MATAYO 26

Lilohiza mu vwivisu ukwita Yeso

(Mar. 14:1-2; Luk. 22:1-2; Yoh. 11:45-53)

1Lwa Yeso yamala kovora amakuva yaga goosi, yavolera aviigi veve, 2“Mumanye ndi inyima wa madiku gaviri kulava ni lilia lie Lipasaka, kandi Umwana wa Adamu alahaanwa mu makono ga vasigu veve, avambwe.”

3Maku avasaalisi vanene navakulundu vavugana harara ha mugizi gwinyumba yu Musaalisi Munene uwalangwa Kayafa, 4kandi vosi valohiza mu vosivisu kuli vagumira Yeso mu vwivisu, vaduuki kumwita. 5Navuzwa vavoola, “Itava ing'inga yi lilia lie Lipasaka mba, kigira avandu valakola liyoga.”

Mukali yavaka Yeso amaguta ha Bezani

(Mar. 14:3-9; Yoh. 12:1-8)

6Lwa Yeso yaali ha Bezani munyumba ya Simoni, uwaali niyalwala ovogere, 7Mukali mulala yaza ku Yeso ni juba ya maguta gafunyaa umwayu agu vuguli vonene ligali. Yaagitulura ku mutwi gwigwe lwa yaali nalizaa. 8Lwa aviigi veve valora yaga, vavihilirwa ligali, ni vavoola, “Kigira ki amaguta yaga gonekaa vuzwa? 9Amaguta gu mwayu yaga gaali ganyala kugulizwa mabese gigulu ma vahane ku avadaka.”

10Yeso yamanya zing'anagani ziavo, navavoolera, “Kigira ki mukubizaa mukali uyu kivi? Oyo ongoleeye ikindu ikilahi ligali. 11Munyi mulava na vadaka vuli kazozo, navuzwa simulava ninzi amadiku goosi mba. 12Mukali uyu unzituluriyi amaguta ukwetegekiza liyavirwa liange. 13Agiligali muvooleraa, hoosi mu lirova, aha Ivangeri yiyi ilakilwazwe, ekekolwa chu mukali uyu akoli, kilakatalwi kumwizuliza.”

Yuda avugiliraa kuzaama Yeso

(Mar. 14:10-11; Luk. 22:3-6)

14Maku mulala ku aviigi likomi na vaviri uwalangwa Yuda Esikarioti yazia ku avasaalisi vanene, 15navateeva, “Mulaamba ki ninzaama Yeso ku munyi?” Vaamuvalizira ividonye salasini viefeza ni vamuha. 16Kutura ing'inga yeyo, Yuda yenyeleriza inzira ni ing'inga indahi yu kuhaana Yeso kuvo.

Yeso Yalohiza kulia Lipasaka na aviigi veve

(Mar. 14:12-21; Luk. 22:7-13,21-23; Yoh. 13:21-30)

17Ku lidiku liu kutanga lie lisavo liu mugadi gutaveeye na mamera, aviigi vazia ku Yeso ni vamuteeva, “Wenyaa kokolombere hayi iliilia lie Lipasaka?”

18Yavativulira, “Muzie mu lidaala, munyumba yu mundu, ma mumuvolere, ‘Mwigizi avoora, ing'inga yange iduuki. Nyenya kokolera Lipasaka munyumba yooyo harara na aviigi vange.’ ”

19Aviigi vaakora kuli Yeso yavalaga na valomba iliilia lie Lipasaka.

20Lwa gwaduuka mugolova, Yeso harara na aviigi veve likomi na vaviri viikara kulia. 21Lwa vaali ni valiza, Yeso yavoola, “Agiligali muvooleraa, mulala ku munyi alaanzaama.”

22Aviigi vavelera ligali, nivatanga kumuteeva sa mulala, “Mwami, ninzi noho?”

23Yeso yavativulira, “Uyu odongeraa harara ninzi mu sahani niyie uzizaa kunzaama! 24Yee, Umwana wa Adamu alakuza kuli gang'odwa kuye, mu Mang'oda Matakatifu, navuzwa, kilaamo keveeye ku oyo uzamaa Umwana wa Adamu! Vwali vwakaveeye vulahi musaza uyu alavula kwivulwa!”

25Yuda, muzaami yamuteeva, “Ligali Mwigizi! Uganaganaa ninzi noho?” Yeso yamutivulira, “Ivi ovooye.”

Lipasaka liu Mwami

(Mar. 14:22-26; Luk. 22:14-20; 1 Vakor. 11:23-25)

26Lwa vaali ni valiza, Yeso yavugula umulango gwu mugadi, nahaana ilisaandiza ma nameganyia. Yahaana ku aviigi veve navoora, “Vuguli mulie; yigu nu muviri gwange. ”

27Yavugula ekekombe kandi, nasandiza imbiri wa Nyasaye, ma navaha navoora, “Munwi mwosi; 28yaga na masahi gange, agaveeye umuhuri gwi lilagana lia Nyasaye, agasundurwa kigira ilisamiifa liu uvwoni vwa vanyingi. 29Muvooleraa, sindanwa kandi iwaini ya mazabibu yaga mba, kuduuka lidiku yilio lia ndinwa iwaini yindi imbia harara ni munyi mu Vwami vwa Baba wange.”

30Maku viimba ulwimbu nukutura ichova kuzia mu Kiguru cha Mizeituni.

Yeso Yaporofetaa ndi Petero alamwambakana

(Mar. 14:27-31; Luk. 22:31-34; Yoh. 13:36-38)

31Maku Yeso yavavolera, “Uvudiku vwa lero munyi mwosi muliruka, mundeke nzienyine kigira Mang'oda Matakatifu gavoora, ‘Ndakuya umwayi, na magondi galasalana.’ 32Nitali inyima wi lisimuguka liange, ndazia Galilaya imbiri winyu.”

33Petero yavolera Yeso, “Kali vosi ni vaasalana vakoleke, inzi sindakoleka mba!”

34Yeso yavolera Petero, “Inzi ngovolera ndi, uvudiku vwa lero idaywa nikikiri kulagula, ivi ulanyambakana haali kavaga.”

35Petero yamuvolera, “Kali niiva gandukira kukuza harara nivi, sindakakwambakane mba!”

Aviigi vandi vosi vavoola ndio kandi.

Yeso Yasaala mu Gezisemane

(Mar. 14:32-42; Luk. 22:39-46)

36Yeso yazia harara na vigi veve havundu halangwa Gezisemane. Yavavolera, “Mwikale hano, nainzi nzie kusaalira hambiri hala.” 37Yazia harara na Petero kandi avayaayi vaviri va Zebedayo. Yaatanga kovelera, no kohenda mwoyo, 38navavoolera “Mbeeye no vovereri ovonene ligali mu mwoyo gwange, kali kuduuka ku likuza. Mwikale hano mulindi harara ninzi.”

39Yisunda hambiri hakekeke, naagwa hasi mam'mama nasaara navoora, “Baba wange, ni ganyalika, tuliza ekekombe chu vusaliri yiki ku inzi! Navuzwa gatava aguvulaliri vwange, nitali gave kuli ivi wenyaa.”

40Yirana ku aviigi vavaga zana, nanyoora ni vagona, na yavolera Petero, “Simunyala kohenza kali isa ndala mba? 41Muhenze kandi musaale gase Setani alamugeriza. Umwoyo gwenyaa, navuzwa umuviri goveeye umudedekere.”

42Yeso yazia lwa kaviri nasaara; “Baba wange, niganyalika kekombe chu vusaliri yiki kimbiti mburi kukinwa, navuzwa uvulariri vuvwo vokolwi.” 43Yirana kuvo kandi nanyoora vagona. Si vaali vanyara kohenza mba kigira izindoolo zinyingi.

44Yeso yavaleka kandi nazia, kusaala lwa kavaga, na yavoola makuva malala meere. 45Maku yirana ku aviigi veve, navateeva, “Mukegonaa kandi mukesosaa? Heenzi! Ing'inga iduuki, yu umwana wa Adamu amali kuvikwa mu makono ga avoni. 46Vuki, kuzie! Heenzi, unzamaa nguyio uduuki!”

Iligumirwa lia Yeso

(Mar. 14:43-50; Luk. 22:47-53; Yoh. 18:1-12)

47Lwa Yeso yaali nakemoloma navo, Yuda uwaali mulala ku aviigi likomi na vaviri yaduuka. Harara naye ikiduma kenene chamulonda nivaveeye ni vivavi kandi ivigurumi, avaari nivatumiywi na vasaalisi vanene navakulundu. 48Umuzaami yaali namali kuvaha kimanyiru navoora: “Umundu wanambuusi, niyie wa mwenya. Mu mugumiri!”

49Yuda yazia kilungika ku Yeso namuvolera “Mirembe jive ku ivi, Mwigizi,” kandi yamuvusa.

50Yeso yamuvolera, “Mulina, kola vwangu ichauzi kokora!”

Maku avandu yavo vaza ni vagumira Yeso, nivadinya kuye ligali.

51Mulala ku vigi va Yeso yanyira umukono gwigwe, nasomola ikivavi chiche kutura mu lwula, naatema umutumikiri wu Musaalisi Munene ugutu. 52Yeso yamuvolera, “Yiranyia kivavi chicho mu lwula, kigira woosi utumikira ikivavi aliitwa ni kivavi. 53Munyi si mumanyi inzi nyara kulaanga Baba wange, naye andetere ulwene yilu zingelosi kuvita izielefu likomi na vaviri? 54Navuzwa, Amang'oda Matakatifu agaavoola yaga gaduukanaa gekoleka, ganyala kutwekizwa ndi?”

55Ing'inga zana yeyo, Yeso yamoloma ku Kiduma cha avandu vaza kumugumira, “Muuzi kung'umira ni vivavi ni vigurumi kuli mbeeye umunuuri? Madiku goosi ndaaveyange mu Litembeli ninzigizaa, na simwang'umira mba! 56Nitali yaga goosi gaakoleki kunangwa, agavaporofeti vaang'oda mu Mang'oda Matakatifu gaduuki kutwekizwa.” Kunangwa aviigi vosi vamuleka ni viiruka.

Yeso imbiri wi Kiyaalo

(Mar. 14:53-65; Luk. 22:54-55,63-71; Yoh. 18:13-14,19-24)

57Yavo avagumira Yeso vamuhira wa Kayafa, Musaalisi Munene, aha avigizi vi Lilaga na vakulundu vaali nivavuganiyi. 58Petero yamulondelera inyima kuduuka hamugizi hu Musaalisi Munene. Yingira ni yikala harara na vasikari aduuki kolola ichekolekaa.

59Avasaalisi vanene ni kiyaalo choosi venyeleriza amakuva go vovehi kugina Yeso, vaduuki ku mwita; 60navuzwa sivanyoola ichukwihambihiziraku mba, kali niiva avandu vovovehi vaali avanyingi. Lwu kumaliriza avandu vaviri vaza 61ni vavoola, “Mundu uyu yavoola, ‘Nyara kwononyia Litembeli lia Nyasaye nukuliumbaka kandi ku madiku gavaga.’ ”

62Musaalisi Munene yasingira nateeva Yeso, “Ivi oveeye ni cha unyala kutivula ku makuva ga vandu yava vavoola ku ivi?” 63Navuzwa Yeso yakiring'ana. Musaalisi Munene yamuvolera, “Ngwisuuhiza mu lieta lia Nyasaye oveeye mwoyo, okovolere niiva ivi niyie Mesia, Umwana wa Nyasaye.”

64Yeso yamuvolera, “Ivi ovola ndio. Navuzwa mbolera munyi mwosi: kutura ing'inga yene yiyi kuzizagilira, mulalora Mwana wa Adamu ni yikaye ku mukono mulungi gwa Nyasaye Wuvunyali, kandi ni yaazaa ku malesi gu mwigulu.”

65Hene yaho Musaalisi Munene yatandula izinguvu zizie, navoora, “Ovooye manyego! Kwenyera ki avalolekizi vandi? Kalunu muhuliyi linyego geege. 66Munyi muloraa ndi?”

Vaamutivulira, “Adukanaa akuzi!”

67Maku, vamutuzira amate mumoni ni vamukubaga; na yavo avaamusamula 68vavoola, “Koporofetere Mesia! Kovolere nivwaha ukuduyi!”

Petero Yambakana Yeso

(Mar. 14:66-72; Luk. 22:56-62; Yoh. 18:15-18,25-27)

69Petero yaali ni yikaye ha mugizi lwa mulala ku vatumikiri vakana vu Musaalisi Munene yaza kuye navoora, “Ivi kandi ni mulala ku vaali na Yeso wa Galilaya.”

70Navuzwa Petero yambakana imbiri wa vosi navoora, “Simanyi aga ovola mba.” 71Lwa yaali natura ichova mu kiliango chu mugizi, mutumikiri mukaana wundi yamulola navolera avandu vasaza vaali ho, “Mundu uyu ligali yaali harara na Yeso wa Nazareti.”

72Petero yambakana kandi ni yisuha, “Inzi nzisuha ndi, si manyi umundu uyu mba!”

73Ing'inga engekeeke, avandu vasaza avaari nivasingiyi ho vaza ku Petero ni vamuvolera, “Agiligali ivi oveeye mulala kuvo kigira livoora liilio limanyia ndio.”

74Maku Petero yaatanga kwilaama nu kwisuuha, na avoora, “Nzisuha ligali nokovoora agiligali! Gaduukanaa Nyasaye asalirizi niiva simbolaa agiligali! Inzi manyi umundu uyu mba!”

Ahene yaho idaywa yalagula, 75na Petero yizuliza amakuva ga Yeso yamuvolera, “Idaywa nikikiri kulagula, ivi ulanyambakana haali kavaga.” Yatura nazia ichova nalira ligali no vovereri.

Currently Selected:

MATAYO 26: LOGOOLI

Highlight

Copy