MARIKO 4

Lugano lwu Mumizi

(Mat. 13:1-9; Luk. 8:4-8)

1Yeso yaatanga kwigiza naveeye ku lujinga lwinyanza ya Galilaya. Ikiduma kenene cha vandu cha mukumbiriza kuduuka ni gamuniga kwingira mu liato; ni yikala mu. Liato liali munyanza ni kiduma choosi chasingira ku lujinga. 2Yaviigiza ivindu vinyingi mu zing'ano, navavoolera:

3“Huliri! Umumizi yatura nazia kumiza uvuguza vwivwe. 4Lwa yaali namiiza, vulala vwagwa kunzira, na amanyonyi gaaza ni gavovoza. 5Uvundi vwagwa ku magina ahatali na marova manyingi. Uvuguza yivwo vwamera vwangu kigira amarova gaali ho makekeeke. 6Lwi iliuva liatonga vwaniala; kigira imiri javwo si jaali ni zinguru, vwuma. 7Uvundi vwagwa mu mafa, na amafa gaviruka, ni gavumiina, ma ni vuvura kwama. 8Uvundi vwagwa mu marova magunamu vwa viruka ni vwama. Vulala vwaleeta amakomi gavaga, uvundi amakomi sita, na uvundi mia.”

9Maku Yeso yamaliriza kovora, “Ka huliri ligali, niiva muveeye na matu.”

Kivuni cho komoloma mu zing'ano

(Mat. 13:10-17; Luk. 8:9-10)

10Lwa Yeso yaali naveeye yenyine, avalala ku yavo avaari vamali kumuhuliriza vazia kuye harara na aviigi likomi na vaviri nivamuteeva ikivuni chu lugano yilwo. 11Naye yavativulira, “Munyi muheveywi kumanya agimbisu yu vwami vwa Nyasaye, navuzwa avandi vosi avaveeye ichova valavolerwa ikindu choosi mu zing'ano, 12Kunangwa,

‘Lihenza valahenza ligali,

navuzwa si valalola mba

lihulira valahulira ligali,

navuzwa si valamanya mba.

Kigira niiva vakakoli ndio,

vaali vakagirungani ukwilanira Nyasaye,

kandi naye yakavasamiihi uvwoni vwavo.’ ”

Yeso yiivara lugano lwu mumizi

(Mat. 13:18-23; Luk. 8:11-15)

13Ahene yaho Yeso yavateva, “Niiva si mu manyi ulugano yilu, mwakamanya ndi izing'ano zindi ziosi? 14Umumizi amiizaa ilikuva lia Nyasaye. 15Avandu valala vaveeye kuli uvuguza vugwizaa kunzira; lwa vahuliraa, Setani yaazaa vwangu mavanyaga ilikuva limali kumiizwa muvo. 16Avandu vandi vaveeye kuli uvuguza vugwizaa kulwanda. Lwa vahulira ilikuva valivugula vwangu nu vuyanzi vonene. 17Navuzwa silivingiraa nu kuhila imiri muvo mba. Navo vidinyirizaa mu Iikuva zana hakekeke vuzwa. Na ing'inga valora ikivi anoho ilidambizwa kigira likuva lia Nyasaye, nonoho ilisuuvira liavo likuzaa. 18Avandi vaveeye kuli uvuguza vugwizaa muvulimu vwa mafa. Yava nivo avahulira ilikuva, 19navuzwa uvunyang'ani vwi lirova yili, iliegomba liu vutugi, harara ni liegomba lie vindu vindi viosi vingira muye mavikunika likuva zana; na kigira yaga goosi ilikuva zana silinyala kwama amakuyu mba. 20Navuzwa avandu vandi vaveeye kuli uvuguza vugwizaa mu marova magunamu. Vahuliraa ilikuva, valivugilira, kandi vaama amakuyu: avalala salasini, avandi sitini, na avandi mia.”

Itaya mu kihinda

(Luk. 8:16-18)

21Yeso yaazizagilira kuvavoolera, “Aveeye ho mundu uvugura itaya ma agikunikira mu kihinda anoho agiviikaa mu lwaalo lwi kidali? Si amanyaa agiviikaa yigulu komesa? 22Ichaaviswa choosi kilakaloleke ichova havulavu kandi yicho ichakunikirwa kilakakunurwi. 23Umundu oveeye na matu gukuhulira, ahuliri!”

24Yeso yavavolera kandi, “Mutegize amatu ku goosi aga muhulira! Amalago ga mutumikiraa kukalagira avandu vandi, nigo aga Nyasaye atumikiraa kumukalagira nu vutima vonene kuvita ligali. 25Umundu oveeye ni kindu alamedwa, na utaveeye ni kindu alanyagwa kali ikikuzuzu chaveeye nacho.”

Ulugano lwu vuguza vuvirukaa

26Yeso yaazizagilira kovora, “Uvwami vwa Nyasaye voveeye kuli umundu umiizaa uvuguza mu mulimi. 27Agona vudiku kandi avukaa mbasu, nu uvuguza navwo ni vomera kandi kuviruka. Navuzwa oyo siamanya kuli vuvirukaa mba. 28Lirova liene livirukizaa ivitaagwa kandi lilomba amakuyu kwama; kutanga komera, kuviruka, lwu kumaliriza, kwama vuswage. 29Na lwu vuswage vokomeraa, umundu oyo avugulaa muvano atangaa kogesa, kigira ing'inga yi ligesa iduuki.”

Lugano lwu luguza lwi lisaazi

(Mat. 13:31-32,34; Luk. 13:18-19)

30Yeso yavoola, “Kufananyia naki Uvwami vwa Nyasaye? Kutumikira lugano ki kwivaala? 31Loveeye kuli luguza lwi lisaazi, oloveeye olokekeke kuvita uvuguza vwosi mu lirova. 32Navuzwa lwa lutagwa, lomeraa nukugwa kitagwa kenene ligali kuvita vitagwa viosi; lutulizaa zisia zinene kuduuka amanyonyi gigulu galuhaa gumbakaa hasi mu chiriri chagwo.”

33Yeso yavilwazira likuva lilie mu zing'ano zinyingi kuli yizi; yavavolera kuduuka nivahulira. 34Siyavavoolera ikindu choosi vugira kutumikira izing'ano mba, navuzwa lwa yaali na aviigi veve venyine, yaali anyala kuvivaalira vuli kindu choosi.

Yeso yakiring'anyia iviguvuli

(Mat. 8:23-27; Luk. 8:22-25)

35Lwa gwaduuka mugolova ku lidiku liene yilio Yeso yavolera aviigi veve, “Gendi kwambuki kuzie ku lwangereka lundi.” 36Kunangwa valeka ikiduma cha avandu; aviigi veve vanina mu liato lia Yeso yaali niyikaye mu. Amato gandi gaali ho kandi. 37Kihuzuzi kenene chahuuza kandi iviguvuli ni vikuya ku liato, ma nilitanga kwizura amazi. 38Yeso mwene yaali inyima mu liato naagonaa naviiki mutwi ku ipilo. Aviigi veve vaamuvukiza ni vamuvolera, “Mwigizi, ivi siohendaa ndi koveeye ahimbi kudiva?”

39Yeso yavuka naagondokera imbuza, navoora “Kiring'ana! Lengela!” Imbuza yalekera, na gwaali umulengera munene. 40Yeso yateeva aviigi veve “Kigira ki mutiizaa? Si muveeye ni lisuuvira?”

41Maku vaatia ligali ni vateevana, “Uyu nivwaha? Kali imbuza ni viguvuli vimuhulira!”

Currently Selected:

MARIKO 4: LOGOOLI

Highlight

Copy