MATAYO 27

Yeso Yahilwa imbiri wa Pilato ni Liesunga lia Yuda

(Mar. 15:1-5; Luk. 23:1-5; Yoh. 18:28-38)

1Lwa vwacha, avasaalisi vanene na vakulundu vaakora kiyaalo ku Yeso nivalomba zing'anagani kuli vanyara kumwita. 2Vaamuvoha ni minyororo, nivamwimiriza nu kumuhaana ku Pilato, uwaali mwamihi wa Varumi.

3Lwa Yuda, umuzaami yalora ndi Yeso umali kukalagirwa, yiganira niyiranyia ku vasaalisi vanene na vakulundu iviali vidonye viefeza salasini. 4Yavavolera, “Mali kokora uvwoni ku kuzaama umundu utaveeye na mahiolo akuzi!”

Navuzwa vamuvolera, “Yago gaveeye ki ku kunyi? Agene yago nagoogo ivi umwene!”

5Yuda yalasa ividonye viefeza yivio mu Litembeli, natura ichova zimbiru, nazia kwisunga mwene.

6Avasaalisi vanene vaavugura ividonye viefeza yivio ni vavoola, “Nu mujiru kuviviika mu livikiru lie Litembeli kandi, kigira ziveeye mabese gikisaahi.” 7Nivakamara kuvugirizana, vaagura Umulimi gwu Mulongi na mabese yago, gove ahukuyavira avamenya. 8Yiki nicho kigira kali kuduuka lero umulimi yigwo gulangangwa “Mulimi gwi Kisaahi.”

9Kunangwa amakuva gu muporofeti Jeremia yaali ni yavoola gaagwa agiligali, “Vaavugura ividonye viefeza salasini, uvuguli vwa vandu va Isiraeli vavugirizana kumutungira, 10ma vatumikira mabese zana kugura Umulimi gwu Mulongi, kuli Mwami yaali ni yaandagi.”

Mwami wa Varumi Yumuteeva Yeso

(Mar. 15:2-5; Luk. 23:3-5; Yoh. 18:33-38)

11Yeso yaasingirizwa imbiri wu mwami, wa Varumi uwamuteeva, “Ivi niyie Mwami wa Vayuda?” Yeso yaamutivulira “Ivi ovooye.” 12Navuzwa siyaativula kindu ku ga vasaalisi vanene na vakulundu vaamugina mba.

13Maku Pilato yamuteeva, “Siuhulira ivindu viosi via vavoola ku ivi?”

14Navuzwa Yeso siyaamutivulira kindu mba kuduuka mwamihi nagenya ligali.

Yeso Yakalagirwa likuza

(Mar. 15:6-15; Luk. 23:13-25; Yoh. 18:39—19:16)

15Vuli ing'inga yoosi yi lilia lie Lipasaka mwami yaali nu mwima gwo kovoholora umuhambe mulala wa Vayuda vaatovora. 16Ing'inga yene yeyo yaali ho muhambe mulala uwamanyikana kulikola uvudamanu, uwalangwa Baraba. 17Lwa vandu vamala kuvugana harara, Pilato yavateva, “Mwenya muvohololere vwaha ku vaviri yava, Baraba anoho Yeso ulangwa Mesia?” 18Yavoola ndio kigira yamanya vamuyaara kigira embodoka.

19Lwa Pilato yaali niyikaye kondeve yi Likalaga, umukali weve yamuletera amakuva namuvolera “Utakola ikindu ku mundu mulungi uyu mba, kigira lero nyooye ilisalirizwa ilinyingi mu maloto kigira ye.”

20Navuzwa avasaalisi vanene na vakulundu vavoolera avandu vateeve Baraba avoholorwi, na Yeso yiitwi. 21Umwami Pilato yavateva, “Ni uliha ku vaviri yava wa mwenya mboholore?”

Vamuvolera, “Baraba!”

22Pilato yavateva, “Maku ngole ki ku Yeso ulangwa Mesia?”

Vosi vaamutivulira, “Muvambe!”

23Pilato yateeva, “Kigira ki? Akoli uvudamanu ki?”

Navo vaakira iliyoga, ni vahanzuka: “Avambwe!”

24Lwa Pilato yalora ndi sianyala kokora kindu, kandi iliyoga limeedeki, yavugula amazi niyisaava makono geege imbiri wi kiduma, navoora, “Inzi simbeeye nimbala ku likuza liu mundu mulungi uyu mba. Gaveeye ku munyi aveene.”

25Avandu vosi vavoola, “Amasahi geege gave ku kunyi, kandi ku vana viitu!”

26Hene yaho Pilato yaavoholora Baraba kutura mu vuhambe. Maku yalaga vasikari veve vakuyi Yeso, ma avambwe.

Avasikari vakolera Yeso kehenyahenye

(Mar. 15:16-20; Yoh. 19:2-3)

27Maku avasikari va Pilato vingiriza Yeso munyumba yu mwami na avasikari vosi vaamukumbiriza. 28Vaamutuliza izinguvu zizie, navamuviika inguvu inzakanyu. 29Maku vanava itaji ya mafwa, ni vamuvika ku mutwi gwigwe na, vamuviikira imbimbu mu mukono gwigwe umulungi, ma vasigama imbiri weve ni vamukolera ekehenyahenye. Vavoola, “Ahindiri Mwami wa Vayuda!” 30Vaamutuzira amate, nivavugura imbimbu nivamukuya nayo ku mutwi. 31Lwa vaali nivakamara kumukolera ekehenyahenye, vaamutuliza inguvu inzakanyu, ni virana kumuviika izinguvu zizie, ma nivazia ku muvaamba.

Yeso Yavambwa

(Mar. 15:21-32; Luk. 23:26-43; Yoh. 19:17-27)

32Lwa vaali ni vazizaa, vanyoola mundu mulala uwalangwa Simoni kutura Kurene. Vamuniga agingi umusalaba gwa Yeso. 33Lwa vaduuka havundu halangwa Gologoza, livoora lialio liveeye, “Ha kihaanga,” 34vamuha iwaini izuganyiwi ni kindu ikilulu, navuzwa lwa Yeso yaagizazama, yasura kuginwa.

35Lwa vaali nivakamuvamba, vagavulana izinguvu zizie mu likuba zikuura kuzio. 36Maku, viikara ni vamulinda hazana. 37Higulu hu umutwi gwigwe vang'oda ho agavamuyalira kuli ndi, “UYU NIYIE YESO, UMWAMI WA VAYUDA.” 38Aviivi vaviri vavambwa harara naye, mulala ku mukono mulungi, nu wundi ku mukono mumosi.

39Avandu vavita ahene yaho vaamunyega, nivasung'usa imitwi jaavo. 40Vavoola, “Ivi si wavoola ulasambula Litembeli ma uliumbake kandi ku madiku gavaga? Wehonyie umwene. Niiva oveeye Umwana wa Nyasaye yika kutura ku musalaba!”

41Avasaalisi vanene harara na avigizi vi Lilaga kandi avakulundu navo vamukolera ekehenyahenye nivavoora, 42“Yahonyia avandi, navuzwa sianyala kwehonyia umwene! Aveeye Mwami wa Isiraeli, kalunu niiva aliika kutura ku musalaba, kunyi kulamusuuvira. 43Yasuuvira Nyasaye navoora, aveeye Umwana weve; kalunu leki kolole niiva Nyasaye yenya kumuhonyia.”

44Kali aviivi vavambwa harara naye vaamunyega kuli ndio kandi.

Likuza lia Yeso

(Mar. 15:33-41; Luk. 23:44-49; Yoh. 19:28-30)

45Kutura zisa sita kuduuka zisa tisa zia mbasu, kisundi chakunika kivala choosi. 46Lwi ing'inga yaduuka ahimbi zisa tisa, Yeso yalira nu mwoyo munene, “Eli, Eli, lama sabakatani?” Livoora liago liveeye, “Nyasaye wange, Nyasaye wange, kigira ki ondeki?”

47Navuzwa valala kuvo avaari nivasingiyi ho lwa vahulira agene yago vavoola, “Alaangaa Elija.”

48Mulala kuvo yanyagura vwangu navugura isiponji ni yiina mu isiki#27:48 Isiki: Likuva liu Luswahili liveeye kovora iwaini endoto, anoho kinwevwa choosi chi zisalulwa ziveeye mu. Avasikari va Varumi vaali nivayaanza., nagiviika ku lusaala, naamunwehiza.

49Vandi vavoola, “Leka kolole niiva Elija alaza kumuhonyia.”#27:49 Vitabu bindi vimeedaa ku mulala ku vasikari yavugula ilitimu naamutumita mu zimbalu, na amasahi na mazi gaturaa mu.

50Yeso yalira vudinyu, ma naalakula mwoyo gwigwe.

51Hene yaho, inguvu yi Litembeli yatanduka mu hagati kutura yigulu kuduuka hasi. Lirova liadegera, amagina ni gadika, 52ivilindwa viakunuka kandi, na avatakatifu vanyingi avaari ni vaakuza kale vasimugukizwa. 53Inyima wi lisimuguka lia Yeso, vatakatifu vatuli mu vilindwa, ni vingira mu Lidaala Litakatifu, nivaloreka ku vandu avanyingi.

54Lwu munene wa vasikari, harara na vasikari avalindaa Yeso valora ilidegera lie lirova ni vindu viosi viekoleka, vaatia ligali ni vavoola, “Ligali umundu uyu yaali Umwana wa Nyasaye.”

55Ahene yaho vaali ho avakali avanyingi avahenzeraa ihale, vaali avalondi Yeso kutura Galilaya nivamukonya. 56Kuvo vaali Maria Magadalena, Maria mama wa Yakobo na Josefu, kandi umukali wa Zebedayo.

Liyavirwa lia Yeso

(Mar. 15:42-47; Luk. 23:50-56; Yoh. 19:38-42)

57Lwa gwaduuka mugolova, mutugi mulala kutura Arimazia, yaduuka; lieta lilie liali Josefu, ma kandi yaali umwigi wa Yeso. 58Yazia ku Pilato naasava ahevwe umuviri gwa Yeso. Pilato yaavugilira. 59Kunangwa Josefu yavugula umuviri yigwo, nagulingira musuuka imbia kandi indahi, 60naguviika mu kilindwa chiche kihia cha yaali navaazi mu lwanda ludinyu. Maku yagomagominya iligina ilinene nakunika ha vwingiliru vwi kilindwa ma nazia. 61Maria Magadalena na Maria wundi vaali ho, ni viikaye ni vahenzi kilindwa.

Mulindi wi kilindwa

62Lwa vwacha, ku lidiku lie Lisabato avasaalisi vanene na Vafarisayo vazia kuvugana wa Pilato 63ni vavoola, “Mwami, kwizulizaa umugadi ula yavoola nakikiri kukuza, ‘Inyima wa madiku gavaga ndasimuguka.’ 64Kulwayago tuliza lilago ikilindwa kisingilirwi kuduuka ilidiku lia kavaga gase aviigi veve valaza kumwiva ma vavoolere avandu ndi yaakusimuguka kutura mu vakuzu. Uvugadi vwi nyima yivu vulava uvudamanu ligali kuvita vwu kutanga.”

65Pilato yavavolera, “Muveeye na avasikari vinyu. Muzie kukilinda kuli munyala.”

66Kunangwa vazia ni vasingilira ikilindwa ni vaviika umuhuri ku ligina, no koleka ho avasikari va lindi.

Currently Selected:

MATAYO 27: LOGOOLI

Highlight

Copy