MARIKO 3

Yeso yahonyia mundu wu mukono gwang'era

(Mat. 12:9-14; Luk. 6:6-11)

1Maku Yeso yingira kandi mu lisinagogi, umundu yaali mu uwaali ni yaang'era umukono. 2Avandu valala vaali mu avenya kwihambihiza Yeso vamunyoole nuvudamanu. Vahenza valore niiva Yeso yaali anyala kohonyia umundu oyo ku lidiku lie Lisabato. 3Yeso yavolera umundu waali niyang'era mukono, “Hamba usingiri imbiri yinu.” 4Maku Yeso yateeva avandu, “Amalago giitu gakuvugiliraa kokole ki ku lidiku lie Lisabato? Gaduukanaa kokonye anoho kusalirizi? Kohonyie ilivamwoyo liu mundu anoho kulidivizi?”

Navuzwa vakiring'ana. 5Yeso yavahenza zimbega ziosi navihilirwa, kandi navavererera kigira uvudinyu vwi mioyo jaavo. Yavolera umundu oyo, “Nyira mukono gugwo!” Naye yanyira umukono gwigwe, nagwo gwahona ligali. 6Kunangwa, Avafarisayo vaatura ichova, nonoho, vavolerana harara na vandu avumuganda gwa Herodi valohizi kuli vaali vanyara kwita Yeso.

Ikiduma ahimbi na Inyanza

7Yeso harara na aviigi veve vaatura ahene yaho nivazia ku lujinga lwinyanza ya Galilaya. Kiduma kenene cha vandu chamulonda kutura Galilaya, Ivuyuda, 8Jerusalemi, Idumea, ni Ivugwi wu Mugera gwa Jorodani kandi kutura Tiro na Sidoni. Avandu yavo vaali kiduma kenene ligali. Vazia ku Yeso kigira vaali ni vaahuliyi ivindu vinyingi via yakola. 9Yeso yavolera aviigi veve vamwetegekiziri iliato, gase ikiduma kilamumiina. 10Yaali niyakohonyia avandu avanyingi. Avalwaye vosi vamiinana nivenya kuzia vaduuki ahimbi kuye vamudiiri. 11Lwa avandu avaari na mademoni vamulola, vaagwa hasi mam'mama imbiri weve ni vakuba lukwiri, “Ivi oveeye Mwana wa Nyasaye!”

12Yeso yagaya amademoni vululu gavuli kumuvura.

Yeso yatovola avatumwa likomi na vaviri

(Mat. 10:1-4; Luk. 6:12-16)

13Yeso yazia mu kiguru, nalaanga vosi ava yenya vaze kuye. Vaza kuye, 14yatovola avandu likomi na vaviri avayalanga “Avatumwa.” Yavavolera, “Mali kotovola munyi muve harara nainzi. Nandumi munyi kandi muzie ichova kwilwaza, 15kandi mulava nuvunyari kukuunga amademoni.”

16Yava nivo likomi na vaviri avayatovola: Simoni uwa Yeso yagulika Petero, 17Yakobo na Yohana, avayaayi va Zebedayo Yeso yavagulika Boanerige, iliveeye kovora, “Avasaza vi Inguba” 18Andereya, Filipo, Baturumayo, Matayo, Tomasi, Yakobo muyaayi wa Alufayo, Tadayo, Simoni Mukanani#3:18 Henza Matayo 10:4., 19na Yuda Esikarioti, uwazaama Yeso.

Yeso na Belizebuli

(Mat. 12:22-32; Luk. 11:14-23; 12:10)

20Lwi nyima Yeso yazia yengo. Ikiduma ekenene chivungizana kali Yeso na vigi veve nivadaka uvwiyangu vwu kulia ichukulia. 21Lwa avinyumba yeeye vahulira, vazia kumugumira kigira avandu vaali ni vavoola, “Yaali kulaluka.”

22Avigizi valala vi Lilaga avaari nivatuli Jerusalemi vavoola, “Aveeye na Belizebuli muye! Belizebuli uyu niyie umunene wa mademoni umuhezaa zinguru kugakuunga.”

23Kunangwa Yeso yavalanga navavoolera mu Zing'ano, “Setani anyala ndi kukuunga Setani? 24Niiva uvwami vwi kivala vulavukana uvwene, uvwami yivwo si vunyala kusingira mba. 25Niiva vandu vinyumba valavukana mu vidieli ivielwaanaa iviene ku viene, inyumba yeyo si inyala kuhindira mba. 26Kulwayago niiva uvwami vwa Setani vunyala kwavukana mu vidieli viukwilwaana iviene ku viene, si vunyala kuhindira mba, navuzwa vulavunikana nu kumalirika.

27“Sihaveeye nu mundu unyala kwingilira inyumba yu mundu wi zinguru ma amunyage imiandu jije vugira kovoha wi zinguru oyo kutanga, maku amunyage imiandu jije zana.

28“Ligali, ligali inzi muvooleraa, avandu vanyara kusamiifwa uvwoni vwavo vwosi harara na mahiolo gaavo goosi. 29Navuzwa uyu ulinyega Roho Mutakatifu sialisamiifwa kali hakuzu mba, kigira umali kokora uvwoni vwi mihiga ni mihiga.” 30Yeso yavoola yaga kigira avandu valala vaali ni vavooye, “Aveeye ni lidemoni muye.”

Mama wa Yeso na vamwavo veve

(Mat. 12:46-50; Luk. 8:19-21)

31Kunangwa Mama wa Yeso na vamwavo veve vaza nivasingira ichova, ni vatuma umundu amulange Yeso. 32Ikiduma cha vandu chaali ni chikaye kumukumbiriza. Vamuvolera, “Mama woovo na avamwavo vovo vaveeye ichova vakwenyaa.”

33Yeso yavavolera, “Mama wange na avamwavo vange ni vanga vwaha?” 34Yahenza avandu vaali ni vamukumbirizi navoora, “Heenzi! Yava nivo avaveeye mama wange na a vamwavo vange. 35Umundu woosi okolaa kuli Nyasaye yenya, oyo niyie amwavo wange, mbozo wange kandi mama wange.”

Currently Selected:

MARIKO 3: LOGOOLI

Highlight

Copy