MATAYO 25

1“Ku ing'inga yeyo Uvwami vwu mwigulu vulakave kuli vakana avagima likomi avaavugura zitaya ziavo nivazia kwaganira oyo osereraa umwiha. 2Vatano kuvo vaali avasiru, na vatano vandi vaali avageri. 3Lwa yavo avaari avasiru vaavugura zitaya ziavo, sivavugula amaguta gandi gokomeeda muzio mba. 4Navuzwa avageri vaavugura amaguta gandi mu zi juba harara ni zitaya ziavo. 5Lwa uwaseleraa umwiha yaalindagira, avakaana yavo vosi vateengeza, ma ni vagona.

6“Navuzwa vudiku hagati, liali ho ni lilangilizana linene ‘Henza! Nguyio oyo osereraa umwiha yaazaa! Muturi muzie kumwaganira!’ 7Hene yaho avakaana vosi avagima vavuuka ni vetegekiza izitaaya ziavo. 8Avasiru vavoolera avageri, ‘Kuhi ku maguta ginyu makekeeke, kigira izitaaya zietu zisimaa!’ 9Navuzwa avageri vavavolera, ‘Awa, sigalakuduuka ni munyi mba! Ni vulahi muzie mu liduka mwiguliri aginyu.’ 10Navuzwa, lwa vakana vasiru vaali ni va kiziyi kugura amaguta, Mwami wa seleraa mwiha yaza. Avakaana vagima avageri avaari nivetegeki, vingira harara naye munyumba ye keserero, ma kiliango ni kihanwa.

11“Inyima avakaana vagima avasiru vaza. Vavoola, ‘Mwami, mwami, kwiguliri kiliango!’ 12Navuzwa yavativulira, ‘Agiligali muvooleraa, Inzi si mumanyi mba!’ ”

13Kunangwa Yeso yamaliriza navoora, “Mugerihi, mulindi, kigira si mumanyi lidiku anoho ing'inga mba.”

Lugano lwa avatumikiri vavaga

(Luk. 19:11-27)

14“Uvwami vwu mwigulu vulakave kuli ndi. Mundu mulala yenya kuzia mu kivala kindi. Yalanga avatumikiri veve navaha ivindu vivie vamulindili. 15Yavaha sa mulala kolondekana ni zinguru zizie. Mulala yamuha ivigero vitano via mabese ivilangwa zitalenta, wundi vigero vie zitalenta ziviri; na wundi kegero chi italenta ndala, ma nazia. 16Uyu wahevwa zitalenta zitano yazia naakiranyia nanyoora uvukala vwi zindi zitano. 17Munzira ndala nzere, umutumikiri wahevwa zitalenta ziviri yanyoora vukala zitalenta zindi ziviri. 18Navuzwa oyo uwahevwa italenta ndala yazia naavisa kegero chu Mwami weve mu marova.

19“Inyima wa madiku manyingi, mwami wa vatumikiri yavo yaza. Yaatanga koteeva kuli vuli mulala yatumikira ekegero cha yahevwa. 20Mutumikiri wahevwa zitalenta zitano yaza namuvolera, ‘Mwami, wamba zitalenta zitano. Henza, mbeeye ni zindi zitano, uvukala vwa ndaanyoora.’ 21Mwami weve yamuvolera, ‘Okoli vulahi, umutugwa mulahi kandi umusuuvirifu. Walinda vulahi ivindu vikekeke; ndakuviika ove umulindi wi vindu ivinyingi. Hamba wingiri mu vusangali harara nu mwami woovo.’

22“Umutumikiri wahevwa zitalenta ziviri yaza navoora, ‘Mwami, wamba zitalenta ziviri. Henza, mbeeye ni zitalenta zindi ziviri; uvukala vwa ndanyoora.’ 23Mwami weve yamuvolera, ‘Okoli vulahi mutumiri mulahi, kandi umusuuvirifu. Waali umusuuvirifu ku vindu vikekeke; ndakuviika kulinda ivindu ivinyingi. Hamba wingiri usangale ninzi!’

24“Navuzwa oyo uwahevwa ekegero kilala chi talenta yaza navoora, ‘Mwami, ndaamanya ivi oveeye mundu mululu. Ogesanga ha wavula kutaga, kandi uvungiza ha wavula kusalanyia. 25Inzi ndaatia ma ninzia kuvisa vudinyu italenta yooyo mu marova. Henza! Ngiyi iyaali iyooyo; givuguli.’

26“Mwami weve yamutivulira, ‘Ivi umutumikiri mudamanu kandi mugata! Wamanya inzi ngesaa aha ndaavura kutaga, kandi mbungizaa aha ndaavura kusalanyia uvuguza. 27Vwali vwakaveeye vulahi ulavika italenta yange mu bengi, nainzi ngano ndaali mbuguli ziosi harara nu vukala vwazio lwa nzilani ndi. 28Kunangwa vuguli italenta yeyo ma muhe oyo wi zitalenta likomi. 29Kigira uyu oveeye navio, alahevwa ivindi, navuzwa uyu utaveeye ni kindu, alanyagwa kali icha aveeye nacho. 30Umutumikiri uwavula koleta iviuvukala uyu, mu musiuvi ichova mu kisundi! Uwene yeyo alalira nu kudiedieyiza amiinu.’

Likalaga lie keheri

31“Lwu Umwana wa Adamu aliiza kuli Umwami harara ni zingelosi vosi alikala ku endeve yu vwami vwivwe, 32na zihiiri ziosi zilavungizwa imbiri weve. Naye alakavavukanyie kuli umwayi yavukanyia amagondi kutura ku zimburi. 33Alaviika amagondi ku mukono gwigwe mulungi, na zimburi ku mukono gwigwe mumosi. 34Ma Mwami alakavoolere avaveeye ku mukono gwigwe umulungi, ‘Hambi munyi avaagasizwa na Baba wange munyore miandu ju vwami vwa mwalomberwa kutura lwi lirova liatanga. 35Ndaali ninzara na munyi mwamba chu kulia; ndaali nu vuluhu na munyi mwamba chu kunwa. Ndaali umugeni na munyi mwanyingiriza. 36Ndaali chahonyo na munyi mwambika izinguvu. Ndaali umulwaye na munyi mwandeenda. Ndaali muvuhambe, na munyi mwaza kondola.’

37“Ahene yaho avalungi valakavoole, ‘Mwami, ni ng'inga ki ya kwakolola noveeye ninzara ma nikukuha ichukulia, anoho noveeye nu vuluhu ma ni kukuha ichukunwa? 38Ni ng'inga ki ya kwakolola noveeye umugeni ma nikukwingiriza anoho noveeye chahonyo ma nikukuviika? 39Ni ng'inga ki ya kwakolola noveeye umulwaye anoho mu vuhambe ma nikuza kokolola?’ 40Mwami alakavativuliri, ‘Muvooleraa, choosi cha mwakolera mulala ku avamwavo vange avakeekeke yava, mwakolera inzi!’

41“Alakavoolere avaveeye ku mukono gwigwe mumosi, ‘Tuli ku hizi munyi avalaamwa na Nyasaye! Muzie mu muliru gwi mihiga ni mihiga ugwalomberwa Setani harara ni zingelosi veve! 42Kigira, ndaali ninzara na munyi simwamba ichukulia. Ndaali nu vuluhu na simwamba amazi. 43Ndaali umugeni na simwanyingiriza. Ndaali chahonyo na simwambika mba; ndaali umulwaye kandi mu vuhambe, navuzwa munyi simwaninda mba.’

44“Maku valakamutivuliri, ‘Mwami, ni ng'inga ki ya kwakolola noveeye ninzara, anoho nu vuluhu anoho noveeye umugeni, anoho chahonyo anoho noveeye umulwaye, anoho mu vuhambe ma nikuvula kuuza kokokonya?’ 45Umwami alakavavoolerc, ‘Muvooleraa, choosi cha mwavura kokolera mulala ku vakekeeke yava, mwavura kokolera inzi.’ 46Kulwayago, valazia konyoora ikivi na maduywa gi mihiga ni mihiga, navuzwa avalungi valanyora livamwoyo lie mihiga ni mihiga.”

Currently Selected:

MATAYO 25: LOGOOLI

Highlight

Copy