KISAH RASUL-RASUL 12
12
Sikso betambeak
1Kekiro pado waktau'o Rajo Herodes muloi betindak te'adep kekedau tun kunei jemaat. 2Si meluak munuak Yakobus, pasuak Yohanes, ngen pedang. 3Waktau si kemliak bahwo hal'o semnang atei tun Yahudi, sesudo'o si meluak temaen Petrus kulo. Waktau'o Bilai Rayo Ruti Coa Beagai. 4#Kel. 12:1-27 Sesudo Petrus tenakep, Herodes meluak nasuk moi lem sel ngen jenago pat regu, masing-masing pat prajurit. Maksudne adeba, kunyau sesudo Paskah si nembin moi adep tun dau. 5Awei yo ba Petrus tenaen neak lem sel. Tapi jemaat tekun de mu'one ngen Allah.
Petrus mbebas kunei sel
6Pado kelmen ayok Herodes lok mbinne ngen tun dau, Petrus tidua neak antaro duai tun prajurit, neket ngen duai ratoi, dong neak adep bang, tobo pengawal dong jago sel'o. 7Tetibo je ba suang malaikat Tuhan pa'ok Petrus ngen cahayo besinea lem bilik sel'o. Malaikat'o minggut Petrus, nadeakne, “Kelongonba!” Lajau putusba ratoi'o kunei tangen Petrus. 8Sesudo'o malaikat'o madeak ngen si, “Neketba pinggangnu ngen nakeiba sepatunu!” Si kulo menea awei'o. Sesudo'o, malaikat'o madeak ngen si, “Nakeiba jubahnu, totoaba uku!” 9Lajau si motoa malaikat'o keluea, si coa namen bahwo jano de nea malaikat'o benea-benea tejijai, sakone si kemliak sewaktau pengeliak. 10Sesudo tobo'o liwet penan jago de pertamo ngen penan jago keduai, sapeiba tobo'o moi muko bang besai de menuju moi kota. Bang'o tukok suang utuk tobo'o. Sesudo sapei neak luea, tobo'o paneu sapei moi ujung dalen, tetibo malaikat'o teminggea si.
11Sesudo sadar, Petrus madeak, “Uyo namenba uku benea-benea bahwo Tuhan bi meluak malaikat-Ne ngen semlamat uku kunei tangen Herodes, kunei kute sesuatau de naep tun Yahudi.”
12Sesudo bepeker tegoa, lalauba si moi umeak Maria, indok Yohanes de senbut kulo Markus. Neak di dau tun bekopoa ngen beduo. 13Waktau si kemtuk bang, tekoba suang pelayan selawei genne Rode utuk namen api de kemtuk bang'o. 14Si lajau kemnal sa'ei Petrus, tapi kerno riangne, si coa mukok bang'o ngen segro masuk moi lem utuk melei namen bahwo Petrus ade neak adep bang. 15Tobo'o madeak ngen selawei'o, “Ko mipai.” Tapi si tep madeak bahwo benea-benea awei yo. Nadeak tobo'o, “Do'o malaikatne.”
16Sementaro'o Petrus bogoa kemtuk bang'to, waktau tobo'o mukok bang ngen kemliak si, tobo'o te'cengang. 17Tapi Petrus melei isyarat ngen tangenne, supayo tobo'o diem, lajau si cemrito awei ipe Tuhan mbinmoi luea kunei sel. Nadeakne, “Melei namenba hal yo ngen Yakobus ngen pasuak-pasuak te.” Lajau si keluea, lalau moi penan luyen.
18Menne tejijaiba sutok neak antaro tentra pengawal. Tobo'o betanye-tanye jano de sudo tejijai ngen Petrus. 19Herodes meluak mesoa Petrus, tapi tobo'o coa temau Petrus.
Lajau Herodes meluak merikso pengawal-pengawal'o ngen munuak tobo'o. Sudo'o si berakat kunei Yudea moi Kaisarea ngen tingea neak di.
Herodes matei
20Herodes kebiak mengiak teadep tun Tirus ngen Sidon. Das sepakat besamo tobo'o lalau madep si. Tobo'o berasea mbujuk Blastus, tukang murus umeak tanggo rajo, moi pihok tobo'o, lajau tobo'o minoi damoi, kerno negrai tobo'o dapet bahan kembuk kunei wilayah rajo.
21Pado suaktau bilai de tentau, Herodes makei keracok kerajaan, lajau temot neak das takhta ngen pidato ngen tobo'o. 22Laju rakyatne senu'ok males ne, “Dio sa'ei diwo, iso sa'ei manusio!” 23Seketiko'o kulo si tenpok malaikat Tuhan kerno si coa melei hormat ngen Allah; si matei nembuk gelong-gelong.
24Sementaro'o firman Allah tambeak tesebea ngen tambeak dau teniuk tun.
25Barnabas ngen Saulus belek kunei Yerusalem, sesudo tobo'o semlesai tugas pelayanan tobo'o. Tobo'o mbin Yohanes, de senbut kulo Markus.
Currently Selected:
KISAH RASUL-RASUL 12: REJ
Highlight
Share
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
