-Ne,

‘Uku bakea melei ngen ko janjai-janjai sucai de dapet pecayo,

de sudo Uku melei ngen Daud.’

35 # Mzm. 16:10 Kerno'o si madeak kulo lem Mazmur de luyen,

‘Ko coa bakea munyau Tun Sucai-Nu kemliak kebinasaan.’

36Kerno Daud menea kelok Allah pado zamanne, lajau si matei ngen genulek neak depeak ninik puyangne, si memang senreak ngen kebinasaan. 37Tapi Yesus, de nidup Allah, coa meding kebinasaan. 38Jijai, namen ba, Pasuak-pasuak, kerno Siba mako nelei namen ngen udi pengapunan duso. Ngen hukum Musa udi coa dapet mbenea dirai. 39Dong neak lem Si tiep tun de pecayo jijai benea. 40Kerno'o, teatei ba, kunyau jibeak belakau das udi jano de sudo nadeak lem kiteb nebai-nebai:

41 # Hab. 1:5 ‘Kemliak baik-baik, hoi udi tun-tun de galok mino!

Seleba ngen mateiba!

Kerno Uku menea suaktau pekerjaan lem zaman nu,

suaktau pekerjaaan, de coa bakea udi pecayo,

amen cenrito ngen udi.’ ”

42Waktau Paulus ngen Barnabas keluea, tobo'o ninoi utuk miling igai tetang hal-hal'o pado bilai Sabat berikutne. 43Sesudo selesei semyang, dau tun Yahudi ngen penganut-penganut agamo Yahudi de saben ngen Allah, temotoa Paulus ngen Barnabas; keduai rasul'o majea tobo'o ngen melei nasihat supayo tobo'o tep idup neak lem anugrah Allah.

44Pado bilai Sabat berikutne tekoba hampir kute kota'o bekopoa utuk temi'uk firman Tuhan. 45Tapi waktau tun Yahudi kemliak tun dau'o, penuakba tobo'o ngen kidek atei samo mino, tobo'o bateak jano de nadeak Paulus. 46Tapi ngen lebiak binai Paulus ngen Barnabas madeak, “Memang ngen udiba firman Allah harus nelei namen lebiak dute, tapi udi temulokne ngen manggep dirainu coa patas utuk dapet idup de kekal. Kerno'o keme moi ngen bangso-bangso luyen. 47#Yes. 49:6 Sebab dioba de neriteak Tuhan ngen keme,

‘Uku bi temtau ko ijai te'ang utuk bangso-bangso luyen,

supayo ko mbin keselamatan sapei moi ujung bumi.’ ”

48Temi'uk'o riangba kute tun kunei bangso-bangso luyen, tobo'o memuliakan firman Tuhan; kute tun de tentau Allah utuk idup de kekal, jijai pecayo.

49Lajau firman Tuhan senbea moi kute daerah'o. 50Tapi tun-tun Yahudi mengasut seslawei kunei golongan tun-tun lekat de saben ngen Allah ngen pejabat-pejabat neak kota'o. Tobo'o menea penganiayaan das Paulus ngen Barnabas, musir tobo'o kunei daerah'o. 51#Mat. 10:14 Tapi, Paulus ngen Barnabas muang debu kunei kekea tobo'o sebagoi peringatan utuk tun-tun'o, lajau lalau moi Ikonium. 52Tun-tun neak Antiokhia tep penuak ngen keriang ngen Roh Sucai.

Currently Selected:

KISAH RASUL-RASUL 13: REJ

Highlight

Copy